1 အုဝ် ပီ ဝီ ယိုဝ် လွင် အီ တူ ကာဆိူဝ် ဒဲင် ကာဒါယ် ခြိုမ် ဘ့လေန့် နီ။ အုဝ် ဟဲ့ ယိုဝ် ဂေ အီ ဟဲ့ ခမ် အီ ဟဝ် ခါနှာပ် ဂေ၊ ဂေ အီ ဟဲ့ ယာမ်။ န့ ယီ တူ မိုဝ်း အာဆေ အီ တး စွယ် ဂေ။ ခုဝ်၊ ဂေ အီ ခါနှာပ် ဂေ တီ၊ ဂေ ဟဲ့ မိုဝ်း ပွုန် မိုဝ်း ဘော အာဖုင် ဒင်ခုဝ် ကူပ် အာဝ် မိုဝ်း အာဆေ အီ ရဲ ဂေ။

2 အုဝ် ဘော တဝ်း၊ ဂေ အီ ဟဲ့ ဟွတ့် ယမ် ဟာဝ်၊ ဂေ ဟဲ့ ဒါခိုယ် လွှိုမ် ဂေ အီ ဆီ ကွယ်၊ အီ ဆီ အိမ် ဒေါ တီ နီ နီ။

3 အီ မွှိုမ် လွှိုမ် အာ မျုဝ် တီ ဘော မုး ဂေ အီ ညှမ် ဒွိုမ် ဂွိုတ်။ ခုဝ်၊ ဂေ ညှမ် ဒွိုမ် ကာဒုး အီ ဟာယ် အီ မိူက် ဒဲင် ကာဒါယ် နီ။

4 န့ ဘော ဝီ ကာလှုး ဒီ နဝ်း အုဝ် လွင် ဒူအီ အီ အွန် ဒီ ဂျုဝ်ဂျာ ဒီ ဘူင် တဲး ဂေ ပွိုန် ဘဲန် မျုဝ် ဘဲန် မျုဝ်။ ဂေ ဘူင် ကူပ် လှယ့် ဂေ အီ ဟဝ်။ လွင် အန် တီ မိူဝ် ဟဲ့ ဒီလူယ် ဒီလာယ်။ န့ ဘော ပီ အီ ဆီ ပါ ခုန်။

5 ဒူအီ အီ ရိုဝ် ကာဆဝ်၊ အန် ဘော ကွယ် ပီယေန့်၊ တူ ဘူင် မာဆေ၊ တဲး အန် ကော အေတ့် ယမ်။

6 ဆေ ဟဲ့ ပွိုန် အူ ကာတိုင် ဒဲ ဘော မိုဝ်း နဝ်း နှိမ် နဝ်း ယေန်၊ န့ ဘော မွှိုမ် လွှိုမ် အီ ဟဲ့ ပွိုန် အူ ကာတူမ် ဘော ရန့် ဒုက် ရန့် ညှာပ် ဆေဆေ။ န့ ဘော ပီ အီ ဆီ ပါ ခုန်။

7 အုဝ် ဝီ ယိုဝ် ပေါ အူ မျုဝ် အီ ဟဲ့ ဒီလူယ် ဒီလာယ်။

8 န့ မိုဝ်း ဒူအီ အူ ဝီ၊ အန် ဘော ကွယ် ရာင် အန် အူ ဝီ။ အန် မိူဝ် တူ မိုဝ်း ဂွန်၊ တူ မိုဝ်း ဘီနွင် ဝေါဝဲ အီ ကွယ် ရိုမ် ဒူပ် အန်။ အန် ဟဲ့ ဂျုဝ်ဂျာ ဒီ ဘူင် ဘော ရန့် ဒုက် ရန့် ညှာပ် ဆေဆေ။ ခဲ့ မိုဝ်း အန် ကြုဝ်ကြာမ်၊ န့ ယီ တူ ဘြေ့ ဒီ နဝ်း အန်။ အန် ဘော ဝီ ဒီမွှတ် တဝ်း၊ “အုဝ် ဟဲ့ ဂျုဝ်ဂျာ ဒီ ဘူင် ဘော ဟူမ် ဒုက် ဟူမ် ညှာပ်။ အီ ဘျုဝ် အီ ကျဝ် အုဝ် ယီ တူ ယိုဝ်။ ခဲ့ ပီ ခမ် အုဝ် ဒုက် တီ၊ န့ ဒီ ဝီ ဘဲန် အာဂျိုဝ် မျုဝ် မှဝ် ဒီ အုဝ်။း” လွင် အန် တီ မိူဝ်၊ န့ ဘော မုး အီ ဒီလူယ် ဒီလာယ်။ န့ ဘော မုး မီ လွင် အီ ဒုက် အီ ညှာပ် ဒီ နဝ်း။

