1 ဇဝ်ဖြာ ဝီ ကာလာင် ဂြုဝ်း ဒီ အာယုဝ်အေလ အီ မုး ဂွန် အာဘေထူအေန်။

2 အန် တဝ်း၊ “အိုယ် ဘေ ဒါ တာင် အီ ယဲတ့် ဒူအီ ဘော မာန် ဘော မိူင်၊ တဲး ဘေ ထူမ် ဂြုဝ်း အုဝ်။ လွင် အန် တီ န့ တူ ဒွိုမ် ဘုဝ် ဘဲန် စုဝ် ဘာန် ဘေ နီ။

3 တဲး ဘေ ဝီ ကာလာင် လွင် အန် တီ ဒီ ဂေ လှုက်လှာန် ဘေ၊ တဲး လှုက်လှာန် ဘေ ဝီ ကာလာင် ဒီ ဂွန် ဂေ။ တဲး ဘေ လှုဝ်း လွင် အန် တီ ဒွန် စုဝ် ဒွန် ဘာန်။

4 ဝါယ် မာအာဇူင့် ဟဲ့ ဟွတ့် ဟူမ်၊ မာအာမူင့် ပီ ဝီ ဟူမ် အီ ဆီ ဂိတ် ဆီ ကွယ်။ ဝါယ် မာအာမူင့် ဟဲ့ ဟွတ့် ဟူမ် အီ ဆီ ဂိတ် ဆီ ကွယ် တီ၊ မာအာဇူင့် ပေါ အူ မျုဝ် ပီ ဝီ တး ဟူမ်။ ဝါယ် အန် တီ မာအာဇူင့် ပေါ အူ မျုဝ် ပီ ဝီ တး ဟူမ်၊ ကွဲ့ တဲး န့ ဂိတ် မာဆေ။

5 အိုယ် ဘေ ဒူအီ အီ ဒျီင် ပဝ်း ဆေဆေ၊ တဲး ဘေ ဝီ န့ဆိုဝ်း ဘော ယာမ် တာင်။ အိုယ် ဘေ အီ ဒျီင် အိုမ် မာငုန် ဆေဆေ၊ တဲး ဘေ ယာမ် ဘော ငှုန်။ ခုဝ်၊ အီ ဟဝ် ဟဲ့ ဒိုဝ်း ဝဲန် အိုမ် မာငုန် အီ ဆီငဲး ကာဆဝ်။

6 ဖိုင် မာအာဇူင့် အီ ဟဲ့ ကိူန် ကာဆဝ် ဟဲ့ တး လိုပ် ခဲင် မိူင် အုဝ်။ ဂေ ဟဲ့ မွှိုမ် ယုဝ် ကာဆဝ် ဘော ကိူန်၊ တူ ပွိုန် တိး။ ဂေ မိုဝ်း ဟြာင် ပီ မာခြင်ဆီ။ ပ့လဲ့ ဂေ မိူဝ် ပီ ပ့လဲ့ မာခြင်ဆီ ဒုဝ် မာ။

7 ဂေ မိူဝ် ဟဲ့ ပျာတ့် လိုဝ် တူတ့် ဟေ မာငုန် ဘော ဟေ ဒီပူ အုဝ်။ ဂေ မိူဝ် ဟဲ့ လျီ့ လေး ဂ့လဲတ့် ဟေ အုဝ် တီ ဘော ဂ်ု တဲး န့ ကေး၊ တဲး ဟေ ဂေ တီ ဘော ရာ အန် ဘောကာဂ့လျီတ် ကွယ် ဒဲင် ကာဒါယ် ကော လုယ်။

