1 အုဝ် ဟဲ့ အုန် နဝ်း ဒီ ဘူင် တဲး န့ ဘျုဝ် တဲး န့ ကျဝ်၊ တဲး အုဝ် နပ် နဝ်း တီ၊ န့ ဒီ ပါယ် မှဝ်။ မာလဲ၊ အုဝ် ဝီ ယိုဝ် န့ ဒီလူယ် ဒီလာယ်။ 2 အုဝ် ဝီ ယိုဝ် ဆေ အီ ကာညး၊ န့ ဝီ ပီ အီ ရိုဝ် အီ ဝှိုန့်။ လွင် အီ ဘျုဝ် အီ ကျဝ်၊ န့ တူ မိုဝ်း အာဂျိုဝ် မာဆေ။ 3 အုဝ် ဘော ဝီ ခြာမ် ဒီ ဒျီင် အိုမ် မာငုန် ခဲ့ ဒီ ဘျုဝ် ဒါခိုယ်။ ဒေါ အန် တီ အုဝ် ယီ ဟဲ့ တဲး အာငျာန် အိုပ် အုဝ် ဆေဆေ။ အုဝ် ဆီ တဲး န့ ကာလှုး ဒီ နဝ်း အုဝ် မာဆေ န့ မုး ပီ ကာအာပ် ဒူအီ ဘူင်၊ တဲး န့ မွှိုမ် ဒီ ဂေ စုဝ် ကွယ် ဂေ ဒဲင် ကာဒါယ် နီ ကူပ် တူ တူင့် အာဆာက် ဂေ။

4 အုဝ် မိူဝ် ဟဲ့ ဘူင် အီ အာရေ တာင် ကာဆဝ်။ အုဝ် ဟဲ့ ဆမ် ကာင် ဘော ဘူင် မာန် မာငုန် အာဒါ အုဝ်။ 5 အုဝ် ဟဲ့ ဘူင် မာန်၊ ဘူင် ကာပိုမ် တဲး န့ စှိတ် ဘော ဆမ် ဟေ ဘ့လေ ဒွန် မျုဝ်။ 6 အုဝ် ဟဲ့ ဂိုဝ်း အိုမ် ဒိုင်၊ တဲး အုဝ် ပွိုန် ဒီ ရိုက် ဟေ ပီ ဆမ် အုဝ် ဘဲန် မျုဝ် ဘဲန် မျုဝ်။ 7 အုဝ် မိူဝ် ဟဲ့ စိုဝ်း တဲး အုဝ် မိုဝ်း မှာယ် အီဘိုန့် ဘော မှာယ် အီမာယ် ကိူန် ကာဆဝ်။ မှာယ် အုဝ် ဂေ တီ ကော ဝီ မိုဝ်း ဂွန် ကိူန် ကာဆဝ် အီ ဂွိုတ် တး ခဲင် န့ဟူမ် အုဝ်။ အုဝ် ဘော မိုဝ်း ဖိုင် မာဘူ ဂေ ဖိုင် မာမက် ကိူန် လွှိုမ် ဒွန် အီ အီ ဒွိုမ် ကွယ် ခဲင် မိူင် ယေရူဆာလဲမ်။ 8 အုဝ် ဘော ဂဲပ် ရွိုန် ဂေ ခြိဝ် ဝီ တး အုန် ကာဇု ဒူပ် ကြုဝ်ကြာမ် အုဝ်။ အုဝ် ဘော ပွိုန် ဘော ခေါဆွင် ပီ ဒွါ ခုန်ဒီခမ် ဘော စိုင် ပီ လုဝ် ဟပ် ဒူအီ ဒွန် အိူင် ဒွန် ပ့လုဝ့်။ ခဲ့ ဘော မိုဝ်း အီဘိုန့် အီမာယ်၊ အုဝ် တဲး ဂေ တဝ်း မှုဝ် ဒေါ ဘူင် အုဝ် ဘ့လွယ်။ အုဝ် မိူဝ် ဟဲ့ ပွိုန် အီဘိုန့် ကိူန် ကာဆဝ်၊ တဲး န့ ဘော ဒူပ် ခဲ့ ပီ အိုင် အီ လဝ့် နဝ်း အီမာယ်။ 9 ပါယ် တီ အုဝ် မိူဝ် ဟဲ့ ပွိုန် အာဖုင် ဒင်ခုဝ် တာင် လွှိုမ် ဂေ အီ ဒွိုမ် ကွယ် ခဲင် မိူင် ယေရူဆာလဲမ်။ ဒေါ အန် တီ အုဝ် မိူဝ် ဒူပ် အာငျာန် အုဝ် ဆေဆေ၊ တူ တဲး န့ ဘျုဝ်း န့ ဟြာယ် ဒေါ မှဝ်။

