1 ဒေါ မုး ဆီနမ် အူယ် ဂိုဝ်၊ မာဂျီန် မ့ဖွုန်၊ ဆီငဲ မ့ဖန် အုဝ် ဟဲ့ ကွယ် ခူပ် ဘ့လဲင် အိုမ် ခေဘာ ဒူပ် ဂေ ဒူအီ အာယူဒါ ပဲ့ ဟဲ့ မှေတ့် ဟာဝ် ဂေ တွိုန်။ ဒေါ အန် တီ ဂါင်ဟြာဝ် ဘော န့ ဝိုဝ်း။ အုဝ် ဘော ယိုဝ် ပီ ဘျ ဇဝ်ဖြာ ဒီ အုဝ်။

2 ဒေါ ဘုဝ် ဘဲန် လွင် အန် တီ၊ န့ ဘော မုး ဝါယ် တး မှေတ့် ဂေ ခုန်ဒီခမ် အာယောယာခိမ် အာဒါ ဖန် ဆီနမ်။ 3 ဒေါ ကွယ် အုဝ် ဒီ ခူပ် ဘ့လဲင် အိုမ် ခေဘာ ခဲင် မိူင် ဘာဘဲ၊ ဇဝ်ဖြာ ဘော ကာလာင် ဂြုဝ်း ဒီ အုဝ်။ ဇဝ်ဖြာ မိူဝ် ဟဲ့ အိုပ် အုဝ် အီ မုး ဒါ အီ လှူ ဒီ ဇဝ်ဖြာ အီ စိူဝ် အာအေဆေခေန် အီ မုး ဂွန် အာဘူစီမီ။

4 အုဝ် ဘော ယိုဝ် ခုန် တာင် ဟဲ့ တး ဘ့လာက် နာ ကွာ။ န့ ဘော မိုဝ်း ဘော န့အု အီ တာင် ကာဆဝ် ဘော ဟမ် ကာနမ် ဘော ပ့လ မ့ပ့လေတ့်။ န့ ဘော မိုဝ်း ဘော ကာတာန် ငဝ် ကုး ဘ့လိဝ် ဘ့လိဝ်၊ အာဝ် ကာဒတ် ဒေါ မှဝ်။ နာ ကာတဲ ငဝ် တီ ပီ ဝီ မိုဝ်း အူ မျုဝ် အီ ပီ ဘွင့် ဒေန့်။ 5 ခဲင် ကာတာန် ငဝ် တီ န့ ပီ ဝီ မိုဝ်း ဒုဝ် အီ မိုဝ်း အာဆာက် ဖွုန် ဒုဝ် အီ ကာပ့လုး တး။ အာရိုပ် ဂေ ဘော ပီ အာရိုပ် ဒူအီ။ 6 ဒုဝ် ဂေ တီ၊ အူ ဒုဝ် မိုဝ်း နာ ဖွုန် နာ၊ မိုဝ်း ဖျီင် ဖွုန် ဘူင့်။ 7 ပ့လဝ် ဂေ မိူဝ် ဆိူဝ်။ ဂိပ် ပ့လဝ် ဂေ ဘော ပီ ဂိပ် ပ့လဝ် ဂွန် မက် အီ ဟဲ့ ကာလ မာဘြိဝ် ပီ ဘွင့် ဒေန့် ပဲ့ ဟဲ့ ဖ ကာမာယ်။ 8 ဒဲင် မိုဝ်း ဂေ နာ ဖွုန် ဘ့လာက် ဘော ဖျီင် ဖွုန် ဘူင့်၊ ဂေ ပီ ဝီ မိုဝ်း ဘော ဒဲ အီ ပီ ဒဲ ဒူအီ ပေါ ဖွုန် ဘူင့်၊ ဝီ လေး ခြိုမ် ဖျီင် ဂေ။ 9 ဂေ ဒွန် ဒုဝ် ဟဲ့ ဘ့လး ဖျီင် ဂေ အာဒါ အာ ဘူင့်။ ကာဒဲ့ ဖျီင် ဂေ ဘော ဒွန် ဒုဝ်၊ န့ ဘော လာယ် ကာဇာပ် လာယ် ထိပ်။ ပါယ် တီ ဒေါ ဘိုန့် ဟာဝ် ဂေ တွိုန်၊ ဂေ မိူဝ် တူ ဝီ မာငး ယွတ်၊ ဂေ ဘော ဘိုန့် ဟာဝ် ဆိူဝ် နာ အာတ့်။

