1 န့ ပီ အန် ဇဝ် ဟဲ့ တဲး န့အု ဝွင့် တး ပ့လိုက် မိူင် ဇီအူန်။ ကူပ် ဟဲ့ ရူ ဇဝ်ဖြာ ဒီ အန်၊ န့ ပီ အန် ဇဝ် ဟဲ့ ဒိုဝ်း အာဖုင် ဒင်ခုဝ် ဂေ ဒူအီ အီဆာရေလ၊ တဲး န့ စုဝ်း ခဲင် ဂါင်ဟြာဝ်၊ ဇမ် ဒဲင် ကာဒါယ်။ ဆီငဲ ဒေါ ရူ အန် ဇဝ် တီ၊ အန် ဘော ခမ် ဒီ ဝဲန် ဘော ဒူင် ဒီ ကွယ် အန်။

2 ဇဝ်ဖြာ မိူဝ် တူ ကာဝေ မာဆေ။ အန် ဘော ပျာတ့် ဝဲန် တူတ့် ဒူင် ကွယ် ဂေ လှုက်လှာန် အာကူပ်။ အန် ဘော ပျာတ့် ဝဲန် ဒူင် ချြီင် ဂေ ဒါ ဆိုက် အီ ရဲ အီ ဂွင့် မာန် မိူင် ဂေ။ မာန် မိူင် ဘော ဒါ ကာညာ အီ အိုပ် မိူင် ယူဒါ၊ အန် ဇဝ် ဟဲ့ တဲး န့ စှိုမ် ဆာရေ ဘော စုဝ်း ဒူင် တျီမ်။

3 နဝ်း ရူ ဇဝ်ဖြာ ဟဲ့ လေး ဟဲန့် ကာဆဝ်။ န့ ဘော ပီ အန် ဟဲ့ ဒဲပ် ဝဲန် ဒဲ ဂေ ဒူအီ အီဆာရေလ။ အန် ဇဝ် မိူဝ် ဒိူန် တူ စွယ် ဂေ ဒေါ တး ရန်ဆူ ဂေ။ နဝ်း ရူ အန် ဇဝ် ဟဲ့ ပီ ငဝ်။ န့ ဘော ပျာတ့် တူတ့် ဒွန် မျုဝ်။

4 အန် ဇဝ် ယေင် အ ပီ ရန်ဆူ နပ် ဒီ ဘူင်။ န့ ပီ အန် ဟဲ့ ဟွတ့် စုဝ့် ဒဲ အန် ငှာ ဒီ ဘန့်။ အန် ဟဲ့ ငဝ်း ဂေ ဒူအီ ပီ ဒွိုမ် ရွက့် အန်၊ ဘူင် တဲး ဂေ ယမ်။ မိူင် ယေရူဆာလဲမ် မိူဝ် ဟဲ့ ကာဆိုမ် ကူပ် ဟဲ့ ရူ ကာဆဝ် အန်။

5 ဇဝ်ဖြာ ဘော ပီ ရန်ဆူ ဟဲ့ တး ပျာတ့် တူတ့် ခဲ့ ကွယ် ဒူအီ အီဆာရေလ။ အန် ဇဝ် ပျာတ့် ဝဲန် ဟုဝ် ခုန်ဒီခမ် ဘော ဒူင် ဒီ ချြီင် ဂေ ဒါ ဆိုက်။ အန် ဇဝ် ဟဲ့ ဝီ တဲး ဂေ ဒူအီ အာယူဒါ ဝီ မိုဝ်း ဒုက် မိုဝ်း နဝ်း က့လိုဝ်၊ တဲး ဂေ ဝီ ယာမ် ဘော ငှုန် ကိူန် လွှိုမ် ဘြိမ်။

6 အန် ဇဝ် မိူဝ် ဟဲ့ ပျာတ့် ဟုဝ် ဒူင် ကွယ် အန် ပီ ဒူအီ ပျာတ့် ထိုပ် ခဲင် ဒူင် နာ။ ဇဝ်ဖြာ ဟဲ့ ဘူင် တဲး ဒူအီ ခဲင် မိူင် ဇီအူန် ပိဝ် ဆီငဲ ဘွတ် ဆီငဲ မွှိုမ် ဒေါ ဘူင် ဂေ ဘ့လွယ် ဘော ဆီငဲ ဒီလှဝ်။ န့ ပီ နဝ်း ရူ အန် ဇဝ် ဟဲ့ လေး ဟဲန့် ကာဆဝ်၊ န့ ဘော တဲး အီ လုက်တာယ် ခုန်ဒီခမ် ဘော ဒါ အီ လှူ ဒီ ဇဝ်ဖြာ။

