1 အုဝ် မုး ဝီ အီ ဟဲ့ နပ် လွင် ဒုက် ကူပ် ဟဲ့ ရူ ဇဝ်ဖြာ။ န့ ပီ အန် ဟဲ့ ဒိုဝ်း မ့ဖျီ့၊ မး အုဝ်။

2 အန် ဇဝ် ဟဲ့ တိုယ် အုဝ် ဟာဝ် ခဲင် အပ် ဝွင့်၊ ဒူင် တူ မိုဝ်း ဘ့လာင်။

3 ဟဲ့ မှာန်၊ အန် ဇဝ် ဘော မး အုဝ် ဒွင် ဝန် ဒွင် ခိူန်။

4 န့ ပီ အန် ဇဝ် ဟဲ့ ဘူင် တဲး ဟုန် အုဝ် ဂေ ယင် အုဝ် ဟျီ့ ကာဟဝ်း တူတ့်၊ ဝီ ကာဘက် ဘော ကာအာင် အုဝ်။

5 အန် ဇဝ် ဟဲ့ ဘ်ု ရူပ် အုဝ် ဘော ခြွင့် အုန် အုဝ်။ အုဝ် မိူဝ် ဟဲ့ ခမ် ဒုက်၊ အီ ဆွင့် တိူက် ဒီ နဝ်း အုဝ်။

6 အန် ဇဝ် ဟဲ့ တဲး အုဝ် ကွယ် ခဲင် အပ် ဝွင့်။ န့ ဘော ပီ အုဝ် ဟဲ့ ကွယ် ခဲင် ကာဒဝ် ဘာရေဝ် ပီ ဒူအီ အီ ဟဲ့ ယမ် လှေန့် ကာဆဝ်။

7 န့ ဘော ပီ အန် ဇဝ် ဟဲ့ လူင့် ရူပ် အုဝ်၊ ကွဲ့ တဲး အုဝ် ပွိုန် ဒီ လေး။ န့ ပီ အန် ဇဝ် ဟဲ့ ဝီ ဒိုဝ်း ဝန် ဟိန် အီ စန် ကာဆဝ်၊ ပက် အုန် အုဝ်။

8 အုဝ် ပီ ဘော ဒဲ့ တဲး အီ တး စွယ် အုဝ် မိူဝ်၊ ဇဝ်ဖြာ ယီ ဝဲန် တူ ထူမ် ဂြုဝ်း ပီ ဆာခိုဝ် အုဝ်။

9 န့ ပီ အန် ဇဝ် ဟဲ့ ဒိုဝ်း မာဝ် ပဲ့ ဟဲ့ ဒဝ်း အီ၊ ကာဘိတ် န့တေန့် ဒူင် ဒီ လုဝ် ဟာဝ် အုဝ်။ အန် ဝီ ဘူင် တဲး န့တေန့် ဒူင် ဒီ ဝဝ့် အုဝ် ဝီ ဂုဝ့် ဂဲ့။

10 အန် ဇဝ် ဘော ပီ မာဂြေး အီ ဘ်ု ဒီ ယွတ် နာ ဒီ ဝဝ့် အုဝ်။ အန် ဘော ပီ မာခြင်ဆီ အီ ဘ်ု ဒီ ဒဲန် ပ ဒီ အုဝ်။

11 န့ ပီ အန် ဇဝ် ဟဲ့ ညွန် လေး အုဝ် ရေတ့် န့တေန့် ဘော ပျာတ့် အုဝ်၊ ဝီ ဝဲန် အုဝ်၊ ကွဲ့ တဲး န့ မိုဝ်း အီ စွယ် အုဝ်။

12 န့ ပီ အန် ဇဝ် ဘော ဝိတ့် အ အန်၊ ဘန့် အုဝ်၊ ဘူင် တဲး အုဝ် ဘဲန် ပီ မှာယ် ဒူင် ဒီ ထေဝ် အန် ဆီနုဝ်း။

13 အန် ဇဝ် ဘော ဘန့် အုဝ်၊ တဲး ဘ့လာ အ အန် ကော လိုပ် လိုက် ခဲင် ဒုဝ် ခဲင် နဝ်း အုဝ်။