10 ခဲ့ ပီ ဆီ ပွိုန် အုဝ်၊ အုဝ် ဟဲ့ ဘူင် တဲး အုဝ် ပွိုန် တူတ့် ဒွန် မျုဝ်။ ခဲ့ ပီ ဆီ တဲး အုဝ် န့ ဘျုဝ် န့ ကျဝ် ဒီ နဝ်း အုဝ်၊ အုဝ် မိူဝ် တူ ခြဲ တူ ယိူန် ခေါ အူ မျုဝ်။ အုဝ် မိူဝ် ခူယ် လွင် ပဲ့ ဟဲ့ ဂျုဝ်ဂျာ အုဝ် ဒီ ဘူင် ဒွန် မျုဝ်။ နဝ်း ခူယ် ပီ လုဝ် အုဝ် ဘူင် ဂါန် ကိူန် တီ၊ ယီ တူ ဘဲန် အာဂျိုဝ် ဒီ အုဝ်။

11 ပါယ် တီ ဒေါ ဝီ ကာဒွါ့ ကာဖာ အုဝ် ခဲ့ ပဲ့ ဟဲ့ ဘူင် အုဝ်၊ ဘော လွင် ဟဲ့ ဂျုဝ်ဂျာ အုဝ် ဒီ ဘူင် တာ ပ့လူမ် တာ ဟဲန့် အုဝ်၊ အုဝ် ဘော ဝီ နပ်၊ ဇိုဝ် တီ ဘော ဒွန် မျုဝ် ဟဲ့ ဒီလူယ် ဒီလာယ်။ န့ ဘော ပီ ဒူအီ အီ ဆီ ပါ ခုန်၊ အာဝ် မိုဝ်း ဒီခုဝ် မာဆေ။

12 ဆေ န့ မိုဝ်း ခုန်ဒီခမ် ကာဒင် ကာမာယ်၊ အန် ဘော နပ် ဒီ ဘူင် ဒူပ် ခဲ့ ပီ ဒွိုမ် ဘူင် ခုန်ဒီခမ် ကာဒင် အာတ့်။ ပါယ် တီ အုဝ် ဘော ဝီ ဇေန့်ဇာ လွင် အာငျာန် ဘော လွင် နာ ရိုဝ် နာ တူ လွှက့်။

13 ဒေါ အန် တီ အုဝ် ဘော ဝီ နပ်၊ အာငျာန် ဟဲ့ မွှိုမ် လွှိုမ် နာ ရိုဝ် နာ တူ လွှက့်။ န့ ဘော ပီ ဘ့လာင် ဟဲ့ မွှိုမ် လွှိုမ် အပ် ဝွင့်။

14 ဒူအီ အီ မိုဝ်း အာငျာန်၊ အန် ဘော မိုဝ်း ငါယ် အီ တဲး အန် ပွိုန် ယိုဝ်။ ဒူအီ ရိုဝ် ယီ နပ် ဒီ ဟာဝ် ခဲင် အပ် ဝွင့်။ ပါယ် တီ အုဝ် ဝီ ယိုဝ် အာဖေ အာရေ အီ ဘုဝ် ဘဲန် ဒီ ဂါယ် ဟဲ့ မုး အူ မျုဝ်။

