1 ခြိဝ် ဟဲ့ ကာမဝ်။ ခြိဝ် ဇဲတ် မိူဝ် ဟဲ့ ဘ့လိူင်။ ဆဲန့် အီ ဘွတ် မိူဝ်၊ ဟဲ့ ဘုင်ဘြတ် ဒူပ် န့တေန့်။

2 ဒူအီ နှိုမ် ခဲင် မိူင် ယေရူဆာလဲမ် ဟဲ့ ဒွိုမ် မိုဝ်း ဒီငဝ်း ဒီခန် ပီ ခြိဝ်။ ဒေါ တီ နီ၊ ငဝ်း ခန် ဂေ ဟဲ့ ဝီ ပီ ငဝ်း ခန် ကာလုဝ့် ကာဒါယ် ပဲ့ ဟဲ့ ဘူင် ဒူအီ။

3 မာဆုဝ် ပြဲ ဆီ ဘော နပ် ဒီ ဒွါ တဲး ဂွန် အန် ပူ ဖဲ။ ဂေ ဒူအီ အာမျုဝ် အုဝ်၊ ဂေ ယီ ဟဲ့ ဟာယ် ကာဆဝ် ပီ မာဆိမ် ကာဟာတ့် အီ ကွယ် ခဲင် ပြဲ ကာဟဝ်း အီ နပ် ဒီ ဝဲန် ဂွန် အန်။

4 ဂွန် ဂေ တီ ဟဲ့ ကာပြာန့် ကာဆဝ် ပူ။ ဆီဒ ဂေ မိူဝ် ဟဲ့ ဝီ ဒိုက် ဒီ နှိုန့် နာ ဒဲင်။ ဂေ ပီ ဘော မှာန့် ပီ ဒီ ဟူမ် မိူဝ်၊ အာဝ် မိုဝ်း အီ ဒွါ ဒီ ဂေ။

5 ဂေ ဒူအီ အီ ဟဲ့ ဒွိုမ် ပွိုန် ဒီ ဟူမ် ဖဲ၊ ဂေ ဝီ အေတ့် ယမ် ဒူပ် န့တေန့်။ ဂေ ဒူအီ အီ ဟဲ့ ဒွိုမ် စှိုပ် ဒီ တာ ခြိုင် ရေန့် ဂဲ၊ ကွယ် ဒဲင် ဒီနွှင့်၊ ဂေ ဒီ ဝီ ကာဒုး ဒီ မွိုန် ဒဲင် မ့ပိုမ် ကာအး။

6 မှာပ် ပီ ခမ် ဂေ ဒူအီ အာမျုဝ် အုဝ် ဟဲ့ တာင် လွှိုမ် မှာပ် ပီ ဒွိုမ် ခမ် ဂေ ဒူအီ ခဲင် မိူင် ဆုဝ်ဒူမ်။ န့ မုး ပဲ့ ဟဲ့ ဘူင် ဇဝ်ဖြာ၊ တဲး ဂေ ကာပျာတ့် လိုဝ် အူ ဇေန့်။

7 ဂေ ဒါ ကာညာ အီ အိုပ် မိူင် ဘော ဂေ ဒါ တာင်၊ ဂေ ဟဲ့ ဒွိုမ် ဆီငါ လွှိုမ် ဘျြီ။ ဂေ ဟဲ့ ဒွိုမ် လုယ် လွှိုမ် အိုမ် ပူ။ ယင် ဂေ ဘော ကာအာင် ဂေ ဟဲ့ ရေန့် လွှိုမ် ဆဲန့် ရေန့်။ ဆီန နှာမ် ဂေ ဟဲ့ ပီ ဆဲန့် ခွင်။

8 ဒေါ တီ နီ အာရိုပ် ဂေ ဟဲ့ ဝီ ဝွင့် ကော လွှိုမ် ကာဆဝ်း။ ဒူပ် န့တေန့် ဂေ အာဝ် ဟူ မိုဝ်း အာဆေ အီ ဝီ နပ် ဝီ နုဝ် ဂေ။ ဟုန် ဂေ ဟဲ့ ဝီ ကာဟဝ်း ဒိုက် ဒီ ကာအာင် ဂေ ပီ အီ ဒုဝ့် ဟေ။

9 ဆေ အီ ယမ် ဒီ မာပွါ့ လာင်၊ န့ ဆီ မွှိုမ် လွှိုမ် ဂေ ယမ် ဒီ အေတ့် ပီ ဒီ ဟူမ်။ ဂေ အီ အေတ့် ပီ ဒီ ဟူမ် ကြဲ ဒီ ယမ် လွယ် လွယ် ကူပ် အာဝ် မိုဝ်း အီ ဒီ ဟျီင် ဂေ။

