1 ဇဝ်ဖြာ ပီ ဝီ တဝ်း၊ “အာခြာဝ် ပန် ဒီ ဝီ ဒိုဝ်း တး အုဝ် ဂေ ဒူအီ အာယူဒါ ဘော ဒူအီ ခဲင် မိူင် ယေရူဆာလဲမ် ပဲ့ ဟဲ့ မှေတ့် ဟာဝ် အီ၊ တဲး ဂေ ဝီ တး ကွယ် ဒါခိုယ် ဒူင် ကွယ် ဘြိမ် ဂေ ပီ ခါ အာတ့်။

2 အုဝ် ဒီ တဲး ဂေ ဒါ ဆိုက် ဒွန် မျုဝ် ဒဲင် ကာဒါယ် တး ကာဇု ခဲင် ဒီလယ့် အာယောဆာဖာတ်။ ဒီ တီ အုဝ် ဒီ ဘော ဆုင်ဖျာတ် အာမူ ဂေ။ ခုဝ်၊ ဂေ ဟဲ့ ဘူင် နာ မိူက် နာ ဟာယ် ဒီ ဒူအီ ပီ အိုပ် အုဝ် အီ ပီ ခါဂုန် အုဝ်။ ဂေ မိူဝ် ဟဲ့ ဘူင် တဲး ဒူအီ အီဆာရေလ ကာယဝ်း ကာရေး၊ ကွယ် ဒွန် မာန် ဒွန် မိူင် ဘော တဲး မိူင် ဂေ အာဝ် ဟူ မိုဝ်း ခေါ အူ မိူင်။

3 ဂေ ဘော ကာတာမ် အာဒါ ဂေ ဒူအီ ပီ အိုပ် အုဝ်။ ဂေ ဒိုဝ်း ဂွန် အီမာယ် ဂွန် ဒီရွယ် ဂေ၊ ဝီ လာယ် ကာရဝ်း ဒီ ယာ မာလမ်။ ဂေ မိူဝ် ဟဲ့ ဒိုဝ်း ဂွန် အီဘိုန့် ဂွန် ဒီရွယ် ယွင့်၊ တဲး ဂေ ဝီ စိုဝ်း ဒီ ဒျီင် အိုမ် မာငုန်၊ တဲး ဂေ ကော ယိုတ့်။

4 အိုယ် ဘေ အီ ကွယ် ခဲင် မိူင် ထူရုဝ်၊ မိူင် ဆီဒူန် ဘော ခဲင် မာန် မိူင် ဖီလီထီ ဘောကာဂ့လျီတ်၊ ဘေ လာယ် ဘာ့ မာဆေ ဒီ အုဝ်။း ဘေ ဆီ ဒီ ဝီ ဘူင် ဝျီ့ အာဖေ အာရေ ဒီ အုဝ်။း ဆေ ဘေ ဆီ ဘူင် ပါယ် တီ၊ အုဝ် ဒီ ဝီ တဲး ဘေ ခမ် ပီ လုတ့် ဘေ တီ ခြန် ခြန်။ 5 ဘေ ဟဲ့ ဒိုဝ်း ရွိုန် အုဝ်၊ ဒိုဝ်း ခြိဝ် အုဝ် ဘော ကြုဝ်ကြာမ် အီ ငဝ်း တာင် အီ လဝ့် နဝ်း အုဝ်၊ ဝီ ဟာဝ် အုန် ခဲင် ဇူင် ဘေ။ 6 ဘေ ဟဲ့ ဒိုဝ်း ဂေ ဒူအီ အာယူဒါ ဘော ဒူအီ ခဲင် မိူင် ယေရူဆာလဲမ်၊ ဝီ ယွင့် ဒွါ ဒီ ဒူအီ ဂြိက်၊ တဲး ဂေ ဒူအီ ဂြိက် ဝီ ယွင့် ဟာဝ် ဂေ၊ တဲး ဂေ ဝီ ကွယ် ကာတူင့် ဒီ မိူင် ဘြိမ် ဂေ။

