1 အုဝ် ဟဲ့ ခမ် ဒုက် တာင်။ အုဝ် ဟဲ့ ပီ ဒူအီ အီ ဟြေတ့် ဒီ ဟူမ် ဘ့လေ မာငုန် ဒေါ မုး အာခြာဝ် ဟဲ့ ဟွတ့် ဘေတ့် ဂေ ဘ့လေ မာငုန်။ အုဝ် မိူဝ် ဟဲ့ ပီ ဒူအီ အီ ဟြေတ့် ဒီ ဟူမ် ဘ့လေ ဒီပူ ဒေါ ဟဲ့ ဟွတ့် ဘေတ့် ဂေ ဘ့လေ တီ။ အာဝ် ဟူ မိုဝ်း မာဆေ အီ ပွိုန် ဟူမ်။

2 ဂေ ဒူအီ အီ ဒူပ် ဇဝ်ဖြာ ဟဲ့ ဟွတ့် ဟြာယ် တူတ့် ဒဲင် ကာဒါယ် နီ။ အာဝ် ဟူ မိုဝ်း အီ မိုဝ်း နဝ်း ဆိူဝ် နဝ်း မှာန် ခေါ အူ ဝီ။ ဂေ ဒွန် အီ နပ် ဒီ ငဝ်း ယမ် အာဆာက် အီ။ ဂေ ဘော ဝီ လာယ် ဒိန့် ယွတ့် ကာတဲ ဂေ ဘော ဘ်ု ဒီ လာယ် မှေတ့်။

3 ဒဲ ဂေ မိူဝ် နပ် ဒီ ဘူင် မီ အီ တူ ဘွတ် အီ တူ မွှိုမ်။ ဝီ အီ ဘဲန် ဒါ ကာညာ ဂေ၊ ဝီ အီ ဘဲန် ဒါ တာင် အီ ဆုင်ဖျာတ် ဒါရာ ဂေ ဘော နပ် ဒီ ဒိုဝ်း ဒီ ဟူမ် ပီ ပြာ အီ ဒီ ဒွါ။ ဝီ အီ ဘဲန် ဒါ တာင်၊ ဂေ ဘော ဘူင် ဒူပ် ပီ အိုင် နဝ်း ဂေ။ ပါယ် တီ ဂေ ဘော နပ် ဒီ ဘူင် အီ တူ မွှိုမ် ဆေဆေ။

4 ဝီ အီ ဟဲ့ မွှိုမ် လွှိုမ် အီ ဟဝ်၊ အန် ဘော ပီ ယွုန် မာအာတ့်။ ဝီ အီ နဝ်း ဆိူဝ် လွှိုမ် အီ ဟဝ်၊ အန် ပီ လူင့် မာအာတ့်။ အာခြာဝ် ဒါ အီ ဘ်ု မိူင် ဘော ဒွါ ဆာဒိက် ဒီ ဘေ ဟဲ့ ကာတတ် ဒီ တူတ့်။ ဆီငဲ ဒီ လုဝ် ဒမ် မှာပ် ဘေ ဟဲ့ ဟွတ့် ဇမ်။ ဒေါ တီ နီ၊ အာခြာဝ် အီ တဲး ကာဝှ်ု ကာဝျှီန် ခဲင် နဝ်း ဘေ ဟဲ့ ဟွတ့် ဇမ်။

5 ကွဲ့ တဲး ဘေ နဝ်း တာင် ဒီ အာဆေ။ ကွဲ့ တဲး ဘေ နဝ်း တာင် ဒီ ဂိုက် ဘေ ဘော ဒီ အီဘိုန့် ဘေ။

6 ခုဝ်၊ ဂွန် အီမာယ် ဘေ၊ အန် ဒီ ဘော ဝီ ဖျာက် ဆာရေ ဂုန့် အန်။ ဂွန် အီဘိုန့် ဒီ ဘော ဝီ ဘူင် ကာဘး ဒီ မာ အန်။ အဝ် ဒီ ဘော ဝီ ဘူင် ကာဘး ဒီ ဂိုန့် အန်။ အီ ဘဲန် ရန်ဆူ ဘေ၊ ဂေ ကွယ် ခဲင် န့ဟူမ် ဘေ ဘော ခဲင် ကာင် ဘေ။

7 အီ မုး အုဝ်၊ အုဝ် ဒီ နှဝ့် န့ဒဝ့် ဇဝ်ဖြာ ဘော ဘိုင် ဇဝ်ဖြာ တဲး အန် ချွတ် အုဝ်။ ဇဝ်ဖြာ ပီ ကြိုပ် အုဝ်၊ အန် ဒီ ဘော ထူမ် ဂြုဝ်း ပီ ဆာခိုဝ် အုဝ်။

