1 န့ မိုဝ်း ဂြုဝ်း ထုင် အီ တဝ်း၊ တဲး မဲ ဒိုဝ်း ပီ ဒီ ဟူမ် ပီ ဒီ ဒျီင် မဲ၊ တဲး န့ လှဲ ဒူပ် အိုမ်။ ဝါယ် ဟဲ့ လှေန့် ကာဆဝ် မဲ ဒီ ဝီ ယိုဝ် ဝီ ပွိုန် ဝိဝ်။

2 တဲး မဲ ကာဆာင် ဒွါ ဒီ ဒူအီ ဘဲန် ဝီ ဘဲန် ဝီ။ ခုဝ်၊ အေ တူ နပ် အာဖေ အာရေ မျုဝ် မှဝ် ဒီ ဘုဝ် တး ဒဲင် ကာဒါယ် နီ။

3 ဆေ န့အု ဝွင့် ဟီ ဟုဝ့်၊ န့ ဒီ ဂ့လာယ်။ ဆေ ဟေ ကေး ဟာဝ် နာ မှဝ်၊ အန် ဘော ကွယ် ပါယ် တီ။

4 အာဆေ ဘ်ု ဒီ ယွတ် ခုန် ဂေ ဂ့လာယ်၊ အန် တူ ဆမ် မာဆေ။ အာဆေ ယွတ် မီ န့အု ခဲင် ဂါင်ဟြာဝ်၊ အန် မိူဝ် တူ ပွိုန် ဒီ ဆုဝ့် ဒီ ဘေတ့် မာဆေ။

5 န့ ဘော ပါယ် နီ။ မဲ တူ နပ် နာ တး ခုန်။ မဲ မိူဝ် တူ နပ် ပီ ပါယ် ဒုဝ် ဘူင့် ဒူအီ ခဲင် ဝတ့် မာ အန်။ ပါယ် တီ မဲ မိူဝ် တူ ပွိုန် နပ် ဇဝ်ဖြာ ပါယ် မှဝ် ဒီ ဘူင် တဲး န့ မိုဝ်း တူတ့် ဒွန် မျုဝ်။

6 တဲး မဲ ဘြတ် မဲ ဝါန် ခြိုင် ဆီမာ စေဝ် ညှာ။ ဘာ ဒီ အပ် မိူဝ် ကွဲ့ စူ။ ခုဝ်၊ မဲ တူ နပ် ဆီမာ ပီ ဘြတ် မဲ တီ၊ မျုဝ် မှဝ် ဒီ လတ့် ဆီချာ တူ လတ့် ဆီချာ။ ဆေ အာဝ် ပါယ် တီ မိူဝ်၊ ယုဝ် န့ ဒီ ဘွတ် ဘော အာ မျုဝ်။

7 ဘ့လာင် ဆီငဲ ဘော ဘဲန် အီ ဘျုဝ် ဒါခိုယ် ဒီ နဝ်း။ ဒူင် ဆွိုန် ဆောဒါတ်၊ န့ ဘော မွှိုမ် ယွတ်။

8 အာဆာက် မဲ ပီ ဘော တူင့် ခဲ့ မှဝ် မိူဝ်၊ တဲး မဲ ခူယ် ဒါခိုယ် ဒွန် ဆီနမ် ဒွန် ဆီနမ်။ မာလဲ၊ တဲး မဲ ယီ လှုဝ်း လွင် အီ အပ် ဝွင့် အီ ဒီ တး၊ အီ ဒီ လှေန့် ကာဆဝ်။ လွင် အီ ဒီ တး ဒွန် မျုဝ်၊ န့ ဘော မုး အီ ဒီလူယ် ဒီလာယ်။

9 အိုယ် ဒူအီ နှိုမ်၊ တဲး မဲ ခူယ် ဒါခိုယ် ကူပ် ဆီ နှိုမ် ဆီ ဒီတဲတ် မဲ။ ခဲ့ ပီ ဆီ ဘူင် မဲ ခဲင် နဝ်း မဲ၊ တဲး မဲ ဘူင်။ မာလဲ၊ မဲ လုဝ် ကာဒွါ့ ကာဖာ ဘော လှုဝ်း ဇဝ်ဖြာ ဒီ ဘော ဆုင်ဖျာတ် ခဲ့ ပီ ဘူင် မဲ ဒွန် မျုဝ်။

10 ကွဲ့ တဲး မဲ မိုဝ်း နဝ်း ကာဟွာ့ နဝ်း မှဲ ခေါ အူ မျုဝ်။ ဆေ အာဝ် မုး ပါယ် တီ မိူဝ်၊ ကွဲ့ တဲး န့ ဆဝ် ဒီ နဝ်း မဲ။ ခုဝ်၊ ဘော အာဆာက် စုဝ် နှိုမ် မဲ ဒေါ ဆီ မိုဝ်း မဲ ပ့လူမ် ဂေ ဟဲန့် တီ အာဝ် မိုဝ်း ဒီခုဝ်၊ ဟဲ့ ဒီလူယ် ဒီလာယ်။