န့ တူ ကူပ် မိုဝ်း အာဆေ အီ ပီ ဒူအီ အီ မိုဝ်း အာငျာန်။ အာဝ် မိုဝ်း အာဆေ အီ ပွိုန် ကာလာင် လွင် ပီ ပါယ် ဘဲန် မျုဝ် ဘဲန် မျုဝ်။ ဒူအီ အီ မိုဝ်း အာငျာန် န့ ဘော နပ် ဒီ တဲး နာ အန် ဆာဘ့လာင်။ နာ အီ မာဘြူင့် အီ ဝွင့် အပ် တွိုန်၊ န့ ဘော နပ် ဒီ ဟြာယ်။

2 အုဝ် တဝ်း ဒီ မဲ၊ တဲး မဲ ထူမ် ဘူင် ဒူပ် အာမိင် ခုန်ဒီခမ်။ ခုဝ်၊ တဲး မဲ လှုဝ်း ပဲ့ ဟဲ့ ဒွိုမ် ကာဆဲန့် မဲ ဒီ ဇဝ်ဖြာ။ 3 ကွဲ့ တဲး မဲ ပီခြန် ဒီ တဝ် လေး ဟာဝ် ဒီ အာတ့် ခုန်ဒီခမ် ကူပ် ယုဝ် ကာဆဝ် မဲ။ ဆေ န့ မိုဝ်း လွင် အီ တူ ဘွတ် အီ တူ မွှိုမ်၊ အာဝ် လုဝ် ဒွါ အာကျာမ် အာငျာန် ဒီ ခုန်ဒီခမ်။ ခုဝ်၊ ခုန်ဒီခမ် ဒီ ဘော ဆုင်ဖျာတ် ဒူပ် ပီ အိုင် အန်။ 4 အာမိင် ပီ ဒွါ ခုန်ဒီခမ်၊ န့ မိုဝ်း ပွုန် တာင် လွှိုမ် အီ ဟဝ်။ ခုဝ်၊ န့ မိူဝ် တူ မိုဝ်း အာဆေ အီ ပွိုန် တဝ်း၊ “မာဆေ ပီ ဘူင် မဲ။း”

5 ဝီ မှဝ် အီ ဘူင် ဒူပ် အာမိင် ခုန်ဒီခမ် တီ၊ အန် ဒီ လွတ် အာဖေ အာရေ။ ခဲင် နဝ်း ဝီ အီ မိုဝ်း အာငျာန်၊ အန် ဘော နပ် ဒေါ မှဝ် ဟဲ့ ဆင်ဒုဝ် ကာလာင် ဂြုဝ်း။ အန် ဘော နပ် ပီ ဒီ ပါယ် ဒီ ဘူင် တဲး န့ ကာဇီ၊ တဲး န့ ဆီချာ တူတ့် ဒွန် မျုဝ်။

6 ခုဝ်၊ ဒွန် မျုဝ် န့ ဘော မိုဝ်း အာခြာဝ် အန်၊ မိုဝ်း ပီ ဒီ ပါယ် မျုဝ် မှဝ် မျုဝ် အန်။ ဒူအီ ယီ လုဝ် ခမ် ဒုက် တာင် ကာဆဝ်။

7 န့ တူ မိုဝ်း ခေါ အူ ဝီ အီ နပ် န့ ဒီ ပါယ် မှဝ် နာ အာတ့် ဟာဝ်။ ခုဝ်၊ အာဝ် မိုဝ်း အာဆေ အီ ပွိုန် ကာလာင် လွင် အန် တီ။

8 န့ တူ မိုဝ်း အာဆေ အီ ပွိုန် ခြွင့် အုန် ခုန်။ ပါယ် တီ န့ မိူဝ် တူ မိုဝ်း အာဆေ အီ ပွိုန် ဆုင်ဖျာတ် လွင် ဆီငဲ ဒီ ယမ် အန်။ ဆေ န့ မိုဝ်း ရန်ဆူ အီ တး၊ အီမာယ် ဒွန် အီ လုဝ် ကာဂုဝ်း၊ အာဝ် ပွိုန် လွတ်။ ပါယ် တီ ဆေ ဒူအီ ဟဲ့ ဘူင် နာ ဟာယ် နာ မိူက်၊ န့ တူ တဲး အန် ပွိုန် လွတ်။

9 အုဝ် ဝီ ယိုဝ် တူတ့် ဇိုဝ် တီ ဒွန် မျုဝ် ဒေါ ဝီ ကာဒွါ့ ကာဖာ အုဝ် ပီ ဘူင် ဒူအီ ဒဲင် ကာဒါယ် ခြိုမ် ဘ့လေန့် နီ။ န့ ဘော မုး လွင် ဒူအီ အီ မိုဝ်း အာဖုင် ဒင်ခုဝ်။ ဂေ မင် အီ နပ် ဒီ ခါနှာပ် အီ ဟဝ်၊ ဝီ တဲး ဘော ဂေ ဝီ ခမ် ဒုက် တာင် ကူပ် ပီ ဘူင် ဂေ တီ။ 10 အုဝ် ဝီ ယိုဝ် ဒူအီ ဟာယ် ဒူအီ တူ မွှိုမ် ပဲ့ ဟဲ့ ဟွတ့် ဟာဝ် ဒိပ် အီ ခဲင် ကာဒဝ် ဘာရေဝ်။ ဂေ ဟဲ့ ဒွိုမ် တး ဒူင် ဘွတ်၊ ဂေ ဒူအီ ကိူန် ဟဲ့ ကာဖြူမ် ဒီ အိူပ် မျုက် ဂေ ခဲင် မိူင် ပဲ့ ဟဲ့ ဘူင် ဂေ နာ ဟာယ် နာ တူ မွှိုမ် တွိုန်။ လွင် အန် တီ မိူဝ် န့ ဘော မုး အီ ဒီလူယ် ဒီလာယ်။