8 အိုယ် ဘေ ရန်ဆူ အုဝ်၊ ကွဲ့ တဲး ဘေ ခူယ် ဘော ပီဖုင် ဘေ ဒီ အုဝ်။ အုဝ် ပီ ဘော ဟဲ့ ကေး၊ အုဝ် ဒီ ပွိုန် ဒီ ဝီ ယိတ့်။ အုဝ် ပီ ဘော ဟဲ့ ကွယ် ခဲင် အပ် ဝွင့် မိူဝ်၊ ဇဝ်ဖြာ ယီ ဝီ တဲး န့ ဘ့လာင် ဒီ အုဝ်။

9 အုဝ် လုဝ် ခမ် ပီ ဒမ် ဇဝ်ဖြာ မှာပ် အုဝ် ကူပ် ဟဲ့ ကာလိုပ် အုဝ် ဘဲန် မျုဝ် ဘဲန် မျုဝ်။ ဝါယ် အန် တီ အန် ဇဝ် ဒီ ဆုင်ဖျာတ် အာမူ အုဝ် ဘော ဒမ် မှာပ် ဒီ ရန်ဆူ အုဝ် ကူပ် ပီ ဘူင် ဂေ အီ တူ မွှိုမ် ဒီ အုဝ်။ အန် ဇဝ် ဝီ ဒိုဝ်း လေး အုဝ်၊ ဝီ တဲး အုဝ် ကွယ် ဒူင် ဘ့လာင်။ အုဝ် ဒီ ဘော ယိုဝ် နာ ဆိူဝ် နာ မှာန် ပီ ဂေဇူ အန် ဇဝ် ဒီ အုဝ်။

10 ဒေါ အန် တီ ဂေ ရန်ဆူ အုဝ် ဒီ ဘော ဝီ လုဝ် ဆာယ် အီ ကူပ် ဟဲ့ ဒီမွှတ် ဂေ ဒီ အုဝ် တဝ်း၊ “ဇဝ်ဖြာ ပီ ကြိုပ် မဲ၊ အန် ကွယ် ဒီ မှဝ်။း” အုဝ် ဒီ ဘော ယိုဝ် ပန် ဒီ လိုဝ် စှိုမ် ဂေ။ ဂေ ဘော လုဝ် ခမ် အီ ညဲတ့် ဒဲင် ဂေ ပီ အီ ညဲတ့် ညုဝ့် ဒူပ် န့တေန့်။

11 ဒေါ အန် တီ ဂေ ဒီ ဝီ မ့ပြာယ် ရဲင် မိူင် ခဲင် ကာဒါယ် မိူင် အီဆာရေလ ဘဲန် ပ့လုဝ့် ဘဲန် ပ့လုဝ့်။ ကာအုန် ကာဒါယ် ဘော ကာဝဝ်း လွှိုမ် ခါ အာတ့်။

12 ဒေါ အန် တီ န့ ဒီ မိုဝ်း ဒူအီ ကိူန်။ ဂေ ဒီ တး ဒူင် ကွယ် ဘေ၊ တဲး ဂေ ရုဝ်ဆေ ဘေ။ ဂေ ဒီ ဘော စုး ဒီ မိူင် အာဆူရီယာ ကော ဇမ် မိူင် အဲဂိုပ်။ ပီ ဝီ စုး မိူင် အဲဂိုပ် ကော ဝီ ဇမ် ဒီ အိုမ် ဘ့လဲင် အူဖာရာတ်၊ ပီ ဝီ စုး ဒီ အိုမ် နမ်မုက်ဆာရာ အူ ပ့လုဝ့်၊ ပီ ဝီ ဇမ် ဒီ အိုမ် နမ်မုက်ဆာရာ ပေါ ပ့လုဝ့်။ န့ ဘော စုး ဒီ နွန် တာင် အူ ဘူင့်၊ ပီ ဝီ ဇမ် ဒီ နွန် တာင် ပေါ အူ ဘူင့်။

13 မာလဲ၊ ကာဒါယ် ခဲင် မိူင် တီ ဘော ဘဲန် ဒူင် ယေန် ဒူင် ငွင့် ဒူအီ ကူပ် မှာပ် ပီ ဘူင် ဒူအီ ဟဝ် ခဲင် ရဝ် ခဲင် မိူင် ဘေ။

