1 ဂြုဝ်း နီ တး ဒီ အာမုဝ် အီ မုး ဒါ အီ ဟျီင် မာဘူ၊ အီ ကွယ် ခဲင် မိူင် ဒေကော ခဲင် အိူင် ယူဒါ။ အန် ယိုဝ် အာရူင် ပီ ဘျ ဇဝ်ဖြာ ဒီ အန် ဒေါ မုး စုဝ် ဘာန် ခုန်ဒီခမ် အာအူဇီယာ အီ မုး ခုန်ဒီခမ် ခဲင် မိူင် ယူဒါ ဘော ဒေါ မုး စုဝ် ဘာန် အာယေရုဝ်ဘုဝ် အီ မုး ဂွန် အာယေဟုဝ်အာတ် အီ မုး ခုန်ဒီခမ် ခဲင် မိူင် အီဆာရေလ။ ဒေါ အန် တီ န့ မုး အာ ဆီနမ် အာတ့် မာအိမ် ယေန့်။

2 ဇဝ်ဖြာ ဟဲ့ ကာလာင် ဒီ အာမုဝ် ပါယ် နီ။ “ဇဝ်ဖြာ ဟဲ့ ကွယ် ဒီ နွန် ဇီအူန် ဘော ရျီင် ပီ မာခြင်ဆီ။ အန် ဟဲ့ ကွယ် ခဲင် မိူင် ယေရူဆာလဲမ် ဘော ဒတ် တာင်။ ဒေါ အန် တီ ဒူင် ဟျီင် ဂေ မာဘူ၊ ပေတ့် ဂေ ပြဲ ဘော ဟျီ့ ကာဟဝ်း အူ ဇေန့်။ ပေတ့် ဒဲင် နွန် ဂါမေလ တွိုန် ဟဲ့ ဟွတ့် ဟျီ့ ကာဟဝ်း တူတ့်။”

3 ဇဝ်ဖြာ ပီ ဝီ တဝ်း၊ “ဂေ ဒူအီ အီ ကွယ် ခဲင် မိူင် ဒါမာခူ ဟဲ့ ဘူင် ကာလိုပ် ဘူင် လုတ့် ဆေဆေ။ ခုဝ်၊ အုဝ် ဒီ ဒမ် မှာပ် ဒီ ဂေ အာခ်ု မှာန်။ န့ ပီ ဂေ ဟဲ့ ဒိုဝ်း မင် မး ငှုဝ် အီ မုး ဟိန်၊ ဝီ မး ဒူအီ ပီ အိုပ် အုဝ် အီ ကွယ် ခဲင် မိူင် ဂီလေအာတ်။

4 အုဝ် ဒီ တဲး ငဝ် တး ကာဆိုမ် ဟုဝ် ခုန်ဒီခမ် အာဟာစေလ၊ တဲး န့ ကာဆိုမ် ဘော ဒူင် ချြီင် ဂေ ဒါ ဆိုက် ပီ အိုပ် ခုန်ဒီခမ် အာဘေန်ဟာဒါတ်။

5 အုဝ် ဒီ ကာဘက် ဝဲန် တူတ့် မာလုဝ်း မိူင် ဒါမာခူ။ အုဝ် ဒီ ငဝ်း ယမ် ဂေ ဒူအီ ဘောကာဂ့လျီတ် အီ ကွယ် ခဲင် မိူင် ကော ဇမ် ဒီ ဒီလယ့် အာဝေန်။ အုဝ် ဒီ ဒိုဝ်း ဝဲန် ဘော ဒါ ကာညာ အီ အိုပ် မိူင် ဘေတ်အေဒေန်။ ဂေ ဒူအီ ခဲင် မိူင် အာဆူရီယာ၊ ဂေ ဒီ ခမ် အီ မှေတ့် ဟာဝ် ဂေ၊ တဲး ဂေ ဟာဝ် ဘဲန် မှာယ် ဒူအီ ခဲင် မိူင် ကီရ။” ဇဝ်ဖြာ ဟဲ့ ကာလာင် ပါယ် တီ။

6 ဇဝ်ဖြာ ပီ ဝီ တဝ်း၊ “ဂေ ဒူအီ အီ ကွယ် ခဲင် မိူင် ဂါဆာ ဟဲ့ ဘူင် ကာလိုပ်၊ ဘူင် မှာပ် ဆေဆေ။ အုဝ် မိူဝ် တူ ပိဝ် လွင် အန် တီ။ အုဝ် ဒီ ဒမ် မှာပ် ဒီ ဂေ၊ တူ တဲး ဂေ လွတ် အာခ်ု မှာန်။ ခုဝ်၊ ဂေ ဟဲ့ မှေတ့် ဟာဝ် ဒူအီ ပီ အိုပ် အုဝ် ဘော ဝီ ယွင့် ဂေ၊ တဲး ဂေ ဘဲန် မှာယ် ခဲင် မိူင် အေဒူမ်။

7 အုဝ် ဒီ တဲး ငဝ် တး စုဝ်း ခဲင် မိူင် ဂါဆာ၊ တဲး ဘော ဒူင် ချြီင် ဂေ ဒါ ဆိုက် ကာပျာတ့် လိုဝ် တူတ့်။