10 အီဘိုန့် အီ ဟဲ့ နပ် ဒီ ရွက့် ဂွန် ဘော မိုဝ်း နဝ်း န့စု န့စမ်၊ ဂေ ဟဲ့ ကာဒုး ဒီ ဝီ ကွင့် ဒီ ဟူမ် ဂွန် ဂေ။ ဂွန် ဂေ တီ ဘော ဝီ ဘဲန် ပီ ဒီ ဟူမ် ဂေ ဒေါ ဟဲ့ လိုဝ် စှိုမ် ဂေ ဒူအီ အာမျုဝ် အုဝ် ဒီ ရန်ဆူ ဂေ။

11 ဇဝ်ဖြာ ဟဲ့ ဘူင် တဲး န့ ဘြေ့ ခဲ့ ပီ ဒီ ပါယ် အန် ဒီ ရူ။ အန် မိူဝ် ဟဲ့ ရူ ကာဆဝ် ဘော ဒိုဝ်း ငဝ် ဒုဝ့် မိူင် ဇီအူန်၊ တဲး န့ ကော ကာဆိုမ် ဇမ် ဘော ဒင် ရဲင် မိူင်။

12 ခဲ့ ကွယ် ဂေ ခုန်ဒီခမ် ဒဲင် ကာဒါယ် နီ ဘော ဂေ ဒူအီ အီ ကွယ် ဒဲင် ကာဒါယ် နီ ဘောကာဂ့လျီတ် အာဝ် မိုဝ်း အာဆေ အီ ထာင် ဂေ ရန်ဆူ ဘော ဒါ ဆိုက် ဂေ ဒီ ပွိုန် ဒီ လိုပ် ဒီ ဘာင် မာလုဝ်း မိူင် ယေရူဆာလဲမ်။

13 န့ ယီ ဘဲန် ပါယ် တီ ကူပ် မှာပ် ပီ ဘူင် ဂေ ဒါ အီ ဘျာန် ဂြုဝ်း ဇဝ်ဖြာ ဘော ဂေ ဒါ အီ လှူ ဒီ ဇဝ်ဖြာ။ ဂေ ဟဲ့ ဝီ ငဝ်း ယမ် ဒူအီ အီ မိုဝ်း နဝ်း ဆိူဝ် နဝ်း မှာန် အီ ကွယ် ခဲင် မိူင် ယေရူဆာလဲမ်။

14 ဒေါ တီ နီ ဒါ အီ ဘျာန် ဂြုဝ်း ဇဝ်ဖြာ ဘော ဂေ ဒါ အီ လှူ ဒီ ဇဝ်ဖြာ၊ ဂေ ဝီ ဟာဝ် ဝိဝ် ဟာဝ် ဝေန့် ဒူပ် န့တေန့် ပီ ဒူအီ ငါယ် အပ်။ ဂေ မိူဝ် ဟဲ့ ဘဲ ဘော နှာမ်၊ ကော ဟူ မိုဝ်း အာဆေ အီ ယ တး ဒိုဝ် တး ပါ ဂေ။

15 အီ ဟဝ် ဘော ဒတ် ဒဲ့ တဝ်း၊ “တဝ် ဘေ၊ ဘေ မုး ဒူအီ အီ ကာဒါတ့် ကာဆဝ်။ တဲး ဘေ ဟာဝ်၊ ကွဲ့ တဲး ဘေ တာ ဒိုဝ် ယေ။” ကူပ် န့ ပါယ် တီ ဂေ ဟဲ့ ဘဲန် ဒူအီ အီ လုဝ် တဝ် ဆေဆေ။ ဂေ ဘော ဝိန် ဒီ လဲပ် ဒီ ယွတ် ဒွန် နာ ဒွန် ပ့လုဝ့်။ ဂေ ဒူအီ အာမျုဝ် ဟဝ် ပီ ဝီ ယိုဝ် ဂေ၊ ပီ ဝီ တဝ်း၊ “ဒူအီ ဂေ နီ အာဝ် ဟူ ကာအာပ် ကွယ် ရိုမ် ဒူပ် အေ ဒေါ မှဝ်။”

