1 အာနီ ဘော မုး ပီ ဘျ ဇဝ်ဖြာ ဒီ ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဟာဘာဂုက်။

2 အိုယ် မဲ ဇဝ်ဖြာ၊ မဲ ပီ ဆော ဟူ ထူမ် ဂြုဝ်း အုဝ်။ အုဝ် ဘော လုဝ် ဒဲ့ မဲ ဇဝ် လှေန့် ခဲ့ မှဝ်။း အုဝ် ဒဲ့ မဲ ဇဝ် တဲး မဲ စွယ် ယေ၊ မဲ ယီ တူ တး ချွတ် အုဝ် တဲး အုဝ် လွတ် ဒီ အီ ဘူင် နာ ဟာယ် နာ မိူက် ဒီ အုဝ်။

3 မဲ ဇဝ် ဆီ တဲး အုဝ် ယိုဝ် ဆေဆေ အီ ညှာပ် အီ ဒုက် အီ ကွယ် ရူပ် အုဝ်။း ဂေ ဒူအီ အီ လာယ် ကာဂုဝ်း လာယ် ကာထဲန့် မိူဝ် ဟဲ့ ကွယ် ဒွန် နာ ဒွန် ပ့လုဝ့်။

4 အာဝ် မိုဝ်း အီ ဒူပ် ဒါရာ မဲ ဇဝ်။ ဒါ တာင် အီ ဆုင်ဖျာတ် ဒူပ် ဒါရာ မိူဝ်၊ အာဝ် ဟူ မိုဝ်း။ ခုဝ်၊ ဂေ ဒူအီ အီ တူ ဘူင် ဒူပ် ဒါရာ၊ ဂေ ဟဲ့ ကိူန် လွှိုမ် ဒူအီ အီ မိုဝ်း နဝ်း ဆိူဝ် နဝ်း မှာန်။ အာမူ ပီ ဆုင်ဖျာတ် ဂေ ဟဲ့ မုး တူတ့် အီ တူ မှာန် ကူပ် လာယ် ပီလွှက့် ဒူအီ ဘော အွန် ဒီ ပြာ ဒီ ဒိုဝ်း ရွိုန်။

5 ဇဝ်ဖြာ ဝီ တဝ်း၊ “တဲး ဘေ ယွတ် ဂေ ဒူအီ အာမျုဝ် ဟဝ်။ ဘေ ဒီ ဘော အာမ် ကာဆဝ် လွင် ပဲ့ ဟဲ့ ယိုဝ် ဘေ တီ။ ခုဝ်၊ ပီ ဒီ ဘူင် အုဝ် ဒေါ မုး စုဝ် ဘာန် ဘေ တီ၊ အုဝ် ပီ ဘော ကာလာင် ဒီ ဘေ မိူဝ် ဘေ တူ ညှိုမ်။

6 အုဝ် ဒီ တဲး ဂေ ဒူအီ မိူင် ဘာဘဲ မိုဝ်း ပွုန် တာင် ဒဲင် ကာဒါယ် နီ အီ မုး ဒူအီ ဟာယ် အီ ခြန် ကာဆဝ်၊ တဲး ဒါ ဆိုက် ဂေ ဟာဝ် ဒဲင် ကာဒါယ် နီ ဒွန် နာ ဒွန် ပ့လုဝ့်၊ တဲး ဂေ ပဲ မာန် မိူင် ဒဲင် ကာဒါယ် နီ။

7 ဂေ ဒူအီ ဒွန် မျုဝ် ဒီ ယုဝ် ဂေ ကူပ် ဘူင် ဂေ အီ ဟာယ် ကာဆဝ်။ ဂေ ဘူင် ပီ အိုင် ဂေ၊ အာဝ် မိုဝ်း အာဆေ အီ ပွိုန် ခြဲ ဂေ။

8 မင်ပြွင့် ဂေ ဒီ ခြန် လွှိုမ် မာဒီဝါယ် ဆီဇိုမ်။ ဂေ ဒါ ဆိုက် ဘော ဟာယ် လွှိုမ် မာဆုဝ် ပြဲ အီ လဲ ခဲင် မှိုဝ်။ ဒါ ဆိုက် ဂေ အီ ပဝ့် မင်ပြွင့် ဘော ခြန် ကာဆဝ်။ ဂေ မွှိုမ် ယုဝ် လွှိုမ် မာဆုဝ် ပြဲ။ ဂေ တး နာ ကာတူင့် ဘော ကာဂုဝ်း ဒီ အီ ပီ မာဂ့လာင် အီ လူင် ဆူပ် ပီ ဒီ ဟူမ် အန်။

9 ဂေ ဘောကာဂ့လျီတ် တး၊ တဲး ဂေ ဘူင် နာ ဟာယ် နာ မိူက် ဒီ အီ ဟဝ်။ ဂေ ဘဲန် ဖိုင် ဘဲန် ဖိုင် တး ဟာဝ် နာ အာတ့် ပီ ခုန် တး ခဲင် ပြဲ ကာဟဝ်း။ ဂေ ဘော ဒိုဝ်း တး ကာဇု ဒူအီ ပဲ့ ဟဲ့ မှေတ့် ဂေ အီ ဟဲ့ ကိူန် ပီ မ့ပိုမ် ကာဟာတ့်။

