1 အာနီ မုး ဂြုဝ်း ပီ ကာလာင် ဇဝ်ဖြာ ဒီ အာစေဖာနီ အီ မုး ဂွန် အာဂူဆီ။ အာဂူဆီ ပီ ဝီ မုး ဂွန် အာကေတာလီ။ အာကေတာလီ ပီ ဝီ မုး ဂွန် အာမာရီ။ အာမာရီ ပီ ဝီ မုး ဂွန် အာဟေစကီယာ။ ဒေါ အန် တီ န့ ဘော မုး စုဝ် ဘာန် ခုန်ဒီခမ် အာယုဝ်ဆီယာ အီ မုး ဂွန် အာမူန် အီ မုး ခုန်ဒီခမ် ခဲင် မိူင် ယူဒါ။

2 ဇဝ်ဖြာ တဝ်း၊ “အုဝ် ဒီ ပျာတ့် ဝဲန် အီ ကွယ် ဒဲင် ကာဒါယ် နီ ဘောကာဂ့လျီတ်။

3 အုဝ် ဒီ ပျာတ့် ဝဲန် ဒူအီ ဘော ဒုဝ် ဆတ်ဒါဝါ ဘောကာဂ့လျီတ်။ အုဝ် ဒီ ပျာတ့် ဝဲန် ဘော မာဆိမ် အီ ကွယ် ခဲင် ဂါင်ဟြာဝ် ဘော မာဂါ အီ ကွယ် ခဲင် အိုမ် နမ်မုက်ဆာရာ။ အုဝ် ဒီ ဘူင် တဲး ဂေ ဒူအီ ဟာယ် ဒူအီ မိူက် ဒီပ့လာတ် ကေး။ အုဝ် ဒီ ပျာတ့် ဝဲန် တူတ့် ဒူအီ ဒဲင် ကာဒါယ် နီ။” ဇဝ်ဖြာ ဟဲ့ တဝ်း ပါယ် တီ။

4 ဇဝ်ဖြာ ပီ ဝီ တဝ်း၊ “န့ ပီ အုဝ် ဒီ ဆူင့် ဒဲ အုဝ် ဘော ဘူင် ကာဘး ဒီ ဒူအီ ခဲင် မိူင် ယူဒါ ဘော ဒူအီ ခဲင် မိူင် ယေရူဆာလဲမ် ဘောကာဂ့လျီတ်။ အုဝ် ဒီ ပျာတ့် ဝဲန် ခဲ့ ကွယ် ဂေ ဒီဘဲ ဇဝ် ဘာလ၊ ဂေ အီ ဆီ ဂိတ် ဆီ ကွယ် ဘောကာဂ့လျီတ်။ အုဝ် ဒီ ဘျတ် ဝဲန် ဘော ဂေ ဒူအီ အီ လှူ ဒီ အာရိုပ် ရာင် ဘော ဂေ ဒူအီ အီ လှူ ဒီ ဇဝ် ပီ ကြိုပ် အီ ဟဝ်။

5 အုဝ် ဒီ ပျာတ့် ဝဲန် ဂေ အီ ဟုဝ့် ဒဲင် ကာတု ကာင် ဘော ကြိုပ် ဆီငဲ၊ မာဂျီန် ဘော ဆီမန့်။ ဂေ တဝ်း ဂေ ဒူပ် ဇဝ်ဖြာ ခါခ်ု။ မာလဲ၊ ဂေ ကြိုပ် ဘော ဇဝ် မူလွက့်။ ကူပ် န့ ပါယ် တီ အုဝ် ဒီ ပျာတ့် ဝဲန် ဂေ။

6 အုဝ် ဒီ ပျာတ့် ဝဲန် ဂေ အီ တူ ဒူပ် ဆီချာ အုဝ် ဘော ဂေ အီ အာဝ် ဟူ ဘိုင် ဇဝ်ဖြာ ဘော တူ တဲး ဇဝ်ဖြာ ယဲတ့် ဂေ ဘော မွင့်ကာရာ ဒွါ ဒီ ဂေ။

