1 ခုန်ဒီခမ် အာနေဘူခတ်နေစာ ဟဲ့ အိုပ် မိူင် ဘာဘဲ အာဒါ အာ ဆီနမ်၊ အန် ဘော အိတ် မ့ဘာဝ်။ လွင် ပီ မ့ဘာဝ် အန် တီ တဲး နဝ်း မှဲ ဒီ အန်၊ တူ တဲး အန် ပွိုန် ဒီ အိတ်။ 2 ပါယ် တီ အန် ဘော စ်ု တဲး ဂေ ဒဲ့ ဂေ ဒူအီ အီ မိုဝ်း အာငျာန် ဘော ဒါ ဆာရာ အီ နပ် ဒီ မဲန် ဘေဒါင်၊ ဒါ ဆာရာ အီ နပ် ဒီ ဘူင် မျလှယ့် ဘော ဒါ ဆာရာ အီ ဘိုင် ကာနမ်၊ တဲး ဂေ ကာလာင် လွင် ဒါင် ပီ မ့ဘာဝ် အန်။ ဂေ ဟဲ့ တး ကွယ် နာ အာတ့် ခုန်ဒီခမ်၊ အန် မိူဝ် ကာလာင် ဒီ ဂေ လွင် ပီ မ့ဘာဝ် အန်။ 3 အန် တဝ်း၊ “အုဝ် ဟဲ့ ကာပိုန့် ကာဆဝ် ကူပ် ပီ မ့ဘာဝ် အုဝ်။ အုဝ် မိူဝ် ဆီ နပ် လွင် ဒါင် ပီ မ့ဘာဝ် အုဝ် တီ။”

4 ဒူအီ ဂေ တွိုန် မိူဝ် ကာလာင် ဂြုဝ်း အာရာမ် ဒီ ခုန်ဒီခမ် တဝ်း၊ “တဲး အာဆာက် မဲ ခုန်ဒီခမ် တာင် တူင့် ကာဆဝ်။ မှာန့်၊ တဲး မဲ ကာလာင် ပီ မ့ဘာဝ် မဲ တီ ဒီ ယေ။ ယေ ဒီ ဝီ ကာလာင် ပီ ပါယ် လွင် ဒါင် အန်။”

5 ခုန်ဒီခမ် ဝီ တဝ်း ဒီ ဂေ၊ “အုဝ် ဟဲ့ ဟွတ့် ဆုင်ဖျာတ် ခဲင် နဝ်း အုဝ်၊ ဘေ လုဝ် ကာလာင် လွင် ပီ မ့ဘာဝ် အုဝ် တီ ဘော ပီ ပါယ် လွင် ဒါင် အန်။ ဆေ ဘေ ယီ တူ နပ် ဒီ ကာလာင်၊ ဘေ ဒီ ကာဒုး အီ ကာဒဲပ် ဒုဝ် ဘေ ဘဲန် ဒီဂ်ု ဘဲန် ဒီဂ်ု။ ကာင် ဘေ မိူဝ် ဒီ ကာပျာတ့် လိုဝ်။ 6 ဆေ ဘေ ယီ ပဲ ဒီ ကာလာင် ပီ မ့ဘာဝ် အုဝ် ဘော နပ် ဒီ ကာလာင် လွင် ဒါင် အန်၊ ဘေ ဒီ ဘော ပွိုန် ရုး အန် ကိူန် ကာဆဝ်၊ ပွိုန် ဘော ဆာရေ ဘော အာဖုင် ဒင်ခုဝ် တာင်။ ခုဝ်၊ ဒေါ တီ နီ တဲး ဘေ စုး ဒီ ကာလာင် လွင် အန် တီ။”

7 ဒူအီ ဂေ တွိုန် ပီ ဝီ ကာလာင် ဒီ ခုန်ဒီခမ် တဝ်း၊ “မှာန့် မဲ ခုန်ဒီခမ် ကာလာင် ပီ မ့ဘာဝ် မဲ ဒီ ယေ။ ယေ ဒီ ဝီ ခဲ ပီ ပါယ် ဆီဖဝ် အန် ဒီ မဲ။”