16 ဇဝ်ဖြာ မိူဝ် အာဝ် ဟူ ယွတ် မဲန် ဂေ။ အန် ဘော ဘူင် တဲး ဂေ ကာယဝ်း ကာရေး။ အီ ဟဝ် မိူဝ် အာဝ် ရုဝ်ဆေ ဂေ ဒါ အီ လှူ ဒီ ဇဝ်ဖြာ။ ဂေ မိူဝ် အာဝ် ဟူ ရီမာတ် ဂေ ဒူအီ ကတ် ဒူအီ ဂဲ။

17 ယေ ယီ ဆီ နှဝ့် န့ဒဝ့် အာမျုဝ် ဒူအီ အီ ဒီ တး စွယ် တး ဂမ် ယေ။ ပီ နှဝ့် န့ဒဝ့် ယေ တီ၊ န့ ယီ တူ ဘဲန် အာဂျိုဝ် မာဆေ။ ငါယ် ယေ မိူဝ် ဟဲ့ ဟွတ့် ကာပျွယ် ဒီ ဘ်ု ဒီ နှဝ့်။ ပီ နှဝ့် န့ဒဝ့် ယေ တီ၊ န့ ယီ တူ တး၊ တူ ပွိုန် ချွတ် ယေ ဒေါ မှဝ်။

18 ဂေ ရန်ဆူ ယေ ဟဲ့ ဝီ ဒူပ် ပန် ယေ၊ ကွဲ့ တဲး ယေ ဆီ ပွိုန် ဟာဝ် ဒူပ် န့တေန့် ခဲင် မိူင် ယေ။ ဆီငဲ ဒီ တူတ့် အာဆာက် ယေ ဟဲ့ ကာတတ် ဒီ ဇမ်။ ပန် ဒီ တူတ့် စုဝ် ယေ ဟဲ့ ဟွတ့် တး။

19 ဂေ ရန်ဆူ ယေ ဟဲ့ ခြန် လွှိုမ် မာဂ့လာင် အီ တး ခဲင် ဂါင်ဟြာဝ် လူင်။ ဂေ ဘော ဝိန် ဒီ ဟြေတ့် ယေ ဒူပ် နွန်၊ ဂေ ဘော ယိုဝ် ယေ။ ယေ ဘော ချြီင် ခဲင် ပြဲ ကာဟဝ်း၊ ဂေ ဘော ဝိန် ဒီ ဘ်ု ယေ ဒီ တီ။

20 ဒါ ကာညာ အီ ဟဲ့ ဒွါ အာဆာက် ဒီ ယေ တဲး ယေ ပွိုန် ဒီ ဟိုဝ်း ဖွိုမ်၊ ဝီ အီ ဟဲ့ ဖဝ်း ဇဝ်ဖြာ နာမန် ဒီ ဂိန့် အန် ဟဲ့ ကာဒုး ဂေ မှေတ့် အန် ခဲင် ကာဒဝ် ကာဒါယ်။ ယေ ယီ ဟဲ့ တဝ်း လွင် အန်၊ “ယေ ဟဲ့ ဆီ ဒီ ကွယ် ခြိုမ် ယာပ် အန်၊ တဲး ယေ ပွိုန် ဒီ ကွယ် ကာတဲ ဂေ ဒူအီ အာမျုဝ် ဟဝ်။”

21 အိုယ် ဘေ ဒူအီ မိူင် အေဒူမ် အီ ကွယ် ခဲင် ကာဒါယ် မိူင် မာအုတ်၊ ဘေ အီ ခူယ် ဒါခိုယ်၊ အီ ဒီ ဘူင် တဲး ဘေ လိုဝ် စှိုမ်၊ ဂေ ဆီငျာ တး။ ဘေ ဒီ ဘော ဝါက်ဝီ ဝါက်ဝိုဝ် ဘော ဂ့လ၊ မွှိုမ် ဆာယ် ကာဆဝ်။

22 အိုယ် ဘေ ဒူအီ အီ ကွယ် ခဲင် မိူင် ဇီအူန်၊ မှာပ် ပဲ့ ဟဲ့ ဘူင် ဘေ ပဲ့ ဟဲ့ ခမ် ဘေ ဟဲ့ ဟွတ့် တူတ့်။ အန် ဇဝ် မိူဝ် အာဝ် ဟူ တဲး ဘေ ဘဲန် မှာယ် ဒူအီ ပေါ အူ မိူင်။ အိုယ် ဘေ ဒူအီ ခဲင် မိူင် အေဒူမ်၊ ဇဝ်ဖြာ ဒီ ဒမ် မှာပ် ဒီ ဘေ။ အန် ဇဝ် ဒီ ဝီ ဘျ ခဲ့ ကွယ် မှာပ် ဘေ။