8 အုဝ် ဒီ ငဝ်း ဝဲန် ဂေ ဒူအီ အီ ကွယ် ခဲင် မိူင် အာစုတ် ဘော ခုန်ဒီခမ် အီ အိုပ် မိူင် အာဆာခေလူန်။ ဟဲ့ ဟွတ့်၊ အုဝ် ဒီ ဝီ ဘာက် ဝိဝ် ဒဲ အုဝ် ဒီ မိူင် အေခြူန်။ ဂေ ဒူအီ ဖီလီထီ အီ ဆီ ဂိတ် ဆီ ကွယ်၊ ဂေ ဒီ ဘော လိုဝ် စှိုမ် တူတ့်။” ဇဝ်ဖြာ ဟဲ့ ကာလာင် ပါယ် တီ။

9 ဇဝ်ဖြာ ပီ ဝီ တဝ်း၊ “ဂေ ဒူအီ အီ ကွယ် ခဲင် မိူင် ထူရုဝ် ဟဲ့ ဘူင် ကာလိုပ် ဘူင် မှာပ် ဆေဆေ။ အုဝ် မိူဝ် တူ ပိဝ် လွင် အန် တီ။ အုဝ် ဒီ ဒမ် မှာပ် ဒီ ဂေ တူ တဲး ဂေ လွတ် အာခ်ု မှာန်။ ခုဝ်၊ ဂေ တူ ခမ် ကာဒိက် ဆတ်ဇာ ပဲ့ ဟဲ့ ဒွါ ဂေ ဒီ ဒူအီ အီဆာရေလ။ ဂေ ဟဲ့ ဝီ ယွင့် ဒူအီ အီဆာရေလ၊ တဲး ဂေ ဘဲန် မှာယ် ဒူအီ ခဲင် မိူင် အေဒူမ်။

10 အုဝ် ဒီ တဲး ငဝ် တး စုဝ်း ခဲင် မိူင် ထူရုဝ်၊ တဲး န့ ကာဆိုမ် ဘော ဒူင် ချြီင် ဒါ ဆိုက် ဂေ။”

11 ဇဝ်ဖြာ ပီ ဝီ ကာလာင် ပေါ မ့ပွါ တဝ်း၊ “ဂေ ဒူအီ အီ ကွယ် ခဲင် မိူင် အေဒူမ် ဟဲ့ ဘူင် ကာလိုပ်၊ ဘူင် မှာပ် ဆေဆေ။ အုဝ် မိူဝ် တူ ပိဝ် လွင် အန် တီ။ အုဝ် ဒီ ဒမ် မှာပ် ဒီ ဂေ အာခ်ု မှာန်၊ တူ တဲး ဂေ လွတ်။ ခုဝ်၊ ဂေ တူ မိုဝ်း နဝ်း ကာဝေ အီ ဟဝ်။ ဂေ ဘော ဝီ ဒိုဝ်း မာပွါ့ လာင်၊ ဝီ ခုင်ခြး ဘီနွင် ဝေါဝဲ ဂေ။ ဂေ တူ တဲး နဝ်း ရူ ဂေ ယေန် ဒေါ မှဝ်။

12 အုဝ် ဒီ တဲး ငဝ် တး စုဝ်း ခဲင် မိူင် ထေမာန် ဘော တဲး န့ ကာဆိုမ် ဒူင် ချြီင် ဂေ ဒါ ဆိုက် ခဲင် မိူင် ဘုဝ်ဇာရာ။”

13 ဟဲ့ ဟွတ့် ဇဝ်ဖြာ ပီ ဝီ တဝ်း၊ “ဂေ ဒူအီ အီ ကွယ် ခဲင် မိူင် အမ်မူန် ဟဲ့ ဘူင် ကာလိုပ်၊ ဘူင် မှာပ် ဆေဆေ။ အုဝ် မိူဝ် တူ ပိဝ် လွင် အန် တီ။ အုဝ် ဒီ ဒမ် မှာပ် ဒီ ဂေ အာခ်ု မှာန်၊ တူ တဲး ဂေ လွတ်။ ခုဝ်၊ ဒေါ ကာဂုဝ်း ဂေ ဒီ မိူင် ဂီလေအာတ်၊ ဒေါ ပီ ဝဝ်း ဂေ ကာဒါယ် ဂေ၊ ဂေ ဘော ခါနှာပ် ကာဆဝ် အီ ဘော ပ့လဝ်း ဝတ့် အီဘိုန့် အီ တူ အး၊ တာ မာပွါ့ လာင် ဂေ။

14 ကူပ် န့ ပါယ် တီ အုဝ် ဒီ ဒိုဝ်း ငဝ်၊ ဒုဝ့် ရဲင် မိူင် ရာဘာ ဘော တဲး န့ ကာဆိုမ် ဒူင် ချြီင် ဂေ ဒါ ဆိုက် ဘောကာဂ့လျီတ်။ ဒေါ ကာဂုဝ်း ဂေ ဒါ ဆိုက်၊ ဂေ ဒီ ဒတ် ရျီင် တာင် ကာဆဝ် ပီ ဟမ် ခုန် လာင် ဘော ဂ့လာယ် တာင်။

15 ခုန်ဒီခမ် ဘော ဂေ အာမူ အာမာတ် အန်၊ ဂေ လုဝ် ခမ် အီ ဟဝ် မှေတ့် ဟာဝ် ဂေ ဘောကာဂ့လျီတ်။” အုဝ် ဇဝ်ဖြာ ဟဲ့ ကာလာင် ပါယ် တီ။