1 အာနီ န့ မုး ဂြုဝ်း ဒါ ဆာရာ အီ ဟုဝ် ဒါရာ။ အန် ဘော မုး လှုက်လှာန် အာဒါဝိတ် အီ မုး ခုန်ဒီခမ် ခဲင် မိူင် ယေရူဆာလဲမ်။

2 အန် တဝ်း၊ “ဒွန် မျုဝ် ဟဲ့ ဒီလူယ် ဒီလာယ်။ ခဲ့ ဘော မိုဝ်း ဒဲင် ကာဒါယ်၊ အာဝ် မိုဝ်း ဒီခုဝ်။”

3 ခဲ့ ကွယ် ဂေ ဒူအီ ဒဲင် ကာဒါယ် ခြိုမ် ဘ့လေန့် နီ၊ ခဲ့ ပီ ဂျုဝ်ဂျာ ဂေ ဒီ ဘူင်၊ အာဝ် မိုဝ်း အာဂျိုဝ် မာဆေ။

4 ဒူအီ ဘော ပွုန် ဟာဝ် ဘဲန် စုဝ် ဘဲန် စုဝ်။ န့ ယီ မုး ကာဒါယ် အီ ကွယ် ဆေဆေ။

5 ဆီငဲ မိူဝ် လေး၊ ပီ ဝီ ဂေတ့်။ န့ ဘော လုဝ် ပီခြန် ဒီ ဟာဝ်၊ တဲး န့ ဝီ ဇမ် ဒူင် ဒွိုမ် လေး အန်။

6 ခုန် မိူဝ် ပါယ် တီ။ အန် ဘော ဘုတ် လူင် ဘ့လာက် နာ တေတ့်။ ဟဲ့ ဟွတ့်၊ ပီ ဝီ ဘုတ် ဟုဝ့် ဘ့လာက် နာ ကွာ။ အန် ဘော ဘန် ဝိဝ် ဘန် ဝေန့် ဒူပ် န့တေန့် အန်။

7 ခဲ့ ကွယ် အိုမ် ဒွန် ဒီလယ့် ဒွန် ဘ့လဲင် ဘော လှဲ ဟာဝ် လိုပ် ခဲင် အိုမ် နမ်မုက်ဆာရာ။ မာလဲ၊ အိုမ် နမ်မုက်ဆာရာ တူ နပ် ဒီ နုဝ့်။ အိုမ် ယီ ဝီ မိုဝ်း ဒီ တုဝ်း အန် ဘော လှဲ ဆေဆေ။

8 ခဲ့ မိုဝ်း ဇိုဝ် တီ ဒွန် မျုဝ်၊ န့ ဘော ဒုက် ဘော ညှာပ် ကာဆဝ် ဒီ ဒူအီ။ န့ ဘော တဲး ဒူအီ ကော ဟူ နပ် ဒီ ကာလာင် တူတ့်။ ငါယ် နပ် ဒီ ယွတ် နပ် ဒီ ယိုဝ်၊ ယီ တူ နပ် ဒီ စူ။ ဟျုဝ့် နပ် ဒီ ထူမ် ယီ ဆီ ထူမ် ဆေဆေ။

9 အီ ဟဲ့ ဒွိုမ် ဘဲန် တး၊ န့ ဒီ ဝီ တး ပေါ အူ ဇေန့်။ ပဲ့ ဟဲ့ ဒွိုမ် ဘူင် ဒူအီ၊ ဂေ ဒီ ဝီ ဘူင် ပေါ အူ ဇေန့်။ ဒဲင် ကာဒါယ် ခြိုမ် ဘ့လေန့် နီ၊ န့ တူ မိုဝ်း အီ ဘုဝ် တး ကာမာယ်။

