1 တဲး မဲ ဆာဒိက် ဒေါ တး လိုပ် မဲ ခဲင် ဟုဝ် ဇဝ်ဖြာ။ တဲး မဲ မိုဝ်း နဝ်း ဆီ ထူမ် ဘော ဘူင် ဒူပ် ပီ အိုင် အန် ဇဝ်။ န့ ဘော မွှိုမ် လွှိုမ် ပီ လှူ ဂေ ဒူအီ ဟာယ် ဒူအီ မိူက် အီ တူ ဝီ နပ် လွင် ပီ ဘူင် ဂေ အာဝ် လဝ့် နဝ်း ဇဝ်ဖြာ။

2 အာတ့် ကာလာင် မဲ ဂြုဝ်း၊ တဲး မဲ ကာဒွါ့ ကာဖာ ဆီချာ။ မဲ ကွဲ့ တဲး နဝ်း မဲ ကာတဝ် ဒီ ဒွါ ကာဒိက် ဆတ်ဇာ ဒီ ဇဝ်ဖြာ။ အန် ဇဝ် ကွယ် ခဲင် ဂါင်ဟြာဝ်၊ မဲ ယီ ဆီ ကွယ် ဒဲင် ကာဒါယ်။ ခုဝ် အန် တီ တဲး မဲ ဆာဒိက်၊ ကွဲ့ တဲး မဲ ကာလာင် ဂြုဝ်း ကိူန်။

3 အီ ဒုက် အီ ညှာပ် ဒီ နဝ်း မဲ န့ ဘော နပ် ဒီ တဲး မဲ မ့ဘာဝ် အီ တူ မွှိုမ်။ ပါယ် တီ ဘော ဂေ ဒူအီ ဟာယ် ဒူအီ မိူက် ဘော နပ် ဒီ ကာလာင် ဂြုဝ်း ကိူန် အီ တူ မိုဝ်း ဒီခုဝ်။

4 ဆေ မဲ ဟဲ့ ကာဆဲန့်၊ ဟဲ့ ဒွါ ကာဒိက် ဆတ်ဇာ ဒီ ဇဝ်ဖြာ၊ တဲး မဲ ဝီ ဘူင် ဒူပ် ဟဲ ဟဲ ခြန် ခြန်။ ဇဝ်ဖြာ တူ အိုင် ဒူအီ ဟာယ် ဒူအီ မိူက်။ ခုဝ်၊ တဲး မဲ ဘူင် ဒူပ် ပီ ကာဆဲန့် မဲ တီ။ 5 ဆေ မဲ တူ ဒွါ ကာဒိက် ဆတ်ဇာ၊ န့ ဘော မွှိုမ် လွှိုမ် မဲ ပီခြန် ဒီ ဒွါ ကာဒိက် ဆတ်ဇာ၊ ယီ တူ ဝီ ဘူင် ဒူပ်။ 6 ကွဲ့ တဲး မူတ့် မဲ ဘူင် မှာပ်၊ ကွဲ့ တဲး မဲ လုဝ် ဝီ ကာလာင် ဒီ ဒူအီ ပီ တိုယ် ဇဝ်ဖြာ တဝ်း၊ “အုဝ် ဟဲ့ ဟွတ့် ကာလိုပ် ဒီ ဒွါ ကာဒိက် ဆတ်ဇာ။” ကွဲ့ တဲး ဇဝ်ဖြာ ရူ စာဝ် ကူပ် ဂြုဝ်း မဲ တီ။ ကွဲ့ တဲး အန် ဇဝ် ကာဒုး ဒီ ဒမ် မှာပ် ဒီ မဲ။ 7 ပီ မ့ဘာဝ် ကိူန် ဘော အီ ကာလာင် ဂြုဝ်း ကိူန် န့ ဘော နပ် ဒီ ဘဲန် အီ တူ မိုဝ်း ဒီခုဝ် အီ ဒီလူယ် ဒီလာယ်။ ကူပ် ပါယ် တီ တဲး မဲ ရုဝ်ဆေ ဇဝ်ဖြာ။

