အာနီ မုး ဂြုဝ်း ပီ ကာလာင် အာယေရေမီ အီ မုး ဂွန် အာဟီလာခီ။ အန် ဘော ဘာ ခဲင် ဖိုင် ဂေ ဒါ အီ လှူ ဒီ ဇဝ်ဖြာ အီ ကွယ် ခဲင် မိူင် အာနာထူတ် ခဲင် ကာဒါယ် မိူင် အာဘေန်ယာမ်။ 2 ဇဝ်ဖြာ ဘော စုး ဒီ ကာလာင် ဂြုဝ်း ဒီ အာယေရေမီ။ ဒေါ အန် တီ ခုန်ဒီခမ် အာယုဝ်ဆီယာ အီ မုး ဂွန် အာမူန် ဟဲ့ ဘဲန် ခုန်ဒီခမ် အီ အိုပ် မိူင် ယူဒါ အာဒါ ဂိုဝ် ဒီ အူယ် ဆီနမ်။ 3 ဇဝ်ဖြာ ဘော ကာလာင် ဟာဝ် ဂြုဝ်း အန် ဒီ အာယေရေမီ ဒေါ အာယောယာခိမ် ဟဲ့ ဘဲန် ခုန်ဒီခမ် အီ အိုပ် မိူင် ယူဒါ။ အာယောယာခိမ် ဘော မုး ဂွန် အာယုဝ်ဆီယာ။ န့ ကော ဝီ ဇမ် ဘော ဘာန် ခုန်ဒီခမ် အီ မုး ဂွန် အာယုဝ်ဆီယာ ဒေါ ဟဲ့ ဘဲန် အန် ခုန်ဒီခမ် အီ အိုပ် မိူင် ယူဒါ အာဒါ ဂိုဝ် ဒီ အူ ဆီနမ်။ ဆီနမ် တီ န့ ဘော ဝီ ဇမ် မာဂျီန် မ့ဖန် ရန်ဆူ ဘော တး မှေတ့် ဟာဝ် ဒူအီ ခဲင် မိူင် ယေရူဆာလဲမ်။

4 ဇဝ်ဖြာ ဟဲ့ ကာလာင် ဂြုဝ်း ဒီ အုဝ် တဝ်း၊

5 “ဆိန့် ဒေါ ဘူင် ဘ့လေး အုဝ် ဒီ မဲ ခဲင် ဝတ့် မာ မဲ၊ အုဝ် ဟဲ့ နပ် မဲ။ ဆိန့် အာတ့် ဂွိုတ် မဲ အုဝ် ဟဲ့ ရဝ်း မဲ၊ တဲး မဲ ဘဲန် ဒါ အီ ဘျာန် ဂြုဝ်း ဇဝ်ဖြာ ဒီ ဂေ ဒူအီ ဒွန် မျုဝ်။”

6 အုဝ် ယီ ဝီ တဝ်း၊ “အိုယ် မဲ ဇဝ်ဖြာ အီ အိုပ် တူတ့် ဒွန် မျုဝ်၊ အုဝ် တူ နပ် ဒီ ကာလာင် ဂြုဝ်း ဒီ အာတ့် ဒူအီ ကိူန်။”

7 ဇဝ်ဖြာ ဝီ တဝ်း၊ “မဲ ကွဲ့ တဝ်း၊ ‘အုဝ် တူ နပ် ဒီ ကာလာင် ဂြုဝ်း ဒီ အာတ့် ဒူအီ ကိူန်။’ မဲ လုဝ် ဟာဝ် ဒူင် ကွယ် ဂေ ဒူအီ ကိူန် ဒွန် ပ့လုဝ့် ဒူင် စ်ု အုဝ် မဲ ဟာဝ်။ မဲ လုဝ် ကာလာင် ဂြုဝ်း ပီ စ်ု အုဝ် မဲ ကာလာင်။ 8 မဲ ကွဲ့ ယုဝ် ဒူအီ ကိူန် ဂေ တီ။ အုဝ် ဒီ ကွယ် ရိုမ် ဒူပ် မဲ ဘော ဘ်ု ဒီ ချွတ် မဲ။” ဇဝ်ဖြာ ဟဲ့ ကာလာင် ပါယ် တီ။

9 ဒေါ အန် တီ ဇဝ်ဖြာ ဟဲ့ တာ ဒဲ အန် တာ ဒိုဝ် မူတ့် အုဝ် ဘော တဝ်း၊ “ဒေါ တီ နီ အုဝ် ဟဲ့ ဟပ် ဂြုဝ်း အုဝ် ခဲင် မူတ့် မဲ။ 10 မဲ ယွတ်၊ အာတိုဝ် အုဝ် ဟဲ့ စုဝ့် တဲး မဲ တာင် လွှိုမ် ဂေ ဒူအီ ဒွန် မျုဝ် ဘော ဂေ အီ အိုပ် မာန် မိူင် ဘောကာဂ့လျီတ်။ အုဝ် ဒီ တဲး မဲ ရိုတ့် ဝဲန် ဘော ပျာတ့် ဝဲန်၊ တဲး မဲ ဆီဂိုပ် ဝဲန် ဘဲန် မျုဝ် ဘဲန် မျုဝ်၊ တဲး မဲ ဝီ ဆမ် ကာမာယ် ဘော ဘြတ် ဆီမာ အီ ကာမာယ်။”

