1 အုဝ် ဟဲ့ ကာဒွါ့ ကာဖာ လွင် ပီ ပါယ် အာဆာက် ဒူအီ။ အုဝ် ဝီ နပ် ဝီ ယိုဝ် လွင် ပီ ဘူင် ဒူအီ အီ မိုဝ်း နဝ်း ဆိူဝ် နဝ်း မှာန် ဘော ဒူအီ အီ မိုဝ်း အာငျာန်။ န့ မုး ဇဝ်ဖြာ အီ အိုပ် ပီ ဘူင် ဂေ ဒွန် မျုဝ်။ န့ တူ မိုဝ်း အာဆေ အီ နပ် ယုဝ် အီ ဒီ ရွက့် ကာဝေ အန်၊ ယုဝ် အီ ဒီ ဇွင့် အန် နာ အာတ့် ဟာဝ်။ 2 ဒီ ကာဒဲ့ အန် ဂေ ဒူအီ ဘောကာဂ့လျီတ် လုဝ် ခမ် အီ မုး အူ မျုဝ်။ ဂေ ဒူအီ အီ မိုဝ်း နဝ်း ဆိူဝ် နဝ်း မှာန် ဘော ဂေ ဒူအီ ဟာယ် ဒူအီ မိူက်၊ ဂေ ဒူအီ မွှိုမ် ဘော ဂေ ဒူအီ အီ တူ မွှိုမ်၊ ဂေ ဒူအီ အီ ဆီငါ ဒူပ် ပီ ဒမ် ဒါရာ ဘော ဂေ အီ တူ ဆီငါ ဒူပ် ပီ ဒမ် ဒါရာ၊ ဂေ ဒူအီ အီ လှူ ဒီ ဇဝ်ဖြာ ဘော ဂေ အီ တူ လှူ၊ ဂေ ဘောကာဂ့လျီတ် လုဝ် ခမ် အီ မုး အူ မျုဝ်။

ပါယ် တီ ဒူအီ အီ ဟဲ့ ဒွိုမ် ဒိူင် ကာဆဲန့် မိူဝ်၊ ဂေ ပီ ဒူအီ အီ တူ ယ ဒိူင် ကာဆဲန့်။ ဒူအီ ဘွတ် ဒူအီ မွှိုမ် မိူဝ်၊ ဂေ လုဝ် ခမ် ပီ ဒူအီ အီ ဘူင် မှာပ်။

3 အာတီ ဟဲ့ မုး အီ တူ မွှိုမ် အီ စီစိဝ် ကာဆဝ် ဒဲင် ကာဒါယ် ခြိုမ် ဘ့လေန့် နီ။ ဒူအီ ဘောကာဂ့လျီတ် ဘော လုဝ် ခမ် အီ မုး အူ မျုဝ်။ ဒဲင် တီ ခဲင် နဝ်း ဒူအီ ဘောကာဂ့လျီတ်၊ န့ မိုဝ်း မီ အီ ဟာယ် အီ တူ မွှိုမ်။ ဒေါ ဆီ အိမ် ဒေါ ဆီ မိုဝ်း ဂေ အာဆာက် ဂေ ဘော မိုဝ်း နဝ်း ဝှိုန့် နဝ်း ဆာဘာ။ ဝါယ် အန် တီ ဂေ ဘော ယမ် ဟာဝ်။ 4 မာလဲ၊ ဒူအီ အီ ဆီ မိုဝ်း အာဆာက် အီ ဆီ အိမ်၊ အန် ဘော မိုဝ်း ပီ နှဝ့် န့ဒဝ့်။ မာဆုဝ် အီ ဆီ အိမ် ဟဲ့ မွှိုမ် လွှိုမ် မာခြင်ဆီ အီ ဟဲ့ ဟွတ့် ယမ်။

5 ဂေ အီ ဆီ အိမ် တီ၊ ဂေ ဟဲ့ နပ် ဂေ လုဝ် ယမ်။ ဂေ အီ ဟဲ့ ဟွတ့် ယမ်၊ ဂေ အာဝ် ဟူ နပ် မာဆေ။ ဂေ မိူဝ် အာဝ် ဟူ ပွိုန် အာဂျိုဝ် မာဆေ။ အီ ဟဝ် မိူဝ် နပ် ဒီ ပိဝ် တူတ့် ဂေ။

