တဲး ဘေ ဘုတ် ဝဝ် ခဲင် မိူင် ယေရူဆာလဲမ်။ တဲး ဘေ ဒတ် တာင် ဒဲင် နွန် အီ ဆီငါ ဘွတ်။ အုဝ် ဒီ ဒမ် ဆာဒိက် ဒီ အီ၊ တဲး ဒူအီ ဘော ရဝ် ဘော မိူင် ဘောကာဂ့လျီတ် ယုဝ် ဒီယုး ဒီယေန့်။ ခုဝ်၊ ဆီငဲ ပီ တဝ်း ဇဝ်ဖြာ ဒီ တး ဟဲ့ ကာတတ် ဒီ ဇမ်။

2 န့ မုး ဆီငဲ ဒီ အပ် ဝွင့် ကာဆဝ်။ ဆီငဲ ကာမိုက် ဒီ ဂ့လာယ် ဒီ ဘော အပ် ဝွင့် ဒီတိန့်၊ န့အု ဒီ ဘော ဟေတ့် ကာဆဝ်။ အူ ဇေန့် ဒါ ဆိုက် အီ ကိူန် ကာဆဝ် အီ မိုဝ်း ပ့လူမ် တာင် ဒီ ဘော တး အိုပ် မိူင် ပီ အပ် ဝွင့် ဒီ ပ့လိုက် နွန်။ ဒေါ မွိုန် အာတ့် နီ န့ တူ ဒွိုမ် ဘဲန် ပါယ် တီ။ နာ အာတ့် နီ ဟာဝ် ဒွန် စုဝ် ဒွန် ဘာန် မိူဝ် အာဝ် ဟူ ဘဲန် ပါယ် တီ ဒေါ မှဝ်။

3 နာ အာတ့် ဂေ ဟဲ့ မိုဝ်း ငဝ် အီ ဟဲ့ ကာဆိုမ် တူတ့်။ နာ ပန် ဂေ မိူဝ် ဟဲ့ မိုဝ်း ပ့လဲ့ ငဝ် အီ ကုး။ မိူင် အီ ကွယ် နာ အာတ့် ဂေ တွိုန်၊ န့ ဘော ဒါခိုယ် ဘော စှိတ် ပီ ကာပိုမ် အေဒေန်။ နာ ပန် ဂေ၊ န့ ဘော ပီ ပြဲ ကာဟဝ်း၊ တူ မိုဝ်း မာဆေ။ န့ မိူဝ် တူ မိုဝ်း ခေါ အူ မျုဝ် အီ ဒီ ပွိုန် လွတ် ဒီ ဂေ။

4 ဂေ မိုဝ်း အာရိုပ် ရာင် ပီ အာရိုပ် မင်ပြွင့်။ ဂေ ဘော ကာဘ့လဲပ် ပီ ဒါ ဆိုက် အီ ပဝ့် မင်ပြွင့်။

5 န့ ဘော ပီ ဂြန့် လက်လဝ် ပီ ပဝ့် ဒါ ဆိုက် ဘော ဂြန့် ဆီနန်။ ဒေါ ဟာဝ် ဂေ ဒီ ကာဒဲ့ နွန် ဂေ ဘော ဟမ် တဲး န့ ပီ အာဟိူန် ငဝ် အီ ဟဲ့ ကာဆိုမ် ပြဲ ကာဟဝ်း။ န့ ဘော ပီ ဘော ဂြန့် ဒါ ဆိုက် အီ ဟဲ့ ကိူန် ကာဆဝ် အီ ဟဲ့ ခြိုင် ဒီ ဟာဝ် ကာဂုဝ်း။

6 ခဲ့ ကွယ် ဂေ ဒူအီ ဘောကာဂ့လျီတ် ဒီ ဘော ယုဝ် ဒီယုး ဒီယေန့်။ နာ ဂေ မိူဝ် ဒီ ကာဟဝ်း တွင့် ဒွန် အီ။

7 ပီ ပါယ် ဂေ ဒီ ကာဂုဝ်း၊ န့ ဘော ပီ ဒါ ဆိုက် အီ မိုဝ်း နဝ်း ယ ကာဆဝ်။ ဂေ ဘော ဟုဝ့် ရဲင် မိူင် ပီ ဒါ ဆိုက် အီ ဟဲ့ မုး ဒါ ဘုဝ် တာင်။ ဂေ ဘော ဟာဝ် ဆိူဝ် ဆိူဝ် ဒူပ် န့တေန့် ဂေ ဝီ မှဝ် ဝီ အန် တူ ဟာဝ် ကာဆူ ကာဝ်ု။