7 ဇဝ်ဖြာ မိူဝ် တူ ဒိုဝ်း ပီ ဒီ လှူ ဂေ ဒဲင် ကာစှူင့် လှူ အီ ဒီ အန် ဘော အာဝ် ဟူ ကွယ် ခဲင် ထိုပ် အီ ဆီငါ ဘွတ်။ အန် ဟဲ့ တဲး ရန်ဆူ ပျာတ့် ဝဲန် ဘော ရဲင် ဟုဝ် ခုန်ဒီခမ်။ ဂေ ဘော ဒတ် တာင် ခဲင် ဒူင် ကြိုပ် ဂေ ဇဝ်ဖြာ၊ တဲး န့ ပီ ဒေါ ဘူင် ဂေ ဘ့လွယ်။

8 ဇဝ်ဖြာ ဟဲ့ ဟွတ့် ဆုင်ဖျာတ် ခဲင် နဝ်း အန်၊ အန် ဒီ ပျာတ့် ဝဲန် ရဲင် မိူင် ယေရူဆာလဲမ်၊ တဲး န့ ကော ကာပျာတ့် လိုဝ် တူတ့်။ အန် ဇဝ် ဟဲ့ ဒိုဝ်း ဝန်၊ ဂဝ် ဆီချာ ဆီချာ ရဲင် မိူင် တီ။ ဟဲ့ ဟွတ့်၊ အန် ဘော ဝီ ပျာတ့် တဲး န့ လိုဝ် တူတ့် အူ ဇေန့်။ ဇဝ်ဖြာ ဟဲ့ ပျာတ့် ဝဲန် ဒူင် ချြီင် ဂေ ဒါ ဆိုက် ဘော ရဲင် မိူင် ယေရူဆာလဲမ် ဘောကာဂ့လျီတ်၊ တဲး ဂေ ပီ ဒူအီ အီ ငှုန် အီ ယာမ် ဘော လိုဝ် စှိုမ် ကာဒူပ် တူတ့်။

9 မာလုဝ်း မိူဝ်၊ ဟဲ့ ဟွတ့် ဝီ လိုပ် လူင် ခဲင် ကာဒါယ်။ မာ မာလုဝ်း မိူဝ်၊ ဟဲ့ ဟွတ့် ကာဘက် တူတ့်။ ဂေ ခုန်ဒီခမ် ခဲင် မိူင် တီ ဘော ဂေ ဒါ ကာညာ အီ အိုပ် မိူင် ဘော ဂေ ဒါ ဘုဝ် တာင်၊ ဂေ ဟဲ့ ဝီ ကာဒုး ဒီ ခမ် ဒုက် တာင် ခဲင် မိူင် အီ ဟဝ်။ ဒါရာ ဇဝ်ဖြာ မိူဝ် အာဝ် ဟူ မိုဝ်း။ ဂေ ဒါ အီ ဘျာန် ဂြုဝ်း ဇဝ်ဖြာ မိူဝ်၊ အာဝ် ဟူ ယိုဝ် မာဆေ ပီ ဘျ ဇဝ်ဖြာ ဒီ ဂေ။

10 ဂေ ဒူအီ ကတ် ဒူအီ ဂဲ ခဲင် မိူင် ယေရူဆာလဲမ် ဂေ ဘော ဝီ တုတ့် ဘော ကွယ် ဒဲင် ကာဒါယ်၊ အာဝ် ဟူ လာယ် ဂြုဝ်း။ ဂေ ဘော ဝီ ဒိုဝ်း ကာပုး ဟပ် ဒဲင် ဂိန့် ဂေ၊ ဝီ ဒိုဝ်း ခြိုင် စာန် ရိတ် ဒီ ညွယ် ဂေ။ ဂေ ဂွန် ဒီဘျာ ခဲင် မိူင် ယေရူဆာလဲမ် မိူဝ် ကာဖြူမ် ဒီ မုတ် ဂိန့် ဂေ ကော ဇမ် ကာဒါယ်။

11 ကူပ် ဟဲ့ လေး အိုမ် ငါယ် အုဝ်၊ ငါယ် အုဝ် မိူဝ် ဟဲ့ ဆဝ်။ ဘင်နဝ်း အုဝ် မိူဝ် ဟဲ့ ဆဝ် ကာဆဝ်။ န့ ဟဲ့ ကာဆဝ် ဒီ နဝ်း ဖွိုမ် အုဝ် ကူပ် ဟဲ့ လိုဝ် စှိုမ် ဂေ ဒူအီ အာမျုဝ် အုဝ်။ ခုဝ်၊ ဂွန် ဒီရွယ် ဘော ဂွန် င ရေန့် ဟဲ့ ယမ် ပိဝ် တူတ့် ဒူပ် န့တေန့် ကာတဲ မိူင် တီ။

