1 ခဲ့ ဘော မိုဝ်း ဒွန် မျုဝ် ပီ လုဝ် ဘူင် ဒဲင် ကာဒါယ် နီ န့ မိုဝ်း အာခြာဝ် အန်။

2 န့ မိုဝ်း အာခြာဝ် ဂွိုတ် ဘော အာခြာဝ် ယမ်။ မိုဝ်း ဘော အာခြာဝ် ဆမ် ဘော အာခြာဝ် ဆုဝ့်။

3 န့ မိုဝ်း အာခြာဝ် ဒီ ငဝ်း ယမ် ဘော အာခြာဝ် ဒီ ဆီနမ် တဲး န့ ကဲန်။ မိုဝ်း ဘော အာခြာဝ် ဒီ ယဝ်း ဝဲန်၊ ဘော အာခြာဝ် ဒီ ဝီ ဒဲ ကာမာယ်။

4 န့ မိုဝ်း အာခြာဝ် ဒီ လုဝ် ယာမ် ဘော အာခြာဝ် ဒီ အေဝ် ကာညး။ မိုဝ်း ဘော အာခြာဝ် က့လိုဝ် ငှဝ် ဘော အာခြာဝ် ဒီ ခူယ် ဒီ ဂါ။

5 မိုဝ်း ဘော အာခြာဝ် ဒီ ဒိုဝ်း ဝဲန် မာဝ် ဘော အာခြာဝ် ဒီ ဂဲပ် အုန် မာဝ်။ မိုဝ်း ဘော အာခြာဝ် ဒီ လာယ် ငျီမ် ဘော အာခြာဝ် တူ ဝီ လာယ် ငျီမ်။

6 န့ မိုဝ်း အာခြာဝ် ဒီ ဟြေတ့် တး ဘော အာခြာဝ် ဒီ ဘျုဝ်း ဟြာယ်။ မိုဝ်း ဘော အာခြာဝ် ဒီ ဒိုဝ်း တး အုန် ဘော အာခြာဝ် ဒီ ဒိုဝ်း ဝဲန်။

7 မိုဝ်း ဘော အာခြာဝ် ဒီ ကာယာတ့် ခြိုင် တာ ဘော အာခြာဝ် ဒီ ဝီ ကာစိန့်။ မိုဝ်း ဘော အာခြာဝ် တူ တဝ်း မာဆေ ဘော အာခြာဝ် ဒီ ဝီ ကာလာင် ဂြုဝ်း။

8 န့ မိုဝ်း အာခြာဝ် ဒီ လာယ် ရွက့် ဘော အာခြာဝ် ဒီ လာယ် ဇွင့်။ မိုဝ်း ဘော အာခြာဝ် ဒီ ကာဂုဝ်း ဘော အာခြာဝ် ဒီ ယေန် ဒါခိုယ်။

9 ဒူအီ အီ ဟဲ့ ဘူင် ဂါန် စန် ကာဆဝ်၊ မိုဝ်း အာဂျိုဝ် မာဆေ ဒီ အန်။း 10 အုဝ် ဟဲ့ ဟွတ့် နပ်၊ ဇဝ်ဖြာ ဟဲ့ တဲး ဒူအီ ဘူင် ဂါန် ရာင် အာဆေ ရာင် အန်။ 11 ဇဝ်ဖြာ ဘ့လေး အုန် အာခြာဝ် တဲး န့ ကာဒုဝ်၊ တဲး န့ ကာငျာ တူတ့် ဒွန် မျုဝ်။ ဇဝ်ဖြာ ဟဲ့ ဘ့လေး အုန် ခဲင် နဝ်း အေ ဒူအီ၊ တဲး အေ မိုဝ်း နဝ်း အီ ဆီ နပ် လွင် အီ တူ နပ် ဒီ ဟြာယ် အီ ကွယ် ဆေဆေ။ မာလဲ၊ ပီ ဘူင် ဇဝ်ဖြာ ဆိန့် ဒေါ ဂုဝ် ကော ဇမ် ကာဒဲ့ ဒူအီ တူ ပွိုန် နပ် တူတ့် ဒွန် မျုဝ်။ 12 ပါယ် တီ အုဝ် ဘော ဝီ နပ်၊ ဆေ ဒူအီ ဟဲ့ ကွယ် ဘျုဝ် ဒါခိုယ် ဘော ဘူင် နာ ဘွတ် နာ မွှိုမ်၊ စုဝ် မိုဝ်း အေ အာဆာက် နီ အာဝ် မိုဝ်း အီ ဆီ ဒီ မိုဝ်း အာဂျိုဝ် တာင် လွှိုမ် တီ။ 13 ဆေ ဒူအီ ဒွန် အီ ဟဲ့ မိုဝ်း ပီ ဒီ ဟူမ် ပီ ဒီ ဒျီင် ဘော ကွယ် ဘျုဝ် ဒါခိုယ်၊ န့ ဘော မုး ဂေဇူ ပီ ဒွါ ဇဝ်ဖြာ ဒီ အေ။ 14 အုဝ် မိူဝ် ဟဲ့ ဟွတ့် နပ်၊ ခဲ့ ပီ ဘူင် ဇဝ်ဖြာ ဒွန် မျုဝ်၊ န့ ဘော မုး မျုဝ် အီ ကွယ် ဆေဆေ။ န့ တူ ပွိုန် ဝီ ပွါ ခေါ အူ မျုဝ်၊ ဘော အာဝ် ပွိုန် ဒိုဝ်း လေး ခေါ အူ မျုဝ်။ ဇဝ်ဖြာ ဘူင် အုန် မျုဝ် တီ၊ တဲး အေ ဒူအီ ရုဝ်ဆေ အန် ဇဝ်။