8 ဂေ မိူဝ် တူ လာယ် ကာပပ်၊ တူ လာယ် ကာဇုန်၊ ဂေ ဘော ဟာဝ် ဒူပ် န့တေန့် ဂေ၊ ဝီ မှဝ် ဝီ အန်။ ဂေ ပီ ဘော ကာဘ့လဲပ် ဟာဝ် ကာတဲ ဒူအီ အီ ဂူင့် မာပွါ့ လာင်၊ န့ ယီ တူ မိုဝ်း အာဆေ အီ ပွိုန် ရဲ တဲး ဂေ ဂိူတ်။

9 ဂေ ဘော လိုပ် ခဲင် မိူင် ဘော ကာဘ့လဲပ် ဟာဝ် ဒွန် နာ ဒွန် ပ့လုဝ့်။ ဂေ ဘော လိုပ် ဟုဝ့် ခဲင် ကာင် ဒွန် ကာင်၊ လိုပ် ဒီ ကာဒဝ် ပါတဲင် ပီ ဒါ ပြာ။

10 ဒေါ တး ကာတတ် ဂေ ကာဒါယ် ဒီ ဘော ရ်ု။ ဂါင်ဟြာဝ် ဒီ ဘော ဒီယုး ဒီယေန့်။ ဆီငဲ ဂါယ် မာဂျီန် ဒီ အပ် ဝွင့်။ ဆီမန့် မိူဝ် အာဝ် ဟူ ဘ့လာင် ခဲင် ဘ့လေန့်။

11 ဇဝ်ဖြာ မိူဝ် ဒီ ဒတ် တာင်၊ ယဲတ့် တး ဒါ ဆိုက် အန်။ ဒါ ဆိုက် အန် ဇဝ် တီ၊ ဟဲ့ ခိုက်ခမ်၊ ဟဲ့ ကိူန် ကာဆဝ်။ ဂေ ဘော ထူမ် ဂြုဝ်း အန် ဇဝ်။ ဆီငဲ ပီ တဝ်း ဇဝ်ဖြာ တီ၊ န့ ဘော မုး ဆီငဲ အီ မွှိုမ် ယုဝ် ကာဆဝ်။ အာဝ် မိုဝ်း ခေါ အူ ဝီ အီ ဒီ ပွိုန် ခမ်။

12 ဟဲ့ ဟွတ့်၊ ဇဝ်ဖြာ ပီ ဝီ တဝ်း၊ “ဒေါ တီ နီ၊ တဲး ဘေ တး ဒီ အုဝ် ဒေါ ဆီ မိုဝ်း အာခြာဝ် အန်၊ တဲး ဘေ အာပ် ဒွါ နဝ်း ဘေ ဒီ အုဝ်။ ဒေါ တး ဘေ တဲး ဘေ ယိူန် ပီ ဒီ ဟူမ် ဘော ယာမ် ဘော ငှုန်။”

13 ဘေ ယီ တူ လုဝ် ကာယာတ့် ခြိုင် ဘေ ကူပ် က့လိုဝ် ဘေ။ ဘေ လုဝ် ကာယာတ့် နဝ်း ဘေ။ ဟဲ့ ဟွတ့်၊ တဲး ဘေ ဝီ တး ကာတတ် ဇဝ်ဖြာ အီ မုး ဇဝ်ဖြာ ပီ ကြိုပ် ဘေ။ မဲ ဇဝ်၊ မဲ မုး ဇဝ်ဖြာ အီ နပ် ဒီ ရွက့်၊ နပ် ဒီ ကာဝေ အီ။ မဲ ဘော မိုဝ်း နဝ်း ခမ် ဒီ ယိူန်၊ တူ ငှိုယ် ရူ။ မဲ ဘော မိုဝ်း နဝ်း ဆီ ဂေဇူ အီ၊ တူ ဆီ ဒမ် မှာပ် ဒီ အီ။

