1 ဇဝ်ဖြာ ပီ ဝီ တဝ်း၊ “ဂါင်ဟြာဝ် မုး မာလာင် အုဝ်။ ကာဒါယ် ဘော မုး ကာစှူင့် ဒူင် ဘ့လေး အုဝ် ပ့လဝ် အုဝ်။ ဆေ ဘေ ဒီ ဘူင် ကာင် အုဝ်၊ ဒီ မှဝ် ဘေ ဒီ ဆမ်။း ဒီ မှဝ် ဘေ ဒီ တဲး အုဝ် ဒီလှဝ်။း

2 ခဲ့ မိုဝ်း တူတ့် ဒွန် မျုဝ်၊ န့ မုး အုဝ် အီ ဘူင်။ အုဝ် ဘော အိုင် ဂေ အီ မိုဝ်း နဝ်း ဂူမ် နဝ်း တျီမ်၊ ဘော ဂေ အီ ကာပ့လု နဝ်း၊ အီ ယုဝ် အုဝ် ဘော ထူမ် ဂြုဝ်း အုဝ်။

3 အာဆေ ငဝ်း ယမ် မာမက်၊ ဟဲ့ ပီ အန် ငဝ်း ယမ် ဒူအီ။ အာဆေ ဒိုဝ်း လှူ ဂွန် မာဘူ၊ ဟဲ့ ပီ အန် ဒဲပ် ဂိန့် မာဆုဝ်။ အာဆေ ဒိုဝ်း လှူ ဘဲန် မျုဝ် ဘဲန် မျုဝ်၊ န့ ဘော ပီ ဒူအီ အီ လှူ နှာမ် မာလေတ့်။ အာဆေ ဒိုဝ်း ကာညန် လေဘူန် ဒုဝ့် ခဲင် ငဝ်၊ န့ ဘော ပီ ဒူအီ အီ မွင့်ကာရာ ဒွါ ဒီ အာရိုပ် ရာင်။ ဒူအီ ဂေ တီ၊ ဂေ ဟဲ့ ရဝ်း ဒီ ဒူပ် ပီ အိုင် ဂေ။ နဝ်း ဂေ ဘော ဘျုဝ် ဘော အိုင် ဒီ ဒူပ် အီ မွှိုမ် ကာအိး ဘဲန် မျုဝ် ဘဲန် မျုဝ်။

4 ပါယ် တီ အုဝ် မိူဝ် ဒီ ပီ ဝါညာက် ဒီ ဂေ၊ တဲး ဂေ ခမ် ခဲ့ ပီ ဘူင် ဂေ ဒွန် မျုဝ်။ အုဝ် ဒီ ဘူင် ပါယ် တီ ခုဝ်၊ ဒေါ ဒဲ့ အုဝ် ဒီ ဂေ၊ အာဝ် မိုဝ်း အာဆေ အီ အိုဝ် ဂြုဝ်း အုဝ်။ ဒေါ ကာလာင် အုဝ် ဂြုဝ်း၊ အာဝ် မိုဝ်း အီ ထူမ် ခေါ အူ ဝီ။ ဂေ ဒိူန် တူ ထူမ် ဂြုဝ်း အုဝ်။ ဂေ ဘော ဝီ ဘူင် အီ တူ လဝ့် နဝ်း အုဝ်။”

5 အိုယ် ဘေ အီ ဟဲ့ ဒီယေန့် ဒီ ယုဝ် ကူပ် ဂြုဝ်း ဇဝ်ဖြာ။ တဲး ဘေ ထူမ် ဇဝ်ဖြာ ဟဲ့ တဝ်း၊ “ကူပ် ဟဲ့ ညှိုမ် ဘေ ဒီ အုဝ်၊ ဂေ ဘီနွင် ဝေါဝဲ ဘေ ဝီ ဇွင့် ဘေ ဘော ဟုဝ် တဝ် ဘေ။ ဂေ ဘော ဝီ နဲန ဘေ တဝ်း၊ ‘တဲး ဇဝ်ဖြာ ဘျ အာဖုင် ဒင်ခုဝ် အန်။’ ဂေ ပီ ဘော တဝ်း ပါယ် တီ မိူဝ်၊ ဂေ ယီ ဒီ လုဝ် ဆာယ် အီ။ အီ မုး ဘေ၊ အန် ဇဝ် ဒီ တဲး ဘေ ခူယ် ဒါခိုယ်။