14 အိုယ် မဲ ဇဝ်ဖြာ မှာန့်၊ တဲး မဲ ဇဝ် ဝီ ယွတ် မဲန် ဂေ ဒူအီ ပီ အိုပ် မဲ၊ တဲး န့ ပီ ဒါ အီ ဟျီင် မာဘူ ဟဲ့ ယဲတ့် မာဘူ အန်၊ တဲး ဂေ ဟူမ် ပေတ့် န့စမ်။ တဲး မဲ စွယ် ဒူအီ ပီ အိုပ် မဲ၊ တဲး ဂေ ကွယ် ဆီချာ ဘော မိုဝ်း တူတ့် ဒွန် မျုဝ် ခဲ့ ပီ လုဝ် ဂေ။ တဲး ဂေ ပွိုန် ဒီ ဟြေတ့် ဒီ ဟူမ် ခဲင် မိူင် ဘာဆန် ဘော ခဲင် မိူင် ဂီလေအာတ်၊ တဲး န့ ဝီ ပီ ဒေါ မွိုန်။

15 ဇဝ်ဖြာ ပီ ဝီ တဝ်း၊ အိုဝ် အုဝ် ဒီ ဘူင် အီ မွှိုမ် အာမ် ကာဆဝ် အာဒါ ဘေ၊ တဲး န့ ပီ ပဲ့ ဟဲ့ ဘူင် အုဝ် ဒေါ လေး ဘေ ခဲင် မိူင် အဲဂိုပ်။

16 ဂေ ဒူအီ ဒွန် ဇိုဝ် ဒွန် မျုဝ် အီ ယိုဝ် လွင် အန် တီ၊ ဂေ ဒီ ဘော အာမ် ခဲ့ ပီ ဘူင် ဇဝ်ဖြာ အာဒါ ဘေ။ ဂေ ဒီ ဘော ဆာယ် အီ ကူပ် အာဖုင် ဂေ ဆာရေ ဂေ အာဝ် မိုဝ်း ဒီခုဝ်။ ဂေ ဒီ ဘော ဝီ ကာဘိတ် မူတ့် ဂေ။ ဟျုဝ့် ဂေ မိူဝ် ဒီ ဘော ကာအာဝ် ကူပ် အာမ် ကာဆဝ် ဂေ။

17 ဂေ ဒီ ဘော ဟူမ် ကာဒါယ် ပီ မာဟန့်၊ ပီ ဘော ဒုဝ် အီ မွိုန် အီ လှိန် ဟာဝ် ဒီ ကာဒါယ်။ ဂေ ဒီ ဘော ဒီယုး ဒီယေန့် လေး တး ခဲင် ဒူင် ချြီင် ဒါ ဆိုက် ဂေ။ ဂေ ဒီ ဘော ယုဝ် ကာဆဝ်၊ ဝီ တး ဒူင် ကွယ် ဇဝ်ဖြာ အီ မုး ဇဝ်ဖြာ ပီ ကြိုပ် အေ။ ဂေ ဒီ ဘော ယုဝ် ဘော ကာပိုန့် ကူပ် ဘေ။

18 အာဝ် မိုဝ်း ဇဝ်ဖြာ ပေါ အူ ကာဒင် အီ ပီ မဲ ဇဝ်၊ အီ ဂဝ်း ဝဲန် မှာပ် ဂေ ဒူအီ ပီ အိုပ် မဲ အီ ဆီ ဂိတ် ဆီ ကွယ်။ မဲ တူ ပွိုန် ရူ ဆေဆေ ဒီ ဒူအီ ပီ အိုပ် မဲ။ ခုဝ်၊ မဲ ဇဝ် ဘော ဘျုဝ် ဒါခိုယ် ဒီ ဘျ နဝ်း ရွက့် ကာဝေ မဲ။

19 မဲ ဇဝ် ဒီ ဝီ ကာဝေ ယေ။ မဲ ဇဝ် ဒီ ညဲတ့် ဝဲန် ခဲ့ ကွယ် နာ တူ မွှိုမ် ပီ ဘူင် ယေ ခြိုမ် ပ့လဝ် မဲ။ မဲ ဇဝ် ဒီ ဘော ဒိုဝ်း ခဲ့ ကွယ် မှာပ် ယေ ဒွန် မျုဝ်၊ ဝီ ဝဲန် တူတ့် ခဲင် အိုမ် နမ်မုက်ဆာရာ အီ ဟဲ့ လိုက် ကာဆဝ်။

20 မဲ ဇဝ် ဒီ ဝီ ဘူင် နာ ဆိူဝ် နာ မှာန် ဒီ ယေ။ န့ ပီ မဲ ဟဲ့ ဒွါ ကာဒိက် ဆတ်ဇာ ဒီ ဒါ အာဘြာဟမ် ဂါယ် အာကူပ် ဆိန့် ဒေါ မွိုန် အီ ဟဲ့ မှာန် ဆေဆေ။