မာရွယ် အူ ဒုဝ် အီ ဟဲ့ ယမ် ခဲင် နာမန် အုး ငှုန်၊ န့ ဘော တဲး နာမန် ဘော ကာပဝ် အုး အမ်။ နာ တူ လွှက့် အီ စဲက်၊ န့ ဘော နပ် ဒီ တဲး ဆာရေ အာငျာန် အီ ဟဲ့ မိုဝ်း ဒီငဝ်း ဒီခန် ဝီ လိုဝ် စှိုမ်။

2 နဝ်း ဒူအီ အီ မိုဝ်း အာငျာန် ဘော ကွယ် ဘ့လာက် အာအး။ နဝ်း ဒူအီ အီ ရိုဝ် ဘော ကွယ် ဘ့လာက် အာဂ။

3 ဒေါ ဟာဝ် အန် ဒူပ် န့တေန့်၊ ရိုဝ် အန် ဘော လိုဝ်း ဆီချာ ဒီ ဒူအီ ပီ ကာတုန့် အန်။ အန် ဘော ဘျ ခဲ့ ရိုဝ် အန် ဒီ ဒူအီ ဒွန် အီ။

4 ဆေ ဒါ ကာညာ မဲ ဟဲ့ ရူ စာဝ် ဒီ မဲ၊ ကွဲ့ တဲး မဲ လေး ဒူင် ကွယ် မဲ။ နဝ်း ခမ် ဒီ ယိူန် လှေန့် ဘော ပဲ ဒီ ဂဝ်း ဝဲန် မှာပ် အီ တာင် ကာဆဝ်။

5 အီ ဟာယ် အီ မိူက် ပီ ယိုဝ် အုဝ် ဒဲင် ကာဒါယ် ခြိုမ် ဘ့လေန့် နီ၊ န့ ဘော မုး ပီ ကာလိုပ် ပီ လုတ့် ဂေ အီ မုး ဒါ ကာညာ။

6 န့ မုး ဂေ ဒူအီ ရိုဝ် ဝီ မိုဝ်း အာယာ ပီ ဒါ ကာညာ အီ မိုဝ်း ပွုန်။ ဂေ ဒူအီ ခြမ် ယီ ဝီ ကာဒုး ဒီ ခမ် ဒီ စုဝ်း တျီမ်။

7 အုဝ် ဟဲ့ ယိုဝ် ဂေ အီ မုး မှာယ် အီ ပွိုန် ဒီ ပဝ့် မ့ပြွင့်။ ဂေ အီ မုး အာမူ အာမာတ် ခုန်ဒီခမ် ယီ ဝီ ကာဒုး ဒီ ဟာဝ် ဒီ ပ့လဝ် ပီ မှာယ် အီ။

8 ဆေ မဲ ဂိုဝ်း ကာဒဝ်၊ လုဝ် ယုဝ် န့ ဝီ မုး မဲ ဒီ စုဝ်း နာ ခဲင်။ ဆေ မဲ ပျာတ့် ရဲင် တဲး န့ လှုး၊ လုဝ် ယုဝ် မာဟန့် ဒီ ဝီ တး ဇုဝ့် မဲ။

9 ဆေ ဒူအီ ဘူင် ဂါန် လုဝ့် မာဝ်၊ လုဝ် ယုဝ် မာဝ် တီ ဝီ ကာစှတ့် ဒိုဝ် အန်။ ဆေ ဒူအီ တာ မိုယ် ဒး ဟေ၊ လုဝ် ယုဝ် ဟေ တီ ဒီ ဝီ တဲး အန် ကာဒုး ဆဝ်။

10 ဆေ ဘ့လာ မိုယ် မဲ ဟဲ့ ဟေတ့်၊ ဆေ မဲ တူ လာ့ တဲး န့ လမ်၊ မဲ ဒီ တူတ့် ကိူန် ဟဲန့် မဲ။ ဆေ မဲ ယီ မိုဝ်း အာငျာန် ဘော လှဲဝ် ဒီ ဘူင်၊ န့ တဲး မဲ ပဲ မဲ အွင်။

11 ဆေ မာဟန့် အီ မိုဝ်း အာယ် ဟဲန့် ပွိုန် ဒီ ဇုဝ့် အီ အာတ့် ဖိုက် အီ တဲး အန် ငဲ၊ ဒါ ဆာရာ အီ နပ် ဒီ မာနုဝ် မာဟန့် တီ၊ အာဝ် မိုဝ်း ဒီခုဝ် မာဆေ။