8 တဲး ဘေ ငှုန် ဘော ယာမ်၊ တဲး န့ ပီ ဂွန် ဒီဘျာ အီ ယာမ် ကူပ် ဟဲ့ ယမ် ပါဝ် အန်။

9 အာဝ် ဟူ မိုဝ်း ပီ ဒီ လှူ ပီ ဒီ ဟူမ် ပီ ဒီ ဒျီင် ဂေ ခဲင် ဟုဝ် ဇဝ်ဖြာ။ ဂေ ဒူအီ အီ လှူ ဒီ ဇဝ်ဖြာ ဘော ဂေ ကာဒုး ဒီ ယာမ် ဒီ ငှုန် ကူပ် တူ မိုဝ်း ပီ ဒီ လှူ။ တဲး ဘေ ထူမ် ယာမ် ဂေ ဒူအီ အီ ဘူင် ဂါန် ခဲင် ဟုဝ် ဇဝ်ဖြာ။

10 မာန် ဂေ ဒူင် နာ မိူဝ် ဟဲ့ ရာမ် လိုဝ် တူတ့်။ အာဝ် မိုဝ်း ဘ့လေ အီ လေး မာဆေ။ ငှုဝ် ဘော အိုမ် မာငုန် ဘော နာမန် ဟဲ့ ဟွတ့် တူတ့်၊ အာဝ် ဟူ မိုဝ်း။

11 အိုယ် ဘေ ဒူအီ အီ ဘူင် ဒူင် နာ၊ ဘေ ဒီ ဘော ဆာယ် အီ။ ဘေ အီ ယွတ် လိုမ်လာ ကာပိုမ် ဟေ ဘ့လေ ဘော ဟေ မာငုန်၊ တဲး ဘေ က့လိုဝ် ယာမ် ကူပ် ခဝ်ချုင် ဂေ ဆီဂူင့်ရာ။ ခုဝ်၊ ကာယူင့် ငှုဝ် အီ ဒီ ပွိုန် ဆုဝ့် ဒွန် မျုဝ် ဟဲ့ ဟွတ့် လိုဝ် တူတ့်။

12 ဟေ မာငုန် ဟဲ့ ဟွတ့် ဟျီ့ ကာဟဝ်း။ ဟေ ဘ့လေ ဒီပူ ဟဲ့ ဟွတ့် ဟျီ့ ဒီလှး တူတ့်။ ဟေ ဘ့လေ မာစက်၊ ဟေ စိုက် ဘော ဘ့လေ မာခီနှူ၊ ခဲ့ ကွယ် ဟေ ဘ့လေ ယွုန် ဘ့လေ ပြဲ ဟဲ့ ဟွတ့် ဟျီ့ ကာဟဝ်း တူတ့်။ ဘော အီ တဲး နဝ်း ဒူအီ ဘျုဝ် ဒါခိုယ် ဟဲ့ ဟြာယ် တူတ့်။

13 အိုယ် ဘေ ဒါ အီ လှူ ဒီ ဇဝ်ဖြာ၊ တဲး ဘေ ဒိုဝ်း ခြိုင် စာန်၊ စှိုပ် ဒီ ညွယ် ဘေ ဘော ယာမ်။ ဘေ အီ ဘူင် ဂါန် ဇဝ်ဖြာ ဒီ ကာစှူင့် လှူ၊ တဲး ဘေ ငှုန်။ ဘေ ဒါ အီ ဘူင် ဂါန် ဇဝ်ဖြာ ဒွန် မျုဝ်၊ တဲး ဘေ တး စှိုပ် တာ ခြိုင် စာန် ဘော ယာမ် ဒွင် ခိူန်။ ခုဝ်၊ မျုဝ် ပီ ဒီ လှူ အီ မုး ငှုဝ် ဒီဂါဝ် ဘော ပီ ဒီ လှူ ပီ ဒီ ဒျီင်၊ အာဝ် ဟူ မိုဝ်း၊ အာဝ် ဟူ ပွိုန် လှူ ဒီ ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။