7 မာလဲ၊ ဒေါ တီ နီ အုဝ် ဒီ ဝီ ဒိုဝ်း လေး ဂေ ခဲင် မိူင် ဒူင် ဟဲ့ ယွင့် ဟာဝ် ဘေ၊ တဲး ဂေ ဝီ တး။ အုဝ် ဒီ ဝီ ဘူင် ဝျီ့ ဒီ ဘေ ခဲ့ ပီ ဘူင် လုတ့် ဘေ၊ တဲး ဘေ ဝီ ခမ်။ 8 ဂွန် အီဘိုန့် ဘော ဂွန် အီမာယ် ဘေ ဘောကာဂ့လျီတ်၊ ဘေ ဒီ ကာဒုး ဒီ ယွင့် ဒွါ ဒီ ဒူအီ အာယူဒါ။ ဂေ ပီ ဒီ ဝီ ယွင့် ဒွါ ဒီ ဒူအီ အာရာပ် အီ မုး ဒူအီ အီ ကွယ် ကာတူင့်။” ဇဝ်ဖြာ ဟဲ့ ကာလာင် အုန် ပါယ် တီ။

9 တဲး ဘေ ကာလာင် ဒီ ဒူအီ ဒွန် ဇိုဝ် ဒွန် မျုဝ် အီ ကွယ် ကာတူင့် တဝ်း၊ “တဲး ဘေ ဘောကာဂ့လျီတ် ရဲန် အုန် ဘော ခြိုင် ကာဂုဝ်း ဘေ၊ တဲး ဘေ ကာဆုး နဝ်း ဂေ ဒါ ဆိုက် အီ ကျ အီ မိုဝ်း နဝ်း ယ။ ခဲ့ ကွယ် ဒါ ဆိုက် ဘောကာဂ့လျီတ်၊ တဲး ဂေ ဟာဝ် ညိူဝ်၊ ဟာဝ် ချြီ့၊ တဲး ဂေ ကာဂုဝ်း။

10 တဲး ဘေ ဒိုဝ်း ဟိန် မင် ထဲ ဘေ၊ ဝီ စိုမ် ဘဲန် မာပွါ့ လာင်။ ဝီ ဒိုဝ်း န့ဝါတ့် ဘေ၊ ဝီ စိုမ် ဘဲန် ဘ့လာ လျီး။ တဲး ဘေ မာနုဝ် ဂေ အီ တူ မိုဝ်း ပ့လူမ် ဂေ ဟဲန့် တဲး ဂေ တဝ်း၊ ‘အုဝ် မိုဝ်း ပ့လူမ် ကိူန်။’

11 အိုယ် ဘေ ဒူအီ အာမျုဝ် ဟဝ် အီ ကွယ် ဒွန် နာ ဒွန် ပ့လုဝ့်၊ တဲး ဘေ ပီခြန် ဘေ ဒီ တး၊ တဲး ဘေ တး ကွယ် ကာဇု ကာဒိုမ် ဒူင် ပဲ့ ဟဲ့ တဝ်း အုဝ်။ အိုယ် မဲ ဇဝ်ဖြာ၊ တဲး မဲ တဲး ဂေ ဒါ ဆိုက် ပီ အိုပ် မဲ တး ဒူင် တီ။

12 တဲး ဂေ ဒူအီ ဒွန် ဇိုဝ် ဒွန် မျုဝ် ဝီ ဟာဝ် ဒီ ဒီလယ့် အာယောဆာဖာတ်။ အုဝ် ဒီ ဘော ကွယ် ဒူင် တီ၊ ဘ်ု ဒီ ဆုင်ဖျာတ် အာမူ ဂေ ဒူအီ အာမျုဝ် ဟဝ် ဘောကာဂ့လျီတ်။

13 တဲး ဘေ ဒိုဝ်း န့ဝါတ့်။ ခုဝ်၊ ငှုဝ် အီ ဟဲ့ လုဝ် ဆုဝ့် ဟဲ့ ဟွတ့် ဆိန်။ ပြဲန့် ဒူင် ကြိတ် ဘ့လေ မာငုန် ဟဲ့ ဟွတ့် နုဝ့်၊ တဲး ဘေ တး ကြိတ်။ ကာလယ့် ဒူင့် အိုမ် မာငုန် ဟဲ့ ဟွတ့် နုဝ့် လုတ့်။ ပါယ် တီ မှာပ် ပီ ဘူင် ဂေ၊ ဟဲ့ ကိူန် ကာဆဝ်။”

14 ဒူအီ ဟဲ့ တး ကာဇု ကိူန် ကာဆဝ် ဒီ ဒီလယ့် ဒူင် ဒီ ဆုင်ဖျာတ် ဇဝ်ဖြာ အာမူ ဂေ။ ဆီငဲ ဒီ ဆုင်ဖျာတ် ဇဝ်ဖြာ အာမူ ဒူအီ ခဲင် ဒီလယ့် တီ၊ ဟဲ့ ကာတတ် ဒီ ဇမ်။

