1 အိုယ် မဲ ဇဝ်ဖြာ၊ ယေ မှာန့်၊ တဲး မဲ ဇဝ် ဝီ လှုဝ်း လွင် ပဲ့ ဟဲ့ ကာဒုး တး ယေ။ ယေ မှာန့်၊ တဲး မဲ ဇဝ် ယွတ် ဘော လွင် အီ ဟဲ့ တဲး ယေ စှိုမ် ဆာရေ။

2 ကာဒါယ် အီ မုး ခါဂုန် ယေ တွိုန် ဟဲ့ ဟွတ့် ဝီ စုဝ်း ဒီ ဒူအီ အာမျုဝ် ဟဝ်။ ကာင် ယေ မိူဝ် ဟဲ့ ဝီ စုဝ်း ဒီ ဒူအီ ပေါ အူ မိူင်။

3 ယေ ဟဲ့ ပီ ဂွန် ဆီပြး၊ ဂုန့် အီ ဟဲ့ ယမ်။ မာ ယေ မိူဝ် ဟဲ့ ပီ ယာ ဆီပြး။

4 အိုမ် ပီ ဒီ ဒျီင် ယေ မိူဝ် လုဝ် စိုဝ်း ဒွါ ရွိုန်။ ဟေ မိူဝ် လုဝ် စိုဝ်း ကော ပွိုန် ဒီ ဒုဝ့်။

5 န့ ပီ ဒူအီ အီ ခါနှာပ် ယေ ဟဲ့ ဘ့လေး အဲ့မဝ် ဒီ မဲင် ယေ။ ယေ ပီ ဘော ဟဲ့ ဒီလှး မိူဝ်၊ အာဝ် ပွိုန် ဒီလှဝ်။

6 ယေ မိူဝ် ဟဲ့ ကာဒုး ဒီ ဂူမ် ဒီ ဒူအီ အဲဂိုပ် ဘော ဒီ ဂေ ဒူအီ ခဲင် မိူင် အာဆူရီယာ၊ တဲး ဂေ ဒွါ ပီ ဒီ ဟူမ် ဒီ ယေ။

7 ဂေ ဂုန့် ဒင် ယေ ဟဲ့ ဘူင် မှာပ်။ ဂေ မိူဝ် ဟဲ့ ဟွတ့် ယမ် တူတ့်။ ယေ မိူဝ် ဝီ လုဝ် ခမ် မှာပ် ဂေ တီ။

8 ဂေ အီ မုး မှာယ် ဟဲ့ ဝီ အိုပ် ယေ။ န့ ယီ တူ မိုဝ်း အာဆေ အီ ဒီ စွယ် ဒီ ချွတ်၊ တဲး ယေ လွတ် ဒီ ဒူအီ ဂေ တီ။

9 န့ ပီ ယေ လုဝ် ဒိုဝ်း အာဆာက် ယေ၊ ကာရဝ်း ပီ ဒီ ဟူမ်။ ခုဝ်၊ ရန်ဆူ အီ ဆီ ငဝ်း ယေ ဟဲ့ ကွယ် ခဲင် ပြဲ ကာဟဝ်း။

10 ဒုဝ် ဘူင့် ယေ ဟဲ့ ဒါတ် ကော နှဲန် ငဝ် ကူပ် ယေ ကာပြာန့် ကာဆဝ် ပီ ဒီ ဟူမ်။

11 ဂေ မိူဝ် ဟဲ့ ဘူင် နာ စီစိဝ် ဒီ အီဘိုန့် ခဲင် မိူင် ဇီအူန် ဘော ဒီ ဂေ ဂွန် ဒီဘျာ ခဲင် မာန် မိူင် ယူဒါ။

12 ဒါ ကာညာ အီ အိုပ် မိူင် ဟဲ့ ဝီ ကာဒုး အီ ပက် ဟွယ် ဒဲ ဂေ။ န့ မိူဝ် တူ မိုဝ်း အီ ရုဝ်ဆေ အီ ရီမာတ် ဂေ ဒါ တာင်။

