1 ဂြုဝ်း ပီ ဆာခိုဝ် ဒါ အီ ဘျာန် ဂြုဝ်း ဇဝ်ဖြာ အီ စိူဝ် အာဟာဘာဂုက်၊ န့ ပါယ် နီ။

2 “အိုယ် ဇဝ်ဖြာ၊ အုဝ် ဟဲ့ ယိုဝ် ဒွန် မျုဝ် လွင် မဲ ဇဝ် ဘော ပဲ့ ဟဲ့ ဘူင် မဲ ဘဲန် မျုဝ် ဘဲန် မျုဝ်၊ တဲး အုဝ် အာမ် ကာဆဝ်။ ဒေါ တီ နီ ယေ ဟဲ့ လုဝ် ဘဲန် မျုဝ် ဘဲန် မျုဝ်၊ တဲး မဲ ဇဝ် စွယ် ယေ၊ တဲး န့ ပီ မဲ ဟဲ့ စွယ် ယေ အာတ့် နီ ဒေါ ဟဲ့ လှေန့် ကာဆဝ်။ တဲး မဲ ဇဝ် ဘျ ပွုန် မဲ ဒီ ယေ။ ဆေ မဲ ဇဝ် ရူ ဒီ ယေ၊ တဲး မဲ လှုဝ်း ဘော နဝ်း ရွက့် ကာဝေ မဲ ဇဝ်။

3 အုဝ် ယိုဝ် ဇဝ်ဖြာ တး ခဲင် မိူင် ထေမာန် ဘော မိူင် ဖာရာန်။ အာဖုင် ဒင်ခုဝ် အန် ဟဲ့ ပွိုန် ယိုဝ် ခဲင် ဘ့လေန့်။ ဘော ဒဲင် ကာဒါယ် ဒူအီ အိူပ် မျုက် အန် ဆေဆေ။ အန် မုး ဇဝ်ဖြာ အီ မွှိုမ် အာမ် ကာဆဝ်။

4 အာရူင် အန် ဇဝ် ဘော ပီ ဘ့လာင် ဆီငဲ။ န့ ဘော လေး ဒီ ဒဲ အန် ဘော ဝီ ဘျ တူတ့် အာဖုင် ဒင်ခုဝ် အန် ဇဝ်။

5 အာဖေ အာရေ ဆဝ် ရောဂါ အီ တဲး ဒူအီ ယမ် ဘော ယဲတ့် ဒီ အာတ့် အန် ဇဝ်။ အာဖေ အာရေ အီ တဲး အီ ဆဝ် ကာဆဝ် ဘော ဒူပ် ဒီ ပန် အန် ဇဝ်။

6 အန် ဇဝ် ဟီ ဂိူတ်၊ ကာဒါယ် မိူဝ် ဒီယုး ဒီယေန့်။ ဆေ အန် ဇဝ် ဝီ ယွတ်၊ ဒွန် မျုဝ် ဒီ ယုဝ် ဒီယုး ဒီယေန့်။ အန် တဲး နွန် အီ ဟဲ့ မန် ဆီချာ ဘော ကာဘက် ကာလာတ့် တူတ့်။ နွန် အီ ကွယ် ဆေဆေ ဘော နပ် ဒီ ဒီဂြပ် ဘော ဂူမ် အန် ဇဝ်။ န့တေန့် ဒူင် ဝဝ့် အန် ဇဝ် မိူဝ် ဟဲ့ မိုဝ်း ဆိန့် ဒေါ မွိုန်။

7 အုဝ် ဟဲ့ ယိုဝ် ဂေ အီ ကွယ် ခဲင် မိူင် ဂူဆာန်၊ ဂေ ဟဲ့ မိုဝ်း ဒုက် တာင် ကာဆဝ် ခဲင် နဝ်း ဂေ။ ဒူအီ အီ ကွယ် ခဲင် မိူင် မီဒီအာန် မိူဝ် ယုဝ် ဒီယုး ဒီယေန့် ကာဆဝ်။

8 အိုယ် မဲ ဇဝ်ဖြာ၊ မဲ တူ မး အိုမ် ဘ့လဲင် ဘော တူ တဲး အိုမ် ဒီနှူင် ရေန့် ကာယဝ်း ကူပ် ဟဲ့ ရူ မဲ ဒီ ဂေ။ မဲ ဇဝ် ဟဲ့ တဲး လက်လဝ် မ့ပြွင့် ဟာဝ်၊ တဲး ဂေ စှိုမ်၊ တဲး န့ ချွတ် ဒူအီ ပီ အိုပ် မဲ။

9 ခြိုင် ကာဂုဝ်း မဲ ဇဝ် ဟဲ့ ဟွတ့် ရဲန် အုန်။ ဘ့လာ အ မိူဝ် ဟဲ့ ဟွတ့် ပိတ် ဒိုက်၊ တဲး န့ ဂိတ် မီ ဘန့်။ မဲ ဇဝ် မိူဝ် ဟဲ့ တဲး ကာဒါယ် ကာယဝ်း၊ တဲး ဘ့လဲင် အိုမ် လေး။