14 ဂေ ဒူအီ ကိူန် ဘော ကာဖြူမ် ဒီ ကာညး အုဝ် ဘော ဒွင် ဝန်။ အုဝ် ဘော ဘဲန် မှုဝ် ပီ တဝ်း ဂေ အီ မွှိုမ် ကာညး အီ မွှိုမ် ဆာယ်။

15 န့ ပီ အန် ဇဝ် ဟဲ့ ဘူင် တဲး အုဝ် ဟူမ် ဒဝ် အီ ဆွင့် ကော ဖဲ ဘော ဒျီင် အိုမ် ဆွင့် ကော ပိုဝ်။

16 န့ ပီ အန် ဇဝ် ဟဲ့ ညဲတ့် အုဝ် ကွယ် ခဲင် ကာပုး။ ဝီ ဒိုဝ်း မာဝ် ဒွယ် ကာဘက် ဟြာင် အုဝ်။

17 န့ ပီ အန် ဇဝ် ဟဲ့ ဒိုဝ်း ဝဲန် အီ ဒါခိုယ် ဂျာမ်ဆာ ဒီ နဝ်း ဖွိုမ် အုဝ်။ န့ တဲး အုဝ် ကော ဝီ ပိဝ် တူတ့် နာ ဘွတ် နာ မွှိုမ်။

18 ကူပ် ပါယ် တီ အုဝ် ဘော ဝီ ကာဖာ ခဲင် နဝ်း အုဝ် တဝ်း၊ “လွင် ပီ ဒီ ပါယ် ဒီ နှဝ့် န့ဒဝ့် ဇဝ်ဖြာ ဟဲ့ ဟွတ့် လိုဝ်။ အာဖုင် ဒင်ခုဝ် အုဝ် ဟဲ့ ဟွတ့် ဟြာယ်။”

19 ဆေ အုဝ် ဝီ ကာဖာ လှုဝ်း ဒုက် ပဲ့ ဟဲ့ တဲး အန် ဇဝ် အုဝ် ခမ် ဘော ပဲ့ ဟဲ့ တဲး အန် ဇဝ် အုဝ် လုဝ် ဟာဝ် ဝိဝ် ဟာဝ် ဝေန့်၊ န့ ဘော ဆွင့် ကာဆဝ် ဒီ နဝ်း အုဝ်။

20 အုဝ် ဝီ လှုဝ်း လွင် အန် တီ၊ န့ ဘော ဘဲန် နဝ်း လိုဝ် နဝ်း ဒီတဲတ် ဒီ အုဝ်။

21 မာလဲ၊ အုဝ် ယီ လှုဝ်း အူ မျုဝ် အီ တဲး နဝ်း အုဝ် နှဝ့် န့ဒဝ့်။

22 နဝ်း ရွက့် ကာဝေ ဇဝ်ဖြာ တူ နပ် ဒီ တူတ့် ဒေါ မှဝ်။ ခုဝ်၊ ယေ တူ စှိုမ် တူတ့်။

23 နဝ်း ဇဝ်ဖြာ တီ န့ ကာမာယ် ဒွန် ဆိန့်ဝး။ နာ ဆိူဝ် နာ မှာန် အန် ဇဝ် မိူဝ်၊ ဟဲ့ ဘွတ် ဟဲ့ မျာတ် ကာဆဝ်။

24 ခဲင် နဝ်း အုဝ် အုဝ် ဝီ တဝ်း၊ “ဇဝ်ဖြာ အီ ဒီ စွယ် အုဝ်။ ခုဝ်၊ အုဝ် ဝီ ဘိုင် အန်။ န့ ဘော ဝီ တဲး အုဝ် မိုဝ်း ပီ နှဝ့် န့ဒဝ့်။”

25 ဇဝ်ဖြာ ဘော ဂေဇူ ဂေ အီ ဘိုင် အန် ဇဝ်။ အန် ဂေဇူ ဘော ဂေ အီ ဟြေတ့် အန် ဇဝ်။

26 ပါယ် တီ ဆေ အေ ကွယ် နှိမ် နှိမ်၊ နှဝ့် န့ဒဝ့် အန် ဇဝ် ဒီ ချွတ် အေ၊ န့ ဒီ ဘော ဘဲန် နာ မွှိုမ် ဒီ အေ။