6 နဝ်း လာယ် ရွက့် လာယ် ဇွင့် ဘော နဝ်း လာယ် လှယ့် အီ ဟဲ့ ကွယ် လှေန့် ကာဆဝ် ခဲင် နဝ်း ဂေ၊ ဟဲ့ ဟွတ့် ဟြာယ် တူတ့် ဒွန် မျုဝ်။ ဂေ မိူဝ် အာဝ် ဟူ လာယ် ဘာ့ မျုဝ် အီ ဘုဝ် ဘဲန် ဒဲင် ကာဒါယ် ခြိုမ် ဘ့လေန့် နီ ဒေါ မှဝ်။

7 ကူပ် န့ ပါယ် တီ တဲး မဲ ဘျုဝ် ဒါခိုယ် ဘော ဟူမ် ပီ ဒီ ဟူမ် ဘော ဒျီင် ပီ ဒီ ဒျီင် မဲ။ တဲး မဲ ဒျီင် အိုမ် မာငုန် ဘော ခူယ် ဒါခိုယ်။ လွင် အန် တီ ဟဲ့ မုး ပီ ဆီ တဲး ဇဝ်ဖြာ မဲ ဘူင်။ 8 တဲး မဲ စှိုပ် ခြိုင် စှိတ် အီ လုယ် ဆီငါ ဆေဆေ။ တဲး မဲ ဖဝ်း နာမန် ဒီ ဂိန့် မဲ ဆေဆေ။ 9 တဲး မဲ ဘျုဝ် ဒါခိုယ် ဒီ ကွယ် ရိုမ် ဒူပ် အီဘိုန့် ဝီ ပီ ရွက့် မဲ။ ဒွန် ဆီငဲ ဒွန် ဆီငဲ ပဲ့ ဟဲ့ ဒွါ ဇဝ်ဖြာ ဒီ မဲ စုဝ် မိုဝ်း မဲ အာဆာက် ဒဲင် ကာဒါယ် ခြိုမ် ဘ့လေန့် အီ တူ မိုဝ်း ဒီခုဝ် နီ၊ တဲး မဲ ဘျုဝ် ဒါခိုယ် ပါယ် တီ။ ဒဲင် တီ စုဝ် ကွယ် မဲ ဒဲင် ကာဒါယ် နီ၊ ဇဝ်ဖြာ ဟဲ့ တဲး မဲ ဘူင် ဂါန် ခဲ့ မိုဝ်း မဲ ပ့လူမ် ဂေ ဟဲန့်။ 10 ခဲ့ ပီ လုဝ် မဲ ဘူင်၊ တဲး မဲ ခတ် နဝ်း ဘော ဂျုဝ်ဂျာ ဒီ ဘူင် ခဲ့ မိုဝ်း မဲ ပ့လူမ် ဂေ ဟဲန့်။ ခုဝ်၊ ခဲင် မိူင် မာရာန ဒူင် ဒီ ဟာဝ် ကွယ် မဲ အာဝ် မိုဝ်း ဒီ လုဝ် ဘူင် လုဝ် ရန့်၊ အာဝ် မိုဝ်း အာကျာမ် အာငျာန်၊ အာဝ် မိုဝ်း အီ ကာလှုး ဒီ နဝ်း ဘော အာငျာန်။

11 အုဝ် ဝီ နပ် ဝီ ယိုဝ် ပေါ အူ မျုဝ် အီ ကွယ် ဒဲင် ကာဒါယ် ခြိုမ် ဘ့လေန့် နီ။

ဒူအီ အီ ခြန် ဒီ ကာဘ့လဲပ်၊ အန် တူ အွင် ဆေဆေ ဒေါ မိုဝ်း ဘ့လွယ် လာယ် ကာခဲန့် ကာဘ့လဲပ်။ ဒူအီ အီ ကျ အီ ယ၊ အန် တူ ပဲ ဒွန် ဇေန့် ဒေါ ကာဂုဝ်း အန် ဒီ ရန်ဆူ။ ဒူအီ အီ မိုဝ်း အာငျာန်၊ အန် တူ ပွိုန် ဒီ ဟူမ် ဖဲ ဆေဆေ။ ဒူအီ အီ မိုဝ်း အာငျာန် မွှိုမ် လွှိုမ် အီ ဟဝ်၊ အန် တူ မိုဝ်း ကြုဝ်ကြာမ် ဆေဆေ။ ဒူအီ အီ လွှက့် လှဲမ်၊ အန် တူ မိုဝ်း ဆာရေ ဆေဆေ။ ဒွန် အီ ယီ မိုဝ်း အာခြာဝ် အန်၊ မိုဝ်း ဒေါ ဆင်ဒုဝ် ဝီ မှဝ် ဝီ အန်။