10 ခဲ့ ကွယ် ဂေ နွန်၊ ဂေ ဘော ယိုဝ် ပီ ဘူင် မဲ ဇဝ် ဘော ဒီယုး ဒီယေန့်။ အိုမ် အီ လေး ခဲင် ကာဒါယ် ဟဲ့ လှဲ တး ကိူန်။ န့ ပီ အိုမ် အီ လိုက် ကာဆဝ် ဘော စုဝ့် ဒဲ ဒတ် ဒဲ့ ဇဝ်ဖြာ။

11 န့ ပီ ဘ့လာင် ဆီငဲ ဘော ဘ့လာင် မာဂျီန် စုး ဒီ ယူမ် ကူပ် ဘ့လာင် ဘ့လာ အ အီ ဘန့် ခဲင် ဘ့လေန့် ဟဲ့ မာဘြိဝ် ကာဆဝ်။ ဘော ဘ့လာင် ဘ့လာ လျီး ပီ တာ ဂေ ဒါ ဆိုက် ဟဲ့ ဘ့လာင် ကာဆဝ်။

12 မဲ ဇဝ် ဟဲ့ မိုဝ်း နဝ်း ရူ ကာဆဝ် ဘော ဟာဝ် ဒွန် ပ့လုဝ့် ဒဲင် ကာဒါယ်၊ တဲး မဲ ညဲတ့် ကာပျာတ့် ဒူအီ ဒွန် ဇိုဝ် ဒွန် ခြိုဝ်။

13 မဲ ဇဝ် လေး ဟာဝ် တဲး မဲ ပွိုန် ဒီ ချွတ် ဂေ ဒူအီ ပီ အိုပ် မဲ ဘော ဂေ ဒူအီ ပဲ့ ဟဲ့ ဖဝ်း မဲ ဇဝ် နာမန် ဒီ ဂိန့် ဂေ။ မဲ ဇဝ် ဘော ပျာတ့် ဝဲန် ဂေ ဒူအီ အီ တူ မွှိုမ်၊ တဲး မဲ ပျာတ့် ကာလာတ့် ဂိန့် ဂေ ဘောကာဂ့လျီတ်၊ တဲး ကော လိုဝ်း ကာအာင် ဂေ ဘော ဒုဝ်။

14 န့ ပီ မဲ ဇဝ် ဟဲ့ ဒိုဝ်း ခြိုင် ကာဂုဝ်း ဂေ ဒူအီ တူ မွှိုမ် ဘော တဲး ဂေ တီ လိုဝ် စှိုမ်။ ဂေ ဟဲ့ တး ပီ ခုန် တာင် ဟာဝ် ဒွန် ဘ့လာက် ဘော ထာင် ဒူအီ ပီ အိုပ် မဲ ဟဲ့ ငှိုယ် ပဲ။

15 မဲ ဇဝ် ဟဲ့ ပဝ့် မင်ပြွင့် မဲ၊ ဟာဝ် ကာတဲ အိုမ် ဒီနှူင် ရေန့် ဒေါ ကာယဝ်း အိုမ် အာ ဘ့လာက်။

16 အုဝ် ဘော ယိုဝ် လွင် အန် တီ၊ န့ တဲး အုဝ် ယုဝ် ဒီယုး ဒီယေန့်။ ဆီပိုန့် အုဝ် ဘော ဒီယေန့် ကူပ် ယုဝ် ကာဆဝ် အုဝ်။ ပ့လဝ် အုဝ် ဘော ဒီလှး ကူပ် ယုဝ် ကာဆဝ် အုဝ်။ ခုဝ်၊ အုဝ် ကွယ် နှိမ် နှိမ် ဘော ဘ်ု အာခြာဝ် ဒီ တး ဇမ် အာဖေ အာရေ ဒီ ရန်ဆူ အီ ကာဂုဝ်း ဒီ ယေ။

17 ဟေ ဘ့လေ ဒီပူ ပီ ဆ ဘုဝ်း ဆ ဘ့လေ၊ ဟေ မာငုန် ပီ ဆ ဘ့လေ ဆ ကာဒွတ့်၊ ဟေ ဘ့လေ နာမန် ပီ ဘော ဟဲ့ တူတ့် ဟဲ့ ဝါယ်၊ ဒူင် နာ ပီ ဆ မိုဝ်း ကာယူင့် ဂေ ဂဝ် အန်၊ ဖိုင် မာဘူ ပီ ဘော ဟဲ့ တူတ့် ဟဲ့ ယမ် ခဲင် ကာပိုမ် အန် ဘော ဖိုင် မာမက် ပီ ဆ မိုဝ်း ခဲင် ကာပိုမ် အန်၊

18 အုဝ် ယီ ဒီ ခူယ် ကူပ် ဇဝ်ဖြာ၊ အုဝ် ဒီ ဒါခိုယ် ဒီ ဒူပ် ဇဝ်ဖြာ အီ ဟဲ့ ချွတ် အုဝ်။

19 ဇဝ်ဖြာ အီ အိုပ် တူတ့် ဒွန် မျုဝ်၊ အန် ဒီ ဒွါ ပ့လူမ် ဂေ ဟဲန့် ဒီ အုဝ်။ အန် ဇဝ် ဒီ ဘူင် တဲး ပ့လဝ် အုဝ် ပီ ပ့လဝ် မာဇ ဒုဝ် မာ၊ တဲး အုဝ် ပွိုန် ဒီ ဟာဝ် ဒဲင် နွန် စာ။”