1 တဲး ဘေ ထူမ် ဂြုဝ်း ပီ ကာလာင် ဇဝ်ဖြာ။ အန် တဝ်း၊ “တဲး ဘေ ယိတ့် ဘော ကာလာင် ဒီ အုဝ် ပီ တူ အိုင် ဘေ။ တဲး ဂေ နွန် စာ ဘော နွန် တျီ့ ဘဲန် ဆက်ဆေ အီ ထူမ် ပီ ဖျာက် ဘေ ဒီ အုဝ်။ အန် ဇဝ် ဟဲ့ ဘူင် အာမူ လွင် ဂေ ဒူအီ အီဆာရေလ အီ မုး ဒူအီ ပီ အိုပ် အန်။ အန် ဒီ ဆုင်ဖျာတ် အာမူ တီ တဲး န့ ဒူပ် တူတ့် ဒါရာ။

2 ဟဲ့ ဟွတ့်၊ ဘေ နွန် ဘောကာဂ့လျီတ်၊ တဲး ဘေ ဝီ ထူမ် ပီ ဖျာက် အုဝ် ဒီ ဒူအီ အီဆာရေလ။ အုဝ် အီ မုး ဇဝ်ဖြာ ဟဲ့ မိုဝ်း အာမူ ဒီ ဂေ ဒူအီ ပီ အိုပ် အုဝ်။ အုဝ် ဘော ဒမ် မှာပ် ဒီ ဂေ တဲး န့ ဒူပ် ဒါရာ၊ ကွဲ့ တဲး အုဝ် ကာဝေ ဂေ။

3 အိုယ် ဘေ ဒူအီ ပီ အိုပ် အုဝ်၊ အုဝ် ဟဲ့ ဘူင် မာဆေ ဒီ ဘေ၊ တဲး ဘေ ဝဲန် အုဝ်။း တဲး အုဝ် နပ် မာဆေ ပီ ဘူင် အုဝ်၊ တဲး န့ ဒုက် န့ ညှာပ် ဒီ ဘေ၊ တဲး ဘေ ကာလာင် ဒီ အုဝ်။

4 အုဝ် ဟဲ့ ဒိုဝ်း လေး ဘေ ခဲင် မိူင် အဲဂိုပ်။ အုဝ် ဟဲ့ ထုတ် လေး ဘေ ဒူင် ဟဲ့ ဒွိုမ် ဘဲန် ဘေ မှာယ် အီ။ အုဝ် ဟဲ့ စ်ု အာမုဝ်ဆဲ၊ အာရူန် ဘော နာင် မီရီယမ်၊ တဲး ဂေ ဘဲန် အီ ယဲတ့် ဘေ။

5 အိုယ် ဘေ ဒူအီ ပီ အိုပ် အုဝ်၊ တဲး ဘေ ဝီ လှုဝ်း ခုန်ဒီခမ် အာဘာလာက် အီ အိုပ် မိူင် မုဝ်အာပ် တွိုန်။ အန် ဟဲ့ စ်ု အာဘာလာအမ် အီ မုး ဂွန် အာပေါဆော၊ တဲး အန် ဒိူင် ဂေ ဒူအီ အီဆာရေလ။ အန် ယီ တူ ဒိူင်၊ အန် ဝီ မွင့်ကာရာ တဲး ဒီ ဂေ ဒူအီ အီဆာရေလ။ တဲး ဘေ လှုဝ်း ဘော ဒေါ ဟာဝ် ဘေ ဒူပ် န့တေန့်၊ စုး ဒီ ဒူင် စိူဝ် ဆီဒိမ် ကော ဇမ် ဒီ မိူင် ဂီလဂါ။ ဒေါ အန် တီ အုဝ် အီ မုး ဇဝ်ဖြာ ဟဲ့ ဘူင် ဘဲန် မျုဝ် ဘဲန် မျုဝ် တဲး အုဝ် ချွတ် ဘေ။

6 မာဆေ န့ မုး ပီ လုဝ် ဒွါ ယေ ဒီ ဇဝ်ဖြာ၊ တဲး ယေ ဝီ ကာလဝ့် ဒီ အန်။း ဆေ ယေ လှူ ဂွန် မက် အီ ဟဲ့ နုဝ့် အူ ဆီနမ်၊ ဟဲ့ ပွိုန်။း

7 ဘေ ထာင် န့ လဝ့် နဝ်း ဇဝ်ဖြာ ဆေ ဘေ လှူ မာဘူ အာလူင့် ဘဲန် ဟြဲန့် ဘဲန် ဟြဲန့် ဘော နာမန် အီ ပီ ဘ့လဲင် အိုမ် ဘဲန် မှိုန့် ဘဲန် မှိုန့် ဘ့လဲင်။း ဟဲ့ ကာအာပ် ဒိုဝ်း လှူ ဂွန် အီမာယ် အီ မုး ဂွန် ဂိန့်၊ တဲး န့ ဂဝ်း ဝဲန် ပဲ့ ဟဲ့ လုတ့် ယေ။း အာဝ် မိုဝ်း ဇိုဝ် တီ ခေါ အူ မျုဝ် အီ လဝ့် နဝ်း ဇဝ်ဖြာ။

