1 အူ ဆီငဲ ဇဝ်ဖြာ ကာလာင် ဂြုဝ်း ဒီ အာယုဝ်နာ အီ မုး ဂွန် အာမိတ်တေ တဝ်း၊ 2 “တဲး မဲ ဟာဝ် ခဲင် မိူင် တာင် အီ မုး မိူင် နီနီဝေ။ တဲး မဲ ကာလာင် ဂြုဝ်း အုဝ် ဒီ ဂေ။ အုဝ် ဒီ ဒမ် မှာပ် ဒီ ဂေ ကူပ် ဟဲ့ ယိုဝ် တူတ့် အုဝ် လွင် မှာပ် ပီ ဘူင် ဂေ။” 3 အာယုဝ်နာ ယီ တူ ဘူင် ပီ တဝ်း ဇဝ်ဖြာ။ အန် ဝီ တဝ်း ဒီ တဝ် ဟာဝ် မိူင် ထာဆိတ်။ အန် ဘော ဟာဝ် ဇမ် ဒီ မိူင် ယုဝ်ဖာ ဘော ယိုဝ် ဒူအီ အီ ပဝ့် ရိုဝ် ဆင်ဖုဝ် အူ လှာင်။ ဂေ တဝ်း ဒီ ဟာဝ် မိူင် ထာဆိတ်။ အန် ဘော ဒိုဝ်း ရွိုန် အန် ခေ ငဝ်း ရိုဝ် ဂေ တီ။ အန် ဘော လိုပ် ခဲင် ရိုဝ် ဘော ဟာဝ် ဒူပ် ဂေ၊ ကွဲ့ တဲး ဇဝ်ဖြာ ယိုဝ် အန်။

4 ပန် တီ ဇဝ်ဖြာ ဘော ဘူင် တဲး န့ မိုဝ်း ခုန် တာင်၊ ဂ့လာယ် တာင်၊ တဲး ရိုဝ် ဆင်ဖုဝ် ဂေ ကော ရိန် ဒီ ကာပျာတ့် လိုဝ် တူတ့်။ 5 ဂေ ဒူအီ အီ ကွယ် ခဲင် ရိုဝ် ဘော ယုဝ် ကာဆဝ်။ ဂေ ဒွန် အီ ဘော ဂါဝ် ဆာခိုဝ် ကြိုပ် ဇဝ် ပီ ကြိုပ် ဂေ။ ဂေ ဘော ဒိုဝ်း ကြုဝ် ပီ ဒါင် ဂေ ခဲင် ရိုဝ်၊ ဘျွာ ခဲင် အိုမ်၊ တဝ်း တဲး ရိုဝ် ဂေ ဝီ န့စိုဝ်။

အီ မုး အာယုဝ်နာ တွိုန်၊ အန် ဟဲ့ လိုပ် လူင် ကာဒမ် ရိုဝ် ဆင်ဖုဝ် ဘော အိတ် တာင်။ 6 ဒါ တာင် အီ အိုပ် ရိုဝ် ဆင်ဖုဝ် ဘော ဘျိတ့် အာယုဝ်နာ တဝ်း ဒီ အန်၊ “မှဝ် န့ ပါယ် ပီ အိတ် မဲ ပါယ် တီ။း ယိတ့်၊ ဆာခိုဝ် ဒီ ဇဝ်ဖြာ ပီ ကြိုပ် မဲ။ ယုဝ် ဇဝ်ဖြာ မဲ ဘော ကာဝေ အေ၊ ကွဲ့ တဲး အေ စှိုမ်။”

7 ပန် တီ ဂေ ဒူအီ အီ လိုမ်လာ ရိုဝ် ဆင်ဖုဝ်၊ ဂေ ဘော တး ကာဇု တဝ်း၊ “တဲး အေ ကာတာမ်၊ ယုဝ် န့ မုး ဝီ မှဝ် အီ ဘူင် တဲး အေ ဇမ် ဒုက် နီ။” ဂေ ဟဲ့ ဟွတ့် ကာတာမ်၊ န့ ဘော ငျာ အာယုဝ်နာ။

8 ဂေ ဝီ ဒီမွှတ် အန် တဝ်း၊ “တဲး မဲ ကာလာင်၊ ကူပ် မာဆေ န့ ဘဲန် ဒုက် ဒီ အေ။း မဲ ဘူင် ဂါန် မာဆေ။း မဲ တး နာ မှဝ်။း မဲ မုး ဒူအီ မိူင် မှဝ်။း မဲ မုး ဒူအီ မျုဝ် မှဝ်။း” 9 အန် ဝီ တဝ်း ဒီ ဂေ၊ “အုဝ် မုး ဒူအီ ဟဲဘြဲ။ အုဝ် ဘော မုး ဒူအီ အီ ရုဝ်ဆေ ဇဝ်ဖြာ အီ မိုဝ်း ပွုန် တာင်၊ အီ ဟဲ့ ဖာန် ဘ့လေး ဘော နမ်မုက်ဆာရာ ဘော ကာဒါယ်။”