8 ပန် အန် တီ ခုန်ဒီခမ် ပီ ဝီ တဝ်း၊ “အုဝ် ဟဲ့ နပ် ဆီချာ၊ ဘေ ခြာမ် ဒီ ဘူင် တဲး အာခြာဝ် အန် ဝဲ လှေန့် ကူပ် ဟဲ့ နပ် ဘေ ပဲ့ ဟဲ့ ဆုင်ဖျာတ် အုဝ် ခဲင် နဝ်း အုဝ်။ 9 ဘေ ဟဲ့ နပ် ဆီချာ၊ ဆေ ဘေ တူ ပဲ ဒီ ကာလာင် ပီ မ့ဘာဝ် အုဝ်၊ ဘေ ဒွန် အီ ဒီ ကာဒုး ဒီ ခမ် မှာပ် အူ မျုဝ်။ ဘေ ဟဲ့ ဟွတ့် လာယ် ဖြူမ်၊ ဝီ ဟြေတ့် ဂြုဝ်း အီ ဂုဝ့် ဂဲ့၊ ဂြုဝ်း အီ တူ မှာန်၊ ဝီ ကာလာင် ဒီ အုဝ်။ ဘေ ဆီ ဘူင် တဲး အာခြာဝ် အန် လှေန့်၊ တဲး ဘေ ဘျွင် ပီ ဆုင်ဖျာတ် အုဝ်။ ပါယ် တီ တဲး ဘေ ကာလာင် လွင် ပီ မ့ဘာဝ် အုဝ် တီ။ ဆေ ဘေ ကာလာင် ပါယ် တီ အုဝ် ဒီ ဘော နပ်၊ ဘေ ဟဲ့ ပွိုန် ခဲ ပီ ပါယ် လွင် ဒါင် အန်။”

10 ဒါ ဆာရာ ဂေ တွိုန် မိူဝ် ဝီ တဝ်း ဒီ ခုန်ဒီခမ်၊ “ဒူအီ အီ ဒီ နပ် ဒီ ကာလာင် လွင် ပီ ဆီ နပ် မဲ တီ၊ ဒဲင် ကာဒါယ် နီ န့ တူ မိုဝ်း ခေါ အူ ဝီ။ ပီ ဘော မုး ခုန်ဒီခမ် ကာဒင် မှဝ်၊ အန် ပီ ဘော မိုဝ်း အာဖုင် ဒင်ခုဝ် တာင် ခဲ့ မှဝ်၊ န့ တူ မိုဝ်း ခေါ အူ ဝီ အီ ဟဲ့ ဒွိုမ် ဒီမွှတ် ဂေ ဒါ ဆာရာ အီ မိုဝ်း အာငျာန်၊ ဒါ ဆာရာ ဘေဒါင် ဘော ဒါ ဆာရာ အီ ဘိုင် ကာနမ် ပါယ် တီ။ 11 လွင် ပီ စ်ု မဲ ခုန်ဒီခမ် ယေ ဘူင်၊ န့ ဟဲ့ လိုက် ဟဲ့ ညှာပ် ကာဆဝ်။ အာဝ် မိုဝ်း ဒူအီ အီ နပ် ဒီ ဘူင်။ န့ မိုဝ်း မီ ဇဝ် ပီ ကြိုပ် အေ ဒူအီ အီ နပ်။ ဂေ ယီ တူ ကွယ် ရိုမ် ဒူပ် အေ အာမျုဝ် ဒူအီ။”

