1 ခုန်ဒီခမ် အာယောယာခိမ် ဟဲ့ အိုပ် မိူင် ယူဒါ အာဒါ အူယ် ဆီနမ်။ ဒေါ အန် တီ အာနေဘူခတ်နေစာ အီ မုး ခုန်ဒီခမ် အီ အိုပ် မိူင် ဘာဘဲ ဘော ဒါ ဆိုက် အန် ဟဲ့ တး ကာဂုဝ်း ဒီ မိူင် ယေရူဆာလဲမ် ဘော ရူပ် မိူင် တီ။ 2 ဇဝ်ဖြာ ဘော တဲး အာနေဘူခတ်နေစာ ပဲ၊ တဲး အန် ပွိုန် ဒီ မှေတ့် ခုန်ဒီခမ် အာယောယာခိမ်။ အန် ဘော ဒိုဝ်း ဟာဝ် ဘော ကြုဝ်ကြာမ် မင် ကာလဝ့် အီ ဘွတ် အီ ကွယ် ခဲင် ဟုဝ် ဇဝ်ဖြာ။ ဟဲ့ ဟွတ့်၊ အန် ဘော ဝီ ဒိုဝ်း ကြုဝ်ကြာမ် ဂေ တွိုန်၊ ဝီ ဟာဝ် အုန် ခဲင် ဇီဒိူက် ဇဝ် ပီ ကြိုပ် အန်။

3 ဝါယ် အန် တီ ခုန်ဒီခမ် အာနေဘူခတ်နေစာ ဘော စ်ု အာဆာဘေနာတ် အီ မုး ဒူအီ အီ အိုပ် အာမူ အာမာတ် ခုန်ဒီခမ် ဘောကာဂ့လျီတ်၊ တဲး အန် ရဝ်း ဂွန် ကာညူမ် မင် အီ ကာတဲ ဂွန် ဂေ ဒူအီ အီဆာရေလ ဘော ဂွန် ကာညူမ် ဂေ ဒါ ကာညာ အီ အိုပ် မိူင် မင် အီ၊ တဲး ဂေ တး ဒီ အန်။ ဂွန် ကာညူမ် တီ ဘော မုး ခြိုဝ် ခုန်ဒီခမ် ဘော ခြိုဝ် ဒါ ကာညာ အီ အိုပ် မိူင်။ 4 ကာညူမ် ဂေ တီ လုဝ် စှိတ်၊ မိုဝ်း အာရိုပ် ခဲမ်၊ မိုဝ်း အာငျာန်၊ ပွိုန် ဟေန် ငှိုယ် ငှိုယ် ဘော လုဝ် နပ် ဘဲန် မျုဝ် ဘဲန် မျုဝ်။ ဂေ လုဝ် ကာလှုး ငှိုယ် ငှိုယ် ဘော နပ် ဒီ ဘူင် ဂါန် ခဲင် ဟုဝ် ခုန်ဒီခမ်။ အာဆာဘေနာတ် လုဝ် မာနုဝ် တဲး ဂေ နပ် ဒီ တိး ပဲ့ ဘော နပ် ဂြုဝ်း ဒူအီ အာမျုဝ် ဘာဘဲ။ 5 ခုန်ဒီခမ် မိူဝ် စ်ု ဒဲစေန့် အန်၊ ဒွန် ဆီငဲ တဲး ဂေ ရဲန် ပီ ဒီ ဟူမ် ဘော အိုမ် မာငုန် ပီ ဒျီင် ဂေ ခဲင် ဟုဝ် ခုန်ဒီခမ်၊ ဝီ ဟျီင် ကာညူမ် ဂေ တီ။ ဝါယ် ဟဲ့ ဟွတ့် မာနုဝ် အန် ဒီ ဂေ အာတ့် ပွိုန် အူယ် ဆီနမ်၊ ဂေ လုဝ် စုး ဒီ ဘူင် ဂါန် ခုန်ဒီခမ်။

