1 ဘေ ဒူအီ အီ ကွယ် ခဲင် မိူင် ယေရူဆာလဲမ် အီ အိုင် ဒီ ဘူင် ကာဘး ဆေဆေ၊ ဘော နပ် ဒီ ဘူင် အီ ဟာယ် ကာဆဝ်၊ ဘေ ဒီ ဇမ် ဒုက် တာင်။

2 ဘေ မိူဝ် ဟဲ့ ပီခိုက် နဝ်း ဘေ တူ ထူမ် ဂြုဝ်း ဇဝ်ဖြာ။ ဘေ မိူဝ် တူ ထူမ် ပီ မာနုဝ် အန် ဇဝ်။ ဘေ မိူဝ် တူ ဘိုင် ဇဝ်ဖြာ။ ဘေ မိူဝ် တူ ကွယ် ကာဒိုက် ကာဒဝ့် ဒီ ဇဝ်ဖြာ ပီ ကြိုပ် ဘေ။

3 ဂေ ဒါ တာင် အီ အိုပ် မိူင် ဘေ၊ ဂေ ဘော ပီ မာခြင်ဆီ အီ နပ် ဒီ မှေတ့် ပီ ဒီ ဟူမ် ဘော မှေတ့် တူတ့် ဒွန် မျုဝ် ပီ ယိုဝ် ဂေ။ ဂေ ဒါ တာင် အီ ဆုင်ဖျာတ် ဒါရာ ခဲင် မိူင် ဘေ၊ ဂေ ဘော ပီ မာဆုဝ် ပြဲ အီ ဝိန် ဒီ လဲ ခဲင် မှိုဝ်၊ ဟြေတ့် ပီ ဒီ ဟူမ် ဂေ။ ဂေ ဟူမ် တူတ့် တဲး ကော ဇမ် ပြဲ ဝး၊ ကွဲ့ တဲး န့ ဆီ ဂိတ် မာဆေ။

4 ဂေ ဒါ အီ ဘျာန် ဂြုဝ်း ဇဝ်ဖြာ ခဲင် မိူင် တီ ဂေ ဘော မုး ဒူအီ တူ ပွိုန် ညှိုမ်၊ ဒူအီ နဝ်း တူ ဆိူဝ်။ ဂေ ဒါ အီ လှူ ဒီ ဇဝ်ဖြာ ခဲင် မိူင် ဘေ တီ မိူဝ်၊ ဂေ ဝီ ဘူင် တဲး ဒူင် ဆီငါ ဘွတ် ဝီ ကာဒါတ့်၊ တူ ဘူင် ဒူပ် ဒါရာ ဇဝ်ဖြာ။

5 မာလဲ၊ ဇဝ်ဖြာ အီ အိုပ် မိူင် တီ၊ အန် ယီ ဆီ ကွယ် ခဲင် မိူင် တီ။ အန် မိူဝ် တူ ဘူင် မာဆေ အီ တူ ဆိူဝ် တူ မှာန်။ ဒွန် ဆီငဲ ဒွန် ဆီငဲ အန် ဇဝ် ဘူင် မီ နာ မုး နာ မှာန်။ ဂေ အီ တူ မိုဝ်း နဝ်း ဆိူဝ် နဝ်း မှာန်၊ ဂေ မိူဝ် တူ နပ် ဒီ ဆာယ် အီ။

6 အုဝ် ဟဲ့ ဝဲန် ဒူအီ ဘဲန် မျုဝ် ဘဲန် မျုဝ်။ ဒူင် ဒီ ချြီင် ဒါ ဆိုက် ဂေ ဟဲ့ ဝီ ဘဲန် ဒူင် ယေန် ဒူင် ငွင့် ဒူအီ။ ခဲင် မိူင် ဂေ တီ အာဝ် ဟူ မိုဝ်း ဒူအီ။ အုဝ် မိူဝ် ဘူင် တဲး န့တေန့် ဒူင် ဒွိုမ် ဟာဝ် ဂေ၊ ဝီ ရာမ်၊ ကွဲ့ တဲး န့ ဆီ မိုဝ်း အာဆေ အီ ဝဝ့် ဒီ တီ။ မိူင် ဂေ တီ မိူဝ်၊ ဟဲ့ လိုဝ် ရာမ် တူတ့်၊ အာဝ် ဟူ မိုဝ်း ဒူအီ အီ ကွယ် ဒီ တီ။