12 ဂေ ဘော ဒဲ့ ဒီမွှတ် မာ ဂေ တဝ်း၊ “အုဝ် ကာပြာန့် ဘူမ်၊ အုဝ် ဟဲ့ ဆီ ဒျီင် အိုမ်။” ပါယ် တီ ဂေ ဘော ယမ် ပိဝ် ကာတဲ န့တေန့် တီ ဘော ပီ ဒါ ဆိုက် အီ ဟဲ့ ကာပပ် ဆဝ်။ ဖွိုမ် ဂေ ဘော ကြဲ ဒီ တူတ့် လွယ် လွယ် ဒဲင် ဘိုမ် မာ ဂေ။

13 အိုယ် ဘေ ဒူအီ ခဲင် မိူင် ယေရူဆာလဲမ် အီ ဟဲ့ မွှိုမ် ကာဝေ ကာဆဝ်၊ မှဝ် အုဝ် ဒီ ပါယ် ဒီ ကာလာင် ဒီ ဘေ။း အုဝ် ဒီ ဒိုဝ်း မျုဝ် မှဝ်၊ ဝီ လာယ် ကာဂဝ် ကာလာင် တဲး န့ ဒိုဝ် နဝ်း ဘေ ဘော လှဝ် နဝ်း ဘေ။း ခုဝ်၊ ပဲ့ ဟဲ့ လိုဝ် စှိုမ် ဘေ တီ၊ န့ ဟဲ့ တာင် ကာဆဝ်၊ ဟဲ့ ပီ အိုမ် နမ်မုက်ဆာရာ။ န့ ယီ တူ မိုဝ်း အာဆေ အီ ဒီ ပွိုန် ဝီ တဲး ဘေ ကဲန်၊ ဝီ တဲး ဘေ ဝီ ပီ ဘြိမ်။

14 ဂေ ဒါ အီ ဘျာန် ဂြုဝ်း ဇဝ်ဖြာ ဘေ၊ ဂေ ယိုဝ် မီ အီ တူ မုး တူ မှာန် အီ ကာလုဝ် ဒီလူယ်၊ ဝီ ကာလာင် ဒီ ဘေ။ ပီ ကာလာင် ဂေ တီ၊ န့ တူ မှာန် မာဆေ၊ န့ တူ တဲး ဘေ ဝီ လှုဝ်း မှာပ် ဘေ၊ တူ တဲး ဘေ လွတ် အာဖေ အာရေ။

15 ဂေ ဒူအီ အီ တး ဝဝ့် ဟာဝ် ဒူင် တီ၊ ဂေ ဘော နပ် ဒီ ပီဂဲ့ ဂိန့် ဂေ ဘော ကာလာင် ဂြုဝ်း အီ ဖျာက် အီ နဲန ဘေ တဝ်း၊ “အာနီ မိူင် ပီ တဝ်း ဂေ ဟဲ့ စှိတ် ကာဆဝ်၊ မိူင် အီ ဟဲ့ တဲး ဒူအီ ဘော ကာဒါယ် ဘဲန် နဝ်း ဒါခိုယ်။”

16 ဂေ ရန်ဆူ ဘေ ဘောကာဂ့လျီတ်၊ ဂေ ဘော ကာလာင် ဂြုဝ်း အီ ဒမ် မှာပ် ဒီ ဘေ။ ဂေ ဘော ဖျာက် နဲန ဘေ ဘော ဇွင့် တိူက် ဘေ။ ဂေ ဘော ဆီဂိတ် ဟြာင် ဂေ တဝ်း၊ “အာတိုဝ် နီ ဟဲ့ မုး ဆီငဲ ပီ နှဝ့် န့ဒဝ့် အေ၊ တဲး အေ ပျာတ့် ဂေ။ အေ မိူဝ် ဟဲ့ ဟွတ့် ယိုဝ် လွင် အန် တီ။”