13 ဂေ ဘော ခါနှာပ် ဒူအီ နှိုမ် တဲး ဂေ ကြိတ် ငှုဝ်၊ တဲး ဘဲန် ကာပဲ့။ ဂေ ဘော စ်ု ဂွန် ဒီရွယ် တဲး ဂေ ဟာဝ် ပး ဟေ အီ စန် ကာဆဝ်။

14 ဂေ ဒူအီ ကတ် ဒူအီ ဂဲ၊ ဂေ ဘော ဟြာယ် ဒူင် တး ကာမွုန် ဂေ ဒီ ဘာင် မာလုဝ်း မိူင်။ ဂေ ဒူအီ နှိုမ် ဘော ဘျုဝ်း ဘော ဟြာယ် ခဲင် ဘာင် ဘ့လွယ် ဒူင် တဝ်း ဂေ မှုဝ်။

15 မျုဝ် အီ ဒီ တဲး နဝ်း ယေ ဘျုဝ် ဒါခိုယ်၊ န့ ဟဲ့ ဟွတ့် ဟြာယ် ယေန် တူတ့်။ နဝ်း ယေ အီ ဆီ ဂါ ဆီ ကျဝ် ဟဲ့ ဝီ ဘဲန် တူတ့် အီ က့လိုဝ် အီ ငှုန် ဒီလူယ်။

16 လွင် ပီ ဆီ ပီဖုင် ယေ၊ အာဝ် ဟူ ဂိတ် မာဆေ။ ယေ ဟဲ့ ကာဒုး အီ တူ မွှိုမ် ကူပ် မှာပ် ပီ ဘူင် ယေ။

17 ကူပ် န့ ပါယ် တီ နဝ်း ယေ မိူဝ် ဟဲ့ လိုဝ်။ ကူပ် န့ ပါယ် တီ ငါယ် ယေ မိူဝ် ဟဲ့ မုဝ်။

18 ကူပ် န့ ပါယ် တီ နွန် ဇီအူန် ဟဲ့ ဝီ ဘဲန် ဒူင် ယေန် ဒူင် ငွင့် ဒူအီ။ ဂေ မာဆုဝ် ပြဲ ဟဲ့ ဝီ ဟာဝ် ဝိဝ် ဟာဝ် ဝေန့် ဒူင် တီ။

19 ပီ ဘော ဟဲ့ ပါယ် တီ မိူဝ်၊ မဲ ဇဝ်ဖြာ၊ မဲ ယီ အိုပ် ဆေဆေ။ အာဖုင် ဒင်ခုဝ် မဲ ဇဝ် ယီ အိုပ် မိူင် ဒူင် ကွယ် မဲ ဇဝ် ဒွန် စုဝ် ဒွန် ဇာတ်။

20 မဲ ဇဝ်၊ မှဝ် န့ ပါယ် ပီ ပိဝ် မဲ ဒီ ယေ ဆေဆေ။း ကူပ် မာဆေ မဲ ဆော ဝဲန် လှေန့် ယေ ပါယ် တီ။း

21 အိုယ် မဲ ဇဝ်ဖြာ၊ ယေ မှာန့်၊ တဲး ယေ ပွိုန် ဒီ ဝီ ဘဲန် ဒူအီ ပီ လိုမ်လာ မဲ။ ယေ မှာန့်၊ တဲး မဲ ဇဝ် ဝီ မ့ပြာယ် ဝီ ဘူင်၊ တဲး ယေ ဝီ ပီ ဘြိမ် ပီ အာတ့် နီ။

22 ဆေ အာဝ် ပါယ် တီ န့ ပီ မဲ ဇဝ်ဖြာ ဟဲ့ ဝဲန် ယေ အာခါခ်ု။ န့ ပီ မဲ ဇဝ်ဖြာ ဟဲ့ ရူ ဒီ ယေ ဘော တူ ဘျွင် နဝ်း ဒေါ မှဝ်။