27 ဆေ ဒူအီ ဂွတ် အဲ့မဝ် ဆိန့် ဒေါ ဆီ နှိုမ် အန် ဒေါ ဆီ ဒီတဲတ် အန်၊ န့ ဘဲန် နာ မွှိုမ် ဒီ အန်။

28 တဲး အန် တုတ့် ဆီချာ ဆီချာ ဘော ကွယ် နှိမ် နှိမ် ဒေါ ဒီ ဒါင် အန် ဇဝ် မင် ဂွတ် ဒဲင် ယ အန်။

29 တဲး ဘော နဝ်း အန် ခမ် ဒီ မုတ် ဒီ ဂူမ်၊ တဲး အန် ဆော ဝီ မိုဝ်း ပီ နှဝ့် န့ဒဝ့်။

30 တဲး အန် ခမ် ဒီ မာငး ညိူဝ် ဘော ဒီ ဒူအီ အီ မး အန် ဘော ခမ် ပီ နဲန အီ ဟဝ်။

31 ဇဝ်ဖြာ မုး အီ နပ် ဒီ ရွက့် ကာဝေ။ အန် တူ ဝဲန် အီ ဆေဆေ။

32 အန် ဇဝ် ပီ ဘော ဟဲ့ နပ် ဒီ တဲး န့ ဒုက် ကာဆဝ် ဒီ နဝ်း အေ မိူဝ်၊ နဝ်း ရွက့် ကာဝေ အန် ဇဝ် ဒီ အေ ယီ ဟဲ့ တာင် ဟဲ့ ကိူန် ကာဆဝ်။

33 အန် ဇဝ် တူ မိုဝ်း နဝ်း ဆီ တဲး ဒူအီ ခမ် ဒုက်၊ တဲး န့ ကော ဆွင့် ဒီ နဝ်း ဂေ။

34 ဂေ အီ ယဲတ့် ဒူအီ ပီ အိုပ် အန် ဇဝ် အီ ညဲတ့် ဒူအီ တဲး ဂေ ဇမ် ဒုက်။

35 ဂေ ပျာတ့် ဒါရာ ပဲ့ ဟဲ့ ဒွါ ဇဝ်ဖြာ အီ အိုပ် တူတ့် ဒွန် မျုဝ် ဘော ကာဘး ဒီ ဇဝ်ဖြာ။

36 ဘော ဒေါ ဆုင်ဖျာတ် ဂေ ဒါရာ၊ ဂေ ဝီ ကာဘ့လျီ့ ဒါရာ ပဲ့ ဟဲ့ ဒွါ ဇဝ်ဖြာ။ န့ ပီ ဂေ ထာင် ဇဝ်ဖြာ တူ ယိုဝ်။

37 န့ ယီ တူ မိုဝ်း မာဆေ အီ ဘုဝ် ဘဲန် ဆေ ဇဝ်ဖြာ တူ ခ့ဝါင် န့ ဘဲန်။

38 နာ မွှိုမ် ဘော နာ တူ မွှိုမ် ဘော တး တူတ့် ဒီ ပီ ကာလာင် အန် ဇဝ် အီ အိုပ် တူတ့် ဒွန် မျုဝ်။

39 ဆေ ဇဝ်ဖြာ ဒမ် မှာပ် ဒီ ဒူအီ အူ ဝီ။ ဝီ တီ အာဝ် ကာအာပ် ပိုန့်။

40 တဲး အေ ဝီ ကာဖာ ပဲ့ ဟဲ့ ဘူင် အေ၊ ဝီ တး ညှိုမ် ဘိုင် ဇဝ်ဖြာ။

41 တဲး နဝ်း ဖွိုမ် အေ ဝီ ကာလာင် ဒီ ဇဝ်ဖြာ အီ ကွယ် ခဲင် ဂါင်ဟြာဝ်၊ ဘော ဆာခိုဝ် ဒီ အန် တဝ်း၊