12 ကူပ် ဂြုဝ်း ပီ ကာလာင် ဂေ တီ၊ န့ ဘော တဲး ခုန်ဒီခမ် ရူ ကာဆဝ်။ အန် မိူဝ် ဘ့လေး အာမိင်၊ စ်ု အီ ငဝ်း ဝဲန် တူတ့် ဒူအီ အီ မိုဝ်း အာငျာန်၊ အီ ကွယ် ခဲင် မိူင် ဘာဘဲ တွိုန်။ 13 ခုန်ဒီခမ် ဟဲ့ ဟွတ့် ဒွါ အာမိင် လွင် ဒီ ငဝ်း ယမ် ဂေ ဒူအီ အီ မိုဝ်း အာငျာန် တွိုန်၊ အန် ပီ ဝီ တဝ်း၊ တဲး ဘော အာဒါနေလ ဂေ ဂိုက် အန် ယမ်။

14 ဒေါ အန် တီ အာဒါနေလ ဘော ဟာဝ် ဒူင် ကွယ် အာရီအုဝ်။ အန် မုး ဒူအီ အီ ယဲတ့် ဒါ ဆိုက် အီ ဘ်ု ခုန်ဒီခမ်။ အန် မုး ဒါ အီ လုဝ် ဘူင် ပီ စ်ု ခုန်ဒီခမ်၊ တဲး အန် ငဝ်း ယမ် ဒူအီ အီ မိုဝ်း အာငျာန် ဂေ တွိုန်။ အာဒါနေလ မိူဝ် ကာလာင် ဒီ အန် ဂြုဝ်း အီ မိုဝ်း အာငျာန် ဘော ဂြုဝ်း အီ မွှိုမ် ထူမ်။ 15 အာဒါနေလ ဘော ဒီမွှတ် အာရီအုဝ် တဝ်း၊ “မှဝ် န့ ပါယ် အာမိင် ခုန်ဒီခမ် တီ ပီ ဆော ညှာပ် ကာဆဝ်။း” ဟဲ့ ဟွတ့်၊ အာရီအုဝ် ဝီ ကာလာင် ပီ ပါယ် လွင် ဒါင် အန် ဒီ အာဒါနေလ။ 16 ပါယ် တီ အာဒါနေလ ဝီ ဟာဝ် ဒူင် ကွယ် ခုန်ဒီခမ်၊ ဝီ မှာန့် တဲး ခုန်ဒီခမ် နှဝ့် ပေါ အီ စဲက်၊ တဲး အန် ပွိုန် ဒီ ကာလာင် လွင် ပီ မ့ဘာဝ် ခုန်ဒီခမ် တီ။

17 ဟဲ့ ဟွတ့်၊ အာဒါနေလ ဘော ဝီ ဝေန့် ဒီ ကာင် အန်၊ ဝီ ကာလာင် လွင် အန် တီ ဒီ ဂေ ဂိုက် အန် အီ မုး အာဟာနာနီယာ၊ အာမီဆေလာ ဘော အာဇာရီယာ တွိုန်။ 18 အန် စ်ု ဂေ တဲး ဂေ ဆာခိုဝ် ဒီ ဇဝ်ဖြာ အီ ကွယ် ခဲင် ဂါင်ဟြာဝ်၊ တဲး အန် ဂေဇူ ဂေ ဘော ဘျ ဒီ ဂေ လွင် ဒါင် ပီ မ့ဘာဝ် ခုန်ဒီခမ်၊ ကွဲ့ တဲး ဂေ ယမ် ဒူပ် ဒူအီ အီ မိုဝ်း အာငျာန် ခဲင် မိူင် ဘာဘဲ။ 19 ခဲင် မှိုဝ် တီ လွင် ဒါင် အန် ဘော လိုဝ်း ဆီချာ ဒီ အာဒါနေလ ဒူပ် ပီ ဘျ ဇဝ်ဖြာ ဒီ အန်။ ပန် တီ အာဒါနေလ ဘော ဝီ ကာလာင် ဂုင် ဒါင် ဒီ ဇဝ်ဖြာ အီ မိုဝ်း အာဖုင် ဒင်ခုဝ် တာင်။