9 ဒူအီ အာ ဝီ ဘော မွှိုမ် လွှိုမ် ဒူအီ အူ ဝီ။ ခုဝ်၊ ပီ ကာဖြူမ် ဂါယ် ဒီ ဘူင်၊ န့ ဟဲ့ ဝဲ မိုဝ်း အာဂျိုဝ်။

10 ဆေ အူ ဝီ ဘော ကေး၊ ပေါ အူ ဝီ ပွိုန် ဒီ ဝီ ဘျိတ့် တဲး အန် ယိတ့်။ မာလဲ၊ ဆေ ဒူအီ အူ ဝီ ဟဲ့ ကေး၊ ယီ တူ မိုဝ်း အီ စွယ် အန်၊ ဝီ တီ ဟဲ့ မွှိုမ် ကာဝေ ကာဆဝ်။

11 ဘော ဆေ ဒူအီ အာ ဝီ အိတ် ရိုမ်၊ န့ ဒီ ဘော ဆီအုန့် ဆီချာ။ ဆေ န့ မုး မီ အူ ဝီ အိတ်၊ န့ တူ နပ် ဒီ ဆီ အုန် ဆီချာ။

12 ဆေ န့ မုး ဒူအီ အူ ဝီ အီ ဟဝ် ဘော နပ် ဒီ ပဲ ငှိုယ် ငှိုယ်။ ဆေ န့ မုး ဒူအီ အာ ဝီ၊ ဂါယ် ဘော နပ် ဒီ ရဲ ဒုဝ် ဘြိမ် ဂါယ်၊ တူ တဲး အီ ဟဝ် ပွိုန် ဒီ ပဲ ဂါယ်။ ပါယ် တီ ဘော ဝန် အီ မိုဝ်း အူယ် ဂိဝ် အန် တူ ကာဒတ် ငှိုယ် ငှိုယ်။

13 ဒူအီ ဖ့လာန် ဒူအီ ဂိန် အီ ဆီ နှိုမ် အီ မိုဝ်း အာငျာန်၊ အန် ဘော မွှိုမ် လွှိုမ် ခုန်ဒီခမ် အီ ဟဲ့ ကတ် ဟဲ့ ဂဲ၊ တူ ခမ် ဒီ ထူမ် အာကျာမ် အာငျာန် ပီ ဒွါ အီ ဟဝ်။ 14 ဒူအီ ဂိန် ဒူအီ ဖ့လာန် အီ ဂွိုတ် တး ခဲင် မိူင် ပီ အိုပ် အန် တွိုန်၊ ပီ ဘော မုး ဒူအီ အီ လေး တး ခဲင် ကာပိုမ် မိူဝ်၊ အန် ဟဲ့ ပွိုန် ဘဲန် ခုန်ဒီခမ်။ 15 အုဝ် ဝီ ယိုဝ် ဒူအီ ဘောကာဂ့လျီတ် အီ ကွယ် ဒဲင် ကာဒါယ် ခြိုမ် ဘ့လေန့် နီ၊ ဂေ ဝီ ဒူပ် ခုန်ဒီခမ် အီ ဆီ နှိုမ် အီ ဟဲ့ ဝီ ပ့လု ခုန်ဒီခမ် ဘြိမ် တွိုန်။ 16 ခုန်ဒီခမ် တွိုန် ဟဲ့ အိုပ် ဒူအီ ကိူန်၊ အာဝ် ပဲ ဒီ တိး တူတ့်။ မာလဲ၊ ဆေ အန် ဟီ ပွုန် ဟာဝ်၊ အာဝ် မိုဝ်း ခေါ အူ ဝီ အီ ခူယ် အီ နဝ်း ဒါခိုယ် လွင် ပဲ့ ဟဲ့ ဒွိုမ် ဘူင် အန်။ လွင် အန် တီ မိူဝ် ဟဲ့ ဒီလူယ် ဒီလာယ် ပီ အီ ဆီ ပါ ခုန်။