7 ဒေါ အန် တီ အုဝ် မိူဝ် ဟဲ့ ဝီ တဝ်း၊ “ဒေါ တီ နီ ဂေ ဒူအီ ခဲင် မိူင် တီ ဝီ ရုဝ်ဆေ အုဝ် အာခ်ု မှာန်၊ ဝီ ခမ် ပီ မာနုဝ် အုဝ် ဒီ ဂေ၊ ကွဲ့ တဲး အုဝ် လုဝ် ပျာတ့် ဝဲန် ဒူင် ကွယ် ဂေ ပေါ အူ ဇေန့်၊ ကွဲ့ တဲး န့ ဒူပ် ပီ ပဲ့ ဟဲ့ ဟွတ့် ဆုင်ဖျာတ် အုဝ် လွင် ဂေ။” အုဝ် ပီ ဘော ဟဲ့ တဝ်း ပါယ် တီ မိူဝ်၊ ဂေ ယီ ဝီ ဝဲ ဘူင် ကာလိုပ်၊ ဘူင် ဘ့လိူင်။

8 ကူပ် န့ ပါယ် တီ ဇဝ်ဖြာ ဝီ ကာလာင် ပါယ် နီ။ အန် တဝ်း၊ “တဲး ဘေ ဘ်ု အုဝ်၊ တဲး န့ ကော ဇမ် ဆီငဲ ဒီ ယိတ့် ဖျာက် အုဝ် ဒီ ဘေ။ အုဝ် ဟဲ့ အုန် နဝ်း ဒီ ဘူင် တဲး ဒူအီ ဒွန် ဇိုဝ် ဒွန် ခြိုဝ် တး ကာဇု ကာဒိုမ်။ တဲး ဒူအီ ဒွန် မာန် ဒွန် မိူင် ဝီ တး ကာဇု ကွယ် အူ ပ့လုဝ့်၊ တဲး အုဝ် ပွိုန် ဒီ ဘ့လေး ဒေါဆ အုဝ် အီ ဟဲ့ ဟဲန့် ကာဆဝ် ဒီ ဂေ၊ တဲး အုဝ် ဘူင် ခဲ့ ဟဲ့ ရူ ဟဲ့ စာဝ် အုဝ် ဒီ ဂေ။ ခဲ့ ကွယ် ဂေ ဒူအီ ဒွန် မျုဝ် ဒဲင် ကာဒါယ် ဒီ စှိုမ် တူတ့် ကူပ် နဝ်း အုဝ် ဟဲ့ ရူ ကာဆဝ် ဟဲ့ ပီ ငဝ် အီ ကာဆိုမ် တူတ့်။

9 ဟဲ့ ဟွတ့် ပါယ် တီ အုဝ် ဒီ ဝီ တဲး ဂြုဝ်း ဒူအီ ဘောကာဂ့လျီတ် ဝီ ဘဲန် ဂြုဝ်း အီ မွှိုမ် အီ ဆီငါ၊ တဲး ဂေ ဝီ ပွိုန် ဒီ ကွယ် ကာဇု ကာဒိုမ် ဘော ကြိုပ် ဇဝ်ဖြာ။

10 ဂေ ဒူအီ အီ ဟဲ့ ကာယဝ်း ဟာဝ် ဒွန် နာ ဒွန် ပ့လုဝ့်၊ ဂေ အီ ကွယ် နာ ဒွယ် အိုမ် ခဲင် မိူင် ဂူဆာ၊ ဂေ ဒီ ဂူင့် တး ပီ ဒီ လှူ ဂေ၊ ဒွါ ဒီ အုဝ်။

