1 ခုန်ဒီခမ် အာတာရိတ် ဟဲ့ အိုပ် မိူင် အာဒါ အာ ဆီနမ်၊ ဒေါ ဇမ် မာဂျီန် န့ဒဝ်၊ ဆီငဲ ဒေါ ဂုဝ်၊ ဇဝ်ဖြာ ဘော စ်ု ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဟာကာယ်၊ တဲး အန် ကာလာင် ဒီ အာဇေရူဘာဘေန် အီ မုး ဂွန် အာဆာလထီအေန် အီ အိုပ် မိူင် ယူဒါ။ အန် တဲး အာဟာကာယ် ကာလာင် ဘော ဒီ ဒါ တာင် အီ လှူ ဒီ ဇဝ်ဖြာ အီ စိူဝ် အာယောဆူ အီ မုး ဂွန် အာယေဟုဝ်ဇာဒက်။

2 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ ကာလာင် ပါယ် နီ။ ဂေ ဒူအီ ကိူန် ဟဲ့ တဝ်း၊ “အာခြာဝ် ပန် ဒီ ဝီ လုဝ် ဆမ် ဟုဝ် ဇဝ်ဖြာ ညှမ် ဇမ်။”

3 ကူပ် န့ ပါယ် တီ ဇဝ်ဖြာ ဝီ ကာလာင် ဂြုဝ်း ဒီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဟာကာယ် တဝ်း၊ 4 “အိုယ် ဘေ ဒူအီ ခဲင် မိူင် ယေရူဆာလဲမ်၊ မှဝ် န့ ပါယ် ပီ ကွယ် ဘေ ခဲင် ကာင် အီ မန် ဆီချာ၊ ယီ တူ မ့ပြာယ် ဟုဝ် ဇဝ်ဖြာ၊ တဲး န့ ရာမ် တူတ့်။း

5 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ တဝ်း ပါယ် နီ။ တဲး ဘေ ဝီ လှုဝ်း ဘော ဇဝ်ဖြာ ဘေ ကွယ် ပါယ် မှဝ် ဒေါ တီ နီ။း 6 ဘေ ဟဲ့ ဘြတ် ဆီမာ ကိူန်။ မာလဲ၊ ဘေ ဝီ ပွိုန် ဘ့လေ အန် ပြေတ့် ကာဆဝ်။ ဘေ ပီ ဘော မိုဝ်း ပီ ဒီ ဟူမ်၊ န့ ယီ တူ တဲး ဘေ ဖဲ။ ဘေ ဘော ပွိုန် ဒီ ဒျီင် အိုမ် မာငုန်၊ န့ ယီ တူ တဲး ဘေ ဖဲ။ ဘေ ဟဲ့ ပွိုန် ဒီ တာ ခြိုင်၊ န့ ယီ တူ ဆီအုန့် ဒီ ဘေ။ ဘေ ပီ ဘော ဟဲ့ ပွိုန် ရုး ဂါန် ပီ ရန့် ဘေ၊ န့ ဒီ ဟြာယ် ပီ ဘေ ဝီ ဟပ် အုန် ခဲင် ဟူ အီ ဟဲ့ လှုး ဟဲ့ ကာပျာတ့်။