15 အုဝ် ဝီ ကာဖာ ခဲင် နဝ်း အုဝ် တဝ်း၊ “အာဖေ အာရေ ပဲ့ ဟဲ့ ကာဒုး ဒူအီ ဂါယ် တီ၊ န့ ဒီ ဘော ဝီ တး ဇမ် ဘော ဒီ အုဝ်။ ဆေ ဟီ ပါယ် တီ အုဝ် ပီ ဘော ဟဲ့ မိုဝ်း အာငျာန် မိူဝ်၊ န့ တူ မိုဝ်း အာဂျိုဝ် မာဆေ။” အုဝ် ဝီ ကာဖာ ခဲင် နဝ်း အုဝ် ဘော လွင် အန် တီ ဟဲ့ ဒီလူယ် ဒီလာယ်။

16 ဘော ဒူအီ အီ မိုဝ်း အာငျာန် ဘော ဒူအီ ရိုဝ်၊ အာဝ် မိုဝ်း အာဆေ အီ ဝီ နမ်လှုဝ်း ဂေ။ နာ အာတ့် ဟာဝ် ဂေ ဒီ ဘော ပိဝ် အေ ဘောကာဂ့လျီတ်။ ဒူအီ အီ မိုဝ်း အာငျာန် ဒီ ဘော လုဝ် ယမ် ပီ ဒူအီ ရိုဝ်။

17 ပါယ် တီ အုဝ် ဟဲ့ ပိုဝ် ဟဲ့ ဆိန် စုဝ် အာဆာက် အုဝ် နီ။ ခုဝ်၊ အုဝ် တူ အိုင် ဂါန် ကိူန် ပီ လုဝ် ဘူင် ဒူအီ ဒဲင် ကာဒါယ် နီ။ န့ တူ ဘဲန် အာဂျိုဝ် မာဆေ ဒီ အုဝ်။ န့ ဝီ တဲး မီ အုဝ် ခမ် ဒုက် ပီယေန့်။ ဇိုဝ် တီ ဘော ဒွန် မျုဝ် န့ ဟဲ့ ဒီလူယ် ဒီလာယ်။ န့ ပီ အုဝ် ဆီ ပါ ခုန်။ 18 ဒဲင် တီ၊ အုဝ် ဘော ဝီ ဇွင့် တူတ့် ဒွန် မျုဝ် လွင် ပဲ့ ဟဲ့ ဂျုဝ်ဂျာ အုဝ် ဒီ ဘူင် အီ တဲး အုဝ် ဒုက် အုဝ် ညှာပ် ကာဆဝ်။ ခုဝ်၊ အုဝ် ဟဲ့ နပ်၊ အုဝ် လုဝ် ဝီ ဘ့လေး အုန် တူတ့် ဒွန် မျုဝ် ဒီ ဂေ အီ ဒီ တး နာ ပန်။ 19 အာဝ် မိုဝ်း အာဆေ အီ နပ် ယုဝ် အန် ဒီ မုး ဒူအီ အီ မိုဝ်း အာငျာန်၊ ယုဝ် အန် ဒီ မုး ဒူအီ ရိုဝ်။ အန် ယီ ဒီ အိုပ် တူတ့် ခဲ့ ပဲ့ ဟဲ့ ဂျုဝ်ဂျာ အုဝ် ဒီ ဘူင်၊ ပဲ့ ဟဲ့ စ်ု အုဝ် အာငျာန် အုဝ် ဘူင် အုန် ဒဲင် ကာဒါယ် နီ။ မျုဝ် တီ မိူဝ် ဟဲ့ ဒီလူယ် ဒီလာယ်။ 20 ဟဲ့ ဟွတ့် ပါယ် တီ န့ ဝီ ဘဲန် နဝ်း လိုဝ် နဝ်း က့လိုဝ် ကူပ် ပီ ဒီ လုဝ် ဘူင် ဒူအီ ကိူန် အီ ဒုက် အီ ညှာပ် ကာဆဝ် ဒဲင် ကာဒါယ် ခြိုမ် ဘ့လေန့် နီ။ 21 ခုဝ်၊ ဆေ န့ မိုဝ်း ဒူအီ အီ မိုဝ်း အာငျာန် ဘော ဟဲ့ ကျ ဒီ ဘူင် ဘဲန် မျုဝ် ဘဲန် မျုဝ်၊ အန် ယီ တူ ပွိုန် ဒီ ဘိုင်။ ဒူအီ ဟဝ် အီ တူ ဒွိုမ် ဘူင် မာဆေ၊ အန် ဒီ ဝီ ပွိုန် တူတ့် ဒွန် မျုဝ်။ ဘော လွင် အန် တီ ဟဲ့ ဒီလူယ် ဒီလာယ်၊ န့ တူ မွှိုမ်။ 22 ဒူအီ အီ ကွယ် ဒဲင် ကာဒါယ် ဟဲ့ ဘူင် အီ ဒုက် အီ ညှာပ် ဒီ နဝ်း အန် ဘော စုဝ် အာဆာက် အန်၊ အာဝ် မိုဝ်း အာဂျိုဝ် မာဆေ ဒီ အန်။ 23 ခဲ့ တူင့် အာဆာက် အန်၊ ခဲ့ ပီ ဘူင် ပီ ရန့် အန် ဘောကာဂ့လျီတ်၊ န့ ဘဲန် မီ အီ ဒုက် အီ ညှာပ် ဒီ အန်။ ဘော ခဲင် မှိုဝ်၊ အာဝ် ဘဲန် နဝ်း နှိမ် နဝ်း ယေန် ဒီ အန်။ ဘော ဇိုဝ် တီ ဟဲ့ ဒီလူယ် ဒီလာယ်။