10 န့ တူ မိုဝ်း မျုဝ် မှဝ် ပဲ့ ဟဲ့ တဝ်း ဒူအီ၊ “အာနီ ဟဲ့ မုး အီ ကာမာယ်။” ဒွန် မျုဝ် ဟဲ့ ဟွတ့် ဒွိုမ် မိုဝ်း အူ ဆိန့် ဒေါ မွိုန် ဆိန့် အာတ့် ဂွိုတ် အေ။

11 န့ ယီ တူ မိုဝ်း ခေါ အူ ဝီ အီ ဝီ နပ် ဝီ နုဝ် လွင် အီ ဟဲ့ ဒွိုမ် ဘုဝ် ဘဲန် ဒေါ မွိုန် အီ ဟဲ့ လှေန့် တီ။ ဘော နာ အာတ့် နီ ဟာဝ်၊ န့ တူ မိုဝ်း အာဆေ အီ ဒီ နုဝ် အီ ဒီ နပ် လွင် အီ ဒီ ဘုဝ် ဘဲန် ဝါယ် နီ။

12 အုဝ် ဒါ ဆာရာ အီ ဟုဝ် ဒါရာ နီ၊ အုဝ် ဟဲ့ ဒွိုမ် ဘဲန် ခုန်ဒီခမ် အီ အိုပ် ခဲင် မိူင် ယေရူဆာလဲမ်။ 13 အုဝ် ဟဲ့ အုန် နဝ်း ဒီ တာ အာငျာန် အုဝ်၊ တဲး အုဝ် ဟေန် တူတ့် ဒွန် မျုဝ် ခဲ့ ပီ ဘူင် ဒူအီ ဒဲင် ကာဒါယ် ခြိုမ် ဘ့လေန့် နီ။ ခဲ့ ပီ တဲး ဇဝ်ဖြာ ဒူအီ ဘူင်၊ န့ ဘော ညှာပ် ကာဆဝ်။ 14 အုဝ် ယိုဝ် ခဲ့ ပီ ဘူင် ဒူအီ ဒဲင် ကာဒါယ် နီ၊ န့ ဘော မုး တူတ့် အီ ဒီလူယ် ဒီလာယ်။ န့ ဘော ပီ ဒူအီ အီ ဆီ ပါ ခုန်။

15 အာမျုဝ် အီ ဂုဝ့်၊ အာဝ် ပွိုန် တဲး အန် ဝီ ဆိူဝ်။ အာမျုဝ် အီ ဇုတ် လုတ် အီ တူ ကာဇီ၊ အာဝ် ပွိုန် တိး တဲး အန် ဝီ ကာဇီ။

16 အုဝ် ဝီ ကာလာင် ခဲင် နဝ်း အုဝ် တဝ်း၊ “အုဝ် ဟဲ့ မိုဝ်း အာငျာန် လွှိုမ် ဂေ ခုန်ဒီခမ် အီ ဒွိုမ် အိုပ် မိူင် ယေရူဆာလဲမ် နာ အာတ့် အုဝ်။ အုဝ် ဝီ ယိုဝ် လွင် အာငျာန် အုဝ် ဟဲ့ ကိူန် ကာဆဝ်။” 17 အုဝ် မိူဝ် အုန် နဝ်း ဒီ တဲး န့ ကာလှုး ဒီ နဝ်း အုဝ် လွင် အာငျာန် ဘွတ်။ တဲး အုဝ် နပ် ဘော လွင် နဝ်း ဝှိုန့် နဝ်း ရိုဝ်။ အုဝ် ဘော ဝီ နပ် လွင် ဇိုဝ် တီ၊ န့ ပီ ဒူအီ အီ ဆီ ပါ ခုန်။

18 ခုဝ်၊ ဒူအီ အီ မိုဝ်း အာငျာန် ကိူန်၊ န့ ဘော ဝဲ ဒုက် ညှာပ် ကိူန် ဒီ နဝ်း အန်။ ဒူအီ အီ နပ် ကိူန် ဘော နဝ်း က့လိုဝ် နဝ်း ငှဝ်၊ န့ ဒီ ကြဲ ဒီ ကိူန်။