12 ဂြုဝ်း ပီ ကာလာင် ဒူအီ အီ မိုဝ်း အာငျာန် တဲး အန် မိုဝ်း ဆာရေ။ အီ မုး ဂြုဝ်း ပီ ကာလာင် ဒူအီ ရိုဝ် ဘော နပ် ဒီ ဝီ ဘူင် တဲး အန် လိုဝ် စှိုမ်။

13 ဒေါ ကာစုး အန် ဒီ ကာလာင် ဂြုဝ်း၊ န့ မုး ဂြုဝ်း အီ မိုဝ်း အာငျာန်။ ကာဒဲ့ ဂြုဝ်း အန်၊ န့ မုး ဂြုဝ်း မိူက် ဂြုဝ်း ဟာယ်။

14 ဒူအီ ရိုဝ် တီ၊ အန် ဘော နပ် ဒီ မူတ့် ကိူန် ဂြုဝ်း ကိူန် အီ တူ မိုဝ်း ဒီခုဝ်။

န့ တူ မိုဝ်း အာဆေ အီ နပ် လွင် ဒီ ဝီ ဘဲန် ပါယ် မှဝ်။ န့ မိူဝ် တူ မိုဝ်း အာဆေ အီ နပ် ဒီ ဝီ ကာလာင် ဒီ အေ၊ န့ ဒီ ဘဲန် ပါယ် မှဝ် အာခြာဝ် အီ ဒီ တး။

15 ဂါန် ပီ ဘူင် ဒူအီ ရိုဝ်၊ န့ ဘော တဲး အန် နုန် ပီယေန့်။ အန် မိူဝ် တူ နပ် န့တေန့် ပီ လုဝ် ဟာဝ် အန်။

16 ဆေ ခုန်ဒီခမ် အီ အိုပ် မိူင် ဟဲ့ ဒွိုမ် ဘဲန် မှာယ် အီ၊ ဒူအီ ရဝ် ဒူအီ ကာင် ဒီ ဇမ် ဒုက် တာင်။ ဆေ အာမူ အာမာတ် အန်၊ ဝီ ဘူင် ဘ့လွယ် ဟူမ် ဘျုဝ် ဟူမ် ကျဝ် ဆိန့်ဝး စေဝ်၊ မိူင် တီ ဘော မိူင် ဒီ ဇမ် ဒုက် တာင်။

17 ဆေ ဂွန် ခုန် ဂွန် ဒါ ကာညာ ဝီ ဘဲန် ခုန်ဒီခမ်၊ န့ ဒီ တဲး မာန် မိူင် ဘျုဝ် ဒါခိုယ်။ အာမူ အာမာတ် အန် မိူဝ် နပ် ဒီ ဟူမ် ဒူပ် အာခြာဝ် ဒူပ် မ့ပြာ၊ ဟူမ် တဲး န့ ဘဲန် ပ့လူမ် ဘဲန် ဟဲန့် ဒီ ဂေ။ အာဝ် မုး ဟူမ် တဲး န့ ကော ယိုတ့် ကော မဝ်။

18 ဆေ ဒူအီ ကြာန် ကာဆဝ်၊ န့ ဘော တဲး ကာတု ကာင် အန် ရာမ် ကာပျာတ့် လိုဝ်။ ဆေ အန် ကြာန် ဒီ စျှီမ်၊ ကြာန် ဒီ မ့ပြာယ်၊ ဂ့လာယ် ဒီ ရွတ့် ဒီ ဘော အမ် ည ဘော ကာင်။

19 ဆေ အေ မိုဝ်း ပီ ဒီ ဟူမ်၊ တဲး အေ ဘျုဝ် ဒါခိုယ်။ အိုမ် မာငုန် မိူဝ်၊ န့ ဘော တဲး အေ ခူယ် အေ ကျဝ်။ အေ ယီ လုဝ် မိုဝ်း ရွိုန်၊ အေ ကော နပ် ဒီ ပွိုန် ဒွန် မျုဝ်။

20 ကွဲ့ ဇေန့်ဇာ ဒီ အေး ခုန်ဒီခမ်၊ ဘော ကွဲ့ ပြာ ဒီ ဒိူင် ဒူအီ ခြမ် ခဲင် ဟူင် အိတ် မဲ။ မာဆိမ် အီ ဘိုန့် ဟာဝ် ခဲင် ဂါင်ဟြာဝ်၊ ဂေ နပ် ဒီ ထူမ် ဂြုဝ်း ပီ ကာလာင် မဲ၊ ဝီ ဟာဝ် ခဲ ဒီ အီ။