7 တဲး ဘေ ကွယ် ယေန် ယေန် ကွယ် နှိမ် နှိမ် ဒီ အာတ့် ဇဝ်ဖြာ အီ အိုပ် တူတ့် ဒွန် မျုဝ်။ ခုဝ်၊ ဆီငဲ ဒီ ဆုင်ဖျာတ် ဇဝ်ဖြာ အာမူ ဒူအီ ဟဲ့ ကာတတ် ဒီ တး။ ဇဝ်ဖြာ ဟဲ့ ရဲန် အုန် ပီ ဒီ လှူ ဘော ဘာင် ဂေ ရန်ဆူ တး၊ တဲး ဂေ ငဝ်း ယမ် ဂေ ဒူအီ ခဲင် မိူင် ယူဒါ။

8 ဆီငဲ ဒီ ဘူင် ဇဝ်ဖြာ ဘ့လွယ် တီ ဇဝ်ဖြာ တဝ်း၊ “အုဝ် ဒီ ဒမ် မှာပ် ဒီ ဂေ ဒါ ကာညာ အီ အိုပ် မိူင် ဘော ဂေ ဂွန် ခုန်ဒီခမ် ဘော ဂေ အီ ဒူပ် ထုင်ဂျာမ် ဂေ ဒူအီ အီ တူ ကြိုပ် ဇဝ်ဖြာ။

9 အုဝ် ဒီ ဒမ် မှာပ် ဒီ ဂေ အီ တူ ကြိုပ် ဇဝ်ဖြာ၊ ဂေ အီ ဘူင် တဲး ကာင် ဒါ ကာညာ ဂေ မိုဝ်း မီ ဒူအီ လာယ် ပုဝ်း လာယ် ပီ လွှက့် ဘော ဒူအီ အီ လာယ် ကာလုဝ်၊ တဲး ဒါ ကာညာ ဂေ ပွိုန် ကြုဝ်ကြာမ် ကိူန်။”

10 ဇဝ်ဖြာ ပီ ဝီ တဝ်း၊ “ဆီငဲ အန် တီ န့ ဒီ ဘော မိုဝ်း ဂြုဝ်း အီ ယာမ် ဒတ် ဒူင် စိူဝ် မာလုဝ်း မာဂါ။ န့ ဒီ ဘော ယိုဝ် မီ ဂြုဝ်း အီ ငှုန် အီ ယာမ် ခဲင် မာန် မိူင်။ ဒဲင် နွန် န့ ဒီ ဘော မိုဝ်း မီ ဂြန့် အီ ဘူင် တဲး န့ ကာပျာတ့် လိုဝ်၊ အီ ဟဲ့ တာင် ကာဆဝ်။

11 အိုယ် ဘေ ဒူအီ အီ ကွယ် ခဲင် မိူင် ဒူင် မိုဝ်း ဂ့လင်၊ တဲး ဘေ ငှုန် ဘော ယာမ် တာင်။ ခုဝ်၊ ခဲ့ ကွယ် ဒူအီ ကာစိုဝ်း ကာယွင့် ဒီ တီ ဒီ ယမ် တူတ့်။ ခဲ့ ကွယ် ဂေ ဒါ အီ ဘ်ု ဒီ ဆ ရွိုန် ဟဲ့ ဟွတ့် စှိုမ် တူတ့်။

12 အာခြာဝ် ဒေါ အန် တီ န့ ပီ အုဝ် ဒီ ဂူင့် ငဝ် အွမ် ဘော ဆွိုန် ဒီ ယွတ် ဒူအီ ခဲင် မိူင် ယေရူဆာလဲမ်။ အုဝ် ဒီ ဒမ် မှာပ် ဒီ ဂေ အီ နဝ်း တာင် ဒီ ဒုဝ် ဘြိမ် ဂေ ဘော ကာဖာ ခဲင် နဝ်း ဂေ တဝ်း၊ ‘ဇဝ်ဖြာ အာဝ် ဟူ ဂေဇူ အေ။ ဘော မှာပ် အေ မိူဝ် အန် အာဝ် ဟူ ဒမ်။’