6 ခဲင် ကာညူမ် ဂေ တီ မိုဝ်း အာဒါနေလ၊ အာဟာနာနီယာ၊ အာမီဆေလ ဘော အာဇာရီယာ။ ဂေ ဘော မုး တူတ့် ဒူအီ အာယူဒါ။ 7 ဒါ တာင် အီ အိုပ် အာမူ အာမာတ် ခုန်ဒီခမ် တွိုန် ဘော ဝီ ဒါင် စိူဝ် ကာမာယ် ဒီ ဂေ။ အာဒါနေလ ဘော ဝီ စိူဝ် အာဘေလထေဆာစာ၊ အာဟာနာနီယာ ဘော ဝီ စိူဝ် အာဆာတာရိက်၊ အာမီဆေလ ဘော ဝီ စိူဝ် အာမေဆိက် ဘော အာဇာရီယာ ဝီ စိူဝ် အာဘေတ်နေကုဝ်။

8 အာဒါနေလ ယီ အုန် နဝ်း၊ တူ တဲး ဒုဝ် အန် ကာဒါတ့် ကူပ် ပီ ဒီ ဟူမ် ဘော အိုမ် မာငုန် ပီ ဟျီင် ခုန်ဒီခမ်။ ပါယ် တီ အန် ဝီ မှာန့်၊ တဲး အာဆာဘေနာတ် စွယ် အန်။ 9 ဇဝ်ဖြာ မိူဝ် ဘူင် တဲး အာဆာဘေနာတ် မိုဝ်း နဝ်း ကာဝေ အာဒါနေလ ဘော စွယ် အန်။ 10 မာလဲ၊ အာဆာဘေနာတ် ယီ ယုဝ် ခုန်ဒီခမ် ဘော ဝီ ကာလာင် ဒီ အာဒါနေလ တဝ်း၊ “ခုန်ဒီခမ် ဟဲ့ ဟွတ့် ဘ့လေး အာမိင်၊ တဲး ဘေ ဟူမ် ပီ ဒီ ဟူမ် ပီ ဒီ ဒျီင် ခုန်ဒီခမ်။ ဆေ ဘေ ယီ တူ ဟူမ်၊ ဆေ ဘေ တူ မိုဝ်း ဒုဝ် ဘူင့် ခဲမ် ပီ ကာညူမ် အီ ဟဝ်၊ အန် ဒီ ဘော ငဝ်း ဝဲန် အုဝ်။”

11 အာဒါနေလ ဘော ဝီ ဟာဝ် ဒူင် ကွယ် ဒါ အီ ယွတ် လိုမ်လာ ဂေ ပဲ့ ဟဲ့ စ်ု အာဆာဘေနာတ်၊ တဲး အန် အိုပ် အာဒါနေလ ဘော ဂိုက် အန် အူယ် ဝီ တွိုန်။ 12 အန် ဘော ကာလာင် ဒီ ဒူအီ ဝီ တီ တဝ်း၊ “တဲး မဲ ထေဝ် ဒီ ယွတ် ယေ အီ မုး ဒဲစေန့် မဲ အာဒါ ဂိုဝ် ဆီငဲ။ တဲး မဲ တဲး ယေ ဟာပ် မီ ဒဝ် ငျီန် ဘော ဒျီင် မီ အိုမ် ဒီလူယ်။ 13 ဝါယ် အန် တီ တဲး မဲ ဝီ ယွတ် ပီ ပါယ် နာ ယေ ဘော အာရိုပ် ယေ၊ ဝီ လာယ် ကာဂဝ် ဒီ ဂေ ကာညူမ် အီ ဟဲ့ ဟူမ် ပီ ဟူမ် ခုန်ဒီခမ် ဘော ဒျီင် အိုမ် မာငုန် ပီ ဒျီင် အန်။ ပန် အန် တီ တဲး မဲ ဆုင်ဖျာတ် ဒူပ် ခဲ့ ပီ ယိုဝ် မဲ။” 14 အန် မိူဝ် ဖြူမ် ပီ တဝ်း အာဒါနေလ တီ။ အန် တဲး ဂေ ထေဝ် အာဒါ ဂိုဝ် ဆီငဲ တီ။