11 ဟဲ့ ဟွတ့်၊ ဇဝ်ဖြာ ပီ ဝီ ကာလာင် ဂြုဝ်း ဒီ အုဝ် တဝ်း၊ “အိုယ် အာယေရေမီ၊ မာဆေ ပီ ယိုဝ် မဲ။း” အုဝ် မိူဝ် ဝီ တဝ်း၊ “အုဝ် ယိုဝ် ရာ ဟေ ဘုဝ်း ဆာခေတ်။”

12 ဇဝ်ဖြာ ပီ ဝီ တဝ်း ဒီ အုဝ်၊ “အိုဝ် မဲ ဟဲ့ ယိုဝ် အာခ်ု မှာန်။ ခုဝ်၊ အုဝ် ဟဲ့ ဘ်ု ဒီ ယွတ် တဲး န့ ဘဲန် ခဲ့ ပီ ကာလာင် အုဝ်။”

13 ဇဝ်ဖြာ ပီ ဝီ ကာလာင် ဒီ အုဝ် ပေါ အူ ဇေန့် တဝ်း၊ “မာဆေ ပီ ယိုဝ် မဲ။း” အုဝ် မိူဝ် ဝီ တဝ်း၊ “အုဝ် ယိုဝ် ကာလုဝ့် အီ မိုဝ်း အိုမ် အီ ဟဲ့ ဆီနမ် ဘော ကျီင် တး ဘ့လာက် နာ ကွာ၊ လူင် နာ တေတ့်။”

14 ဇဝ်ဖြာ ဝီ တဝ်း ဒီ အုဝ်၊ “အာဖေ အာရေ ဒီ တး နာ ကွာ၊ တး ဇမ် ဒူင် ကွယ် ဒူအီ ခဲင် မိူင် နီ။ 15 အုဝ် ဒီ ဒဲ့ တး ဂေ ဒူအီ ဒွန် မျုဝ် အီ ကွယ် ခဲင် မိူင် ဘ့လာက် နာ ကွာ။ ဂေ ဒီ ဘ့လေး မာလာင် ဂေ ခူပ် ဘာင် မာလုဝ်း ဒူင် ဒီ လိုပ် ခဲင် မိူင် ယေရူဆာလဲမ်။ ဂေ ဒီ ဘော ဝဲင် ရူပ် မိူင် ယေရူဆာလဲမ် ဘော မိူင် ဒွန် မိူင် အီ ကွယ် ခဲင် ကာဒါယ် မိူင် ယူဒါ။

16 အုဝ် ဒီ ဘော ဇဲတ် ဂေ ဘော ဆုင်ဖျာတ် အာမူ ဂေ ဒူအီ ပီ အိုပ် အုဝ်။ မှာပ် ပီ ဘူင် ဂေ ဘော မုး မှာပ် ဟဲ့ ဝဲန် ဂေ ဒီ အုဝ်၊ မှာပ် ဟဲ့ လှူ ဂေ ဒီ ဇဝ် ပီ ကြိုပ် အီ ဟဝ် ဘော မှာပ် ပဲ့ ဟဲ့ ဘူင် ဂေ အာရိုပ် ရာင်၊ တဝ်း န့ မုး ဇဝ်ဖြာ။

17 ပါယ် တီ တဲး မဲ ရဲန် ဒုဝ် မဲ၊ တဲး မဲ ကာလာင် ခဲ့ ပီ ကာလာင် အုဝ် ဒီ မဲ။ ကွဲ့ တဲး ဂေ ပွိုန် ဒီ ကာဘျုဝ် မဲ၊ တဲး မဲ ယုဝ် ဂေ။ ဆေ မဲ ဟီ ယုဝ် ဂေ၊ အုဝ် ဒီ ဝဲ ကာဘျုဝ် မဲ ဒီ အာတ့် ဂေ။ 18 အာတိုဝ် နီ အုဝ် ဟဲ့ တဲး မဲ ပီ မိူင် အီ မိုဝ်း ရဲင် အီ မန် ဆီချာ၊ တဲး မဲ ပီ ဘော ရွင့် ဟိန် ဘော ရဲင် ဘွင့် ဒေန့်၊ တဲး မဲ ခြဲ ဂေ ခုန်ဒီခမ် အီ အိုပ် မိူင် ယူဒါ ဘော ဂေ အာမူ အာမာတ် အန် ဘော ဂေ ဒါ အီ လှူ ဒီ ဇဝ်ဖြာ ဘော ဂေ ဒူအီ ရဝ် ဒူအီ ကာင် ဘောကာဂ့လျီတ်။ 19 ဂေ မိူဝ် ဒီ ကာဂုဝ်း ဒီ မဲ။ ဂေ ယီ တူ ပဲ မဲ။ အုဝ် ဒီ ကွယ် ရိုမ် ဒူပ် မဲ ဘော ဘ်ု ဒီ စွယ်၊ ဘ်ု ဒီ ချွတ် မဲ။” ဇဝ်ဖြာ ဟဲ့ ကာလာင် ဒီ အုဝ် ပါယ် တီ။