15 အီ ဟဲ့ ဘဲန် ဒေါ တီ နီ၊ န့ ဟဲ့ ဒွိုမ် ဘဲန် အာတ့် နီ။ ဘော အီ ဒီ ဘဲန် နာ အာတ့် ဟာဝ်၊ န့ ဟဲ့ ဒွိုမ် ဘဲန် အာတ့် နီ။ အီ ဟဲ့ ဒွိုမ် ဘဲန် ဟာဝ် မိူဝ်၊ အန် ဇဝ် ဒီ ဝီ တဲး န့ ဘဲန် ပေါ အူ ဇေန့်။

16 ဒဲင် တီ အုဝ် ပီ ဝီ ယိုဝ် ဒဲင် ကာဒါယ် ခြိုမ် ဘ့လေန့် နီ။ ဒူင် ဆုင်ဖျာတ် အီ ဒါရာ၊ န့ ဘော မိုဝ်း အီ ဟာယ် အီ မိူက် အီ တူ ဒူပ် ဒါရာ။ ဒူင် ကာအာပ် ဆုင်ဖျာတ် နာ ဆိူဝ် နာ မှာန်၊ န့ ဘော မိုဝ်း အီ ဟာယ် အီ မိူက် အီ တူ ဒူပ် ဒါရာ။

17 အုဝ် ဝီ ကာဖာ ခဲင် နဝ်း အုဝ် တဝ်း၊ “ဇဝ်ဖြာ ဒီ ဘော ဆုင်ဖျာတ် ဒါရာ ဒီ ဒူအီ ဒူပ် နဝ်း ဆိူဝ် နဝ်း မှာန် ဘော ဒီ ဒူအီ ဟာယ် ဒူအီ မိူက်။” ခုဝ်၊ ခဲ့ ဘော မိုဝ်း ဒွန် မျုဝ် ဘော ခဲ့ ပီ ဘူင် ဒူအီ ဒွန် အီ၊ ဇဝ်ဖြာ ဟဲ့ တဲး န့ မိုဝ်း အာခြာဝ် အန်။

18 အုဝ် ဝီ ကာဖာ တဝ်း၊ “ဇဝ်ဖြာ ထေဝ် ဒီ ယွတ် အေ ဒူအီ၊ တဲး အေ နပ်၊ အေ ပီ ဒုဝ် ဆတ်ဒါဝါ။” 19 အာဖေ အာရေ အီ တး ဇမ် ဒီ ဒူအီ၊ န့ ဇမ် ဘော ဒီ ဒုဝ် ဆတ်ဒါဝါ။ န့ ဘော မုး အူ မျုဝ်။ ဒုဝ် ဆတ်ဒါဝါ လုဝ် ယမ် ဘော ဒူအီ လုဝ် ယမ်။ ဒုဝ် ဆတ်ဒါဝါ ဘော ဒူအီ မိုဝ်း ဖွိုမ် အီ မုး အူ မျုဝ်။ ပါယ် တီ ဒူအီ တူ မွှိုမ် လွှိုမ် ဒုဝ် ဆတ်ဒါဝါ။ ခုဝ်၊ ဘော အာဆာက် အေ ဒူအီ ဟဲ့ ဒီလူယ် ဒီလာယ်။ 20 ခဲ့ ကွယ် ဂေ ဘောကာဂ့လျီတ်၊ ဂေ ဒီ ဟာဝ် ဇမ် အူ ပ့လုဝ့်။ ဂေ ဟဲ့ ဒွိုမ် တး ဒီ ကာပုး။ ဝါယ် ဟဲ့ ဟွတ့် ယမ်၊ ဂေ ဒီ ဝီ ဟာဝ် ဘဲန် ကာပုး။ 21 အာဝ် မိုဝ်း အီ နပ် ဆီချာ ယုဝ် နဝ်း ဖွိုမ် ဒူအီ ဒီ ဟုဝ့် နာ ဒဲင် ဘော ယုဝ် နဝ်း ဖွိုမ် ဒုဝ် ဆတ်ဒါဝါ ဒီ လူင် ခြိုမ် ကာဒါယ်။

22 ကူပ် န့ ပါယ် တီ အုဝ် ဘော ဝီ နပ်၊ ဆေ ဒူအီ ဟဲ့ ဘျုဝ် ဒါခိုယ် ဒီ ဘူင် ဂါန် အန်၊ အာဝ် မိုဝ်း အီ ဆီ ဒီ မွှိုမ် လွှိုမ် တီ။ ခုဝ်၊ ဇဝ်ဖြာ ဟဲ့ တဲး အန် ဘူင် ပါယ် တီ။ ပီ ပါယ် ဒွန် မျုဝ်၊ အာဝ် မိုဝ်း အာဆေ အီ နပ် ဝါယ် ဟဲ့ ဟွတ့် ယမ် အန်။