1 မိူင် ယေရူဆာလဲမ် အီ ဟဲ့ ဒွိုမ် မိုဝ်း ဒူအီ ကိူန် ကာဆဝ် ဟဲ့ ဝီ ဘဲန် ဒူင် ယေန် ဒူင် ငွင့် ဒူအီ။ မိူင် တီ ဟဲ့ ဒွိုမ် ဘဲန် ပီ အီဘိုန့် ပီ အိူပ် မျုက် ဒူအီ ဒွန် မျုဝ် ဒွန် ဇိုဝ်။ အန် ဟဲ့ ဝီ ဘဲန် ပီ ယာ ဆီပြး။ မိူင် တီ ဟဲ့ ဒွိုမ် ပီ ဒီဘျာ အီ စှိတ် အီ ကျ လွှိုမ် ဒူအီ ဒွန် မာန် ဒွန် မိူင်။ ဒေါ တီ နီ အန် ဟဲ့ ဝီ ဘဲန် မှာယ် အီ ဟဝ်။

2 မိူင် တီ ဟဲ့ ပီ ဒီဘျာ အူ ဝီ အီ ဟဲ့ ယာမ် ဒတ် ဒွင် ခိူန်။ အိုမ် ငါယ် အန် မိူဝ် ဟဲ့ ဟွယ် ဒီ ကာလာ အန်။ ခဲ့ ကွယ် ပါဝ် အန်၊ အာဝ် မိုဝ်း ခေါ အူ ဝီ အီ ဝီ တး လှဝ် နဝ်း အန်၊ တဲး နဝ်း အန် ဝီ ဒါခိုယ်၊ ဝီ နှိမ်။ ခဲ့ ကွယ် ဂိုက် အီ ကာလဝ့် အန် ဟဲ့ ကာလုဝ် ဒီ အန်၊ ဝီ ကာဖြူမ် ဒီ ဘဲန် ရန်ဆူ အန်။

3 ဂေ ဒူအီ ခဲင် မိူင် ယူဒါ ဟဲ့ ခမ် တဲး အီ မှေတ့် ဟာဝ် ဂေ ဘော ခါနှာပ် ဂေ၊ တဲး ဂေ ဘဲန် မှာယ် အီ ဟဝ်။ ဂေ ဘော လုဝ် ကွယ် ကာတဲ ဒူအီ အာမျုဝ် ဟဝ်။ ဂေ မိူဝ် တူ မိုဝ်း ဒူင် ဒီ တဲး ဂေ မိုဝ်း နဝ်း ယေန် နဝ်း ဒါခိုယ်။ ရန်ဆူ ဂေ မိူဝ် ဟဲ့ ဟွတ့် ရူပ် ဂေ၊ တဲး ဂေ ကာဒုး အာဖေ အာရေ ဘဲန် မျုဝ် ဘဲန် မျုဝ်။

4 န့တေန့် အီ ဟာဝ် ဒီ မိူင် ဇီအူန် ဘော ဘဲန် က့လိုဝ် ကူပ် အာဝ် မိုဝ်း ဒူအီ အီ ဟာဝ် ဒူပ် န့တေန့် တီ၊ အီ ဟာဝ် လိုပ် ဘ့လွယ်။ ဒီ ဘာင် မာလုဝ်း ခူပ် န့တေန့် တီ၊ အာဝ် မိုဝ်း ဒူအီ အီ လိုပ်။ ဂေ ဒါ အီ လှူ ဒီ ဇဝ်ဖြာ ဟဲ့ က့လိုဝ် ဟဲ့ ငှဝ်။ ဂေ ဂွန် ဒီဘျာ ဟဲ့ ဒုက် ကာဆဝ် ဒီ နဝ်း ဂေ။ ဒူအီ ခဲင် မိူင် ဇီအူန် ဟဲ့ က့လိုဝ် ဟဲ့ ငှဝ် ပါယ် တီ။

5 ရန်ဆူ ဂေ ဟဲ့ ဝီ ဘဲန် ဒါ ကာညာ အီ အိုပ် ဂေ။ ရန်ဆူ ဂေ ဘော ကွယ် ဒါခိုယ်။ ဇဝ်ဖြာ ဟဲ့ တဲး ဂေ ဇမ် ဒုက် ကူပ် မှာပ် ပဲ့ ဟဲ့ ဘူင် ဂေ ဟဲ့ ကိူန်။ ရန်ဆူ ဂေ မိူဝ် ဟဲ့ ဟွတ့် မှေတ့် ဟာဝ် တူတ့် လှုက်လှာန် ဂေ။

