ပါယ် တီ ဒေါ ဆီ နှိုမ် မဲ တဲး မဲ ဝီ လှုဝ်း ဇဝ်ဖြာ အီ မုး ဒါ ကာညာ အီ ဟဲ့ ဖာန် ဘ့လေး မဲ။ တဲး မဲ လှုဝ်း ဇဝ်ဖြာ အာတ့် တး ဇမ် ဒုက် တာင် ဘော အာခြာဝ် ပန် ဒီ ကာလာင် မဲ လွင် တူ အိုင် မဲ အာခြာဝ် တီ။

2 န့ ဒီ မိုဝ်း အာခြာဝ် အာတ့် ဒီ ဟြာယ် ဘ့လာင် ဆီငဲ ဘော ဘ့လာင် မာဂျီန် ဂေ ဆီမန့်၊ ဘော အာတ့် ဝီ ဟုဝ့် န့အု ဝီ တး တဲး န့ အပ် ဝွင့် ဝါယ် ဟဲ့ စုဝ်း ဂ့လာယ်။

3 ပန် အန် တီ ဂေ အီ ဒီ ဂွင့် ဒီ ရဲ ကာင်၊ ဂေ ဒီ ဘော ဒီယုး ဒီယေန့်။ ဂေ အီ ဟဲ့ ဒွိုမ် မိုဝ်း ပ့လူမ် မိုဝ်း ဟဲန့် ကိူန်၊ ဂေ ဒီ ဝီ ဟာဝ် ကာဂုဝ့်။ ဂေ အီဘိုန့် အီ ကြိတ် ငှုဝ် ဒီ ဘော ဂိူတ် ဘော စူ ကူပ် ဟဲ့ ကြဲ ဂေ ဒီ ပြေတ့်။ ဘော ဂေ အီဘိုန့် အီ ယွတ် ခဲင် ကာဒဝ် ပါတဲင်၊ ဂေ အာဝ် ဟူ ယိုဝ် ဘြီ။

4 န့ ဒီ ဇမ် အာခြာဝ် ပန် ဒီ ကာဘိတ် အီ မာလုဝ်း အီ လေး ဒီ န့တေန့်၊ အာဝ် ဟူ ပွိုန် ယိုဝ် ဟမ် ကြိတ် အီ ငှုဝ်။ မာလဲ၊ ဆိန့်ဝး စေဝ် ဟမ် မာဆိမ် ဒီ ဝီ ဘျိတ့် တဲး ဒူအီ န့ဆိုဝ်း။ ဟမ် မဲင် ဂေ အီဘိုန့် အီ တဝ်း မှုဝ်၊ န့ ယီ ကြဲ ဒီ ဟြာယ်။

5 န့ ဒီ ဘော ဇမ် ပန် ဒီ ယုဝ် ဒူအီ တူ ယ ဟာဝ် ဒူင် စာ။ ဂေ ဘော ယုဝ် ဒီ ကာဒုး အာဖေ အာရေ ဒေါ ဟာဝ် ဂေ ဒူပ် န့တေန့်။ န့ ဒီ ဘော မိုဝ်း ဟေ အီ ဘုဝ်း လုယ်။ မာ အာဇူင့် အာဝ် ဟူ စာဝ် ဒန့်။ ပီ ဆီ ဘူင် ဆီ ရန့် ဒူအီ မိူဝ်၊ အာဝ် ဟူ မိုဝ်း။ လွင် အန် တီ ဒွန် မျုဝ်၊ န့ ပီ ဒူအီ အီ ဟဲ့ ကြဲ ဒီ ကတ်၊ ဟဲ့ ချြီ့ ပန် ဒီ ယမ် ဂေ။ ဒေါ အန် တီ ဒူအီ ဇိုဝ် တီ ဒီ ဟာဝ် ကွယ် ဒူင် ကွယ် ဒွန် အီ ဆေဆေ။ ဂေ အီ က့လိုဝ် အီ ငှဝ် ကူပ် မိုဝ်း ဒူအီ ယမ်၊ ဂေ ဆီ ဟာဝ် ဒူပ် န့တေန့်။

6 တဲး ဘေ လှုဝ်း အန် ဇဝ် အာတ့် ကာဒတ် ဝန် ရွိုန်၊ အာတ့် ကာလာတ့် ဆီလယ့် ခြိဝ်၊ အာတ့် လှုး အာတ့် ရွတ့် ကာပဝ် အိုမ် အီ ကွယ် ခူပ် တုဝ်း အိုမ်၊ ဘော အာတ့် ကာဘက် ကာလေန့် အီ ပ့လက် အိုမ် ဒီ အိုမ် ခိုမ်။