12 ဒဲင် တီ၊ အာဝ် မိုဝ်း အီ နပ် အာခြာဝ် ဒီ ယမ် အန်။ မာဂါ ဘော နပ် ဒီ ဟဝ့် ဒီ န့ရပ်။ မာဆိမ် ဘော နပ် ဒီ ခြေ ယွတ့်။ န့ ဘော ပါယ် တီ ဒူအီ နပ် ဒီ ကာဒုး အာဖေ အာရေ ဒေါ တူ နမ်လှုဝ်း နမ်ရွယ် ဂေ။

13 ဒဲင် ကာဒါယ် ခြိုမ် ဘ့လေန့် နီ အုဝ် ဝီ ကာတုန့် အာငျာန် အူ မျုဝ် အီ မွှိုမ် အာမ် ကာဆဝ်။ 14 န့ ဟဲ့ ဒွိုမ် မိုဝ်း မိူင် အူ မိူင် အီ ဒီတဲတ်။ ဒူအီ အီ ကွယ် ခဲင် မိူင် တီ မိူဝ် တူ ကိူန်။ ခုန်ဒီခမ် တာင် အူ ကာဒင် ဘော တး ကာဂုဝ်း ဒီ မိူင် တီ။ အန် မိူဝ် ဟဲ့ ဝဲင် ရူပ် မိူင် တီ ဘော ဘူင် ဘ့လဝ့် န့တဲင်၊ တဲး အန် ပွိုန် ဒီ လိုပ်။ 15 ခဲင် မိူင် တီ၊ န့ မိုဝ်း ဒူအီ ဖ့လာန် အူ ဝီ အီ မိုဝ်း အာငျာန် ဘော လွှက့် ကာဆဝ်။ အန် ဘော တာ အာငျာန် အန်၊ တဲး အန် ချွတ် မိူင် တီ။ မာလဲ၊ ဝါယ် အန် တီ န့ ယီ တူ မိုဝ်း အာဆေ အီ ဝီ နမ်လှုဝ်း ဒူအီ ဖ့လာန် ဝီ တီ။ 16 အုဝ် ဟဲ့ ဟွတ့် ဒွိုမ် တဝ်း၊ “ဆေ ဒူအီ မိုဝ်း အာငျာန်၊ န့ ဘော မွှိုမ် လွှိုမ် အာဖုင် ဂေ ဟဲန့်။” ပီ ဘော တဝ်း ပါယ် တီ မိူဝ်၊ ဒူအီ ယီ အွန် ဒီ လုက်တာယ် အာငျာန် ဒူအီ ဂိန် ဒူအီ ဖ့လာန်။ ဂေ မိူဝ် တူ ဆီ ထူမ် ဂြုဝ်း ပီ ကာလာင် အန်။

17 ဆေ ဒူအီ ထူမ် ဂြုဝ်း န့စု န့စမ် ပီ ကာလာင် ဒူအီ အီ မိုဝ်း အာငျာန်၊ န့ မွှိုမ် လွှိုမ် ထူမ် ဂြုဝ်း ပီ ဒတ် ဒဲ့ ကာလာင် ခုန် ရဝ် ကာတဲ ဂေ ဒူအီ ရိုဝ်။

18 အာငျာန် ဟဲ့ မွှိုမ် လွှိုမ် ခြိုင် ကာဂုဝ်း ပီ တာ ဒါ ဆိုက်။ မာလဲ၊ ဒူအီ တူ မွှိုမ် အူ ဝီ ဘော နပ် ဒီ ပျာတ့် နာ ဘွတ် နာ မွှိုမ် ကိူန် ကာဆဝ်။