20 အန် တဝ်း၊ “အိုယ် မဲ ဇဝ်ဖြာ၊ မဲ ဘော မိုဝ်း အာငျာန် ဘော ပွုန် တာင်။ မဲ မိူဝ် ကာအာပ် ဒူအီ အိူပ် မျုက် မဲ ဆေဆေ ဒွန် စုဝ် ဒွန် ဘာန်။

21 ဇဝ်ဖြာ ဘော ပွိုန် ဘျွင် ပီ ပါယ် အာခြာဝ် အန်။ အန် ဇဝ် ဘော ပွိုန် ဘ့လွာ့ စုဝ်း ခုန်ဒီခမ်၊ ပီ ဝီ ပွိုန် ဒါင် ခုန်ဒီခမ်။ အန် ဇဝ် ဘော နပ် ဒီ ဒွါ အာငျာန် ဒီ ဒူအီ။ အန် ဘော နပ် ဒီ ဒွါ အီ ကာလှုး ဒီ နဝ်း ဒီ ဒူအီ အီ မိုဝ်း အာငျာန်။

22 အန် ဇဝ် မိူဝ် ဟဲ့ ဘျ အီ ခိုက်ခမ် ဒီ အုဝ်။ အန် ဘော နပ် တူတ့် အီ ကွယ် ခဲင် အပ် ဝွင့်။ ဘ့လာင် ဘော ကွယ် ရိုမ် ဒူပ် အန်။

23 ဇဝ်ဖြာ ဘော မုး ဇဝ်ဖြာ ပီ ကြိုပ် ဂုန့် ဒင် အုဝ်။ အုဝ် ဒါင် ဂုင် ဂေဇူ ဒီ မဲ ဇဝ်ဖြာ ဘော ရုဝ်ဆေ မဲ ဇဝ်။ မဲ ဇဝ် ဟဲ့ ဒွါ အာငျာန် ဘော ပ့လူမ် ဂေ ဟဲန့် ဒီ အုဝ်။ မဲ မိူဝ် ဟဲ့ ထူမ် ဂြုဝ်း ပီ ဆာခိုဝ် ယေ ဘော ဘျ တဲး အုဝ် နပ် လွင် ပီ ဒီ လုဝ် အုဝ် ဝီ ကာလာင် ဒီ ခုန်ဒီခမ်။”

24 ပန် အန် တီ အာဒါနေလ ဘော ဝီ ဟာဝ် ဒူင် ကွယ် အာရီအုဝ် အီ မုး ဒူအီ ပဲ့ ဟဲ့ စ်ု ခုန်ဒီခမ် တဲး အန် ဘဲန် ဒါ အီ ငဝ်း ယမ် ဒူအီ အီ မိုဝ်း အာငျာန် ဂေ တွိုန်။ အန် ဘော ကာလာင် ဒီ အာရီအုဝ် တွိုန် တဝ်း၊ “အာဝ် လုဝ် ငဝ်း ယမ် ဒူအီ ဂေ နီ။ တဲး အုဝ် ဟာဝ် ဒူင် ကွယ် ခုန်ဒီခမ်။ အုဝ် အီ ဒီ ကာလာင် လွင် ဒါင် ပီ မ့ဘာဝ် ခုန်ဒီခမ်။”

25 အာရီအုဝ် မိူဝ် ပီခြန် အန် ဒီ တိုယ် အာဒါနေလ ဟာဝ် ဒူင် ကွယ် ခုန်ဒီခမ် အာနေဘူခတ်နေစာ အူ ဇေန့်။ အန် ဘော ကာလာင် ဒီ ခုန်ဒီခမ် တဝ်း၊ “အုဝ် ဟဲ့ ယိုဝ် ဒူအီ ဟဲဘြဲ အူ ဝီ ပီ မှေတ့် တး အေ တွိုန်။ အန် ပွိုန် ကာလာင် လွင် ဒါင် ပီ မ့ဘာဝ် မဲ ခုန်ဒီခမ် တာင်။”