14 အာဆေ ဒီ ဘော နပ်၊ အန် ဇဝ် ဟဲ့ ဝီ ကာပ့လု နဝ်း၊ ဝီ ရွက့် ကာဝေ ဂေ၊ ဝီ မွင့်ကာရာ ဒွါ နာ မွှိုမ် ဒီ ဂေ၊ တဲး န့ ဂ့လိုမ် အာဒါ ပီ ဒီ လှူ ဂေ ငှုဝ် ဘော အိုမ် မာငုန်။ ပါယ် တီ ဇဝ်ဖြာ တူ ဝီ ဘူင် အီ တူ မွှိုမ် ပီ ကာလာင် အန် ဘော တဲး ဘေ ကွယ် ဒါခိုယ် ပီ ခါ အာတ့်။

15 တဲး ဘေ ဘုတ် ဝဝ် ခဲင် မိူင် ယေရူဆာလဲမ်၊ တဲး ဘေ ယိူန် ပီ ဒီ ဟူမ်၊ တဲး ဘေ တး ကာဇု ဘော လှုဝ်း ဇဝ်ဖြာ။

16 တဲး ဘေ ဒဲ့ တး တူတ့် ဒူအီ ဘောကာဂ့လျီတ်၊ ဘူင် တဲး ဂေ ဘောကာဂ့လျီတ် ဆီငါ။ ဒဲ့ ဘော ဂေ ဒူအီ ကတ် ဒူအီ ဂဲ ဘော ဂေ ဂွန် ဒီရွယ်၊ ဂွန် ဒီရာ့ ဘော ဂွန် အီ ဆီ ပူ၊ တဲး ဂေ တး ကာဇု တူတ့်။ တဲး ကာညူမ် အီ ဒီ ခတ် ဘော လေး ခဲင် ဟူင် အိတ် အန်၊ တဲး ဒီဘျာ အီ ဒီ ခတ် ဘော လေး ခဲင် ဒူင် ကွယ် အန်။

17 ဂေ ဒါ အီ လှူ ဒီ ဇဝ်ဖြာ ဘော ဂေ အီ ဘူင် ဂါန် ခဲင် ဟုဝ် ဇဝ်ဖြာ၊ တဲး ဂေ ကွယ် ဒီ ကာတဲ ဟုဝ် ဇဝ်ဖြာ ဘော ကာစှူင့် လှူ၊ တဲး ဂေ ယာမ် ဘော ကာလာင် တဝ်း၊ “အိုယ် မဲ ဇဝ်ဖြာ၊ မှာန့် တဲး မဲ ကာဝေ ဂေ ဒူအီ ပီ အိုပ် မဲ။ ကွဲ့ တဲး အီ ဟဝ် ကာယွင့် ဂေ။ ကွဲ့ တဲး ဂေ ဒူအီ အာမျုဝ် ဟဝ် ပွိုန် ဒီ ကာညး ဘော ပီ ဝါညာက် ဒီ ဂေ။ ကွဲ့ တဲး ဂေ တဝ်း၊ ‘ဇဝ်ဖြာ ပီ ကြိုပ် ဂေ ဒူအီ အီဆာရေလ ကွယ် ဒီ မှဝ်။း န့ ပီ အန် တူ မိုဝ်း ပွုန် မာဆေ။’”

18 ဆေ ဘေ ဘူင် ပါယ် တီ ဇဝ်ဖြာ ဒီ ဘော ဝီ နမ်လှုဝ်း မိူင် ပီ အိုပ် အန်။ အန် ဘော ဝီ ကာဝေ ဂေ ဒူအီ ပီ အိုပ် အန်။

19 ဇဝ်ဖြာ ဝီ အိုဝ် ဂြုဝ်း ဂေ၊ ဝီ ကာလာင် ဒီ ဂေ တဝ်း၊ “အုဝ် ဒီ ဝီ ဒွါ ဒီ ဘေ ငှုဝ် ဂေ ဒီဂါဝ်၊ အိုမ် မာငုန် ဘော နာမန်။ ဘေ ဒီ ဘော ပွိုန် ဒီ ဟူမ် ဖဲ ဟူမ် လိုင်။ ဝါယ် အန် တီ အုဝ် မိူဝ် အာဝ် ဟူ တဲး ဘေ ဘဲန် ပီ နဲန ဒူအီ အာမျုဝ် ဟဝ်။