15 ဟဲ့ ဟွတ့် နုဝ့် ဂိုဝ် ဆီငဲ၊ ဂေ ယီ ဝီ မိုဝ်း ပ့လူမ် မိုဝ်း ဟဲန့် ဘော စှိတ် လွှိုမ် ဂေ အီ ဟဝ် အီ ဟဲ့ ဟူမ် ပီ ဒီ ဟူမ် ခုန်ဒီခမ် တွိုန်။ 16 ခုဝ်၊ ဒူအီ တွိုန် အာဝ် ဟူ တဲး ဂေ ဟူမ် ပီ ဒီ ဟူမ် ပီ ဒီ ဟာပ် ခုန်ဒီခမ်။ အန် ဝီ ဒိုဝ်း မီ ဒဝ် ငျီန်၊ ဟျီင် ဂေ ဟူမ်။

17 ဇဝ်ဖြာ ဘော တဲး ဂေ ဖွုန် ဝီ တီ မိုဝ်း အာငျာန် ဘော နပ် ဒီ ကာဒွါ့ ကာဖာ ဒွန် မျုဝ်၊ နပ် ဘော ဒီ ဇေန့်ဇာ နာ ဘွတ် နာ မွှိုမ် ဘဲန် မျုဝ် ဘဲန် မျုဝ်။ အန် ဇဝ် ဘော ဒွါ ဒီ အာဒါနေလ တဲး အန် နပ် ဆီဖဝ် ပီ ဘျ ဇဝ်ဖြာ၊ နပ် ဒီ ကာလာင် လွင် ဒါင် ပီ မ့ဘာဝ် အီ။

18 ဒေါ ဟဲ့ နုဝ့် အူယ် ဆီနမ်၊ ဟဲ့ ဇမ် ခဲ့ ပွက့် ခုန်ဒီခမ် တွိုန်၊ အာဆာဘေနာတ် ဘော ဒိုဝ်း ခဲ့ ကွယ် ဂေ ကာညူမ် ဘောကာဂ့လျီတ်၊ တဲး ဂေ ဟာဝ် ဒီ အာတ့် ခုန်ဒီခမ် အာနေဘူခတ်နေစာ တွိုန်။ 19 ခုန်ဒီခမ် မိူဝ် ဒီမွှတ် ကာလာင် ဒီ ဂေ ဒွန် အီ။ န့ ဘော မုး အာဒါနေလ၊ အာဟာနာနီယာ၊ အာမီဆေလာ ဘော အာဇာရီယာ တွိုန် အီ လဝ့် နဝ်း ခုန်ဒီခမ် လွှိုမ် ဂေ ကာညူမ် အီ ဟဝ်။ ပါယ် တီ ဂေ မိူဝ် ပွိုန် ဒီ ဘဲန် ဒဲစေန့် ခုန်ဒီခမ်။ 20 ခုန်ဒီခမ် ပီ ဘော ဒီမွှတ် မျုဝ် မှဝ် အာဝ် တဝ်း၊ ဂေ ဖွုန် ဝီ တီ၊ ဂေ ဘော နပ် ဒီ ကာလာင် လွှိုမ် ဂေ ဒူအီ အီ မိုဝ်း အာငျာန် ဘော ဂေ အီ မုး ဒါ ဘေဒါင် အီ ကွယ် ခဲင် မိူင် ခုန်ဒီခမ် ဒွန် နာ ဒွန် ပ့လုဝ့်။ ဂေ ဘော နပ် လွှိုမ် ဒူအီ ဂေ တီ ဂိုဝ် ဘုန်။

21 အာဒါနေလ ဘော ကွယ် ခဲင် ဟုဝ် ခုန်ဒီခမ် ကော ဇမ် ဒေါ တး ခုန်ဒီခမ် အာဆာယ်ရတ် အီ အိုပ် မိူင် ဘီရာဆီ၊ ကာဂုဝ်း ပဲ မိူင် ဘာဘဲ တွိုန်။