8 ဆေ မဲ ယိုဝ် ဒါ ကာညာ အီ အိုပ် မိူင် အီ ခါနှာပ် ဒူအီ ဂိန် ဒူအီ ဖ့လာန် ဘော ဆုင်ဖျာတ် အီ တူ ဒူပ် ဒါရာ ဘော ဝး နာ ဆိူဝ် နာ မှာန်၊ အာဝ် လုဝ် အာမ်။ ဒါ တာင် အီ ဘူင် ဂါန် ဇိုဝ် တီ၊ အန် လုဝ် ခမ် ဝီ အီ တာင် လွှိုမ် အန် ဒီ ဘော ဘ်ု ဒီ ယွတ် အန်။ ဒဲင် တီ၊ ပီ ဆီ မိုဝ်း အီ တာင် လွှိုမ် တီ ဒီ ဘော ဘ်ု ဒီ ယွတ် ဂါယ်။ 9 ဒူအီ ဘောကာဂ့လျီတ် ကော နပ် ဒီ မိုဝ်း၊ နပ် ဒီ ဆာကဲန် ကူပ် ပီ ဂေဇူ ပြဲ ကာဒါယ်။ ဘော ခုန်ဒီခမ် ဘော ပွိုန် ပီ ဂေဇူ မာန် ဂေ ဒူင် နာ။

10 ဒူအီ အီ မိုဝ်း နဝ်း ဆီ ပွိုန် ရွိုန်၊ နဝ်း အန် တူ နပ် ဒီ စူ ဒေါ မှဝ်။ ဒူအီ အီ မိုဝ်း နဝ်း ဆီ ခြမ် ကာဆဝ်၊ ကြုဝ်ကြာမ် အန် ပီ ဘော ဟဲ့ ကိူန် ခဲ့ မှဝ်၊ န့ တူ ဘြေ့ ဒီ နဝ်း အန် ဒေါ မှဝ်။ ဇိုဝ် တီ မိူဝ်၊ န့ ဘော မုး အီ ဒီလူယ် ဒီလာယ်။

11 ဆေ အေ ဟဲ့ ကြဲ ဒီ ခြမ်၊ ကြဲ ဒီ မိုဝ်း ကိူန်၊ ဒူအီ ဟူမ် မိူဝ် ကြဲ ဒီ မိုဝ်း ကိူန် ဒူပ်။ ဒူအီ အီ နဝ်း တာင် ဒီ ကြုဝ်ကြာမ် အန် တီ၊ န့ တူ မိုဝ်း အာဂျိုဝ် မာဆေ။ ငါယ် အန် ပွိုန် မီ ခဲ့ ယွတ် ပီယေန့်။

12 ဂေ ဒူအီ အီ ရန့် မာန် ရန့် ဂါန်၊ န့ ဒီ ဂ့လိုမ် ဟူမ် တူ ဂ့လိုမ် ဟူမ် အာဝ် တဝ်း၊ အန် ပွိုန် ဒီ အိတ် ဒါခိုယ် အိတ် ဆီချာ။ ဂေ ဒူအီ ခြမ် ဘော နပ် ဒီ ဘဲန် နဝ်း မှဲ နဝ်း ကာဟွာ့ ကူပ် ကြုဝ်ကြာမ် ဂေ၊ တဲး န့ ပျာတ့် ဆီ အိတ် ဂေ။

13 အုဝ် ဝီ ယိုဝ် ပေါ အူ မျုဝ် အီ တူ မွှိုမ် အီ စီစိဝ် ကာဆဝ် အီ ကွယ် ဒဲင် ကာဒါယ် ခြိုမ် ဘ့လေန့် နီ။ ဒူအီ ဘော နပ် ဒီ ဂဲပ် ကာဇု အုန် ကြုဝ်ကြာမ် ဂေ၊ တဲး န့ ကော ဝီ ဘဲန် အာဖေ အာရေ ဒီ ဒုဝ် ဘြိမ် ဂေ။