11 ဒေါ အန် တီ ဘေ မိူဝ် အာဝ် ဟူ လုဝ် ဆာယ် အီ ကူပ် ပဲ့ ဟဲ့ ဘူင် လုတ့် ဘေ ဒီ အုဝ်။ ခုဝ်၊ ဒေါ အန် တီ အာဝ် ဟူ မိုဝ်း ဒူအီ အီ ဘူင် ကာဘး ဒီ အုဝ်။ အုဝ် ဒီ ဒိုဝ်း ဝဲန် ဂေ အီ ပီခိုက် ပီဖုင် ဂေ၊ တဲး ဂေ လေး ကာတဲ ဘေ။ ဝါယ် အန် တီ န့ မိူဝ် တူ မိုဝ်း အာဆေ အီ မိုဝ်း နဝ်း ပီခိုက် အီ ကွယ် ဒဲင် နွန် ဆီငါ ဘွတ် အုဝ်။

12 ဂေ ဒူအီ အီ ဆီ ဂိတ် ဆီ ကွယ် မုး မီ ဒူအီ အီ မိုဝ်း နဝ်း တျီမ် ဘော ဂေ ဒူအီ အီ မိုဝ်း နဝ်း ဂူမ်။ န့ မုး ဂေ အီ ဘိုင် ဘော ဂါဝ် ပွုန် ဇဝ်ဖြာ။

13 ဂေ ဒူအီ အီဆာရေလ အီ ဆီ ဂိတ် ဆီ ကွယ်၊ ဂေ မိူဝ် အာဝ် ဟူ ဘူင် အီ တူ ဒူပ် ဒါရာ။ ဂေ မိူဝ် တူ ကာလာင် ဂြုဝ်း အီ ကာလုဝ်။ ဂေ ဘော ပွိုန် ဒီ ဟူမ် ဘော ပွိုန် ဒီ အိတ် ဆီချာ။ ဂေ မိူဝ် တူ လုဝ် ယုဝ် မာဆေ။ ခုဝ်၊ အာဝ် မိုဝ်း အီ တး ကာဘျုဝ် ဂေ။”

14 အိုယ် ဘေ ဒူအီ အီ ကွယ် ဒဲင် နွန် ဇီအူန်၊ တဲး ဘေ ဒတ် တာင် ကူပ် ဟဲ့ ဒါခိုယ် ဘေ။ အိုယ် ဘေ ဒူအီ အီ ကွယ် ခဲင် မိူင် ယေရူဆာလဲမ်၊ တဲး ဘော နဝ်း ဘော ဖွိုမ် ဘေ ဘျုဝ် ဒါခိုယ် ဘော ခူယ် ကာဆဝ်။

15 ဇဝ်ဖြာ ဒီ ဘူင် တဲး မှာပ် ဘေ ဟြာယ် တူတ့် ဘော ဒိုဝ်း ဝဲန် ရန်ဆူ ဘေ အီ ဆီ ကာဂုဝ်း ဒီ ဘေ။ ခုန်ဒီခမ် ဒူအီ အီဆာရေလ အီ မုး ဇဝ်ဖြာ၊ အန် ဒီ ဘော ကွယ် ရိုမ် ဒူပ် ဘေ။ ဝါယ် အန် တီ အီ ဒုက် အီ ညှာပ် ဒီ ဟြာယ် ဘော ဘေ အာဝ် ဟူ ခမ် အာဖေ အာရေ။

