1 အာနီ ဘော မုး ပီ ဘျ ဇဝ်ဖြာ အီ အိုပ် တူတ့် ဒွန် မျုဝ် ဒီ အာအောဘာဒီ လွင် ဂေ ဒူအီ ခဲင် မိူင် အေဒူမ်။ ဇဝ်ဖြာ ဟဲ့ စ်ု ဂေ ဒဲစေန့် အန် ဟာဝ် ဒူင် ကွယ် ဒူအီ ဒွန် ဇိုဝ် ဒွန် ခြိုဝ် ဘော တဝ်း၊ “တဲး အေ ရဲန် ဒါ ဆိုက် အေ၊ ဟာဝ် ကာဂုဝ်း ဒီ ဒူအီ ခဲင် မိူင် အေဒူမ်။”

2 ဇဝ်ဖြာ ပီ ဝီ တဝ်း၊ “အိုယ် ဘေ ဒူအီ အာမျုဝ် အေဒူမ်၊ အုဝ် ဒီ တဲး ဘေ ဘဲန် ဒူအီ အာမျုဝ် အီ တူ မိုဝ်း ဒီခုဝ် ဒီ အာတ့် ဒူအီ အာမျုဝ် ဟဝ် ဘော ဘဲန် ပီ လုက်တာယ် ဘော ပီ ကာအိး အီ ဟဝ်။

3 ဘေ မိုဝ်း နဝ်း ပီခိုက် ကူပ် ကွယ် ဘေ ဒဲင် နွန်။ ခုဝ်၊ ဘေ ထာင် မိူင် ဘေ ဟဲ့ မန် ဆီချာ၊ ဟဲ့ ဂုဝ် တာ မာဝ်။ ကာင် ဘေ မိူဝ် ဟဲ့ ကွယ် ဒဲင် နွန် စာ။ အာဝ် မိုဝ်း အာဆေ အီ ဒီ ပွိုန် တဲး န့ ကာပျာတ့် လိုဝ်။ ပါယ် တီ ဘေ ယီ ကာလုဝ် ဒီ ဒုဝ် ဘြိမ် ဘေ။

4 ဘေ ပီ ဘော နပ် ဒီ ဘိုန့် ပီ မာဂ့လာင်၊ တဲး ဘေ ပွိုန် ဒီ ဟုဝ့် ကွယ် ကာတဲ ဆီမန့် မိူဝ်၊ အုဝ် ယီ ဒီ ဝီ တဲး ဘေ စုဝ်း အီ ခြိုမ် ဒူင် တျီမ်။” အုဝ် အီ မုး ဇဝ်ဖြာ ဟဲ့ ကာလာင် ပါယ် တီ။

5 ဒေါ တး ဇူန် ဒါ ပြာ ခဲင် မှိုဝ်၊ အန် ဒီ ဒိုဝ်း မီ ခဲ့ ပီ လုဝ် အန်။ ဒေါ ဘေတ့် အီ ဘ့လေ မာငုန်၊ အန် ဒီ ဘော အုန် တဲး န့ မိုဝ်း အီ ကာလူယ် အီစီ အီ စဲက်။ မာလဲ၊ ဂေ ရန်ဆူ ဘေ ဒီ တး ဘူင် တဲး ဘေ ကာပျာတ့် လိုဝ် တူတ့်၊ ကွဲ့ တဲး န့ ဆီ ဂိတ် မာဆေ။

6 ဂေ ရန်ဆူ ဒူအီ အေဒူမ် ဒီ ဟြေတ့် ဒွန် နာ ဒွန် ပ့လုဝ့် ဘော ဖာတ် ဒိုဝ်း ဒွန် မျုဝ် အီ မိုဝ်း ဒီငဝ်း ဒီခန်။

7 ခဲ့ ကွယ် ဂေ ဂိုက် အီ ကာလဝ့် ဒီ ဘေ၊ ဂေ ဒီ ဘဲန် ရန်ဆူ ဘေ။ ဂေ ဒီ ဝီ ဟုဝ် တဝ် ဘေ ခဲင် မိူင် ဒူင် ကွယ် ဘေ။ ဂေ အီ ဒွါ ကာဒိက် ဆတ်ဇာ ဒီ ဘေ၊ တဲး ဘေ ကွယ် ဆီချာ။ ဂေ ယီ ခြာမ် ဒီ ဘူင် တဲး ဘေ လိုဝ် စှိုမ်။ ဂေ ဂိုက် ပီ ဘိုင် ဘေ ဂေ ဒီ ဘော ဝီ ဒိန့် ယွတ့် အာဒါ ဘေ။ ဘေ ယီ တူ နပ် တူ နုဝ် မာဆေ။