14 ကူပ် ဟဲ့ ကာဒုး ဂေ အာဖေ အာရေ န့ ဘော တဲး ကြုဝ်ကြာမ် ဂေ ဘျုဝ်း ဟြာယ် တူတ့်။ န့ ဘော နပ် ဒီ တူတ့်၊ နပ် ဒီ ယူမ် ကော ဟူ မိုဝ်း မာဆေ ပီ ဒီ လုဝ် ဝီ ဒွါ ဂေ ဒီ လှုက်လှာန် ဂေ။

15 ဒေါ ဂွိုတ် တး ဒူအီ၊ အန် တူ မိုဝ်း ဒီ ဒိုဝ်း တး မာဆေ။ န့ ဘော ပါယ် တီ ပန် ဒီ ယမ် ဟာဝ် အန်၊ အန် မိူဝ် တူ ပွိုန် ဒိုဝ်း ဟာဝ် မာဆေ။ အန် ပီ ဘော ဟဲ့ ဂျုဝ်ဂျာ ဒီ ဘူင် ခဲ့ မိုဝ်း အန် ပ့လူမ် ဂေ ဟဲန့် ဘော ခမ် ဒုက် ညှာပ် ခဲ့ မှဝ်၊ အန် ယီ တူ ပွိုန် ဒိုဝ်း ဟာဝ် ခေါ အူ မျုဝ်။

16 ဘော အာတီ ဘော မုး အီ တူ မွှိုမ် အီ စီစိဝ် ကာဆဝ် ပဲ့ ဟဲ့ ယိုဝ် အုဝ်။ ဒူအီ ဒီ ဝီ ဟာဝ် ပီ ဒေါ တး အန်။ အန် ဟဲ့ ရန့် ဒုက် ရန့် ညှာပ် ဘော ဂျုဝ်ဂျာ ဒီ ဘူင် ခဲ့ မိုဝ်း အန် ပ့လူမ် ဂေ ဟဲန့်၊ န့ ယီ ဟဲ့ ဒီလူယ် ဒီလာယ် ပီ အန် ဆီ ပါ ခုန်။

17 စုဝ် မိုဝ်း အန် အာဆာက် တီ၊ အန် ဒီ ပွိုန် မီ ကွယ် ခဲင် အပ် ဝွင့် ဘော က့လိုဝ် ငှဝ်။ အန် ဘော မိုဝ်း ဒုက် ညှာပ် ဒီ နဝ်း၊ မိုဝ်း ဘော ကာအုဝ့် ဆဝ်ဖိုဝ် ဘော နဝ်း ရူ နဝ်း စာဝ်။

18 ဝါယ် အန် တီ အုဝ် ဘော ဝီ နပ် ပီ ကာအာပ် အေ ဒူအီ ဘူင် အီ မွှိုမ် လွှိုမ် မျုဝ် ဟဝ်၊ န့ ဘော မုး လွင် ပီ ဒီ ဟူမ် ပီ ဒီ ဒျီင်၊ လွင် အီ ဘျုဝ် ဒါခိုယ် ကူပ် ဂါန် ပီ ဘူင် ပီ ဟြေတ့် တး အေ စုဝ် မိုဝ်း အေ အာဆာက် အီ တူ တူင့် ပီ ဒွါ ဇဝ်ဖြာ ဒီ အေ။ လွင် အန် တီ ဟဲ့ ဘဲန် အာဂျိုဝ် ဒီ အေ။ 19 ဆေ ဂေ ဟဲ့ ပွိုန် ဒိုဝ်း ဟူမ် ပီ ဒွါ ဇဝ်ဖြာ ဒီ ဂေ ဒွန် အီ ဘော ဘျုဝ် ဒါခိုယ် ကူပ် ကြုဝ်ကြာမ် ပီ ဟြေတ့် တး ဂေ တာ ပ့လူမ် ဂေ ဟဲန့် ဂေ၊ အာတီ န့ ဘော မုး ရုး ပီ ဒွါ ပီ ဂေဇူ အန် ဇဝ် ဒီ ဂေ။ 20 ဂေ မိူဝ် တူ ဒန် ဇေန့်ဇာ ကိူန် လွင် အာဆာက် ဂေ။ ခုဝ်၊ ဇဝ်ဖြာ ဟဲ့ တဲး ဂေ မိုဝ်း နဝ်း အီ ဘျုဝ် ဒါခိုယ်။