26 ခုန်ဒီခမ် မိူဝ် ဝီ ကာလာင် ဒီ အာဒါနေလ အီ ဘော စိူဝ် အာဘေလထေဆာစာ။ အန် တဝ်း၊ “မဲ နပ် ဒီ ကာလာင် ပီ မ့ဘာဝ် အုဝ် ဘော ခဲ လွင် ဒါင် အန်။း”

27 အာဒါနေလ ဝီ တဝ်း ဒီ ခုန်ဒီခမ်၊ “မဲ ခုန်ဒီခမ် တာင်၊ န့ ဘော မုး ဒူအီ အီ မိုဝ်း အာငျာန် ဘော မုး ဒါ ဆာရာ ဘေဒါင် ဘော ဒါ ဆာရာ အီ ဘိုင် ကာနမ်၊ အာဝ် မိုဝ်း ခေါ အူ ဝီ အီ နပ် ဒီ ကာလာင် အီ ဟဲ့ ခိုက်ခမ် ကာဆဝ် ပီ ဒီမွှတ် မဲ ခုန်ဒီခမ် တီ။ 28 မာလဲ၊ န့ မိုဝ်း မီ ဇဝ်ဖြာ အူ ကာဒင် အီ ကွယ် ခဲင် ဂါင်ဟြာဝ်၊ အီ နပ် ဒီ ကာလာင် လွင် အီ ဟဲ့ ခိုက်ခမ် ကာဆဝ် တီ။ အန် ဇဝ် တီ ကာလာင် တဲး မဲ ခုန်ဒီခမ် အာနေဘူခတ်နေစာ ယိုဝ် လွင် အီ ဒီ ဘုဝ် ဘဲန် နာ အာတ့် နီ ဟာဝ်။ ဒေါ တီ နီ အုဝ် ဒီ ကာလာင် လွင် ပီ မ့ဘာဝ် မဲ ခုန်ဒီခမ် ဘော ပဲ့ ဟဲ့ ယိုဝ် မဲ ဒေါ ဟဲ့ အိတ် မဲ။

29 အိုယ် မဲ ခုန်ဒီခမ်၊ ဒေါ ဟဲ့ ပွိုန် မဲ ဒီ အိတ်၊ မဲ ဟဲ့ မ့ဘာဝ် လွင် အီ ဒီ ဘုဝ် ဘဲန် ဝါယ် နီ။ ဇဝ်ဖြာ ဟဲ့ ဘျ လွင် အီ ဟဲ့ ခိုက်ခမ် ကာဆဝ် တီ။ အန် ဘျ န့ ဒီ ပါယ် မှဝ် နာ အာတ့် ဟာဝ်။ 30 ဒေါ တီ နီ အုဝ် နပ် ဘော ယိုဝ် ဆီချာ။ လွင် အန် တီ အာဝ် မုး ကူပ် မိုဝ်း အုဝ် အာငျာန် လွှိုမ် အီ ဟဝ်။ န့ ယီ မုး ကူပ် ဇဝ်ဖြာ ဆီ တဲး မဲ နပ် လွင် အန် တီ၊ တဲး မဲ နပ် လွင် ပဲ့ ဟဲ့ ကာဖာ မဲ။