6 အာဖုင် ဒင်ခုဝ် မိူင် ယေရူဆာလဲမ် ဟဲ့ ဟွတ့် ဟြာယ် တူတ့်။ ဂေ ဒါ ကာညာ အီ အိုပ် မိူင်၊ ဂေ ဘော ပီ ဖိုင် မာဇ အီ တူ မိုဝ်း ပ့လူမ် ကူပ် တူ မိုဝ်း ပီ ဒီ ဟူမ်။ ဂေ မိူဝ် တူ မိုဝ်း ပ့လူမ် ဂေ ဟဲန့် ကူပ် ကာဒုး ဂေ ဒီ တဝ် ဒူအီ အီ ခုင်ခြး ဂေ။

7 ဒူအီ ခဲင် မိူင် ယေရူဆာလဲမ်၊ ဒေါ ကာဒုး ဂေ ဒုက် တာင် ဘော ဒေါ ဟဲ့ လဲ ဝိဝ် လဲ ဝေန့် ဂေ ဂေ ဝီ လှုဝ်း ကြုဝ်ကြာမ် ပီ ဒွိုမ် မိုဝ်း ဒွိုမ် ဘိုင် ဂေ အာတ့် နီ။ ဒေါ စှိုမ် ဂေ ဒူအီ ခဲင် မိူင် တီ ဒီ ရန်ဆူ ဂေ၊ န့ ယီ တူ မိုဝ်း အီ ဝီ စွယ် ဂေ ခေါ အူ ဝီ။ ရန်ဆူ ဂေ ဘော ယွတ် ဂေ၊ ဝီ နဲန ဘော ကာညး ဂေ ကူပ် ကြုဝ်ကြာမ် ပဲ့ ဟဲ့ စှိုမ် ဂေ။

8 ဒူအီ အီ ဒွိုမ် ရုဝ်ဆေ မိူင် ယေရူဆာလဲမ်၊ ဂေ ဝီ တဝ်း န့ မွှိုမ် ကာအိး။ ဂေ ဝီ လုက်တာယ် ဂေ ဒူအီ ခဲင် မိူင် ယေရူဆာလဲမ် ကူပ် ဟဲ့ ပီ ဂေ ဒူအီ ဂ့လ။ ခုဝ်၊ ဒူအီ ခဲင် မိူင် ယေရူဆာလဲမ် ဘော က့လိုဝ် ဘော ငှုန်၊ ဝီ မာငး ယွတ် ပေါ ဘ့လာက်။

9 မှာပ် ပီ ဘူင် ဂေ ဘော အီ တူ ဆီငါ ဘွတ် ဟဲ့ လိုဝ်း ဆီချာ။ ဂေ ယီ တူ ဝီ လှုဝ်း မှာပ် ပီ ဒီ လုဝ် ခမ် ဂေ။ ကူပ် န့ ပါယ် တီ ပီ စှိုမ် ဂေ တွိုန် ဟဲ့ မွှိုမ် ယုဝ် ကာဆဝ်။ န့ ယီ တူ မိုဝ်း အာဆေ အီ လှဝ် နဝ်း ဂေ၊ တဲး နဝ်း ဂေ ဝီ နှိမ်။ ရန်ဆူ ဂေ ဟဲ့ ဟွတ့် ပဲ ဒီ အိုပ် ဂေ။ ဂေ ဘော ဝီ မှာန့် တဲး ဇဝ်ဖြာ စွယ် ကာဝေ ဂေ။

10 ရန်ဆူ ဂေ တီ ဟဲ့ ဟွတ့် ဖာတ် ဒိုဝ်း တူတ့် ကြုဝ်ကြာမ် ဂေ အီ ဟဲ့ ငဝ်း ကာဆဝ်။ ဂေ မိူဝ် ဟဲ့ ယိုဝ် ဒူအီ အာမျုဝ် ဟဝ် ဟဲ့ တး လိုပ် ခဲင် ဟုဝ် ဇဝ်ဖြာ ဒူင် ဆီငါ ဘွတ်၊ ဒူင် ပီ ခြဲ ဇဝ်ဖြာ၊ တူ တဲး ဒူအီ အာမျုဝ် ဟဝ် တး လိုပ်။

11 ဒူအီ ခဲင် မိူင် တီ ဘောကာဂ့လျီတ် ဘော ယာမ် ဘော ငှုန် ဒေါ ဟြေတ့် ဂေ ပီ ဒီ ဟူမ်။ ဂေ ဘော ဒိုဝ်း ကြုဝ်ကြာမ် ဂေ၊ ဝီ ကာရဝ်း ပီ ဒီ ဟူမ်၊ တဲး ဂေ လွတ် ယမ်။ ဂေ ဘော ယာမ် ဒတ် တဝ်း၊ “အိုယ် ဇဝ်ဖြာ၊ မှာန့် တဲး မဲ ကာဝေ ယေ။ အီ ဟဝ် ဟဲ့ ဟွတ့် လုက်တာယ် ယေ။”