42 “ယေ ဟဲ့ ဟွတ့် ကာလိုပ်၊ ယေ ဟဲ့ တဲး မဲ ဇဝ် ရူ ဒီ ယေ။ ယေ မိူဝ် ဟဲ့ ကာဘး ဒီ မဲ၊ မဲ ဇဝ်ဖြာ မိူဝ် ညှမ် ဂဝ်း ဝဲန် မှာပ် တီ ဒီ ယေ။”

43 န့ ပီ နဝ်း ရူ မဲ ဇဝ် ဟဲ့ ဟွတ့် ဝီ ဆီဘ့လိုက် တူတ့် နဝ်း ရွက့် ကာဝေ မဲ ဒီ ယေ။ မဲ ဇဝ် ဟဲ့ ဝီ ခုင်ခြး ဒူပ် ဒီ ငဝ်း ယမ် ယေ ပီ မဲ တူ မိုဝ်း နဝ်း ကာဝေ။

44 နဝ်း ရူ မဲ ဇဝ် တီ၊ န့ ဟဲ့ ပီ န့အု အီ ဟဲ့ ဟေတ့် ကာဆဝ်။ န့ တူ တဲး ပီ ဆာခိုဝ် ယေ ဇမ် ဒီ မဲ ဇဝ်။

45 မဲ ဇဝ် ဟဲ့ ဘူင် တဲး ယေ ပီ ကာအး ကာအူပ် အီ မွှိုမ် ကာအိး ကာဆဝ်၊ ပီ ဘိး ဝဲန် ဂေ ဒူအီ ဒွန် မျုဝ်။

46 ရန်ဆူ ယေ ဘောကာဂ့လျီတ် ဟဲ့ ဝီ ကာဖြူမ် ဒီ ကာစွှာ့ ယေ ဘော နဲန ယေ။

47 ယေ ဟဲ့ ခမ် အီ မွှိုမ် ယုဝ် အီ ဒွါ ယေ ခြေ ယွတ့် ဘော အီ နပ် ဒီ တဲး န့ ကာပျာတ့် လိုဝ် တူတ့်၊ တဲး န့ ရာမ် တူတ့်။

48 အိုမ် ငါယ် ဟဲ့ လှဲ ဒီ ငါယ် အုဝ် ပီ အိုမ် ဘ့လဲင် ကူပ် ဟဲ့ လိုဝ် စှိုမ် ကာဆဝ် ဂေ ဒူအီ အာမျုဝ် အုဝ်။

49 အိုမ် ငါယ် အုဝ် မိူဝ် ဟဲ့ လေး လှဲ ကော ပီ အိုမ် ဘ့လဲင် အီ တူ ဟိတ် ဒေါ မှဝ်။

50 ပါယ် တီ တဲး ကော ဇမ် ပန် ဒီ ဝီ ယွတ် ဇဝ်ဖြာ အီ ကွယ် ခဲင် ဂါင်ဟြာဝ်၊ တဲး အန် စွယ် အုဝ်။

51 နဝ်း အုဝ် ဘော ကာဟွာ့ မှဲ ကာဆဝ် ကူပ် ဟဲ့ ယိုဝ် အုဝ် အီ ဟဲ့ ဘုဝ် ဘဲန် ဒီ ဂေ အီဘိုန့် အီ ကွယ် ခဲင် မိူင် တာင် ဒူင် ကွယ် အုဝ်။

52 ဂေ ရန်ဆူ အုဝ် ယီ ဇွင့် အုဝ် ပီယေန့်။ ဂေ ဘော ခုင်ခြး ဒီ မှေတ့် အုဝ် ကော ပီ အီ ခုင်ခြး ဒီ မှေတ့် မာဆိမ်။