17 ဇဝ်ဖြာ ဘော ဘူင် ခဲ့ ပီ ခြာမ် အန်။ အန် ဘော ဘူင် ခဲ့ ပီ ကာလာင် အန် ဒေါ မွိုန်၊ တဲး န့ ကော ဟွတ့် ဒေါ တီ နီ။ အန် ဇဝ် မိူဝ် တူ လှယ့် မာဆေ ဘော ပျာတ့် ဝဲန် တူတ့်၊ တဲး န့ ဒူပ် ပီ ဒွိုမ် ဘျ အန် ဒေါ ဟဲ့ လှေန့် ကာဆဝ်။ အန် ဇဝ် ဟဲ့ ခ့ဝါင် တဲး ရန်ဆူ ဘေ ဝီ ပဲ ဘေ၊ တဲး ဂေ ဘော ပွိုန် ဒီ ခူယ် ကူပ် ဟဲ့ စှိုမ် ဘေ။

18 အိုယ် ဘေ အီ ကွယ် ခဲင် မိူင် ယေရူဆာလဲမ် ဘော မိူင်၊ တဲး ဘေ ဒဲ့ ဇဝ်ဖြာ။ တဲး အိုမ် ငါယ် ဘေ လှဲ ဒွင် ဝန် ဒွင် ခိူန်၊ တဲး န့ ကော ပီ အိုမ် ဘ့လဲင်၊ ကွဲ့ တဲး န့ ဟိတ် ဒေါ မှဝ်။

19 ဆေ ဘေ အိတ် ခဲင် မှိုဝ်၊ တဲး ဘေ ယိတ့် ဒဲ့ ဇဝ်ဖြာ ဒေါ ကာစုး ဂေ ဒူအီ ဘ်ု မိူင်။ ခဲ့ ကွယ် ခဲင် နဝ်း ဘေ၊ တဲး ဘေ ကာလာင် တူတ့် ဒီ ဇဝ်ဖြာ၊ တဲး န့ ပီ ဘေ လှုဝ် အိုမ်။ တဲး ဘေ စုဝ့် ဒဲ ဘေ ဘော ဆာခိုဝ် မှာန့် ဒီ ဇဝ်ဖြာ စွယ် ဂွန် ဘေ အီ ဟဲ့ ဒီလှး ဒီလွှယ်၊ အီ ကွယ် ကာတဲ န့တေန့်။

20 ဂေ အီ ကွယ် ခဲင် မိူင် ယေရူဆာလဲမ် ဒဲ့ မဲ တဝ်း၊ “အိုယ် မဲ ဇဝ်ဖြာ၊ မှာန့် တဲး မဲ ဇဝ် ဝီ ယွတ် ပဲ့ ဟဲ့ ဘူင် မဲ ဒေါ တီ နီ ဒီ ဒူအီ ပီ အိုပ် မဲ။ အာဝ် ကာအာပ် ဂေ အီဘိုန့် ဝီ ကာဒုး ဒီ ဟူမ် ယင် ဂွန် ပီ ရွက့် ဂေ။ အာဝ် ကာအာပ် ဂေ ဒါ အီ ဘျာန် ဂြုဝ်း ဇဝ်ဖြာ ဘော ဂေ ဒါ တာင် အီ လှူ ဒီ ဇဝ်ဖြာ ယမ် ခဲင် ဟုဝ် ဇဝ်ဖြာ။

21 ဂေ ဒူအီ နှိုမ် ဘော ဒူအီ ကတ် ဟဲ့ ကေး ယမ် ဒူပ် န့တေန့် ခဲင် မိူင်။ ဂွန် ကာညူမ် ဂေ ဂွန် ဒီဘျာ မိူဝ်၊ ရန်ဆူ ယေ ဟဲ့ ဟွတ့် ငဝ်း ဝဲန် တူတ့်။ ဒေါ ဟဲ့ ရူ ကာဆဝ် မဲ ဇဝ် တီ၊ မဲ မိူဝ် တူ ကာဝေ ဂေ။ မဲ ဟဲ့ ငဝ်း ဝဲန် တူတ့် ဂေ။

22 န့ ဘော ပီ မဲ ဇဝ် ဟဲ့ ဒဲ့ တဲး ဂေ ဒူအီ တး လိုပ် ဘ့လွယ်။ ပါယ် တီ မဲ ဇဝ် ဟဲ့ ဝီ ဒဲ့ ရန်ဆူ တး ဒွန် ဘ့လာက်၊ တး ကာဂုဝ်း ဒီ ယေ။ ဆီငဲ ဟဲ့ ရူ မဲ ဇဝ်ဖြာ ဒီ ယေ တီ၊ အာဝ် မိုဝ်း ခေါ အူ ဝီ အီ လွတ် အီ တူ ယမ်။ ရန်ဆူ ယေ ဟဲ့ ဒဲပ် ဟဲ့ ငဝ်း ယမ် ဂွန် ပီ ရွက့် ပီ လိုမ်လာ ယေ။”