7 ဇဝ်ဖြာ အီ အိုပ် တူတ့် ဒွန် မျုဝ် ပီ ဝီ တဝ်း၊ တဲး ဘေ ဝီ လှုဝ်း ဘော ဇဝ်ဖြာ ဘေ ကွယ် ပါယ် မှဝ် ဒေါ တီ နီ။း 8 ဒေါ တီ နီ တဲး ဘေ ဟုဝ့် ဒီ နွန်၊ တဲး ဘေ ဒိုဝ်း တး ဟေ ဘော မ့ပြာယ် ဟုဝ် ဇဝ်ဖြာ။ ဆေ ဘေ ဘူင် ပါယ် တီ န့ ဒီ ဘော လဝ့် နဝ်း အုဝ်။ အာဖုင် ဒင်ခုဝ် အုဝ် မိူဝ် ဒီ ဘော လိုဝ်း ဆီချာ။” ဇဝ်ဖြာ ဟဲ့ ကာလာင် ပါယ် တီ။ 9 “ဘေ ပီ ဘော ဟဲ့ ခြာမ် ဟဲ့ မာင် ဘေ ဒီ ပွိုန် ကိူန် ကာဆဝ် မိူဝ်၊ ခဲ့ ပီ ပွိုန် ဘေ ယီ ဝီ ပြေတ့် ကာဆဝ်။ ဒေါ ဒိုဝ်း တး ဘေ ငှုဝ် ဒီ ကာင် ဘေ၊ အုဝ် ဟဲ့ ဘုတ် ဝဲန် တူတ့်။ မှဝ် န့ ပါယ် န့ ဘဲန် ပါယ် တီ။း ဇဝ်ဖြာ အီ အိုပ် တူတ့် ဒွန် မျုဝ် ဝီ တဝ်း၊ န့ ဘဲန် ပါယ် တီ ကူပ် ဟဲ့ ဘ့လေး ဝဲန် ဘေ ဟုဝ် ဇဝ်ဖြာ တဲး န့ ကာပျာတ့် လိုဝ် တူတ့်။ ဘေ ယီ ဝီ ပီခြန် ဘေ ဒီ ဆမ် ကာင် ဘေ။ 10 ကူပ် မ့ပါယ် တီ၊ ခဲင် ဘ့လေန့် န့ တူ မိုဝ်း အိုမ် ဒီငါန် ဘော အိုမ် ဂ့လာယ်။ ပီ ဆမ် ဘေ ခဲင် ကာဒါယ် မိူဝ်၊ အာဝ် ဟူ မိုဝ်း ဘ့လေ အန် ဂေ ကာယူင့် အန်။ 11 ပါယ် တီ အုဝ် ဟဲ့ ဒဲ့ တး အာဖေ အာရေ အီ နပ် ဒီ တဲး ကာဟဝ်း ယမ် တူတ့် ဒွန် မျုဝ် ပီ ပိတ် ပီ ဆမ် ဘေ ခဲင် မာန် ဘေ။ ဒီဂါဝ်၊ ဘ့လေ မာငုန် ဘော ဘ့လေ နာမန်၊ န့ ဟဲ့ ကာဟဝ်း တူတ့်၊ တဲး ဘေ အေတ့် ပီ ဒီ ဟူမ်။ တဲး ဘော ဒူအီ ဘော ဒုဝ် ဆတ်ဒါဝါ ဘော မာဒုဝ် ပြဲ ဇမ် ဒုက် တာင်။ ပါယ် တီ ပီ ဂျုဝ်ဂျာ ဘေ ဒီ ဘူင်၊ န့ ဒီ လိုဝ် တူတ့်။”

12 ဒေါ အန် တီ အာဇေရူဘာဘေန် အီ မုး ဂွန် အာဆာလထီအေန် ဘော ဒါ တာင် အီ လှူ ဒီ ဇဝ်ဖြာ အီ စိူဝ် အာယောဆူ အီ မုး ဂွန် အာယေဟုဝ်ဇာဒက် ဘော ဂေ အီ ဆီ ဂိတ် ဆီ ကွယ်၊ ဂေ ဘော ထူမ် ဂြုဝ်း ပီ ကာလာင် ဇဝ်ဖြာ။ ဇဝ်ဖြာ ဟဲ့ စ်ု အာဟာကာယ် အီ မုး ဒါ အီ ဘျာန် ဂြုဝ်း ဇဝ်ဖြာ၊ တဲး အန် ကာလာင် ဒီ ဒူအီ ဂေ တီ။ ခဲ့ ကွယ် ဂေ ဒူအီ ဘောကာဂ့လျီတ် ဘော ထူမ် ဂြုဝ်း ဇဝ်ဖြာ ဘော ဘျွင် နဝ်း ဘော ဒူပ် ဆီချာ ဇဝ်ဖြာ။

13 ပန် တီ အာဟာကာယ် အီ မုး ဒူအီ ပီ စ်ု ဇဝ်ဖြာ တဲး အန် ကာလာင် ဒီ ဂေ ဒူအီ ကိူန် ဂေ တွိုန်။ အန် တဝ်း ဇဝ်ဖြာ ဟဲ့ ဒွါ ကာဒိက် ဆတ်ဇာ ဘော တဝ်း၊ “အုဝ် ဒီ ကွယ် ရိုမ် ဒူပ် ဘေ။” 14 ဇဝ်ဖြာ ဘော ကာဆုး နဝ်း အာဇေရူဘာဘေန် အီ မုး ဒါ ကာညာ အီ အိုပ် မိူင် ယူဒါ။ အန် ဘော မုး ဂွန် အာဆာလထီအေန် ဘော ကာဆုး နဝ်း ဒါ အီ လှူ ဒီ ဇဝ်ဖြာ အီ စိူဝ် အာယောဆူ အီ မုး ဂွန် အာယေဟုဝ်ဇာဒက် ဘော နဝ်း ဂေ ဒူအီ အီ ဆီ ဂိတ် ဆီ ကွယ်။ ဒူအီ ဂေ တီ ဘော ကာဖြူမ် ဒီ ဆမ် ဟုဝ် ဇဝ်ဖြာ အီ မုး ဇဝ်ဖြာ အီ အိုပ် တူတ့် ဒွန် မျုဝ် ဘော ဇဝ်ဖြာ ပီ ကြိုပ် ဂေ။ 15 ဒေါ အန် တီ ခုန်ဒီခမ် အာတာရိတ် ဟဲ့ အိုပ် မိူင် အန် အာဒါ အာ ဆီနမ် ဘော ဇမ် မာဂျီန် န့ဒဝ် ဆီငဲ အာ ဂိုဝ် ဒီ မ့ဖွုန်။