6 တဲး ဘေ ထူမ် ဂြန့် အီ ဆီနန် ဆီနိူင် ခဲင် မိူင် အီ လေး တး ဒူင် ကွယ် ဟုဝ် ဇဝ်ဖြာ။ န့ ဘော မုး ဂြန့် ဇဝ်ဖြာ ကူပ် ဟဲ့ ဘူင် ဝျီ့ အန် ဒီ ရန်ဆူ အန်။

7 မိူင် တီ ဟဲ့ ပီ အီဘိုန့် အီ ဂွိုတ် ဂွန် ဒေါ မှဝ် ဒေါ အန်။ အာတ့် ခမ် အန် ဝတ့် ဆဝ်၊ ဂွန် ဟဲ့ ဟွတ့် ဂွိုတ်။

8 အာဆေ ဟဲ့ ဒွိုမ် ယိုဝ် လွင် အန် တီ။း မိူင် ကာမာယ် တူ နပ် ဒီ ဘုဝ် ဘဲန် ကာန်ု အူ ဆီငဲ။ ဘော အာမျုဝ် ဒူအီ အီ ကာမာယ် တူ ပွိုန် ဘုဝ် ဘဲန် ဒေါ မှဝ် ဒေါ အန်။ အီ မုး မိူင် ဇီအူန်၊ န့ ယီ ပီ အီဘိုန့် အီ တူ လုဝ် ခမ် လှေန့် ဆဝ် ဒီ ဂွန်။ အန် ပွိုန် ဂွိုတ် ဒေါ မှဝ် ဒေါ အန်။”

9 ဇဝ်ဖြာ ပီ ဝီ တဝ်း၊ “ဆေ အုဝ် တဲး န့ မိုဝ်း အီဘိုန့် အီ ကာတတ် ဒီ ဂွိုတ် ဂွန်၊ အုဝ် ဒီ ဘော စွယ် တဲး အန် ဂွိုတ်။ ဆေ န့ မိုဝ်း အီဘိုန့် အီ တူ အး၊ အုဝ် တူ ခြဲ အန် ဂွိုတ်။”

10 အိုယ် ဘေ အီ ရွက့် မိူင် ယေရူဆာလဲမ်၊ တဲး ဘေ ဘျုဝ် ဒါခိုယ် ကူပ် မိူင် တီ။ တဲး ဘေ ဘျုဝ် ဒါခိုယ် ဒူပ် ဂေ အီ ကွယ် ခဲင် မိူင် တီ။ ဘေ အီ မိုဝ်း နဝ်း က့လိုဝ် နဝ်း လိုဝ် ကူပ် ဂေ၊ တဲး ဘေ ဝီ ခူယ် ဒါခိုယ် ဒေါ တီ နီ။

11 ဘေ ဒီ ဘော ပွိုန် ဒီ ဘျုဝ် ဒါခိုယ် ပီ ဂွန် ဒီတဲတ် အီ ဟဲ့ ဖဲ ပူ။ ဂေ ဒီ ဂျာမ်ဆာ ကူပ် ဟဲ့ ဝီ မိုဝ်း ဇေ့ဇုင် ဘေ ဒွန် မျုဝ်။”

12 ခုဝ်၊ ဇဝ်ဖြာ ဟဲ့ ဟွတ့် ဒွိုမ် ကာလာင် အုန် တဝ်း၊ “အုဝ် ဒီ တဲး ဘေ ကွယ် ဂတ် ဂျီတ်၊ တဲး န့ ပီ အိုမ် ဘ့လဲင် အီ လှဲ ဆေဆေ။ ဘေ ဒီ ဘော ပွိုန် ခဲ့ ကွယ် ကြုဝ်ကြာမ် ဂေ ဒူအီ အာမျုဝ် ဟဝ်၊ တဲး န့ ပီ အိုမ် ဘ့လဲင် အီ တူ ဟိတ် ဒေါ မှဝ်။ ဘေ ဒီ ဘော ပီ ဂွန် ဒီတဲတ် ပီ ယွတ် လိုမ်လာ ဆီချာ မာ အန်။ န့ ပီ မာ အန် ဒီ ဘော စုဝ့် ငျီ့ အန်၊ ဘော ဘ့လေး အန် ဒဲင် ဘိုမ်၊ ဝီ ဒီလာဝ် ဒီ အန်။

13 အုဝ် ဒီ ဝီ လှဝ် နဝ်း ဂေ၊ ပီ မာ နပ် ဒီ လှဝ် ဂွန် အန်။ ပါယ် တီ နဝ်း ဘေ ဒီ ဘော ဒါခိုယ် ဂျာမ်ဆာ ဒေါ ကွယ် ဘေ ခဲင် မိူင် ယေရူဆာလဲမ်။

