အာနီ မုး မှုဝ် ပဲ့ ဟဲ့ ဒွိုမ် တဝ်း အာဆာလုဝ်မုဝ် အီ ဟဲ့ မွှိုမ် ထူမ် လွှိုမ် မှုဝ် မျုဝ် ဟဝ် ဘောကာဂ့လျီတ်။

2 တဲး မဲ အုး ဆီချာ အုဝ်၊ တဲး မူတ့် မဲ ဘျ နဝ်း ရွက့် မဲ ဒီ အုဝ်။ ခုဝ်၊ ပီ ပါယ် နဝ်း ရွက့် မဲ၊ န့ မွှိုမ် လွှိုမ် အုဝ် ဒျီင် အိုမ် မာငုန်။

3 နာမန် အုး ငှုန် ပီ ဖဝ်း မဲ န့ ဟဲ့ လဝ့် ကာဆဝ် နဝ်း အုဝ်။ ဆေ အုဝ် ယိုဝ် အီ ဟဝ် ကာလာင် လွင် စိူဝ် မဲ၊ ဟဲ့ ပီ အီ ဟုး နာမန် အုး ငှုန် နာ အာတ့် အုဝ်။ ကူပ် န့ ပါယ် တီ၊ ခဲ့ ကွယ် ဂေ ဒီဘျာ ဇဲတ် ဒီ ဘော အိုင် မဲ။

4 တဲး မဲ ဒဲ့ အုဝ် ခေါ အူ ဒဲ။ အုဝ် မိူဝ် ဒီ ကာဘ့လဲပ် ဟာဝ် ဒူပ် မဲ။ မဲ ခုန်ဒီခမ် အီ အိုပ် အုဝ်၊ တဲး မဲ ဒိုဝ်း အုဝ် တး ကွယ် ခဲင် ဟူင် အိတ် မဲ။

ယေ ဒီ ပွိုန် ဒီ ဘျုဝ် ဘျုဝ် ကျဝ် ကျဝ် ဒူပ် မဲ ခုန်ဒီခမ်။ ယေ အိူပ် ပီ ပါယ် မဲ ဒီ ရွက့် ဒီဘျာ၊ န့ ဟဲ့ မွှိုမ် လွှိုမ် ယေ ဒျီင် အိုမ် မာငုန်။

ပီ ရွက့် ဂေ ဒီဘျာ ဒီ မဲ ဟဲ့ မှာန်။

5 အိုယ် ဘေ ဒီဘျာ အီ ကွယ် ခဲင် မိူင် ယေရူဆာလဲမ်၊ နာ အုဝ် ပီ ဘော ဟဲ့ ဝွင့် မိူဝ်၊ န့ ယီ မွှိုမ် ရွက့်။ န့ ပီ ဘော ဝွင့် ပီ ထိုပ် အီ ကွယ် ဂေ ဒူအီ ကေဒါ မိူဝ်၊ န့ ယီ စှိတ် ပီ ဘိက် ဂွင့် အီ ကွယ် ခဲင် ဟုဝ် အာဆာလုဝ်မုဝ်။

6 ကွဲ့ တဲး ဘေ ယွတ် တွင့် အုဝ်။ အုဝ် ဝွင့် ပါယ် နီ ကူပ် ဟဲ့ ရာယ် အုဝ် ဒီ ဆောဒါတ်။ အီကတ် အုဝ် ဂေ ဝါ အုဝ် အီ မုး အီမာယ်၊ ဂေ ဟဲ့ ရူ စာဝ် ဒီ အုဝ်။ ဂေ ဟဲ့ စ်ု အုဝ် ဟာဝ် ဘူင် ဂါန် ခဲင် မာန် မာငုန် ဂေ။ အီ မုး မာန် မာငုန် အုဝ်၊ အုဝ် ယီ တူ ဒန် ယွတ် လိုမ်လာ။