10 ဂေ လုက်တာယ် ခုန်ဒီခမ် ဘော ကာညး ဒူင် ချြီင် ဒါ ဆိုက် ဂေ။ ဂေ ဒီ ဘော ဒိုဝ်း ကာဒါယ်၊ ဂုဝ် ဟုဝ့် ဒီ ရဲင် မိူင် ဘော ကာဂုဝ်း တဲး ဂေ ပွိုန်။

11 ဝါယ် အန် တီ ဂေ ဒီ ဘော ပွုန် ဟာဝ် ပီ ခုန် ဘုတ်။ ဂေ ယီ မိုဝ်း မှာပ် ကိူန် ကာဆဝ် ကူပ် ဝီ ဘိုင် ဂေ ပွုန် ဒုဝ် ဘြိမ် ဂေ အီ ဟဲ့ ဝီ ဘဲန် ဒီ ဂေ ပီ ဇဝ်ဖြာ ပီ ကြိုပ် ဂေ။”

12 “အိုယ် မဲ ဇဝ်ဖြာ ပီ ကြိုပ် အုဝ် အီ မုး ဇဝ်ဖြာ အီ ဆီငါ ဘွတ် အီ ကွယ် ဆေဆေ။ ယေ ယိုဝ် ပီ ဘူင် မဲ ဇိုဝ် တီ ဒွန် မျုဝ်၊ န့ ပီ မဲ ခြာမ် ဒီ ပျာတ့် ဝဲန် ယေ ဘောကာဂ့လျီတ်။ မဲ ဟဲ့ စ်ု ဒူအီ ခဲင် မိူင် ဘာဘဲ တး ဒူင် ကွယ် ယေ၊ တဲး ဂေ ဒမ် မှာပ် ဒီ ယေ ဘော မာနုဝ် ယေ ကူပ် ဟဲ့ ဘူင် ယေ မှာပ် ကိူန်။

13 ပဲ့ ဟဲ့ ဘူင် မဲ ဇိုဝ် တီ ဟဲ့ မုး ဟဲ့ မှာန်။ မဲ တူ ခမ် ဒီ ယွတ် မှာပ် ပီ ဘူင် အီ။ ခုဝ်၊ မဲ တူ တဲး ရန်ဆူ ဘူင် တဲး ယေ စှိုမ် တူတ့်။ မဲ မိူဝ် တူ ကွယ် နှိမ် နှိမ် ဒေါ ဟဲ့ ပျာတ့် ဒူအီ ဟာယ် ဒူအီ မိူက် ဒီ ဒူအီ အီ မိုဝ်း နဝ်း ဆိူဝ် နဝ်း မှာန် အီ မွှိုမ် လွှိုမ် ဂေ။

14 မဲ ဇဝ် ဆီ ဘူင် တဲး ယေ ဒူအီ ပီ မာဂါ အီ ပွိုန် မှေတ့် ဘော ငဝ်း ယမ် အီ ကွယ် ခဲင် အိုမ် နမ်မုက်ဆာရာ။ မဲ မိူဝ် ဆီ ဘူင် တဲး ယေ ပီ မာဝ အီ တူ မိုဝ်း ဒါ တာင် ဂေ ခုန်။

15 န့ ပီ ရန်ဆူ ဂေ တွိုန် ဟဲ့ ဒိုဝ်း မ့ပဲတ်၊ ပဲတ် ခဲ့ ကွယ် ဒူအီ ဘောကာဂ့လျီတ်။ န့ ဘော ပီ ဂေ ဘော ဒိုဝ်း န့ရပ် ပ့လိုက် ဒဲင် ဂေ၊ ခြွင့် အုန် ဂေ ဘော ဝီ ခူယ် ဒါခိုယ် တဲး န့ ကျဝ် ဒီ နဝ်း ဂေ။

16 ပါယ် တီ ဂေ ဘော ဝီ ဒိုဝ်း ပီ ဒီ လှူ၊ လှူ ဒီ န့ရပ် ဂေ။ ဒိုဝ်း ဆီနမ် အုး ငှုန်၊ ဒုဝ့် ဒီ န့ရပ် ဂေ။ ခုဝ်၊ ခြိုင် တာ ဂေ တီ ဟဲ့ တဲး ဂေ ခြမ်။

17 မဲ ဇဝ် ဒီ တဲး ဂေ ဘူင် ပါယ် တီ ဆေဆေ။း ဂေ တူ ရွက့် ကာဝေ ဒူအီ ဒွန် ဇိုဝ် ဒွန် ခြိုဝ်။ မဲ ယီ တဲး ဂေ ပျာတ့် ဒူအီ ပါယ် တီ ဆေဆေ။”