14 ဆေ န့ ဘုဝ် ဘဲန် ပါယ် တီ၊ နဝ်း ဘေ မိူဝ် ဒီ ဘော ဒါခိုယ် ကာဆဝ်။ ဘေ ဒီ ဘော ဝီ မိုဝ်း ပ့လူမ် မိုဝ်း ဟဲန့် ပီ ပေတ့် န့စမ်။ ဒေါ အန် တီ ဂေ ဒူအီ ပီ ဆုတ့် ပီ စ်ု ဇဝ်ဖြာ ဂေ ဒီ ဘော ဝီ နပ် လွင် ပီ ဘူင် ဇဝ်ဖြာ ဒွန် မျုဝ်။ ဂေ အီ မုး ရန်ဆူ ဇဝ်ဖြာ၊ ဂေ ယီ နပ် ခဲ့ ရူ ဇဝ်ဖြာ။”

15 ဆေ ဇဝ်ဖြာ ဟီ တး၊ န့ ဒီ ဘော မိုဝ်း ငဝ် တး ဒူပ် အန်။ အန် ဇဝ် ဒီ ဘော ပဝ့် လက်လဝ်၊ တဲး န့ ပီ ခုန် လာင် တး၊ တဲး အန် ပွိုန် ဒီ ဘျ ခဲ့ ရူ အန်။ ပ့လဲ့ ငဝ် အန် မိူဝ် တး၊ တဲး အန် ပွိုန် ဒီ မာနုဝ် ကာဆဝ် အီ။

16 ဇဝ်ဖြာ ဒီ ဂူင့် တး ငဝ် ဂေ မာပွါ့ လာင် အန်၊ ဒမ် မှာပ် ဒီ ဒူအီ ဘောကာဂ့လျီတ်။ ဂေ ဒူအီ ပီ ငဝ်း ယမ် အန် ဟဲ့ ကိူန် ကာဆဝ်။

17 ဇဝ်ဖြာ ဝီ တဝ်း၊ “ဟဲ့ ဟွတ့် ဇမ် အာခြာဝ် ဒီ လိုဝ် စှိုမ် ဂေ ဒူအီ အီ ဘူင် တဲး ဒုဝ် ဂေ ဆီငါ အာဒါ ဇဝ်ဖြာ ပီ ကြိုပ် အီ ဟဝ်။ ဘော ဂေ အီ ဘူင် တဲး ဒုဝ် ဂေ ဆီငါ ခဲင် ကာပိုမ် ဘော ဒူပ် ဒီ ပန် ဒူအီ အူ ဝီ ကာတဲ ဂေ၊ ဘော ဂေ အီ ဟူမ် ယင် မာလေတ့် ဂေ ယင် မာနှာယ် ဘော ဟူမ် ဘော ဒျီင် အီ မွှိုမ် ကာအိး ဘဲန် မျုဝ် ဘဲန် မျုဝ်၊ ဂေ အီ ဘူင် ဇိုဝ် တီ ဒွန် မျုဝ်၊ ဂေ ဒီ လိုဝ် စှိုမ် တူတ့်။

18 ခုဝ်၊ အုဝ် ဟဲ့ ဟွတ့် နပ် ပီ ခြာမ် ဂေ ဘော ပီ ဘူင် ဂေ။ အုဝ် ဒီ တး ဒဲ့ ကာဇု ဒူအီ ဘောကာဂ့လျီတ် ဘော ဒူအီ အီ ကာလာင် ဂြုဝ်း ဒွန် မျုဝ်။ ဒေါ ကာဒူပ် တး ဂေ တီ၊ ဂေ ဒီ ဘော ယိုဝ် ပီ ပါယ် အာဖုင် ဒင်ခုဝ် အုဝ်။