20 အုဝ် ဒီ ဝီ တဲး ဒါ ဆိုက် အီ တး ဘ့လာက် နာ ကွာ တွိုန် ဟာဝ် ကွယ် ကာတူင့်၊ ကွယ် လာယ် ကာယာန် ဒီ ဘေ။ အုဝ် ဒီ ဝီ ညွန် ဟာဝ် ဂေ ခဲင် ဒူင် ကာဟဝ်း၊ ဒူင် တူ မိုဝ်း အီ ကွယ်။ ဒါ ဆိုက် အီ ကွယ် ဒီ ပန်၊ ဂေ ဒီ ဟာဝ် ခဲင် အိုမ် ဒိုင် ဆဲ့ ဆွင့် ဘ့လာက် နာ လေး ဆီငဲ။ ဂေ အီ ယဲတ့် ဒီ အာတ့် ဒီ ဘော ဟာဝ် ခဲင် အိုမ် နမ်မုက်ဆာရာ ဘ့လာက် နာ ဂေတ့် ဆီငဲ။ အုး အမ် ဒုဝ် ယမ် ဂေ တီ ဒီ ကွယ် ခဲင် မိူင် ဘော မိူင်၊ န့ ဒီ ဘော ကာလတ့် ဒွန် ပ့လုဝ့်။ ဇဝ်ဖြာ ဟဲ့ ဘူင် အီ မွှိုမ် အာမ် အာခ်ု မှာန်။”

21 အိုယ် ကာဒါယ် မိူင် ယူဒါ၊ ကွဲ့ တဲး မဲ ယုဝ်၊ တဲး နဝ်း မဲ ဘျုဝ် ဒါခိုယ် ဘော တဲး မဲ မိုဝ်း နဝ်း ကြွိုမ် နဝ်း တာင်။ ဇဝ်ဖြာ ဟဲ့ ဘူင် အီ မွှိုမ် အာမ် ကာဆဝ်။

22 အိုယ် ဘေ ဒုဝ် ဆတ်ဒါဝါ၊ ကွဲ့ တဲး ဘေ ယုဝ်။ ပေတ့် ဂေ ပြဲ ဒီ ဘော ဝီ လတ့် ခဲင် ယွုန် ခဲင် ပြဲ။ ဟေ မိူဝ် ဒီ ဘော ဝီ မိုဝ်း ဘ့လေ အန်။ ဟေ ဒီပူ ဘော ဟေ မာငုန် မိူဝ် ဒီ ဘော ဝီ မိုဝ်း ကိူန် ဘ့လေ အန်။

23 အိုယ် ဘေ ဒူအီ အီ ကွယ် ခဲင် မိူင် ယေရူဆာလဲမ်၊ တဲး ဘေ ဘျုဝ် ဒါခိုယ် ဘော ဘိုင် ဇဝ်ဖြာ ပီ ကြိုပ် ဘေ။ တဲး ဘေ မိုဝ်း နဝ်း ကြွိုမ် နဝ်း ခူယ်။ ခုဝ်၊ အန် ဇဝ် ဒီ ဝီ တဲး ဂ့လာယ် စုဝ်း၊ တဲး န့ ဘျ ဂေဇူ အန်။ အန် ဒီ တဲး ဂ့လာယ် တာင် အီ မုး ဂ့လာယ် အာတ့် ဆမ် ဘော ဂ့လာယ် ဝါယ် ဆမ် စုဝ်း အာဒါ ဘေ၊ တဲး န့ ဝီ ပီ ဘြိမ်။

24 ငှုဝ် မိူဝ် ဒီ ဘော နုဝ့် ဒီ အူင့် ကာင်နဝ်း ဘေ။ အိုမ် မာငုန် ဘော နာမန် မိူဝ် ဒီ ဘော နုဝ့် လုတ့် ခဲင် ပြဲန့် ဘေ။

25 ဇဝ်ဖြာ ပီ ဝီ တဝ်း၊ “အုဝ် ဒီ ဝီ ဒွါ ဒီ ဘေ ပဲ့ ဟဲ့ ဟူမ် မာအာဇူင့် ဘော မာအာမူင့် ဘဲန် မျုဝ် ဘဲန် မျုဝ်။ ဂေ ဟဲ့ တး ပီ ဒါ ဆိုက် အီ ဟဲ့ ကိူန် ကာဆဝ်။ အုဝ် ဟဲ့ စ်ု ဂေ၊ တဲး ဂေ ဒွါ ဒုက် ဒီ ဘေ။

