“အိုယ် ဘေ ဒူအီ အီဆာရေလ၊ ဒေါ တီ နီ တဲး ဒါ ဆိုက် ဘေ တး ကွယ် ကာဇု ကာဒိုမ် ဘော ရဲန် ဆိုက်။ ရန်ဆူ အေ ဟဲ့ ဟွတ့် တး ဝဲင် ရူပ် အေ ဘော ဒွန် ဘ့လာက်။ ဂေ ဒီ ဘော ဒိုဝ်း န့ကြွုန်၊ မး ကာလာ ဒါ ကာညာ အီ အိုပ် ဒူအီ အီဆာရေလ။”

2 “အိုယ် ဘေ အီ ကွယ် ခဲင် မိူင် ဘေတ်လဲမ် အီ စိူဝ် ဘော အေဖာရာ၊ မိူင် ဘေ ပီ ဘော မုး မိူင် ဒီတဲတ် ခဲင် ကာဒါယ် မိူင် ယူဒါ မိူဝ်၊ အန် ဇဝ် အီ အိုပ် ဂေ ဒူအီ အီဆာရေလ၊ အန် ဒီ ဘော ဂွိုတ် တး ခဲင် မိူင် ဘေ။ အန် ဇဝ် တီ၊ အန် ဟဲ့ မိုဝ်း ဆိန့် ဒေါ မွိုန်။

3 အန် ဇဝ် တီ ဒီ ဘော ဘ့လေး ဝဲန် ဒူအီ အန် ဒီ ရန်ဆူ ဂေ၊ တဲး န့ ကော ဇမ် အာခြာဝ် အီဘိုန့် အီ ဝတ့် ဆဝ် ဒီ မိုဝ်း ဂွန်၊ တဲး ဂွန် အန် ကော ဂွိုတ်။ ဝါယ် အန် တီ ဂေ ဘီနွင် ဝေါဝဲ အန် အီ ဆီ ဂိတ်၊ ဂေ ဒီ ဘော ဝီ ဟာဝ် ဒူင် ကွယ် ဘြိမ် ဂေ ဒူအီ အီဆာရေလ။

4 အန် ဇဝ် တီ ဒီ ဘော ခမ် ဒီ စွင့် တဲး အန် မန် ဆီချာ။ အန် ဒီ ဘော ဒိုဝ်း ပ့လူမ် ဂေ ဟဲန့် ဘော အာဖုင် ဒင်ခုဝ် ပီ ဒွါ ဇဝ်ဖြာ အီ မုး ဇဝ်ဖြာ ပီ ကြိုပ် အန်။ အန် ဒီ ယွတ် လိုမ်လာ ဂေ ဒူအီ အီ ပီ မာဘူ အန်။ ဂေ မိူဝ် ဒီ ဘော ပွိုန် ဒီ ကွယ် ဒါခိုယ်၊ အာဝ် မိုဝ်း အာဆေ အီ ဒွါ ဒုက် ဒီ ဂေ။ ခုဝ်၊ ဂေ ဒူအီ ဒဲင် ကာဒါယ် ဘောကာဂ့လျီတ် ဒီ ရုဝ်ဆေ အန် ဇဝ် တီ။

5 အန် ဇဝ် တီ ဘော မုး အီ ဒွါ နဝ်း ဂျီတ် နဝ်း ယေန်။

ပန် ဒီ တး ကာဂုဝ်း ဂေ ဒါ ဆိုက် မိူင် အာဆူရီယာ ဒီ မိူင် အေ၊ ဂေ ဒီ ဘော တး အိုပ် မာန် မိူင် အေ နီ။ အေ လုဝ် ဒါင် တဲး န့ မိုဝ်း ဒါ အီ ဟျီင် မာဘူ ဘူ ဝီ အီ ယွတ် မဲန် အေ။ အေ ဘော လုဝ် ဒါင် ဒါ ကာညာ အီ အိုပ် မိူင် ဒါ ဝီ၊ တဲး ဂေ ယဲတ့် အေ ဘော ကာဂုဝ်း ဒီ ဂေ။”

6 ဂေ တီ ဂေ ဒီ ပွိုန် ဒီ အိုပ် မိူင် အာဆူရီယာ တာ မာပွါ့ လာင်။ ဂေ ဘော လိုပ် ခဲင် မိူင် နိမ်။ ဂေ ယီ ဒီ ချွတ် ယေ တဲး ယေ လွတ် ဒီ ဒူအီ အာဆူရီယာ။ ဒေါ ဟဲ့ တး ကာဂုဝ်း ဒါ ဆိုက် ဂေ ခဲင် မိူင် အေ နီ ဘော ဒေါ တး လိုပ် ဂေ ခဲင် ကာဒါယ် မိူင် အေ နီ၊