19 မာလဲ၊ အုဝ် ဒီ ဘော ဒိုဝ်း ဂေ မင် အီ၊ အီ ဟဲ့ လွတ်၊ ဝီ စ်ု ဂေ ဟာဝ် ဒူင် ကွယ် ဒူအီ အာမျုဝ် ဟဝ်၊ တဲး ဂေ ဟာဝ် ဘော ခဲင် မိူင် ထာဆိတ်၊ မိူင် ဘူလ၊ မိူင် လုတ် အီ မုး ဒူင် ကွယ် ဂေ ဒူအီ အီ နပ် ဒီ ဘန့် အ၊ ဘော ဒီ မိူင် အာမေဆေတ် ဂါယ် မိူင် ရူတ်၊ မိူင် ထူဘာ ဂါယ် မိူင် ယာဝ် ဘော ဒီ ဂေ ဒူအီ အီ ကွယ် ခဲင် ဂုန် အိုမ် အီ တူ ဒွိုမ် ယိုဝ် လွင် အုဝ်၊ ဘော တူ ဒွိုမ် ယိုဝ် ခဲ့ တာင် အာဖုင် ဒင်ခုဝ် အုဝ်။ ဂေ ဒူအီ ပီ စ်ု အုဝ် တီ၊ ဂေ ဒီ ဘော ကာလာင် လွင် အာဖုင် ဒင်ခုဝ် အုဝ် ကာတဲ ဂေ ဒူအီ အာမျုဝ် ဟဝ် တီ။

20 ဂေ ဒီ ဘော ဝီ ဒိုဝ်း တး ဘီနွင် ဝေါဝဲ ဘေ အီ ကွယ် ခဲင် မိူင် ဂေ တီ၊ တဲး ဂေ တး ဇမ် ဒီ နွန် အုဝ် အီ ဘွတ်၊ တဲး ဂေ ဘဲန် ပီ ပီ ဒီ လှူ ဒီ အုဝ်။ ဂေ ဒီ ဘော ဝီ ဒိုဝ်း တး ဘီနွင် ဝေါဝဲ ဘေ တီ၊ တဲး ဂေ ပဝ့် မင်ပြွင့် ဘော လက်လဝ် ဘဲန် မျုဝ် ဘဲန် မျုဝ်၊ မာ မာလုဝ် ဂေ မင်ပြွင့် ကာဟာတ့်။ ဂေ ဒီ ဘော ဒိုဝ်း တး ဂေ တီ ဒူင် ကွယ် ဇဝ်ဖြာ ပီ ဂေ ဒူအီ အီဆာရေလ ဒိုဝ်း တး ပီ ဒီ လှူ ဂေ ခဲင် ဆီလယ့် အီ ဆီငါ ဘွတ်၊ ဝီ ဟာဝ် ဒူင် ကွယ် ဟုဝ် ဇဝ်ဖြာ။ 21 အုဝ် ဒီ ဘော ဒိုဝ်း ဒူအီ ကာတဲ ဘေ တီ မင် အီ၊ တဲး ဂေ ဘဲန် ဒါ အီ လှူ ဒီ ဇဝ်ဖြာ ဘော ဘူင် ဂါန် ခဲင် ဟုဝ် ဇဝ်ဖြာ ပီ ဂေ ဒူအီ အာလေဝီ။

22 အုဝ် ဒီ တဲး ဒူအီ အာမျုဝ် ဘေ ဘော စိူဝ် ဘေ ကွယ် ဆေဆေ။ ပါယ် တီ အုဝ် ဒီ ဘော တဲး ဂါင်ဟြာဝ် ကာမာယ် ဘော ကာဒါယ် ကာမာယ် ကွယ် မန် ဆီချာ ဆေဆေ။”

23 ဇဝ်ဖြာ ပီ ဝီ တဝ်း၊ “ဆီငဲ ဘ့လွယ် မာဂျီန် ကာမာယ် ဒွန် ဆီငဲ၊ ဘော ဆီငဲ ဒီလှဝ် ဒွန် ဆီငဲ၊ ဂေ ဒူအီ ဘောကာဂ့လျီတ် ဒီ ဘော တး ကြိုပ် အုဝ်။”

24 ဒေါ ဝီ လေး ဝေန့် ဂေ၊ ဂေ ဒီ ဘော ယိုဝ် ဒုဝ် ယမ် ဂေ ဒူအီ အီ ကာဘး ဒီ အုဝ်။ မင်ပြတ့် အီ ဟူမ် ယင် ဒူအီ၊ ဂေ တူ ယမ် ဒေါ မှဝ်။ ဘော ငဝ် အီ တဲး ဒူအီ ခမ် ဒုက် တာင်၊ အာဝ် ပွိုန် ဘျတ်။ ဆေ ဟီ ယိုဝ် ပီ ပါယ် ဂေ တီ၊ န့ ဘော ဘဲန် မွှိုမ် ကာအိး ကာဆဝ် ဒီ ဒူအီ ဘောကာဂ့လျီတ်။