12 ဂေ ဘော ယာမ် ဘော ငှုန် ဒီ ဂေ ဒူအီ အီ တး ဝဝ့် ဒူင် တီ ဘော တဝ်း၊ “မှဝ် န့ ပါယ် ဒုက် ယေ အာဝ် ဒိုဝ် နဝ်း ဘေ။း အာဝ် မိုဝ်း အာဆေ အီ ဒွိုမ် ခမ် ဒုက် တာင် ပီ ဒုက် ပဲ့ ဟဲ့ ခမ် ယေ၊ ပဲ့ ဟဲ့ ဒွါ ဇဝ်ဖြာ ဒီ ယေ ဒေါ ဟဲ့ ရူ ကာဆဝ် အန် ဒီ ယေ။

13 အန် ဇဝ် ဟဲ့ တဲး ငဝ် တး လူင် ခဲင် ဘ့လေန့်၊ တဲး န့ ပီ ဟဲ့ ကာဆိုမ် ကာအာင် အုဝ်။ န့ ပီ အန် ဇဝ် ဟဲ့ ဒိန့် အုန် ယွတ့် ဂေ ခိူမ်။ ပ့လဝ် အုဝ် ဟဲ့ ဟွတ့် ဟာဝ် ခြေ။ န့ ဘော တဲး အုဝ် ဝီ ဝိဝ် နာ ပန်။ အန် ဇဝ် မိူဝ် ဟဲ့ ဘ့လေး ဝဲန် အုဝ်၊ တဲး န့ ဘော ဘဲန် နဝ်း လိုဝ် နဝ်း ဒီတဲတ် ဒီ အုဝ် ဒွင် ဝန် ဒွင် ခိူန်။

14 န့ ပီ ခဲ့ ကွယ် နာ တူ မွှိုမ် ပီ ဘူင် အုဝ်၊ အန် ဇဝ် ဟဲ့ ပက် ဟဲ့ ကျီန် ဘန် တဲး န့ ဘဲန် အဲ့မဝ်၊ ဟဲ့ ဝီ ဘ့လေး ဒဲင် ယ အုဝ်၊ တဲး အုဝ် ဒီလှး၊ ဝီ ပး အီ စန် ကာဆဝ်။ ဇဝ်ဖြာ ဟဲ့ အာပ် အုဝ် ဒီ ဂေ ရန်ဆူ အုဝ် ပီ တူ ပွိုန် ခြဲ အုဝ်။

15 န့ ပီ ဇဝ်ဖြာ ဟဲ့ ဝဲန် ဂေ ဒါ ဆိုက် အုဝ် ဘောကာဂ့လျီတ် အီ ကွယ် ခူပ် အုဝ်။ အန် ဇဝ် ဟဲ့ ဝီ ရဲန် ဂေ ဒါ ဆိုက် ပေါ အူ မျုဝ်၊ တဲး ဂေ ဝီ တး ကာဂုဝ်း ဒီ ဒါ ဆိုက် အုဝ် အီ ဆီ နှိုမ်။ အန် ဇဝ် ဟဲ့ ဝဲန် တူတ့် ဒူအီ အုဝ် အီ မုး ဒူအီ အာမျုဝ် ယူဒါ၊ တဲး န့ ပီ အီ ကြိတ် ဘ့လေ မာငုန်။

16 ကူပ် န့ ပါယ် တီ အုဝ် ကာဒုး ဒီ ယာမ် ဘော ပီရး အိုမ် ငါယ် အုဝ်။ န့ ယီ တူ မိုဝ်း အာဆေ အီ ပွိုန် ဘူင် တဲး န့ ဘြေ့ ဒီ နဝ်း အုဝ်၊ ဝီ တဲး နဝ်း အုဝ် ယေန်၊ တဲး အုဝ် ဝီ မိုဝ်း ပ့လူမ် မိုဝ်း ဟဲန့်။ ဂွန် အုဝ် မိူဝ် ဟဲ့ ဂိန် ဟဲ့ ဖ့လာန်။ ခုဝ်၊ ရန်ဆူ အုဝ် ဟဲ့ အွင်။”