53 ဂေ ဘော ဒိုဝ်း အုဝ်၊ ဘျွာ ခဲင် ကာဒဝ်၊ ပီ ဝီ ဒိုဝ်း မာဝ်၊ ဝိုန့် ဒီ အုဝ်။

54 အိုမ် မိူဝ် ဟဲ့ မ့ပုန် ဂိန့် အုဝ်။ အုဝ် ဘော ထာင်၊ အုဝ် အာဝ် ဟူ လွတ် ယမ်။

55 အိုယ် မဲ ဇဝ်ဖြာ၊ န့ ပီ အုဝ် ဟဲ့ ကွယ် ခဲင် ကာဒဝ် အီ ဟဲ့ လိုက် ကာဆဝ်။ အုဝ် ဘော ဝီ ဒဲ့ မဲ၊ ဝီ ဂါဝ် ပွုန် မဲ ဇဝ်။

56 ပါယ် တီ ဒေါ ဝီ မှာန့် အုဝ်၊ တဲး မဲ ဇဝ် ကာဝေ အုဝ်၊ မဲ ဇဝ် ဘော ဝီ ယိုဝ် ဒီ ထူမ် ဂြုဝ်း ပီ ဆာခိုဝ် အုဝ် တီ။

57 မဲ ဇဝ် မိူဝ် တး ကာတတ် အုဝ်၊ ဝီ ဝျီ့ ဂြုဝ်း အုဝ် တဝ်း၊ “ကွဲ့ တဲး မဲ ယုဝ်။”

58 အိုယ် မဲ ဇဝ်ဖြာ၊ မဲ ဟဲ့ ယွတ် အာမူ အုဝ်၊ မဲ ဟဲ့ တး ချွတ် တး ထုတ် လေး အာဆာက် အုဝ်။

59 အိုယ် မဲ ဇဝ်ဖြာ၊ မဲ မိူဝ် ဟဲ့ ဟွတ့် ယိုဝ် ခဲ့ ပီ ခါနှာပ် ဂေ ရန်ဆူ ဒီ အုဝ်။ အုဝ် မှာန့်၊ တဲး မဲ ဆုင်ဖျာတ် ဒါရာ ဘ့လာက် အုဝ်။

60 မဲ ဇဝ် မိူဝ် ဟဲ့ ဟွတ့် ယိုဝ် ခဲ့ ဇွင့် ဂေ ဒီ အုဝ် ဘော ပဲ့ ဟဲ့ ခြာမ် ဂေ ဒီ ဘူင် နာ တူ မွှိုမ် ဒီ အုဝ်။

61 မဲ ဇဝ်ဖြာ၊ မဲ မိူဝ် ဟဲ့ ဟွတ့် ထူမ် ဂြုဝ်း ပီ နဲန ဂေ ဒီ အုဝ် ဘော ပဲ့ ဟဲ့ ခြာမ် ဂေ ဒီ ဘူင် နာ တူ မွှိုမ် ဒီ အုဝ်။

62 မဲ မိူဝ် ဟဲ့ ထူမ် ပီ ကာလာင် ဂေ နာ တူ မွှိုမ် လွင် အုဝ်၊ ဝီ ခဲ အီ တူ ဘွတ် အီ တူ မွှိုမ် လွင် အုဝ် ဒွင် ဝန် ဒွင် ဝန်။

63 မဲ ဇဝ် ယွတ်၊ ဂေ ဘော စွင့် အာဝ် တဝ်း၊ ဂေ ဘော တုတ့် အာဝ် တဝ်း၊ ဂေ တဲး န့ ဘဲန် မှုဝ် ပီ တဝ်း လေန် ဂေ လွင် အုဝ်။

64 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ဝီ ဒမ် မှာပ် ဒီ ဂေ ခဲ့ ကာဒါန် ပီ ဒွိုမ် ဘူင် ဂေ တီ။

65 တဲး န့ ဘဲန် နဝ်း ကာဝှ်ု ကာဝျှီန် ဒီ ဂေ။ တဲး ဂေ ဝီ ခမ် ပီ ဒိူင် မဲ ဇဝ် ဒီ ဂေ။

66 အိုယ် မဲ ဇဝ်ဖြာ၊ အုဝ် မှာန့်၊ တဲး နဝ်း ရူ မဲ ဇဝ် ဘူင် တဲး ဂေ လိုဝ် စှိုမ် တူတ့် ဒဲင် ကာဒါယ် ခြိုမ် ဘ့လေန့် နီ။