1 အာနီ မုး ပီ ဘျ ဇဝ်ဖြာ ဒီ အာနာဟုဝ် အီ ကွယ် ခဲင် ဒူင် စိူဝ် အေလာကောဆာ လွင် မိူင် နီနီဝေ။

2 ဇဝ်ဖြာ ဘော မုး ဇဝ်ဖြာ အီ တူ ခမ် ဒူအီ ကြိုပ် အာရိုပ် ရာင်။ အန် ဒီ ရူ ကာဆဝ် ဒီ ဒူအီ ဇိုဝ် တီ ဘော နပ် ဒီ ဘူင် ဝျီ့ ဒီ ဂေ ဒူအီ အီ ဘူင် ကာဘး ဒီ အန်။

3 ဇဝ်ဖြာ တူ ငှိုယ် ရူ ဘော မိုဝ်း အာဖုင် ဒင်ခုဝ် တာင် ကာဆဝ်။ ပီ ဘော ဟဲ့ ပါယ် တီ မိူဝ်၊ အန် ယီ တူ တဲး ဂေ အီ မိုဝ်း မှာပ် လွတ် ဒမ် မှာပ်။ ဒူအီ ပွိုန် ယိုဝ် ခဲ့ တာင် ပွုန် အန်၊ ဒေါ တိုယ် ဇဝ်ဖြာ ခုန် လာင် ဘော ဂ့လာယ် တာင်။ န့အု အီ တာင် ဟဲ့ ပီ ကာပုး အီ ကွယ် ခြိုမ် ပ့လဝ် အန်။

4 ဆေ ဇဝ်ဖြာ ဒွါ အာမိင်၊ အိုမ် နမ်မုက်ဆာရာ ဒီ ဟိတ် ဘော ဘ့လဲင် အိုမ် ဒွန် ဒီလယ့် မိူဝ် ဟိတ် တူတ့်။ နွန် ဘာဆန် ဘော နွန် ဂါမေလ ဟဲ့ ဟွတ့် ဟျီ့ ကာဟဝ်း တူတ့်။ ဆေ ဇဝ်ဖြာ တဝ်း ဒီ ပေတ့် အီ ငျီန် အီ ကွယ် ဒီ နွန် လေဘာနုန် မိူဝ်၊ န့ ဒီ ဟျီ့ ကာဟဝ်း တူတ့်။

5 နွန် ဒီ ဘော ဒီယုး ဒီယေန့် ဘော ကူင့် နွန် ဒီ လာတ့် ဘဲန် အိုမ် ဒီ အာတ့် အန် ဇဝ်။ မာအိမ် ဒီယေန့် ဘော ဒူအီ အီ ကွယ် ဒဲင် ကာဒါယ် ဒီ စှိုမ်။

6 န့ တူ မိုဝ်း အီ ပွိုန် ခမ် ပီ ပီရူ အန် ဇဝ်။ န့ မိူဝ် တူ မိုဝ်း အီ ပွိုန် ကွယ် ပွိုန် ခမ် ခဲ့ ဟဲန့် ကာဆဝ် ဒေါဆ အန် ဇဝ်။ ပီ ပါယ် ဒေါဆ အန် ဇဝ် တီ ဒီ ဟဲန့်၊ ဟဲ့ ပီ ငဝ် ကာဆိုမ် တူတ့်။ ဒါအာင် ဂေ မာဝ် အန် ဇဝ် ဟဲ့ ပျာတ့် ဟဲ့ ဂ့ဝါ စုဝ်း၊ တဲး န့ ကာလာတ့် ကာမုန်။

7 ဇဝ်ဖြာ ဘော မိုဝ်း နဝ်း မွှိုမ်။ အန် ဘော ပီ ဒူင် ဒီ ချြီင် ဒါ ဆိုက် ဒေါ ဟဲ့ မိုဝ်း အာဖေ အာရေ။ အန် ဇဝ် ဘော ဂွင့် ဘော ရဲ ဂေ အီ ဘိုင် အန်။

8 အန် ဇဝ် ဒီ တဲး အိုမ် မ့ပုန် ဂေ အီ ကာဘး ဒီ အန်၊ တဲး ဂေ လိုဝ် စှိုမ် တူတ့်။ အန် ဒီ ဘော ခုင်ခြး ရန်ဆူ အန် ခဲင် အပ် ဝွင့်။