15 ဒေါ အန် တီ ဆီငဲ ဂါယ် မာဂျီန် ဒီ ဘော အပ် ဝွင့်။ ဆီမန့် မိူဝ် အာဝ် ဟူ ဘ့လာင်။

16 ဇဝ်ဖြာ ဒီ ဘော ကွယ် ဒဲင် နွန် ဇီအူန် ဘော ဒတ် တာင်။ အန် ဘော ကွယ် ခဲင် မိူင် ယေရူဆာလဲမ် ဘော ဒတ် တာင် တာင်။ ဘ့လေန့် ဂေ ကာဒါယ် ဘော ဒီယုး ဒီယေန့်။ မာလဲ၊ ဇဝ်ဖြာ ယီ ဒီ ဘဲန် ဒူင် ဘိုင်၊ ဒူင် နဝ်း တာင် ဒီ ဂေ ဒူအီ အီဆာရေလ။ အန် ဇဝ် ဘော ဘဲန် အီ ဂွင့် အီ ရဲ အာဒါ ဂေ ဒူအီ အာမျုဝ် အီဆာရေလ။

17 “ဆေ ဘေ ထူမ် ဟမ် အန် တီ၊ ဘေ ဒီ ဘော နပ် အုဝ် မုး ဇဝ်ဖြာ ပီ ကြိုပ် ဘေ။ အုဝ် ဘော ကွယ် ဒဲင် နွန် ဇီအူန် အီ မုး နွန် ဆီငါ ဘွတ် ဒူင် ကွယ် အုဝ်။ ဘော မိူင် ယေရူဆာလဲမ် ဒီ ဘော ဘဲန် ဒူင် ဆီငါ ဘွတ်။ ဝါယ် အန် တီ ဒါ ဆိုက် အာမျုဝ် ဟဝ် တူ ဝီ ပဲ မိူင် ယေရူဆာလဲမ် တီ။

18 ဒေါ အန် တီ အိုမ် မာငုန် ဒီ ကိူန် ကာဆဝ် ပီ အိုမ် အီ လှဲ တး ဒီ နွန် ဒွန် နွန်။ အိုမ် ပူ ဒီ ဘော ကိူန် ကာဆဝ် ပီ အိုမ် အီ လှဲ တး ဒီ နွန် စာ ဒွန် ပ့လုဝ့်။ ဘ့လဲင် အိုမ် ခဲင် မိူင် ယူဒါ ဒီ ဘော မိုဝ်း အိုမ် လှဲ ဒွန် ဘ့လဲင်။ အိုမ် ဒီ ဘော တုဝ်း ဒီ ဟုဝ် ဇဝ်ဖြာ၊ တဲး န့ ဘော လှဲ ဒူပ် ဒီလယ့် အီ မိုဝ်း ဟေ ကာထိန်။

19 မိူင် အဲဂိုပ် ဒီ ဘော ဘဲန် ဒူင် ယေန် ဒူင် ငွင့် ဒူအီ။ မိူင် အေဒူမ် ဒီ ဘော ဝီ ဘဲန် ပြဲ တာင် ဘော ငွင့်၊ အာဝ် မိုဝ်း ဒူအီ အီ ကွယ်။ ခုဝ်၊ ဂေ ဟဲ့ ခါနှာပ် ဂေ ဒူအီ အာယူဒါ၊ ဟဲ့ ငဝ်း ယမ် ဒူအီ တူ မိုဝ်း မှာပ်။

20 မိူင် ယူဒါ ယီ ဒီ ကွယ် ဆေဆေ။ မိူင် ယေရူဆာလဲမ် ဒီ ဘော ကွယ် ဆေဆေ ဒွန် စုဝ် ဒွန် ဘာန် တူ ရာမ် ဒေါ မှဝ်။

21 အုဝ် ဒီ ဝီ ဂဝ်း ဝဲန် မှာပ် ဂေ ပီ ညှမ် ဂဝ်း ဝဲန် အုဝ်။ အုဝ် အီ မုး ဇဝ်ဖြာ အီ အိုပ် ဒူအီ အီဆာရေလ၊ အုဝ် ဒီ ကွယ် ဒူပ် ဂေ ခဲင် မိူင် ယေရူဆာလဲမ်။”