အုဝ် ဝီ ယိုဝ် ပေါ အူ မျုဝ် အီ တူ မွှိုမ် အီ စီစိဝ် ကာဆဝ် ဒဲင် ကာဒါယ် ခြိုမ် ဘ့လေန့် နီ။ န့ ဘော ဒုက် ညှာပ် ကာဆဝ် ဒီ ဒူအီ။ 2 န့ မိုဝ်း ဒူအီ အူ ဝီ၊ ဇဝ်ဖြာ ဟဲ့ တဲး အန် ခြမ် ဘော မိုဝ်း ကြုဝ်ကြာမ် ကိူန်၊ တဲး အီ ဟဝ် မိူဝ် ရုဝ်ဆေ အန်။ ပါယ် တီ အန် ဟဲ့ မိုဝ်း ဇေ့ဇုင် တူတ့် ဒွန် မျုဝ် ခဲ့ ပီ ဆီ ပွိုန် နဝ်း အန်။ ဇဝ်ဖြာ ယီ တူ တဲး အန် ပွိုန် ဒီ ဘိုင်။ ဒူအီ ပေါ အူ ဝီ အီ တူ လာယ် ဘာ့ လွင် အန် တီ၊ အန် ယီ ဝီ ပွိုန် ဒီ တး ဘိုင်။ လွင် အန် တီ၊ န့ ဘော မုး အီ ဒီလူယ် ဒီလာယ် အီ တူ မွှိုမ် အီ စီစိဝ် ကာဆဝ်။

3 န့ မိူဝ် မိုဝ်း ဒူအီ ပေါ အူ ဝီ၊ အန် မိူဝ် ဟဲ့ မိုဝ်း လှုက်လှာန် ကိူန် ကော နုဝ့် ဘဲန် မာယဝ်း။ အာဆာက် အန် မိူဝ် ဟဲ့ တူင့် ကာဆဝ်။ ဆေ အန် ယီ တူ ပွိုန် ဒီ ဘိုင် ကြုဝ်ကြာမ် အီ ဒီ တဲး အန် ဘျုဝ် ဒါခိုယ် ဘော အီ တူ ဒိပ် ဒုဝ် ယမ် အန် တဲး န့ ကာဒါန် ဒီ အာဖုင် ဂေ ဆာရေ အန်။ အာဆာက် အန် ပီ ဘော ဟဲ့ လှေန့် ခဲ့ မှဝ် အာဝ် တဝ်း၊ ဂွန် အာင အီ ဟဲ့ ယမ် ခဲင် ဝတ့် မာ အန်၊ န့ ဟဲ့ မွှိုမ် ဒီ အန် လွှိုမ် ဒူအီ ဝီ တီ။ 4 ဂွန် အာင အီ ညှမ် ဂွိုတ် တီ၊ အန် တူ မိုဝ်း ဒီခုဝ် မာဆေ။ အန် ဟဲ့ ဝီ ဘျုဝ်း ဟြာယ် ခဲင် အပ် ဝွင့် တဲး အီ ပိဝ် အန်။ 5 အန် ပီ ဆ ယိုဝ် ဘ့လာင် ဆီငဲ၊ ပီ ဆ နပ် လွင် မာဆေ မိူဝ်၊ အန် ယီ ဟဲ့ ဒါခိုယ် ဂျာမ်ဆာ လွှိုမ် ဒူအီ ဝီ တွိုန်။ ခုဝ်၊ အန် တူ လုဝ် ခမ် ဒုက် မာဆေ။ 6 ဒူအီ ဝီ တွိုန်၊ အာဆာက် အန် ပီ ဘော တူင့် ဘဲန် အာ ဟြဲန့် ဆီနမ် မိူဝ်၊ အန် ယီ တူ ပွိုန် ဒီ ဘိုင် ကြုဝ်ကြာမ် အန် ဘော တူ ပွိုန် ကွယ် ဘျုဝ် ဒါခိုယ်။ ဒီ ကာဒဲ့ အန်၊ ဘော အန် ဘော ဂွန် အာင တွိုန် ဒီ ဘော ဟာဝ် ဇမ် အူ ပ့လုဝ့်။

7 ခဲ့ ပီ ဂျုဝ်ဂျာ ဒူအီ ဒီ ဘူင်၊ န့ ဘဲန် အာဂျိုဝ် အာဒါ ဝတ့် ဒုဝ် ဘြိမ် အန်။ ခဲ့ ပီ ဆီ ဟူမ် အန်၊ န့ ယီ တူ ဘြေ့ ဒီ နဝ်း အန်။

8 ဒူအီ အီ မိုဝ်း အာငျာန် တူ မွှိုမ် လွှိုမ် ဒူအီ ရိုဝ်။ ဒူအီ ဂိန် ဒူအီ ဖ့လာန် အီ နပ် ဒီ ကွယ် ဆီချာ နာ အာတ့် အီ ဟဝ် တူ မိုဝ်း အာဂျိုဝ် မာဆေ။

9 ဆေ နဝ်း အေ ဟဲ့ စူ ဟဲ့ နှိမ် ခဲ့ မိုဝ်း အေ၊ န့ ဘော မွှိုမ် လွှိုမ် နဝ်း လာမာက် အီ ဆီ ပွိုန် ကာပွါ ဆေဆေ။ လွင် အန် တီ မိူဝ်၊ န့ ဘော မုး အီ ဒီလူယ် ဒီလာယ်၊ န့ ဘော ပီ အီ ဆီ ပါ ခုန်။

10 မျုဝ် အီ ဟဲ့ မိုဝ်း ဒဲင် ကာဒါယ် ဒေါ တီ နီ၊ ဒူအီ ဟဲ့ ဟွတ့် တဲး န့ မိုဝ်း စိူဝ် အန်။ ဘော လွင် ပီ ပါယ် ဒူအီ ဂေ ဟဲ့ ဟွတ့် နပ်။ ဒူအီ တူ ပွိုန် ဝီ ကာခဲန့် ဒီ ဝီ အီ ဟဲ့ မိုဝ်း ပ့လူမ် ဂေ ဟဲန့် လွှိုမ် အန်။

11 ဆေ မဲ ကာလာင် ဂြုဝ်း ကိူန်၊ အီ ဒီလူယ် ဒီလာယ် ဒီ ဝဲ ဘြဲ ကိူန်။ န့ မိူဝ် တူ ဘဲန် အာဂျိုဝ် ဒီ အာဆေ။

12 ခုဝ်၊ အာဝ် မိုဝ်း အာဆေ ဒီ ဘော ပွိုန် နပ် လွင် အီ မွှိုမ် အာဒါ ဒူအီ ဒေါ မိုဝ်း အန် အာဆာက် အီ တူ တူင့် အီ ပီ ကာမိုက် အီ ဒီလူယ် ဒီလာယ်။ အာဝ် မိုဝ်း အာဆေ အီ ပွိုန် ဝီ နပ် လွင် ပီ ပါယ် ဒူအီ ဒဲင် ကာဒါယ် ခြိုမ် ဘ့လေန့် နီ ဝါယ် ဟဲ့ ဟွတ့် ယမ် အန်။