16 ဆီငဲ အန် တီ ဂေ ဒီ ဘော ကာလာင် ဒီ ဒူအီ ခဲင် မိူင် ယေရူဆာလဲမ် တဝ်း၊ “ကွဲ့ တဲး ဘေ ယုဝ် မာဆေ။” ဂေ ဒီ ဘော ကာလာင် ဒီ ဒူအီ ဒဲင် နွန် ဇီအူန် တဝ်း၊ “တဲး ဘေ ဒါခိုယ်၊ ကွဲ့ တဲး ဘေ ဒီလှး ဒေါ မှဝ်။”

17 ခုဝ်၊ ဇဝ်ဖြာ အီ မုး ဇဝ်ဖြာ ပီ ကြိုပ် ဘေ ကွယ် ရိုမ် ဒူပ် ဘေ။ ဇဝ်ဖြာ အီ မိုဝ်း အာဖုင် ဒင်ခုဝ် တာင် မိူဝ် မိုဝ်း ပွုန် တဲး အန် ချွတ် ဘေ။ အန် ဇဝ် ဒီ ဘော ဝီ ခူယ် ကူပ် ဘေ ဟဲ့ လဝ့် နဝ်း အန်။ အန် ဒီ ဘော ဝီ တဲး ဘေ မိုဝ်း အာဆာက် ကာမာယ် ကူပ် ရွက့် ကာဝေ အန် ဒီ ဘေ။ အန် ဒီ တဝ်း မှုဝ် ဒါခိုယ် လွင် ဘေ ဒေါ မုး ဆီငဲ ဘ့လွယ်။

18 အုဝ် ဒီ ဘူင် တဲး အာဖေ အာရေ ဝး ဒူင် ကွယ် ဘေ၊ ကွဲ့ တဲး ဘေ ခမ် ဂြုဝ်း ပီ နဲန အီ ဟဝ် ဘော ပီ ကာလာင် ဂေ နာ တူ မွှိုမ် လွင် ဘေ။

19 ဘ်ု ဘေ ယွတ်၊ ဆီငဲ တီ အုဝ် ဒီ ဒမ် မှာပ် ဒီ ဂေ အီ ဟဲ့ ဒွိုမ် ခါနှာပ် ဘေ။ အုဝ် ဒီ ဝီ ဒွါ ဂျာမ်ဆာ ဒီ ဂေ အီ တူ ပွိုန် ဟာဝ်။ ဂေ အီ ဟဲ့ ဒွိုမ် တဝ် ကာယဝ်း၊ အုဝ် ဒီ ဝီ တဲး ဂေ ဝီ တး ကာဇု။ ဂေ အီ ဟဲ့ ဒွိုမ် မွှိုမ် ဆာယ်၊ အုဝ် ဒီ ဝီ ဒွါ တဲး ဂေ မိုဝ်း အာဖုင် ဆာရေ၊ တဲး အီ ဝီ အိူပ် မျုက် ဂေ ဘော ကာလာင် နာ မွှိုမ် လွင် ဂေ။ ခဲင် မိူင် ဒွန် မိူင် အုဝ် ဒီ ဘူင် ပါယ် တီ ဒီ ဂေ အီ ဟဲ့ စှိုမ် ဆာရေ ဘော ခမ် ဒုက်။

20 ပန် အန် တီ အုဝ် ဒီ ဝီ ဒိုဝ်း တး ဘေ၊ တဲး ဘေ ဝီ ဇမ် မိူင် ဘြိမ် ဘေ။ အုဝ် ဒီ ဘူင် တဲး ဒူအီ အာမျုဝ် ဟဝ် ကာလာင် နာ မွှိုမ် လွင် ဘေ၊ တဲး ဘေ ယဲတ့် ဒီ အာတ့် ဒူအီ ဒွန် မျုဝ် ဒဲင် ကာဒါယ်။ ဂေ ဒူအီ ဒွန် မျုဝ် ဒီ အိူပ် ဘေ ကူပ် ပဲ့ ဟဲ့ မွင့်ကာရာ ဒွါ အုဝ် ဒီ ဘေ၊ တဲး ဂေ ပွိုန် ဒီ ယိုဝ်။