10 ဒုဝ် ဂေ တီ ဘော ဒွန် ဒုဝ် မိုဝ်း နာ ဖွုန် နာ အီ လာယ် ခါနှဲန်။ နာ ဂေ နာ အာတ့်၊ န့ ပီ နာ ဒူအီ။ နာ အာအး၊ န့ ဘော ပီ နာ မာခြင်ဆီ။ နာ အာဂ ဘော ပီ နာ မာမက်။ နာ ပန် ဘော ပီ နာ မာဂ့လာင်။ 11 ဒုဝ် ဂေ တီ ဘော ဒွန် ဒုဝ်၊ ဂေ ဘော ဘ့လး ဖျီင် ဂေ အာဒါ အာ ဘူင့်၊ တဲး ကာဒဲ့ ဖျီင် ဂေ ဝီ လာယ် ထိပ် လာယ် ကာဇာပ် ဒီ ဒွန် ဒုဝ်။ ဖျီင် ဂေ အာဒါ အာ ဘူင့် ဘော ဆီဘ့လိုက် ဒုဝ် ဂေ။ 12 ဒွန် ဒုဝ် မိူဝ် ဟာဝ် ဆိူဝ် နာ အာတ့်။ နဝ်း ဖွိုမ် ဇဝ်ဖြာ ဟာဝ် နာ မှဝ်၊ ဂေ မိူဝ် ဟာဝ် နာ တီ။ ဂေ မိူဝ် တူ ကာဘတ် ဒေါ မှဝ်၊ ယီ ပွိုန် ဟာဝ် ဒွန် ဘ့လာက်။ 13 အာရိုပ် ဒုဝ် တီ ဘော ပီ န့ကိုဝ် ငဝ်။ ဂေ ဘော မိုဝ်း အာရူင် အန် ပီ ငဝ် ကာဝှါင်။ ငဝ် တီ ဘော လဲ ဝိဝ် လဲ ဝေန့် ကာတဲ ဒုဝ် ဂေ တွိုန်။ ငဝ် တီ ဘော ကုး တာင်။ န့ ဘော မိုဝ်း ပ့လ မ့ပ့လေတ့် ဝီ လေး ခဲင် ငဝ် တီ။ 14 ဒုဝ် ဂေ တီ ဘော ကာဘ့လဲပ် ဝိဝ် ကာဘ့လဲပ် ဝေန့်။ ဂေ ဘော ခြန် ပီ ပ့လ မ့ပ့လေတ့်။

15 ဒေါ ဆီငျာ ယွတ် အုဝ် ဒုဝ် အီ မိုဝ်း အာဆာက် ဂေ တီ၊ အုဝ် ဝီ ယိုဝ် ကာလေန့် အူ ဘူင့် အီ ကွယ် ဒဲင် ကာဒါယ် ခူပ် ဒွန် ဒုဝ်။ 16 ကာလေန့် ဂေ တီ ဘော ဖွုန် ဘူင့်၊ အာရိုပ် ဂေ မုး အူ မျုဝ်။ ဒွန် ဘူင့် ပီ ဝီ မိုဝ်း အာရူင် မာဘြိဝ် ပီ အာရူင် ဆဲန့် ငျီန် ဝွင့် အီ ငဝ်း တာင် ကာဆဝ်။ ဒီ ကာလေန့် ဂေ တီ ဘော ဒွန် ဘူင့် ပီ ဝီ မိုဝ်း ကာလေန့် အန် ပေါ ဘူင့်။ 17 ကူပ် န့ ပါယ် တီ ကာလေန့် ဂေ တွိုန် ဘော ပွိုန် ကာလွှယ် ဟာဝ် ဘော ဖွုန် ဘ့လာက် ဖွုန် နာ၊ တူ လုဝ် ကာဘတ် ဝိဝ် ကာဘတ် ဝေန့်။ ဒုဝ် ဂေ တွိုန် ဟာဝ် နာ မှဝ်၊ ကာလေန့် ဘော ဟာဝ် နာ တီ။ 18 ခူပ် ဘာင် ကာလေန့် ဂေ တီ န့ ဘော စာ ဘော မွှိုမ် ယုဝ် ကာဆဝ်။ ခုဝ်၊ ရူပ် ဘာင် ကာလေန့် ဂေ တီ ဟဲ့ မုး တူတ့် ငါယ် ဒီလူယ်။