8 ဒေါ အန် တီ ခဲင် မိူင် အေဒူမ် အာဝ် မိုဝ်း ခေါ အူ ဝီ အီ မိုဝ်း အာငျာန်။ ခုဝ်၊ ဒဲင် နွန် မိူင် အေဒူမ် အုဝ် ဒီ ပျာတ့် ဒွန် အီ အီ မိုဝ်း အာငျာန် ဘော အီ နပ် ဒွန် မျုဝ်။

9 ဂေ ဒါ ဆိုက် အီ ကွယ် ခဲင် မိူင် ထေမာန် အီ ဟဲ့ မိုဝ်း ပ့လူမ် မိုဝ်း ဟဲန့် ကိူန် ကာဆဝ်၊ ဂေ ဒီ ကာဒုး ဒီ ယုဝ် ဒီယုး ဒီယေန့် ကာဆဝ်။ ဘော ဂေ ဒါ ဆိုက် ခဲင် မိူင် အေဒူမ် ဂေ ဘောကာဂ့လျီတ် ဒီ ခမ် ဒီ ယမ်။

10 ဘေ ဟဲ့ ဒွိုမ် ခါနှာပ် ဘီနွင် ဝေါဝဲ ဘေ အီ မုး လှုက်လှာန် အာကူပ်။ ဒေါ တီ နီ ဘေ လုဝ် ဆာယ် အီ ဘော စှိုမ် အာဆာက် ဘေ ကွဲ့ ဟူ တဲး ဘေ မိုဝ်း ဒူအီ အေဒူမ် ဒေါ မှဝ်။

11 ဒေါ တး ပျာတ့် ဂေ ရန်ဆူ ဒီ မိူင် ယေရူဆာလဲမ်၊ ဘေ ဟဲ့ ကွယ် ယွတ် တူ စွယ် ဂေ။ ဒေါ တး လိုပ် ဂေ ဒီ မိူင် ဘော ကာတာမ် ဒီ ကာယဝ်း မိူင်၊ ဘေ မိူဝ် တူ စွယ် မာဆေ။

12 ဘေ တူ ကာအာပ် ဘူင် ပါယ် တီ။ ဘေ တူ ကာအာပ် ခူယ် ဒါခိုယ် ဒေါ မှေတ့် ဟာဝ် ဂေ ရန်ဆူ ဒီ ဘီနွင် ဝေါဝဲ ဘေ၊ တဲး ဂေ ဇမ် ခဲင် မိူင် တူင့်။ ဘေ တူ လုဝ် ဘဲန် နဝ်း ဒါခိုယ် ကူပ် ဟဲ့ ဇမ် ဂေ ဒုက်။ ဘေ မိူဝ် တူ လုဝ် ပီခိုက် နဝ်း ဘေ ကူပ် ဟဲ့ ဇမ် ဂေ ဒုက် တာင် ဇိုဝ် တီ။

13 ဘေ မိူဝ် တူ ကာအာပ် လိုပ် ခဲင် မိူင် အီဆာရေလ ဘော ဖာတ် ဒိုဝ်း ကြုဝ်ကြာမ် ဂေ ဒေါ ဇမ် ဂေ ဒုက် တာင်။ ဘေ မိူဝ် တူ ကာအာပ် ဘဲန် နဝ်း ဒါခိုယ် ဒေါ ဟဲ့ ဖာတ် ရန်ဆူ ကြုဝ်ကြာမ် ဘီနွင် ဝေါဝဲ ဘေ၊ တဲး ဘော ဘေ ခြမ် ကူပ် ဇမ် ဂေ ဒုက်။

14 ဘေ တူ ကာအာပ် ကွယ် ခူပ် န့တေန့် ဘော ငဝ်း ယမ် ဒူအီ အီ တဝ် လေး ခဲင် မိူင် ယေရူဆာလဲမ် တဲး ဂေ လွတ်။ ဘေ မိူဝ် တူ ကာအာပ် မှေတ့် ဒူအီ အီ ညှမ် ယမ်၊ ဝီ အာပ် ဒီ ရန်ဆူ ဘေ။ ဘေ တူ ကာအာပ် ဘူင် ပါယ် တီ။ ဘေ ယီ ဘူင် ဇိုဝ် တီ ဒွန် မျုဝ်။

15 ဆီငဲ ဒီ ဒမ် အုဝ် ဇဝ်ဖြာ မှာပ် ဒီ ဒူအီ ဒွန် ဇိုဝ် ဒွန် မျုဝ် ဟဲ့ ကာတတ် ဒီ ဇမ်။ ဘေ ဒူအီ အီ ကွယ် ခဲင် မိူင် အေဒူမ်၊ ခဲ့ ပီ ဘူင် ဘေ ဒီ ဒူအီ အီဆာရေလ၊ ဘေ လုဝ် ဝီ ခမ်။ ခဲ့ ပီ ဒွါ ဘေ ဒီ အီ၊ ဘေ ဒီ ဝီ ပွိုန် ဝိဝ် ခဲ့ တီ။