31 မဲ ခုန်ဒီခမ် တာင်၊ မဲ ယွတ် ဘော ယိုဝ် အာရိုပ် ရာင် အီ ဟဲ့ တာင် ကာဆဝ် အီ ကွယ် နာ အာတ့် မဲ။ န့ ဘော မိုဝ်း အာရူင် အီ ဘ့လာင် ကာဆဝ် ဘော မွှိုမ် ယုဝ် ကာဆဝ်။ 32 ဂိန့် အန် ဘော မုး ခြိဝ် ဇဲတ်။ ဘင်နဝ်း အန် ဘော ဒဲ အန် ဘော အာ ဘ့လာက် မုး ရွိုန်။ ဝတ့် အန် ဘော ဆီပူင့် အန် ဂေ ဂိုမ် တာင် အန် ဘော အာ ဘ့လာက် ဘော မုး ဘွင့် ဒေန့်။ 33 ဘူဂိုဝ်း အန် ဘော အာ ဘ့လာက် ဘော မုး ဟိန်။ ပ့လဝ် အန် ဘော မုး ဟိန် အူ ကာတဲ၊ ကာဒါယ် ပေါ အူ ကာတဲ။ 34 ဒေါ ဆီငျာ ယွတ် မဲ ခုန်ဒီခမ် ဒီ အာရိုပ် ရာင် တီ၊ န့ ဘော မိုဝ်း မာဝ် တာင် ကာဆဝ် အူ ဘူင့် အာဝ် မိုဝ်း အာဆေ ဝိုန့်။ န့ ဘော စုဝ်း ဒဲင် ပ့လဝ် အာရိုပ် ရာင် တီ အီ မုး ဟိန် အူ ကာတဲ ဘော ကာဒါယ် အူ ကာတဲ။ န့ ဘော တဲး အာရိုပ် ရာင် တွိုန် ကာဘက် ကာလာတ့် တူတ့်။ 35 ဒေါ အန် တီ အူ ဇေန့် အီ မုး ဟိန်၊ ကာဒါယ် ကာပိတ်၊ ဘွင့် ဒေန့်၊ ခြိဝ် ဂေ ရွိုန်၊ န့ ဘော ကာလာတ့် ကာမုန် ကော နှဲန် ကာပုး ပီ ညဲတ့် အီ ဒီ အူင့် ကာင်နဝ်း ဒေါ မုး အာခြာဝ် ဒီယာင်။ ခုန် ဘော ဝီ တး ဘုတ် ကာမွတ့် အန် တီ၊ ကွဲ့ ဟူ တဲး န့ ဆီ မိုဝ်း ပန် အန် မာဆေ။ မာလဲ၊ မာဝ် အီ စုဝ်း တး ဒိုဝ် အာရိုပ် ရာင် တီ ယီ ဝီ ကြဲ ဒီ တာင်၊ ကော ဝီ ဘဲန် နွန် တာင်၊ အီ နုဝ့် ဒဲင် ကာဒါယ် နီ။

36 အာတီ မုး ပီ မ့ဘာဝ် မဲ၊ မဲ ခုန်ဒီခမ် တာင်။ ဒေါ တီ နီ အုဝ် ဒီ ဝီ ကာလာင် ပီ ပါယ် လွင် ဒါင် အန်၊ တဲး မဲ ထူမ်။ 37 မဲ ခုန်ဒီခမ် ဟဲ့ မိုဝ်း ပွုန် တာင် လွှိုမ် ခုန်ဒီခမ် ဘောကာဂ့လျီတ်။ ဇဝ်ဖြာ အီ ကွယ် ခဲင် ဂါင်ဟြာဝ်၊ အန် ဟဲ့ ဒါင် တဲး မဲ ဘဲန် ခုန်ဒီခမ်၊ တဲး မဲ မိုဝ်း အာဖုင် ဒင်ခုဝ်။ 38 အန် ဇဝ် ဟဲ့ တဲး မဲ အိုပ် ဘော ဒူအီ ဘော ဒုဝ် ဆတ်ဒါဝါ ဘောကာဂ့လျီတ်၊ တဲး မဲ အိုပ် ဘော မာဒုဝ် ပြဲ ဂေ မာဆိမ် ဘော တူတ့်။ ပါယ် တီ မဲ ပီ ဂိန့် ခြိဝ် အာရိုပ် ရာင် တာင် တွိုန်။