9 ဘေ ခြာမ် ဒီ ဘူင် ကာဘး ဒီ ဇဝ်ဖြာ ခဲ့ မှဝ်၊ အန် ဇဝ် ဒီ ပျာတ့် ဝဲန် ဘေ အူ ဇေန့်။ ဝါယ် အန် တီ ဂေ ဒူအီ အီ ဘူင် ကာဘး ဒီ အန် ဇဝ်၊ ဂေ အာဝ် ဟူ မိုဝ်း။

10 ရန်ဆူ ဇဝ်ဖြာ ဂေ တီ၊ ဂေ ဘော လာယ် ကာဆျီ့ လာယ် ကာဒိုက် ပီ ဟေ မာအာတ့်။ ဂေ ပီ ဘော ဒူအီ အီ ဟဲ့ ယိုတ့် ပဝ်း၊ အီ ဟာဝ် ဂုဝ့် ဂဲ့။ ဂေ ဒီ ဘော ကာဆိုမ် ခဲင် ငဝ် ပီ ဟျြီင် ကာဟဝ်း။

11 အာဆေ မုး ခုန်ဒီခမ် အီ အိုပ် ဘေ၊ အီ ယ ဒီ ဘူင် ကာဘး ဒီ ဇဝ်ဖြာ။း

12 ဇဝ်ဖြာ ပီ ဝီ တဝ်း၊ “ဂေ ဒူအီ အာဆူရီယာ ဂေ ပီ ဘော ဟဲ့ မိုဝ်း အီ စွယ် ဂေ ကိူန် မိူဝ်၊ ဂေ ယီ လုဝ် ခမ် အီ ပျာတ့် ဝဲန်၊ တဲး ဂေ လိုဝ် စှိုမ် တူတ့်။ အိုယ် ဘေ ဒူအီ ပီ အိုပ် အုဝ်၊ အုဝ် ဟဲ့ ဟွတ့် ဒမ် မှာပ် ဒီ ဘေ အူ ဇေန့်။ ဝါယ် နီ အုဝ် မိူဝ် အာဝ် ဟူ ခါနှာပ် ဘေ ပေါ မ့ပွါ။

13 ဒေါ တီ နီ အုဝ် ဒီ ကာဘက် ဝဲန် အဲ့မဝ် ပီ စှိုပ် ဂေ ဒူအီ အာဆူရီယာ ဒီ မဲင် ဘေ။ အုဝ် ဒီ ဒိူတ် ကာဒတ် ဘော ဝန် ပီ ပက် ဂေ ဒီ ဘေ။”

14 ဇဝ်ဖြာ ဝီ ကာလာင် လွင် ဒူအီ ခဲင် မိူင် နီနီဝေ တဝ်း၊ “နာ အာတ့် နီ ဟာဝ် အာမျုဝ် ဘေ အာဝ် ဟူ မိုဝ်း ဒေါ မှဝ်။ အုဝ် ဒီ ပျာတ့် ဝဲန် ဘော အာရိုပ် ရာင် ပီ ကြိုပ် ဘေ ဘော ဇူင် ဒူင် ကြိုပ် ဘေ ဇဝ် ဘဲန် မျုဝ် ဘဲန် မျုဝ်။ ဘေ မွှိုမ် ကာအိး၊ တူ ကာအာပ် ကွယ်။ ခုဝ်၊ အုဝ် ဒီ ရဲန် ဘာရေဝ် အာဒါ ဘေ ဘောကာဂ့လျီတ်။”

15 ဘေ ဒူအီ အာယူဒါ တဲး ဘေ ယွတ်၊ ဝီ အီ တး ကာလာင် ဆာဒါင် အီ မွှိုမ် ဘော ဝီ အီ ဟဲ့ တး ကာလာင် လွင် ဒူအီ အီ တဲး နဝ်း ဒူအီ ဒါခိုယ်၊ အန် ဟဲ့ တး ဒူင် ကွယ် ဘေ။ ခုဝ်၊ တဲး ဘေ ဘူင် ဘ့လွယ် ဘေ၊ တဲး ဘေ လှူ ခဲ့ ပီ ဒွိုမ် ဒွါ ဘေ ကာဒိက် ဆတ်ဇာ ဒီ ဇဝ်ဖြာ။ ဝါယ် အန် တီ ဂေ အီ ဟာယ် အီ မိူက်၊ ဂေ တူ ပွိုန် လိုပ် ခဲင် မိူင် ဘေ ဒေါ မှဝ်။ ဟဲ့ ဟွတ့်၊ အုဝ် ဒီ တဲး ဂေ ဘောကာဂ့လျီတ် စှိုမ်။