16 ဘေ ဟဲ့ ဘူင် တဲး ဒူအီ ပီ အိုပ် အုဝ် ဇမ် ဒုက်၊ တဲး န့ ပီ ဂေ ဟဲ့ ဒျီင် အိုမ် အီ ဆွင့် ကာဆဝ်။ ပါယ် တီ ဘေ ဘော ဂေ ဒူအီ အာမျုဝ် ဟဝ် အီ ကွယ် ရူပ် ဘေ လုဝ် ခမ် ဒုက်။ န့ ပီ ဘေ ဘောကာဂ့လျီတ် ဒီ ကာဒုး ဒီ ဒျီင် အီ တူ မွှိုမ်၊ တဲး ဘေ ကော ဟြာယ် တူတ့်။

17 မိူင် ယေရူဆာလဲမ် ဒီ ဘဲန် ဒူင် ချြီင် ဂေ ဒူအီ အီ လေး တဝ် ခဲင် ဒူင် ကာဂုဝ်း။ န့ ဒီ ဘဲန် ဒူင် ဆီငါ ဘွတ်။ ဂေ ဒူအီ အာမျုဝ် အီဆာရေလ ဒီ ဝီ ပွိုန် ဒီ ဘိုင် ကာဒါယ် အီ မုး ခါဂုန် ဘြိမ် ဂေ။

18 ဒေါ အန် တီ မိူင် အီဆာရေလ ဒီ ပီ ငဝ် တာင်။ ဂေ ဒူအီ အေဒူမ် ဘော ပီ ပြဲ ကာဟဝ်း။ ငဝ် တာင် တီ ဒီ ဝီ ကုး ကာဆိုမ် ပြဲ ကာဟဝ်း၊ ကွဲ့ တဲး န့ ဆီ ဂိတ် မာဆေ ဘော တဲး ဒူအီ အေဒူမ် ယမ် တူတ့်။” အုဝ် အီ မုး အန် ဇဝ် ဟဲ့ ကာလာင် ပါယ် တီ။

19 ဝါယ် အန် တီ ဂေ ဒူအီ ပီ အိုပ် အုဝ် အီ ကွယ် ဘ့လာက် နာ တေတ့် မိူင် ယူဒါ၊ ဂေ ဒီ ဘော ဟာဝ် ကွယ် ဒဲင် နွန် မိူင် အေဒူမ်။ ဂေ ဒူအီ အီ ကွယ် ဒီ ဒင် နွန် ခဲင် မိူင် ယူဒါ၊ ဂေ ဒီ ပွိုန် ဒီ အိုပ် မိူင် ဖီလီထီ။ ဂေ မိူဝ် ဒီ အိုပ် ဒူင် နာ မိူင် အာအေဖာရိမ် ဘော မိူင် ဆာမာရီ။ ဂေ ဒူအီ အာဘေန်ယာမ် ဒီ ဘော ပွိုန် ဒီ အိုပ် မိူင် ဂီလေအာတ်။

20 ဂေ ဒူအီ အီဆာရေလ အီ ဟဲ့ ကာဒုး အီ မှေတ့် ဟာဝ် ဂေ ခဲင် မိူင် တူင့်၊ ဂေ ဒီ ဝီ ပွိုန် ဒီ အိုပ် မိူင် ဖုဝ်နီဆာ အီ ကွယ် ခူပ် အိုမ် နမ်မုက်ဆာရာ ကော ဇမ် ဒီ မိူင် စာရေဖတ်။ ဂေ ဒူအီ အီ ဟဲ့ ဒွိုမ် ကွယ် ခဲင် မိူင် ယေရူဆာလဲမ် ဘော ကာဒုး အီ မှေတ့် ဟာဝ် ဂေ ဘ့လာက် နာ ကွာ ဒီ မိူင် ဆေဖာရာတ်၊ ဂေ ဒီ ဘော ဝီ တး ဒူင် ကွယ် ဘြိမ် ဂေ ဘော ကွယ် ဘ့လာက် နာ တေတ့် ခဲင် ရဝ် ဘဲန် ရဝ် ဘဲန် ရဝ်။

21 ဂေ အီ ဟဲ့ အွင် ဟဲ့ ပဲ အီ ဟဝ်၊ ဂေ ဒီ ဟုဝ့် ဒဲင် နွန် ဇီအူန် ခဲင် မိူင် ယေရူဆာလဲမ် ဘော ဘဲန် ဒါ တာင် အီ အိုပ် မိူင် အေဒူမ်။ ဒေါ အန် တီ ဇဝ်ဖြာ မိူဝ် ဒီ ဘဲန် ခုန်ဒီခမ် အီ အိုပ် ဂေ။