39 ဝါယ် အန် တီ န့ ဒီ ဝီ မိုဝ်း မိူင် ပေါ အူ မိူင်။ န့ ယီ တူ မိုဝ်း ပွုန် တာင် ခဲ့ မိူင် ပဲ့ ဟဲ့ အိုပ် မဲ ခုန်ဒီခမ်။ ဝါယ် အန် တီ ပီ ဒီ ဝီ မိုဝ်း မိူင် ပေါ အူ မိူင်။ ဟဲ့ မုး မိူင် ဟာအူယ် အီ မုး မိူင် ပီ ဘွင့် ဒေန့် အီ ဒီ ဝီ အိုပ် ဒွန် မိူင် ဒဲင် ကာဒါယ် နီ။ 40 ဝါယ် အန် တီ ပီ ဒီ ဝီ မိုဝ်း မိူင် မ့ဖွုန်၊ အန် ဒီ မိုဝ်း ပ့လူမ် မိုဝ်း ဟဲန့် ပီ ဟိန်၊ ပွိုန် မး တဲး ဒွန် မျုဝ် ကာပျာတ့် လိုဝ်။ မိူင် တီ ဒီ ဝီ ပျာတ့် ဝဲန် တူတ့် မိူင် ဘြိမ် အီ ကွယ် ဒဲင် ကာဒါယ်။ 41 ဒေါ မ့ဘာဝ် မဲ ခုန်ဒီခမ်၊ မဲ ဟဲ့ ယိုဝ် ပ့လဝ် ဘော ကာနူ ပ့လဝ်။ အာဒါ အူ ပ့လုဝ့် မုး ကာဒါယ်။ ပေါ အူ ပ့လုဝ့် မုး ဟိန်။ အာတီ န့ ဘျ ဂေ ဒူအီ ခဲင် မာန် မိူင် တီ တူ လာယ် ဖြူမ် ရိုမ်။ ပီ မ့ဘာဝ် မဲ အီ မုး ဟိန် ကာဆူ ကာဒါယ် ကာပိတ် တွိုန်၊ န့ ဘျ ဒူအီ ခဲင် မာန် မိူင် တီ၊ ဂေ ဒီ မိုဝ်း ဟဲန့် မိုဝ်း ပ့လူမ် ပီ ဟိန် တီ။ 42 ကာနူ ပ့လဝ် အီ မုး ဟိန် အူ ပ့လုဝ့် ဘော ကာဒါယ် ကာပိတ် အူ ပ့လုဝ့် တွိုန်၊ န့ ဘော မုး မာန် မိူင် အာဒါ အူ ဘ့လာက် ဒီ မိုဝ်း ပ့လူမ် မိုဝ်း ဟဲန့်။ အာဒါ ပေါ အူ ဘ့လာက် ဒီ ဘော န့စမ်၊ အာဝ် မိုဝ်း ပ့လူမ် ဂေ ဟဲန့်။ 43 ပီ မ့ဘာဝ် မဲ အီ မုး ဟိန် အီ ဟဲ့ ကာဝ်ု ကာဆူ ကာဒါယ် ကာပိတ် တွိုန်၊ န့ ဘော မုး ဒူအီ ခဲင် မိူင် တီ အီ ဟဲ့ ကာဝ်ု ဘဲန် မျုဝ် ဘဲန် မျုဝ်၊ တူ ဘဲန် အူ နဝ်း အူ ဖွိုမ်။