17 န့ ပီ ဒူအီ ခဲင် မိူင် ဇီအူန် ဟဲ့ ဆူင့် ဒဲ ဂေ ဒဲ့ အီ တး စွယ် ဂေ။ န့ ယီ တူ မိုဝ်း ခေါ အူ ဝီ အီ တး စွယ် ဂေ။ ဇဝ်ဖြာ ဟဲ့ ဘ့လေး အာမိင် အာဒါ ဒူအီ အာမျုဝ် အာကူပ်၊ တဲး ဒူအီ အာမျုဝ် ဟဝ် အီ ကွယ် ရူပ် ဂေ ဝီ ဘဲန် ရန်ဆူ ဂေ။ မိူင် ယေရူဆာလဲမ် မိူဝ် ဟဲ့ ဘဲန် အီ မွှိုမ် ကာအိး။

18 ဇဝ်ဖြာ ယီ ဘူင် နာ မုး နာ မှာန်။ အုဝ် ယီ တူ ဆီ ဒူပ် ဒါရာ အန် ဇဝ်။ အုဝ် ဟဲ့ တဝ်း၊ “အိုယ် ဘေ ဒူအီ ဒွန် မျုဝ်၊ တဲး ဘေ ယွတ် ခဲ့ ဟဲ့ ဒုက် ကာဆဝ် အုဝ်။ ဂေ ဟဲ့ ဟွတ့် မှေတ့် ဟာဝ် ဂွန် ကာညူမ် ဘော ဂွန် ဒီဘျာ။”

19 အုဝ် မိူဝ် ဒဲ့ ဂိုက် အုဝ်။ မာလဲ၊ ဂေ ယီ ဝီ ဘူင် နာ စာဝ် ဒီ အုဝ်။ ဂေ ဒါ အီ လှူ ဒီ ဇဝ်ဖြာ ဘော ဂေ ဒါ တာင် အီ အိုပ် အီ ယဲတ့် ဂေ၊ ဂေ ဘော စှိုမ် တူတ့် အာဆာက် ဂေ ခဲင် မိူင် ဒေါ ဟာဝ် ဟြေတ့် ဂေ ပီ ဒီ ဟူမ်၊ ကွဲ့ တဲး ဂေ ယမ်။

20 အိုယ် မဲ ဇဝ်ဖြာ၊ မှာန့် တဲး မဲ ယွတ် ဒုက် ပဲ့ ဟဲ့ ခမ် အုဝ် နီ။ န့ ဟဲ့ ညှာပ် ကာဆဝ် ဒီ နဝ်း ဒီ ဖွိုမ် အုဝ်။ နဝ်း အုဝ် မိူဝ် ဟဲ့ ကာဟွာ့ ကူပ် မှာပ် ပီ ဘူင် အုဝ် ဟဲ့ ကိူန် ကာဆဝ်။ နာ ရေတ့် ကာင် န့ မိုဝ်း ရန်ဆူ အီ ငဝ်း ယမ် ဒူအီ။ နာ ခဲင် ကာင် မိူဝ်၊ ဟဲ့ မိုဝ်း မီ ဒူအီ ယမ်။

21 ဂေ မိူဝ် ဟဲ့ ယိုဝ် ပီ ယာမ် ပီ ငှုန် အုဝ် တီ။ မာလဲ၊ န့ ယီ တူ မိုဝ်း အာဆေ အီ ဘူင် တဲး န့ လှဝ် နဝ်း အုဝ်၊ တဲး နဝ်း အုဝ် ဝီ ယေန်။ ဂေ ရန်ဆူ အုဝ် ဘော ခူယ် ကာဆဝ် ကူပ် ဟဲ့ ဘူင် မဲ ဇဝ် တဲး ယေ ခမ် ဒုက် တာင် တီ။ အုဝ် မှာန့်၊ တဲး န့ ဇမ် ဆီငဲ ပီ ဒွိုမ် ကာလာင် အုန် မဲ ဇဝ်။ တဲး ဂေ ခမ် ပီ ပဲ့ ဟဲ့ ခမ် အုဝ် နီ။

22 တဲး မဲ ဇဝ် ဒမ် မှာပ် ဒီ ဂေ ကူပ် ဟဲ့ ဘူင် ဂေ နာ တူ မွှိုမ် ဒွန် မျုဝ်။ တဲး မဲ ဝီ ဒမ် မှာပ် ဒီ ဂေ၊ တဲး န့ ပီ ပဲ့ ဟဲ့ ဒမ် မဲ မှာပ် ဒီ အုဝ်။ အုဝ် မိူဝ် ဟဲ့ ယာမ် ဟဲ့ ငှုန် တာင် ကာဆဝ် ကော ဒီလှး၊ အာဝ် ဟူ မိုဝ်း ဟဲန့်။”