13 ကြုဝ်ကြာမ် ဂေ ဒီ ဘော ဘဲန် ပီ ဖာတ် ပီ ဇူန် အီ ဟဝ်။ ကာင် ဒူင် ကွယ် ဂေ ဒီ ဘော ရာမ်။ ဂေ ပီ ဘော ဝီ ပွိုန် ဒီ ဆမ် ကာင် မိူဝ်၊ ဂေ ယီ တူ ပွိုန် ဒီ ကွယ် ခဲင် ကာင် ဂေ တီ။ ဂေ ပီ ဘော ပွိုန် ဒီ ဆမ် ဟေ မာငုန် မိူဝ်၊ ဂေ ယီ တူ ပွိုန် ဒီ ဒျီင် အိုမ် မာငုန် တီ။

14 ဆီငဲ ဒီ ဘူင် ဇဝ်ဖြာ အီ မွှိုမ် ယုဝ် တီ ဟဲ့ ကာတတ် ဒီ ဇမ်။ ဆီငဲ တီ ဟဲ့ ပီခြန် ဒီ တး။ ဒါ အီ မိုဝ်း ပ့လူမ် တာင် ဂေ ဒီ ဘော ကာဒုး ဒီ ယာမ် တာင်။

15 ဆီငဲ တီ ဇဝ်ဖြာ ဟဲ့ ရူ ကာဆဝ်၊ တဲး ဒူအီ ခမ် ဒုက် တာင်၊ တဲး ဇဝ်ဖြာ ပျာတ့် လိုဝ် တူတ့် ဒွန် မျုဝ်။ န့ မုး ဘော ဆီငဲ အပ် ဝွင့် အီ တူ မိုဝ်း ဘ့လာင်။ ဆီငဲ တီ၊ န့အု ဒီ ဘော အပ် ဝွင့် ဒီတိန့် ဘော ဟေတ့် ကာဆဝ်။

16 န့ ဘော မုး ဆီငဲ ဒီ ဘုတ် ဝဝ် ဘော ဒတ် ဒဲ့ ဒူအီ တဲး ဂေ လာယ် ကာဂုဝ်း။ မိူင် အီ မိုဝ်း ရဲင် ဘော ဒူင် ချြီင် ဂေ ဒါ ဆိုက် အီ ပ့လူမ် ကာဆဝ်၊ ဒီ ကာပျာတ့် လိုဝ် တူတ့်။

17 ဇဝ်ဖြာ ပီ ဝီ တဝ်း၊ “တဲး ဘေ ဘဲန် ပီ ဒူအီ အီ တူ နပ် ဒီ ဘူင် မာဆေ ကူပ် ငါယ် ဂေ ဟဲ့ အပ်။ ခုဝ်၊ ဘေ ဟဲ့ ဘူင် လုတ့် ဇဝ်ဖြာ။ နှာမ် ဘေ ဒီ လေး လူင် ခဲင် ကာပုး။ ဒုဝ် ဘေ ဒီ ဘော ကွယ် ဒဲင် ကာဒါယ် ဘော အုး အမ်။”

18 ဆီငဲ ဒေါ ရူ ကာဆဝ် ဇဝ်ဖြာ ဒီ ဘေ၊ ရွိုန် ဂါယ် ခြိဝ် တူ ပွိုန် ချွတ် ဂေ။ နဝ်း ရူ အန် ဇဝ် တီ ဒီ ဘော ပီ ငဝ် အီ ကာဆိုမ် မိူင် ဘော မိူင်။ အန် ဇဝ် ဒီ ဘော တဲး ဒူအီ ဘော ကာဒါယ် လိုဝ် စှိုမ်၊ တဲး န့ မွှိုမ် ယုဝ် ကာဆဝ်။”