44 အာခြာဝ် ဒေါ မိုဝ်း မိူင် ဂေ တီ၊ ဇဝ်ဖြာ အီ အိုပ် တူတ့် ဒွန် မျုဝ်၊ အန် တဲး န့ ဘဲန် မိူင် ပေါ အူ မိူင် အီ တူ ကာပျာတ့် လိုဝ် ဒေါ မှဝ်။ န့ မိူဝ် တူ လိုဝ် တူ စှိုမ် ဒီ အီ ဟဝ်။ န့ ယီ တဲး မိူင် အီ ဟဝ် ကာပျာတ့် လိုဝ် တူတ့်။ အီ မုး မိူင် ကာမာယ် တီ၊ န့ ယီ ဒီ ကွယ် ဆေဆေ။ 45 အာတီ မုး လွင် ဒါင် ပဲ့ ဟဲ့ မ့ဘာဝ် မဲ အီ မုး မာဝ် အူ ဘူင့် အီ တူ မိုဝ်း အီ ဝိုန့် တး။ န့ ဘော စုဝ်း ဒိုဝ် အာရိုပ် ရာင် အီ မုး ဟိန်၊ ဘွင့် ဒေန့်၊ ကာဒါယ် ကာပိတ်၊ ရွိုန် ဂေ ခြိဝ်၊ တဲး န့ ကော ကာပျာတ့် လိုဝ် တူတ့် တွိုန်။ ဇဝ်ဖြာ အီ မိုဝ်း ပွုန် တာင် ဟဲ့ ဘျ ဒီ မဲ ခုန်ဒီခမ် လွင် အီ ဒီ ဘုဝ် ဘဲန် နာ အာတ့် နီ ဟာဝ်။ ပီ မ့ဘာဝ် မဲ ဟဲ့ မှာန် အာခါခ်ု ဘော လွင် ဒါင် အန် ဟဲ့ မှာန်။ န့ ဒီ ဘဲန် ပါယ် တီ ဒွန် မျုဝ်။”

46 ဟဲ့ ဟွတ့် ပါယ် တီ ခုန်ဒီခမ် အာနေဘူခတ်နေစာ ဘော ဝီ မုတ် ကြိုပ် ဒီ အာတ့် အာဒါနေလ ဘော ဝီ စ်ု ဒဲစေန့် အန်၊ တဲး ဂေ ဒိုဝ်း ပီ ဒီ လှူ ဘော န့ကြိုဝ်း အုး ငှုန် ပီ ဒုဝ့် ဒီ ငဝ်၊ ဝီ လှူ ဒီ အန်။ 47 ခုန်ဒီခမ် မိူဝ် တဝ်း၊ “ဇဝ်ဖြာ ပီ ကြိုပ် မဲ တီ ဟဲ့ မုး ဇဝ်ဖြာ အီ ဘွတ် လွှိုမ် ဇဝ် ပီ ကြိုပ် ဒူအီ ဘောကာဂ့လျီတ်။ အန် ဟဲ့ မုး ဇဝ်ဖြာ အီ အိုပ် ခုန်ဒီခမ် ဘောကာဂ့လျီတ်။ အန် ဇဝ် မိူဝ် ဟဲ့ နပ် ဒီ ကာလာင် လွင် ပီ တူ ဒွိုမ် နပ် ဒူအီ။”

48 ခုန်ဒီခမ် မိူဝ် အာပ် ပွုန် ဒီ အာဒါနေလ၊ ဒွါ ဘော ရုး ဘော လက်ဆွင် အီ တာင် အီ ကိူန် ကာဆဝ် ဒီ အန်။ အန် မိူဝ် အာပ် တဲး အာဒါနေလ ဘဲန် ဒါ တာင် အီ အိုပ် မိူင် ဘာဘဲ တွိုန်၊ တဲး အန် ဘဲန် ဘော ဒါ ကာညာ အီ အိုပ် ဂေ ဒါ အီ မိုဝ်း အာငျာန် ဘောကာဂ့လျီတ် အီ ကွယ် ခဲင် မိူင် ဘာဘဲ။ 49 အာဒါနေလ ဘော မှာန့်၊ တဲး ခုန်ဒီခမ် ဒါင် အာဆာဒါရိက်၊ အာမေဆိက် ဘော အာဘေတ်နေကုဝ်၊ တဲး ဂေ ဘဲန် ဒါ ကာညာ အီ အိုပ် မိူင် ဘာဘဲ။ အီ မုး အာဒါနေလ၊ အန် ဘော ကွယ် ခဲင် ဟုဝ် ခုန်ဒီခမ်။