24 ဆေ ဒူအီ ဟဲ့ မိုဝ်း ပီ ဒီ ဟူမ် ပီ ဒီ ဒျီင် ဘော ဟဲ့ ဒါခိုယ် ဒီ ဘူင် ဂါန် အန်၊ န့ ဟဲ့ တိူက် ခဲ့ တီ၊ အာဝ် ဟူ ပွိုန် လွှိုမ် ဒဲင် တီ။ လွင် အန် တီ အုဝ် ဟဲ့ နပ်၊ န့ ဘော မုး ပီ ဒွါ ဇဝ်ဖြာ၊ တဲး အေ ဒူအီ ဘူင်။ 25 ဆေ အန် ဇဝ် တူ ခ့ဝါင်၊ အာဝ် မိုဝ်း အာဆေ အီ ပွိုန် ဟူမ် အီ ပွိုန် ဘျုဝ် ဒါခိုယ်။ 26 ဇဝ်ဖြာ ဒွါ အာငျာန် ဘော တဲး ဒူအီ နပ် ဘဲန် မျုဝ် ဘဲန် မျုဝ်။ အန် ဘော တဲး ဝီ အီ လဝ့် နဝ်း အန် ပွိုန် ဒီ ကွယ် ဘျုဝ် ဒါခိုယ်။ ဝီ အီ မိုဝ်း မှာပ်၊ အန် ဇဝ် ဘော စ်ု တဲး အန် ဘူင် ဂါန် အီ ဒုက် အီ ညှာပ် ကာဆဝ်၊ တဲး အန် မိုဝ်း ဒီ ဂဲပ် ကာဇု အုန်၊ တဲး အန် ဝီ ပွိုန် ဒီ ဒွါ ဒီ ဒူအီ အီ လဝ့် နဝ်း ဇဝ်ဖြာ။ လွင် အန် တီ မိူဝ် ဟဲ့ ဒီလူယ် ဒီလာယ်။ န့ ဘော ပီ အီ ဆီ ပါ ခုန်။