26 ဘေ ဒီ ဘော ဝီ ပွိုန် ဒီ ဟူမ် ဖဲ ဟူမ် လိုင်။ ဘေ ဒီ ဘော ဝီ ပွိုန် အိူပ် မျုက် ဇဝ်ဖြာ ပီ ကြိုပ် ဘေ အီ ဟဲ့ ဘူင် ဒီ ဘေ အီ မွှိုမ် အာမ် ကာဆဝ်။ ဝါယ် အန် တီ ဂေ ဒူအီ ပီ အိုပ် အုဝ်၊ ဂေ အာဝ် ဟူ လုဝ် ဆာယ် အီ ခဲ့ တီ။

27 ဘေ မိူဝ် ဒီ နပ်၊ အုဝ် ကွယ် ကာတဲ ဘေ ဒူအီ အီဆာရေလ။ ဘေ ဒီ ဘော နပ် လွင် မုး အုဝ် ဇဝ်ဖြာ ပီ ကြိုပ် ဘေ။ ဒဲင် အုဝ် အာဝ် မိုဝ်း ဇဝ်ဖြာ ပေါ အူ ကာဒင်။ ဂေ ဒူအီ ပီ အိုပ် အုဝ်၊ ဂေ တူ ဝီ လုဝ် ဆာယ် အီ။”

28 ဝါယ် အန် တီ အုဝ် ဒီ ဝီ ဟုး နဝ်း ဖွိုမ် အုဝ် တဲး န့ ဇမ် ဒဲင် ဂေ ဒူအီ ဘောကာဂ့လျီတ်။ တဲး န့ ပီ ဒူအီ ဟုး လေး အိုမ် ခဲင် ကာပဝ်။ ဂေ ဂွန် အီဘိုန့် ဘော ဂွန် အီမာယ် ဘေ၊ ဂေ ဒီ ဘော နပ် ဒီ ဘျာန် ဂြုဝ်း ဇဝ်ဖြာ။ ဂေ ဒူအီ ကတ် ဒူအီ ဂဲ၊ ဂေ ဒီ ဘော နပ် ဒီ မ့ဘာဝ် ဒွန် မျုဝ်။ ဂေ ဒူအီ အီ ဆီ နှိုမ်၊ ဂေ ဒီ ဘော ယိုဝ် ပီ ဘျ ဇဝ်ဖြာ ဒီ ဂေ။

29 ဒေါ အန် တီ အုဝ် ဒီ ဟုး နဝ်း ဖွိုမ် အုဝ် ဒဲင် ဒဲစေန့် အုဝ် အီ မုး ဘော အီဘိုန့် ဘော အီမာယ်။

30 အုဝ် မိူဝ် ဒီ ဘျ တဲး ဘေ ယိုဝ် အီ မွှိုမ် အာမ် ကာဆဝ် ခဲင် ဂါင်ဟြာဝ် ဘော ဒဲင် ကာဒါယ် နီ။ န့ ဒီ ဘော မိုဝ်း နှာမ်၊ ပ့လဲ့ ငဝ် ဘော ဒက် ငဝ်။

31 အာတ့် ဇမ် ဆီငဲ အီ မွှိုမ် ယုဝ် ကာဆဝ်၊ ဆီငဲ ပီ ဒီ ဘူင် ဇဝ်ဖြာ တီ၊ ဆီငဲ ဒီ ဘော အပ် ဝွင့် ဒီတိန့်၊ မာဂျီန် ဒီ ဘော လေး ပီ နှာမ်။

32 ဒေါ အန် တီ ဂေ အီ ဆာခိုဝ် အီ ဂါဝ် ပွုန် ဇဝ်ဖြာ ဒွန် အီ၊ ဇဝ်ဖြာ ဒီ ဘော ချွတ် ဂေ။ ဂေ အီ ကွယ် ဒီ နွန် ဇီအူန် ဘော ဂေ အီ ကွယ် ခဲင် မိူင် ယေရူဆာလဲမ်၊ ဂေ ဒီ ဘော လွတ် ယမ် မင် အီ။ ပါယ် တီ န့ ဒူပ် ဂြုဝ်း ပီ ဒွိုမ် ကာလာင် ဇဝ်ဖြာ တဲး န့ မိုဝ်း ဂေ အီ ဆီ ဂိတ် ဆီ ကွယ်၊ အီ မုး ဒူအီ ပဲ့ ဟဲ့ ဒဲ့ ဇဝ်ဖြာ။