7 ဂေ ဒူအီ အီဆာရေလ အီ ဆီ ဂိတ် ဆီ ကွယ်၊ ဂေ ဒီ ဘော ဟာဝ် ကွယ် ကာတဲ ဒူအီ အာမျုဝ် ဟဝ် အီ ဟဲ့ ကိူန် ကာဆဝ်။ ဂေ ဒီ ဘော ပီ အိုမ် ဒီငါန် ပီ ဒွါ ဇဝ်ဖြာ ဘော ဂ့လာယ် တာင် အီ တူ ဘ်ု အာခြာဝ် ဒူအီ၊ အီ တူ ဒူပ် ပီ လုဝ် ဒူအီ။ န့ တူ မိုဝ်း အီ ခြဲ ဂေ စုဝ်း။

8 ဂေ ဒူအီ အီဆာရေလ အီ ဆီ ဂိတ် ဆီ ကွယ်၊ ဂေ ဒီ ဘော ကွယ် ကာတဲ ဒူအီ အာမျုဝ် ဟဝ်၊ ကွယ် ကာတဲ ဒူအီ အီ ဟဲ့ ကိူန် ကာဆဝ်။ ဂေ ဒီ ဘော ပီ မာခြင်ဆီ အီ ဟဲ့ ကွယ် ကာတဲ မာဒုဝ် ပြဲ ဟာယ်၊ ပီ ဘော မာခြင်ဆီ နှိုမ် အီ ကွယ် ကာတဲ ဖိုင် မာဘူ။ ဆေ မာခြင်ဆီ ဟီ လိုပ် တး၊ အန် ဒီ ဘော ညဲတ့် ဘော ကဝ့် ဟူမ်၊ န့ ယီ တူ မိုဝ်း အာဆေ အီ ပွိုန် ချွတ် အီ ပီ မာဘူ တီ။

9 ဂေ ဒူအီ အီဆာရေလ ဒီ ကာဂုဝ်း ဒီ ရန်ဆူ ဂေ၊ တဲး ဂေ ဘောကာဂ့လျီတ် လိုဝ် စှိုမ်။

10 ဇဝ်ဖြာ တဝ်း၊ “ဆီငဲ တီ၊ အုဝ် ဒီ ဒိုဝ်း ဝဲန် တူတ့် မင်ပြွင့် ဘေ အီ ကွယ် ကာတဲ ဘေ။ အုဝ် ဒီ ပျာတ့် ဝဲန် ဘော လက်လဝ် ပီ ပဝ့် ဂေ ဒါ ဆိုက် ဘေ ဘောကာဂ့လျီတ်။

11 အုဝ် ဒီ ပျာတ့် ဝဲန် ရဲင် မိူင် ဘေ ဘော ဒိုဝ်း ဝဲန် ဒူင် ချြီင် ဂေ ဒါ ဆိုက် ဘေ ဘော တူတ့်။

12 အုဝ် ဒီ ဒိုဝ်း ဝဲန် ဘော ဂေ အီ ဘိုင် ကာနမ်၊ ကွဲ့ တဲး န့ ဆီ မိုဝ်း ကာတဲ ဘေ။ ဘေ မိူဝ် အာဝ် ဟူ မိုဝ်း ခေါ အူ ဝီ အီ နပ် ဒီ မဲန် ဘေဒါင် ဘော နပ် ဒီ မဲန် ဂါလာ။

13 အုဝ် ဒီ ဒိုဝ်း ဝဲန် အာရိုပ် ရာင် ပဲ့ ဟဲ့ ဘူင် ဘေ။ အုဝ် ဒီ ဒိုဝ်း ဝဲန် ဘော ရွင့် နာင် ကာနမ် ပီ ကြိုပ် ဘေ အီ ကွယ် ကာတဲ ဘေ။ ဝါယ် အန် တီ ဘေ မိူဝ် အာဝ် ဟူ ကြိုပ် အာရိုပ် ရာင် ပီ ဘူင် ဘေ တာ ဒဲ ဘေ။

14 ခဲ့ ကွယ် ရွင့် နာင် ကာနမ် အေဆူရာ ကာတဲ ဘေ၊ အုဝ် ဒီ ဒိုဝ်း ဝဲန် တူတ့်၊ ပျာတ့် ဝဲန် ဘော မိူင် အီ မိုဝ်း ဒူင် ကြိုပ် အာရိုပ် ရာင် ဂေ တီ။

15 အုဝ် ဒီ ဘော ပီရူ ကာဆဝ် အုဝ် ဘော ဒမ် မှာပ် ဒီ ဂေ ဒူအီ အာမျုဝ် ဟဝ် ဒွန် မျုဝ် အီ တူ ထူမ် ဂြုဝ်း အုဝ်။”