10 အန် ဟဲ့ ဟွတ့် ကာလာင် ပါယ် တီ ဂေ ဘော ယုဝ် ကာဆဝ်။ ဂေ ဝီ တဝ်း ဒီ အန်၊ “မှဝ် န့ ပါယ် ပီ ဘူင် မဲ ပါယ် တီ။း” ဂေ ဟဲ့ ဟွတ့် နပ် အာယုဝ်နာ ဆီ တဝ် ဇဝ်ဖြာ။ ခုဝ်၊ အန် ဟဲ့ ဟွတ့် ကာလာင် ဒီ ဂေ။

11 ပန် တီ ခုန် ဘော ဝဲ တာင် ဘုတ် တဲး အိုမ် ဒီယုး။ မာ အိုမ် ဘော ဝဲ ဆီလွယ် ဟုဝ့် ကာဆဝ်။ ဂေ ဝီ တဝ်း ဒီ အန်၊ “မှဝ် ယေ ဒီ ပါယ် ဒီ ဘူင် ဒီ မဲ၊ တဲး အိုမ် ဂေ ခုန် ဝီ ယေန် ဒီ အေ။း”

12 အန် ဘော ဝီ တဝ်း ဒီ ဂေ၊ “ဆေ ဘေ စုဝ့် ဘျွာ အုဝ် ခဲင် အိုမ် နီ၊ အိုမ် ကော ဒီ ယေန် ဒီ ဘေ။ အုဝ် ဟဲ့ နပ် ဆီချာ၊ ခုန် တာင် ဂေ အိုမ် တာင် ဟဲ့ တး ဒီ ဘေ ကူပ် မှာပ် ပီ ဘူင် အုဝ်။”

13 ဂေ အီ ပဝ့် ရိုဝ် ဆင်ဖုဝ်၊ ဂေ ယီ ကာဖြူမ် ဒီ ဝါယ် နင်ဂန် ရိုဝ် ဂေ၊ တဲး ဂေ ဇမ် ဒီ ခူပ် အိုမ်။ န့ ယီ ညှာပ် ကာဆဝ်၊ ကူပ် ခုန် ဂေ အိုမ် ဟဲ့ တာင်။ ဂေ အာဝ် ဟူ ပဲ ဒီ ဝါယ် ရိုဝ် ဂေ။ 14 ဒေါ အန် တီ ဂေ ဘော ဝီ ဆာခိုဝ် ဒီ ဇဝ်ဖြာ တဝ်း၊ “အိုယ် မဲ ဇဝ်ဖြာ၊ ယေ မှာန့် ဒီ မဲ၊ ကွဲ့ တဲး ယေ စှိုမ် ကူပ် ဒူအီ ဝီ နီ။ ကွဲ့ တဲး ယေ ခမ် မှာပ် ပဲ့ ဟဲ့ ငဝ်း ယေ ဒီ အန်၊ ဆေ ယေ ဘော ဝဲန် အန်၊ တဲး မဲ ဇဝ်ဖြာ ဘူင် ခဲ့ ပီ အိုင် မဲ။” 15 ဟဲ့ ဟွတ့်၊ ဂေ ဘော ဒိုဝ်း အာယုဝ်နာ၊ ဘျွာ လူင် အန် ခဲင် နမ်မုက်ဆာရာ။ ခုန် ဂေ အိုမ် ဘော ယေန် အူ ဇေန့်။ အာဝ် ဟူ မိုဝ်း အိုမ် အီ ဆီလွယ် တာင် တွိုန်။ 16 ပန် တီ ဒူအီ ဂေ တွိုန် ဘော ယုဝ် ကာဆဝ် ဇဝ်ဖြာ။ ဂေ ဘော လှူ ပီ ဒီ လှူ ဒီ ဇဝ်ဖြာ၊ ဘော ဒွါ ကာဒိက် ဆတ်ဇာ ဒီ ဇဝ်ဖြာ။

17 ဇဝ်ဖြာ ဘော တဲး မာဂါ တာင် တး မဲင် အာယုဝ်နာ။ အာယုဝ်နာ ဘော ကွယ် ခဲင် ဝတ့် မာဂါ အာဒါ အူယ် ဆီငဲ ဒီ အူယ် မှိုဝ်။