14 တဲး ဘေ ဒဲ့ ဒွန် အီ ယိူန် ပီ ဒီ ဟူမ်။ တဲး ဘေ တး ကာဇု ဘော လှုဝ်း မှာပ် ဘေ။ တဲး ဂေ ဒူအီ ကတ် ဒူအီ ဂဲ ဘော ဂေ ဒူအီ ဘော ရဝ် ဘော ကာင် ဘောကာဂ့လျီတ် တး ကာဇု ဒီ ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ တဲး ဘေ ဆာခိုဝ် မှာန့် ဒီ ဇဝ်ဖြာ။

15 ဆီငဲ ဒီ ဆုင်ဖျာတ် ဇဝ်ဖြာ အာမူ အီ ဟဲ့ ကာတတ် ဒီ တး။ န့ မုး ဆီငဲ ဒီ ပျာတ့် ဇဝ်ဖြာ တူတ့် အီ မိုဝ်း ပွုန် တာင်။ အန် မုး ဇဝ်ဖြာ အီ အိုပ် တူတ့် ဒွန် မျုဝ်။ အန် ဇဝ် ဝီ ဘူင် တဲး န့ မွှိုမ် ယုဝ် ကာဆဝ်။

16 လွင် ပီ ဒီ ဟူမ် ပီ ဒီ တာ ဒီ ဘော ဟြာယ် ဒီ အာတ့် အေ။ လွင် အီ တဲး အေ ဘျုဝ် ဒါခိုယ် ဘော ဘ့လွယ် ဘဲန် မျုဝ် ဘဲန် မျုဝ် အာဝ် ဟူ မိုဝ်း ခဲင် ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် အေ။

17 ခဲ့ ကွယ် ခြိုင် ဆီမာ၊ န့ ဒီ ဘော ကာဟဝ်း တူတ့် ခြိုမ် ကာဒါယ်။ ဂြွာ ငှုဝ် ဂေ ဘု ငှုဝ် ဟဲ့ လိုဝ် ကာပျာတ့် တူတ့်။ ခုဝ်၊ ဒင် ငှုဝ် ဟဲ့ ဟွတ့် ဟျီ့ ကာဟဝ်း တူတ့်။

18 ခဲ့ ကွယ် ဂေ မာမက်၊ ဂေ ဘော ငှုန်။ ဖိုင် ဂေ မိူဝ် အာဝ် ဟူ မိုဝ်း ဒူင် ဒီ ဒီလှဝ်၊ ဒူင် ဒွိုမ် ဟူမ် ဂေ ပေတ့် ဆေဆေ။ ဖိုင် ဂေ မာဘူ မိူဝ် ဟဲ့ ဇမ် ဒုက် ကာဆဝ်။

19 အိုယ် မဲ ဇဝ်ဖြာ၊ ယေ မိူဝ် ဟဲ့ မှာန့် တဲး မဲ စွယ် ယေ။ ငဝ် ဟဲ့ ဟွတ့် ကာဆိုမ် အူင့် ပေတ့် အီ မုး ဒူင် ဒွိုမ် ဟူမ် ဒုဝ် ဆတ်ဒါဝါ ဆေဆေ။ ပ့လဲ့ ငဝ် မိူဝ် ဟဲ့ ဟွတ့် ကာဆိုမ် တူတ့် ခဲ့ ကွယ် ဟေ ဂေ ပြဲ။

20 ခဲ့ ကွယ် ဂေ မာဒုဝ် ပြဲ ဟာယ် မိူဝ်၊ ဟဲ့ ဝီ ကာဖြူမ် ဒီ ဒဲ့ မဲ ဇဝ်။ ခဲ့ ကွယ် အိုမ် ဘ့လဲင် ဒွန် ဒီလယ့် ဟဲ့ ဟွတ့် ဟိတ် တူတ့်။ ငဝ် မိူဝ် ဟဲ့ ဟွတ့် ကာဆိုမ် တူတ့် ပေတ့် ဒီ ဒူင် ဒွိုမ် ဟူမ် ဂေ ဆေဆေ။”