8 ဇဝ်ဖြာ ဟဲ့ ဟွတ့် တဲး ဘေ နပ် အီ မွှိုမ် ပီ ဆီ တဲး ဇဝ်ဖြာ ဘေ ဘူင် မုး မာဆေ။ အန် ဆီ တဲး ဘေ ဘူင် နာ မုး နာ မှာန်၊ မိုဝ်း နဝ်း ရွက့် ကာဝေ အီ ဘော မိုဝ်း နဝ်း ဂူမ် နဝ်း တျီမ် ဒီ အာတ့် ဇဝ်ဖြာ ပီ ကြိုပ် ဘေ။

9 တဲး ဘေ ထူမ်။ ဆေ ဘေ မိုဝ်း အာငျာန် တဲး ဘေ ရုဝ်ဆေ ဇဝ်ဖြာ။ အန် ဇဝ် ဒဲ့ ဘော ကာလာင် ဂြုဝ်း ဒီ ဂေ ဒူအီ အီ ကွယ် ခဲင် မိူင် ယေရူဆာလဲမ်။ အန် တဝ်း၊ ဂေ ဒါ ဆိုက် အီ ဘူင် ကာပျာတ့် လိုဝ် တူတ့် ဒွန် မျုဝ် ဟဲ့ ကာတတ် ဒီ တး။ န့ မုး ဇဝ်ဖြာ အီ ဟဲ့ တိုယ် တး ဂေ။

10 ဂေ ဒူအီ အီ တူ မိုဝ်း နဝ်း ဆိူဝ် နဝ်း မှာန်၊ ဂေ မိုဝ်း ကြုဝ်ကြာမ် ကိူန် ပဲ့ ဟဲ့ ပွိုန် ဂေ ကူပ် ကာလုဝ် ဂေ ဒီ အီ။ ဘော ကွက့် ပီ ဂဝ် ဂေ ဘဲန် မျုဝ် ဘဲန် မျုဝ်၊ အာဝ် မှာန်။

11 အုဝ် မိူဝ် တူ ခမ် ဂေ အီ တာ လစူ အီ တူ မှာန် အီ ကာလုဝ်။

12 ဂေ ဒါ ဆာထေ အီ ကွယ် ခဲင် မိူင် ဘေ၊ ဂေ ဟဲ့ ပီလွှက့် ဒီ အီ ဘော ခါနှာပ် အီ တဲး ဂေ ခြမ်။ ဂေ ဒူအီ ခဲင် မိူင် ဘော မိူင် နပ် ဒီ ကာလုဝ် ဆေဆေ၊ ကော ဟူ နပ် ဒီ ကာလာင် ဂြုဝ်း အီ မုး အီ မှာန်။

13 ပါယ် တီ အုဝ် ဒီ ဒမ် မှာပ် ဒီ ဘေ၊ တဲး ဘေ မိုဝ်း ဒိမ် အီ ဆဝ် ကာဆဝ်၊ တဲး ဘေ ခမ် အီ ပျာတ့် ဝဲန် ဘေ ကူပ် မှာပ် ပီ ဘူင် ဘေ။

14 ဘေ ဒီ ပွိုန် ဒီ ဟူမ်၊ ဘေ ယီ တူ ဖဲ။ ဘေ ဒီ အေတ့် ပီ ဒီ ဟူမ် အာခ်ု မှာန်။ ဘေ ပီ ဘော ဟဲ့ ပွိုန် ဒီ ဂဲပ် အုန် ရွိုန် မင် ကာလဝ့် မိူဝ်၊ န့ ယီ တူ လွတ် စှိုမ်။ အုဝ် ဒီ ဝီ ဒိုဝ်း အာပ် ဒွါ ဒီ ရန်ဆူ ဘေ။

15 ဘေ ပီ ဘော ဟဲ့ ဆမ် ငှုဝ် မိူဝ်၊ ဘေ ယီ တူ ပွိုန် ဒီ ဆုဝ့်။ ဘေ ပီ ဘော ဟဲ့ ကြိတ် နာမန် မိူဝ်၊ န့ ယီ တူ ဂ့လိုမ် တဲး ဘေ ဖဝ်း ဒီ ဒုဝ် ဘေ။ ဘေ ပီ ဘော ကြိတ် ဘ့လေ မာငုန် မိူဝ်၊ ဘေ ယီ တူ ပွိုန် အိုမ် မာငုန် ခဲ့ ပီ လုဝ် ဘေ။

16 ဘေ မိူဝ် ဟဲ့ ဒူပ် မီ ဒါရာ ပီ ဘ့လေး အုန် ခုန်ဒီခမ် အာအုဝ်မာရီ၊ ဘေ ဘော ဘူင် ဒူပ် ခဲ့ ပီ ဒွိုမ် ဘူင် ခုန်ဒီခမ် အာဟပ် အီ ဟာယ် ကာဆဝ်။ ကူပ် န့ ပါယ် တီ အုဝ် ဒီ တဲး မိူင် ဘေ ဘဲန် ဒူင် ယေန် ဒူင် ငွင့် ဒူအီ။ ဒူအီ ခဲင် မိူင် ဘေ ဘောကာဂ့လျီတ်၊ ဂေ ဒီ ဘော ဘဲန် ပီ လုက်တာယ် အီ ဟဝ်၊ ဘဲန် ပီ ဇွင့် ပီ နဲန ဂေ ဒူအီ ကိူန်။