7 အိုယ် ပါဝ် ပီ ရွက့် အုဝ်၊ တဲး မဲ ကာလာင် ဒီ အုဝ်၊ မဲ ဒီ ဟာဝ် ဟျီင် ဖိုင် မာဘူ မဲ ဒီ မှဝ်။း ဒေါ ကာတဲ ဆီငဲ၊ မဲ ဒီ တဲး ဖိုင် မာဘူ မဲ ဒီလှဝ် ဒီ မှဝ်။း ဆေ မဲ တူ ကာလာင် ဒီ အုဝ်၊ အုဝ် ဒီ ဘော ပီ ယာ မာလမ် အီ ကာမှုဝ့် နာ အန် ဘော ဝိန် ဒီ ဟြေတ့် မဲ ခူပ် ဖိုင် မာဘူ ဂေ ဂိုက် မဲ။

8 အိုယ် မဲ နာင် အီ ဟဲ့ စှိတ် လွှိုမ် အီဘိုန့် ဘောကာဂ့လျီတ်၊ ဆေ မဲ ဆီ နပ် ဒူင် ကွယ် ပါဝ် မဲ၊ တဲး မဲ ဒူပ် ပန် ဖိုင် မာဘူ မာပဲ တီ။ တဲး မဲ မိူဝ် ဟာဝ် ဟျီင် မာဘူ ဂေ မာပဲ မဲ၊ ဟာဝ် ခူပ် ထိုပ် ဂေ အီ ဟဝ် အီ ဟျီင် မာဘူ မာပဲ။

9 အိုယ် မဲ ပါဝ် ပီ ရွက့် အုဝ်၊ မဲ ပီ မင်ပြွင့် ဒုဝ် အာဟျာင် အီ ခြိုင် ဒီ လက်လဝ် ခုန်ဒီခမ် ဖာရုဝ်။

10 ကာလာ မဲ ဘော ဘီဟျဝ့် ပီ တာ မဲ မိူဝ် ဟဲ့ စှိတ် ကာဆဝ်။ ဘော ပွိုန် မာဟွယ် အီ ဟွယ် ဒီ မဲင် မဲ ဘဲန် ဝန် ဘဲန် ဝန် မိူဝ်၊ ဟဲ့ မွှိုမ် ယွတ် ကာဆဝ်။

11 ယေ ဒီ ဝီ ဘူင် မာကာဝဲ့ ခြိဝ် အီ ဟပ် ဘုဝ်း ရွိုန်၊ တဲး န့ ပီစှိတ် မဲ နာင်။

12 ဒေါ အိတ် ဒီလှဝ် ခုန်ဒီခမ် ဒဲင် ကာစှူင့် အန်၊ နာမန် အုး ငှုန် အုဝ်၊ တဲး န့ အုး ငှုန် ဘော ဟုဝ်။

13 ပါဝ် ပီ ရွက့် အုဝ် ဟဲ့ ပီ န့ကြိုဝ်း အုး ငှုန် ဒဝ် မူရာ အီ ကွယ် ခဲင် ဟူ အီ ဟွယ် ဒီ ဘင်နဝ်း အုဝ်။

14 ပါဝ် ပီ ရွက့် ကာဆဝ် အုဝ်၊ အန် မိူဝ် ဟဲ့ ပီ ဘုဝ်း အီ ကွယ် ခဲင် မာန် မာငုန် အီ တး ဒူင် စိူဝ် အေန်ကေဒီ။

15 အိုယ် ပါဝ် ပီ ရွက့် အုဝ်၊ အာရိုပ် မဲ ဟဲ့ စှိတ် ကာဆဝ်။ ငါယ် မဲ မိူဝ် ပီ မာဘ့လူယ် ဘော မွှိုမ် ယွတ် ဆေဆေ။

16 အိုယ် ပါဝ် ပီ ရွက့် အုဝ်၊ အာရိုပ် မဲ မိူဝ် ဟဲ့ စှိတ် ကာဆဝ် ဘော မွှိုမ် ရွက့် မွှိုမ် ဝုဝ် ကာဆဝ်။ ပေတ့် အီ ငျီန် ဒီ ဘော ဘဲန် ဒူင် အိတ် အာယ်။

17 အာယ် ဒီ ဒိုဝ်း ဟေ အာရိတ် ဒီလူယ် ဘူင် မာနက် ကာင် အာယ်။ အာယ် မိူဝ် ဒီ ဒိုဝ်း ဟေ န့ကေ ဒီလူယ် ဘူင် ဒီ အုဝ် အန်။