19 ဒေါ ဟာဝ် ဒုဝ် ဂေ တွိုန်၊ ကာလေန့် ဂေ တွိုန် မိူဝ် ဟာဝ် ဒူပ်။ ဒေါ န့ စုဝ့် ဟုဝ့် ဒုဝ် ဂေ တွိုန် ဒဲင် ကာဒါယ်၊ ကာလေန့် ဂေ တွိုန် မိူဝ် စုဝ့် ဟုဝ့် ဒူပ် ဂေ။ 20 နဝ်း ဖွိုမ် ဒုဝ် ဂေ တီ ဟာဝ် ဒီ မှဝ်၊ ကာလေန့် ဂေ တွိုန် မိူဝ် ဟာဝ် ဒူပ် ဒုဝ် ဂေ တီ အီ ဟဲ့ အိုပ် ကာလေန့် ဂေ တီ။ 21 ဆေ ဒုဝ် ဂေ တွိုန် ဟာဝ်၊ ကာလေန့် ဂေ တီ မိူဝ် ဟာဝ် ဒူပ်။ ဆေ ဒုဝ် ဂေ တွိုန် ဟီ ဂိူတ်၊ ကာလေန့် ဂေ တီ မိူဝ် ဂိူတ်။ ဆေ ဒုဝ် ဂေ တွိုန် ဟုဝ့် ခဲင် ဘ့လေန့်၊ ကာလေန့် ဂေ မိူဝ် ဟုဝ့် ဒူပ်။ ခုဝ်၊ နဝ်း ဖွိုမ် ဒုဝ် ဂေ တွိုန် ဟဲ့ ကွယ် ခဲင် ကာလေန့် ဂေ တီ။

22 ဒဲင် ဂိန့် ဒုဝ် ဂေ တွိုန် န့ ပီ ဝီ မိုဝ်း အာဒါ အူ မျုဝ်၊ အာရိုပ် အန် ပီ ဘ့လေန့်။ န့ ဘော မာဘြိဝ် ပီ မာဝ် မင်ပူင့်။ န့ ဘော မွှိုမ် အာမ် ဘော မွှိုမ် ယုဝ်။ 23 နာ ခြိုမ် အီ ပီ ဘ့လေန့် တီ၊ ဒုဝ် ဂေ တွိုန် ဘော ဘ့လး ဖျီင် ဂေ၊ တဲး န့ လာယ် ကာဇာပ် ဒီ ဒွန် ဒုဝ်။ ဝီ မိုဝ်း ဖျီင် ပေါ အာ ဒုဝ် အီ ဆီဘ့လိုက် ဒုဝ် ဂေ။ 24 ဒေါ ဟာဝ် ဒုဝ် ဂေ တီ၊ အုဝ် ဝီ ယိုဝ် ဟမ် ဒီ ဖျီင် ဂေ ဆီနန် ဆီနိူင် အာဟိူန် ပီ ဟမ် အိုမ် နမ်မုက်ဆာရာ။ န့ ပီ ဘော ဂြုဝ်း ဆီနန် ဂေ ဒါ ဆိုက်၊ ပီ ဘော ဂြုဝ်း ဇဝ်ဖြာ အီ အိုပ် တူတ့် ဒွန် မျုဝ်။ ဆေ ဂေ ဟီ ဂိူတ်၊ ဂေ မိူဝ် ဝီ ဘ့လေး လူင် ဖျီင် ဂေ။

25 ဟဲ့ ဟွတ့် ပါယ် တီ န့ ဘော ဝီ မိုဝ်း ဂြုဝ်း လေး ခဲင် ဘ့လေန့် အီ ကွယ် ဒဲင် ဂိန့် ဒုဝ် ဂေ တွိုန်။ 26 ခဲင် ဘ့လေန့် အီ ကွယ် ဒဲင် ဂိန့် ဒုဝ် ဂေ တီ၊ န့ ဝီ မိုဝ်း အာဒါ အူ မျုဝ် အီ ပီ အာရိုပ် မာလာင် ပဲ့ ဟဲ့ ဘူင် အီ တာ ဆဲန့် ငျီန် ဘ့လေန့်။ နာ ဒဲင် မာလာင် တီ န့ ပီ ဝီ မိုဝ်း အီ ပီ အာရိုပ် ဒူအီ။ 27 ပီ ပါယ် အာရိုပ် တီ၊ စုး ဒီ ညွယ် ဟုဝ့် နာ ဒဲင်၊ န့ ဘော ကာလ မာဘြိဝ် ပီ ဘွင့် ဒေန့် အီ ဆီ ကွယ် ခဲင် ငဝ်။ စုး ဒီ ညွယ် လူင် နာ ခြိုမ်၊ အာရူင် အန် တီ၊ န့ ဘော ပီ ငဝ် အီ ထွင် ဟာဝ် ဒွန် နာ ဒွန် ဘ့လာက်။ 28 ပီ ပါယ် အာရူင် အန် ဒီ ဘ့လာင်၊ န့ ဘော ပီ အာရူင် ခုန်မာယဲင် ဝါယ် စုဝ်း ဂ့လာယ်။

အာတီ မုး အာရူင် အာဖုင် ဒင်ခုဝ် ဇဝ်ဖြာ။ ဒေါ ယိုဝ် အုဝ် ပီ ဘျ ဇဝ်ဖြာ တီ၊ အုဝ် ဘော မုတ် ဂိုပ် ဘော ဝီ ယိုဝ် အီ ကာလာင် ဂြုဝ်း။