7 တဲး ဘေ ကာဒွါ့ ကာဖာ ဒေါ ဆီ ပွိုန် ဘေ ဒီ လှုဝ်း အန် ဇဝ် အာတ့် ဝီ ဘဲန် ဘေ ကာပုး ဂေ ကာဒါယ် ပဲ့ ဟဲ့ ဒွိုမ် ဒိုဝ်း ဇဝ်ဖြာ ဒီ ဘူင် ဘေ၊ အာတ့် လေး နဝ်း ဖွိုမ် ဘေ ခဲင် ဒုဝ် ဘူင့် ဘေ၊ ဝီ ဟာဝ် ဒူင် ကွယ် ဇဝ်ဖြာ အီ ဟဲ့ ဒွိုမ် ဒွါ နဝ်း ဖွိုမ် တီ ဒီ ဘေ။

8 ဒါ ဆာရာ အီ ဟုဝ် ဒါရာ ဟဲ့ တဝ်း၊ “ဒွန် မျုဝ် ဟဲ့ ဒီလူယ် ဒီလာယ်။ ခဲ့ ကွယ် ဒွန် မျုဝ်၊ အာဝ် မိုဝ်း ဒီခုဝ်။”

9 ဒါ အီ ဟုဝ် ဒါရာ တီ ဟဲ့ မိုဝ်း အာငျာန်။ အာဝ် ဝန် ခဲ့ တီ။ အန် မိူဝ် မာနုဝ် ဂေ ဒူအီ ကိူန်၊ တဲး ဂေ နပ် လွင် ပီ ပါယ် ဘဲန် မျုဝ် ဘဲန် မျုဝ်။ အန် ဝီ ဟြေတ့် တး ဂြုဝ်း မာကာထ ဘော ဂြုဝ်း ထုင် ဘဲန် မျုဝ် ဘဲန် မျုဝ်၊ ဝီ ဒဲမ် အုန် တဲး န့ ငှိုယ် ဇေန့်ဇာ ဒူပ်။ 10 ဒါ ဆာရာ အီ ဟုဝ် ဒါရာ တီ၊ အန် ဘော ဟြေတ့် ဂြုဝ်း အီ မွှိုမ် ထူမ် ဘော ဒဲမ် အုန် ဂြုဝ်း ဒါရာ အီ ဆိူဝ် ဆိူဝ် မှာန် မှာန်။

11 ဂြုဝ်း ဒူအီ အီ မိုဝ်း အာငျာန် တီ၊ န့ ဘော ပီ န့ကြွုန် ပီ ဂူင့် ဒါ အီ ဟျီင် မာဘူ။ ဂြုဝ်း အာငျာန် ဘွတ် ပီ ဒဲမ် အုန် ပီ ကာဇု အုန် အန် တီ၊ န့ ဘော ပီ မာဟိန် ပဲ့ ဟဲ့ ဒွက် အုန် အီ၊ တဲး န့ မန် ဆီချာ။ 12 အိုယ် ဂွန် ကာညူမ် အုဝ်၊ ဒဲင် တီ တဲး မဲ ဆာဒိက်။ လွင် ပီ ဒီ ဒဲမ် ပဲ့ ဂေ ထမ် အာဝ် နပ် ဒီ တူတ့်။ လွင် ပီ ဂျုဝ်ဂျာ အေ ဒီ ဟေန် ကိူန် မိူဝ်၊ န့ ဘော တဲး အေ နုန် ကာဆဝ်။

13 ဒီ ကာဒဲ့ ဂြုဝ်း နီ၊ န့ ဘော မုး၊ တဲး ဘေ ရုဝ်ဆေ ဇဝ်ဖြာ ဘော ဘူင် ဒူပ် ဂြုဝ်း အန် ဇဝ်။ လွင် အန် တီ ဟဲ့ မုး တူတ့် ပီ လုဝ် ဘူင် အေ ဒူအီ။

14 ခုဝ်၊ ဇဝ်ဖြာ ဘော မုး ဒါ ကာညာ အီ ဒီ ဆုင်ဖျာတ် ခဲ့ ပီ ဘူင် အေ ဒွန် မျုဝ်။ န့ ဘော မုး မျုဝ် ပီ ချြီင် ပီ တူ ဘျ အေ၊ န့ ဘော မုး အီ မွှိုမ် ဘော အီ စီစိဝ် ဒွန် မျုဝ်။