1 ဇဝ်ဖြာ ကာလာင် ဂြုဝ်း ဒီ အာဟုဝ်ဆီယာ အီ မုး ဂွန် အာဘေအေရီ။ ဒေါ အန် တီ န့ ဘော မုး အာခြာဝ် ခုန်ဒီခမ် အာအူဇီယာ၊ ခုန်ဒီခမ် အာယုဝ်ထာမ်၊ ခုန်ဒီခမ် အာခါတ် ဘော ခုန်ဒီခမ် အာဟေစကီ ဂေ အီ မုး ခုန်ဒီခမ် အီ အိုပ် မိူင် ယူဒါ။ န့ ဘော မုး အာခြာဝ် အာယေရုဝ်ဘုဝ် အီ မုး ဂွန် အာယုဝ်အာတ်၊ အီ ဟဲ့ ဘဲန် ခုန်ဒီခမ် ခဲင် မိူင် အီဆာရေလ။

2 ဒေါ အန် တီ ဇဝ်ဖြာ စုး ဒီ ကာလာင် ဂြုဝ်း ဒီ အာဟုဝ်ဆီယာ တဝ်း၊ “တဲး မဲ ဟာဝ် ဒိုဝ်း ယာ မာလမ်၊ တဲး အန် ဘဲန် အီဘိုန့် မဲ။ အီဘိုန့် မဲ တီ အန် ဒီ ဒူပ် အီမာယ် ဘဲန် ဝီ ဘဲန် ဝီ။ ဘော ဂွန် မဲ ဒီ ဘော ပီ အန်။ န့ ဘော ပါယ် တီ ခုဝ်၊ ဂေ ဒူအီ ပီ အိုပ် အုဝ် ဟဲ့ ဝဲန် အုဝ် ဘော ဒူပ် ဇဝ် ပီ ကြိုပ် ဒူအီ အာမျုဝ် ဟဝ်။” 3 ပန် တီ အာဟုဝ်ဆီယာ မိူဝ် ဒိုဝ်း အီဘိုန့် အီ စိူဝ် နာင် ဂုဝ်မာ အီ မုး ဂွန် အာတီပါလိမ်။ အီဘိုန့် တီ ဘော ဒဲ ဘာဒိက် ဆန်ထေ ဘော မိုဝ်း ဂွန် အီမာယ်။

4 ဇဝ်ဖြာ ဘော ဝီ ကာလာင် ဒီ အာဟုဝ်ဆီယာ တဝ်း၊ “တဲး မဲ ဒါင် စိူဝ် ဂွန် မဲ တီ၊ တဲး အန် စိူဝ် အာယေစာရေလ။ ခုဝ်၊ အာဝ် ဘော လှေန့် အုဝ် ဒီ ဒမ် မှာပ် ဒီ ခုန်ဒီခမ် ဒူအီ အီဆာရေလ ကူပ် မှာပ် ပီ ဘူင် ဂုန့် ဒင် ဂေ အီ မုး အာယေဟူ။ န့ မုး မှာပ် ပဲ့ ဟဲ့ ငဝ်း ယမ် အန် ဒူအီ ခဲင် မိူင် ယေစာရေလ တွိုန်။ အုဝ် ဒီ ဘူင် တဲး လှုက်လှာန် ခုန်ဒီခမ် အာယေဟူ ဟြာယ် တူတ့်။ 5 ပါယ် တီ အုဝ် ဒီ ပျာတ့် ဝဲန် ပွုန် ဒါ ဆိုက် ဒူအီ အီဆာရေလ ခဲင် ဒီလယ့် ယေစာရေလ။”

6 နာင် ဂုဝ်မာ တွိုန် ပီ ဝီ မိုဝ်း ဂွန် ပေါ အူ ဝီ။ ဝီ တီ ဘော မုး ဂွန် အီဘိုန့်။ ဇဝ်ဖြာ ဝီ ကာလာင် ဒီ အာဟုဝ်ဆီယာ တဝ်း၊ “တဲး မဲ တဲး အန် စိူဝ် လောရူဟာမာ။^a ခုဝ်၊ ဝါယ် အန် တီ အုဝ် မိူဝ် တူ ရွက့် ကာဝေ ဂေ ဒူအီ အီဆာရေလ၊ တူ ဂဝ်း ဝဲန် မှာပ် ဂေ။ 7 အီ မုး ဂေ ဒူအီ အာယူဒါ၊ အုဝ် ယီ ဒီ ရွက့် ကာဝေ။ အုဝ် အီ မုး ဇဝ်ဖြာ ပီ ကြိုပ် ဂေ၊ အုဝ် ဒီ ဘော ချွတ် ဂေ။ မာလဲ၊ အုဝ် တူ စ်ု အ၊ တူ စ်ု ဂေ ဒါ ဆိုက် ဘော မာပွါ့ လာင်၊ လာယ် ကာဂုဝ်း၊ တူ စ်ု မင်ပြွင့် ဘော ဒါ ဆိုက် အီ ပဝ့် မင်ပြွင့် တီ။”

8 နာင် ဂုဝ်မာ ဟဲ့ ဟွတ့် တဲး ဂွန် အန် အီ စိူဝ် လောရူဟာမာ ဂဝ်း ပူ၊ အန် ပီ ဝီ ဒဲ ဘာဒိက် ဆန်ထေ ပေါ အူ ဇေန့်။ အန် ဝီ မိုဝ်း ဂွန် အီမာယ်။ 9 ဇဝ်ဖြာ ပီ ဝီ တဝ်း၊ “တဲး မဲ တဲး အန် စိူဝ် အာလောအမ်မီ။^b ခုဝ်၊ ဂေ ဒူအီ အီဆာရေလ အာဝ် ဟူ မုး ဒူအီ ပီ အိုပ် အုဝ်။ အုဝ် မိူဝ် အာဝ် ဟူ မုး ဇဝ်ဖြာ ပီ ကြိုပ် ဂေ။

10 မာလဲ၊ ဂေ ဒူအီ အီဆာရေလ ယီ ကြဲ ဒီ ဘြဲ ကိူန် ကော ပီ ကာဟာတ့် အီ ကွယ် ခူပ် အိုမ် နမ်မုက်ဆာရာ အာဝ် နပ် ဒီ တိး။ အာတိုဝ် နီ ဇဝ်ဖြာ ပီ ဘော တဝ်း၊ ‘ဘေ မုး ဒူအီ အုဝ်’ မိူဝ်၊ န့ ယီ ဒီ မိုဝ်း အာခြာဝ် ဒီ ဝီ တဝ်း အန် ဒီ ဂေ၊ ‘ဘေ မုး ဂွန် ဇဝ်ဖြာ အီ ကွယ် ဆေဆေ။’ 11 ဂေ ဒူအီ အာယူဒါ ဘော ဂေ ဒူအီ အီဆာရေလ ဂေ ဒီ ဝီ လာယ် ဖြူမ် ရိုမ်။ ဂေ ဒီ ဝီ ရဝ်း ခုန်ဒီခမ် အူ ကာဒင်၊ တဲး အန် ဘဲန် ခုန်ဒီခမ် အီ အိုပ် ဂေ ဒေါ ဝီ ဟာဝ် ဇမ် ဂေ ခဲင် မိူင် ဘြိမ် ဂေ။ ဒူင် စိူဝ် ယေစာရေလ တွိုန် ဒီ ဝီ ဘဲန် ဒူင် ဘျုဝ် ဒါခိုယ်။”