11 ဆေ ဂေ ဒါ တာင် တူ ဆုင်ဖျာတ် ခြန် ခြန် အာမူ ဂေ ဒူအီ အီ ဘူင် နာ ဟာယ် နာ မိူက် ဘော တူ ဒမ် မှာပ် ဒီ ဂေ အူ ဇေန့်၊ ဒူအီ ဘော နပ် ဒီ ဘူင် နာ ဟာယ် နာ တူ မွှိုမ် တဲး န့ ဝဲ ကိူန်။ 12 ဝီ အီ ဟဲ့ ကာလိုပ်၊ အန် ဟဲ့ ဘူင် နာ စီစိဝ် နာ တူ မွှိုမ် ကော နုဝ့် အူ မာယဝ်း ဇေန့်၊ အာဆာက် အန် မိူဝ် ဟဲ့ တူင့် ကာဆဝ်။ အုဝ် ဟဲ့ ဝီ နပ်၊ န့ မိုဝ်း မီ ဂေ အီ ရုဝ်ဆေ ဇဝ်ဖြာ အီ ပွိုန် အာဂျိုဝ် နာ ဘွတ် နာ မွှိုမ်။ ကူပ် ရုဝ်ဆေ ဂေ ဒီ အန် ဇဝ်၊ န့ ဘော တဲး ဂေ ပွိုန် ကွယ် ဒါခိုယ်။ 13 ဒူအီ ဟာယ် ဒူအီ မိူက် တွိုန်၊ ဂေ ယီ တူ ပွိုန် အာဂျိုဝ် အီ မွှိုမ် ကူပ် တူ ရုဝ်ဆေ ဂေ ဒီ ဇဝ်ဖြာ။ အာဆာက် ဂေ န့ ပီ ကာမိုက် အီ တူ ကွယ် လှေန့်။

14 အုဝ် ဟဲ့ ယိုဝ် ပေါ အူ မျုဝ် ဒဲင် ကာဒါယ် ခြိုမ် ဘ့လေန့် နီ အီ ဟဲ့ ဒီလူယ် ဒီလာယ်။ ဂေ အီ မိုဝ်း နဝ်း ဆိူဝ် နဝ်း မှာန် မင် အီ၊ ဂေ ဘော ကာဒုး ဒီ ခမ် ပီ ကာအာပ် ခမ် ဒူအီ ဟာယ် ဒူအီ မိူက်။ ဂေ အီ ဟာယ် အီ မိူက် မင် အီ ဂေ ယီ ပွိုန် ခဲ့ ကာအာပ် ပွိုန် ဂေ အီ မိုဝ်း နဝ်း ဆိူဝ် နဝ်း မှာန်။ အုဝ် ဝီ တဝ်း၊ လွင် အန် တီ မိူဝ် ဟဲ့ ဒီလူယ် ဒီလာယ်။ 15 ပါယ် တီ အုဝ် ဝီ ဒွါ အာကျာမ် အာငျာန်၊ တဲး အေ ဘျုဝ် ဒါခိုယ် စုဝ် မိုဝ်း အေ အာဆာက် နီ။ ခုဝ်၊ ဒူအီ အီ ကွယ် ဒဲင် ကာဒါယ် ခြိုမ် ဘ့လေန့် နီ၊ ဆေ အေ ဟဲ့ ပွိုန် ဒီ ဟူမ် ဘျုဝ် ဘျုဝ် ကျဝ် ကျဝ် ဘော ပွိုန် ဒီ ကွယ် ဒါခိုယ်၊ အာဝ် မိုဝ်း အီ ဆီ ဒီ မွှိုမ် လွှိုမ် တီ။ ပါယ် တီ အေ မိူဝ် ဒါခိုယ် ဒီ ဘူင် ဂါန် ပီ ကာအာပ် အေ ဘူင်၊ ပဲ့ ဟဲ့ ဒွါ ဇဝ်ဖြာ ဒီ အေ ဒေါ ဆီ ကွယ် အေ ဒဲင် ကာဒါယ် နီ။

16 ဒေါ ဟဲ့ ဂျုဝ်ဂျာ အုဝ် ဒီ နပ် လွင် အာငျာန်၊ အုဝ် ဟဲ့ ယွတ် ဂါန် ပီ ဘူင် ဒူအီ ဒဲင် ကာဒါယ် နီ။ အုဝ် ဟဲ့ ယိုဝ်၊ ဒူအီ ဘော ဘူင် ဂါန် ဒွင် ဝန် ဒွင် ခိူန် တူ အိတ်။ 17 ဟဲ့ ဟွတ့်၊ အုဝ် ဝီ ယိုဝ် ဘော လွင် ပဲ့ ဟဲ့ ဘူင် ဇဝ်ဖြာ၊ အာဝ် မိုဝ်း အီ နပ် တူတ့် ဒွန် မျုဝ် လွင် အန် တီ။ ဒူအီ ပီ ဘော ခတ် နဝ်း၊ ဂျုဝ်ဂျာ ခဲ့ မှဝ် ဒီ တဲး အန် နပ် လွင် အန် တီ၊ အန် ယီ တူ ပွိုန် နပ် တူတ့် လွင် အန် တီ။ ဒဲင် တီ၊ ဒူအီ အီ မိုဝ်း အာငျာန်၊ အန် ပီ ဘော ထာင် အန် နပ် မိူဝ်၊ အန် ယီ တူ နပ်။