ဘပ် ဖိူန် နီ ဘော ဒဲမ် လွင် ပဲ့ ဟဲ့ ဘျ ဇဝ်ဖြာ ဒီ အာအီဆာယ အီ မုး ဂွန် အာမူတ်။ ဇဝ်ဖြာ ဟဲ့ ဘျ ဒီ အန် လွင် အီ ဒီ ပါယ် မိူင် ယူဒါ ဂါယ် မိူင် ယေရူဆာလဲမ်။ ဒေါ အန် တီ န့ ဘော မုး စုဝ် ဘာန် ခုန်ဒီခမ် အာအူဇီယာ၊ ခုန်ဒီခမ် အာယုဝ်ထာမ်၊ ခုန်ဒီခမ် အာခါတ် ဘော ခုန်ဒီခမ် အာဟေစကီ အီ အိုပ် မိူင် ယူဒါ။

2 အာအီဆာယ ဟဲ့ တဝ်း ပါယ် နီ၊ “အိုယ် ဘေ အီ ကွယ် ဂါင်ဟြာဝ် ဘော ဘေ အီ ကွယ် ဒဲင် ကာဒါယ် တဲး ဘေ ဘောကာဂ့လျီတ် ထူမ်။ ခုဝ်၊ န့ မုး ဇဝ်ဖြာ အီ ကာလာင် ဂြုဝ်း ဒီ ဘေ။ အန် ဟဲ့ တဝ်း၊ ‘အုဝ် ဟဲ့ ဟျီင် ဂွန် အုဝ် တဲး ဂေ ကြဲ ဒီ တာင်။ မာလဲ၊ ဂွန် အုဝ် ဂေ တီ ဂေ ဝီ ကာဘး ဒီ အုဝ်။

3 မာမက် ဆီ ဘော နပ် ဒါ ကာညာ အန်။ မာလာ ဆီ ဘော နပ် ကာလာတ့် အန် အီ မုး ဒူင် ဒီ ဒွါ ဒါ ကာညာ အန် တဲး အန် ဟူမ်။ ဂေ ဒူအီ အီဆာရေလ ယီ တူ ဝီ နပ် အုဝ်။ ဂေ အီ မုး ဒူအီ အာမျုဝ် ပီ အိုပ် အုဝ်၊ ဂေ အာဝ် ဟူ ဝီ နပ် လွင် အုဝ်။”

4 ဇဝ်ဖြာ ဟဲ့ တဝ်း ပါယ် တီ။ ခုဝ်၊ ဂေ မုး ဒူအီ ဟာယ် ဒူအီ မိူက် အီ မိုဝ်း မှာပ် ကိူန်။ မှာပ် ဂေ န့ ပီ ကြုဝ်ကြာမ် အီ စန် ကာဆဝ် ပီ လုဝ် ပး ဂေ။ ဂေ ဘော ဘူင် မှာပ် ဆေဆေ ပီ ဂုန့် ဂေ ဟဲ့ ဒွိုမ် ဘူင်။ ဂေ ဘော ဘူင် အီ တူ ဆိူဝ် တူ မှာန် ပီ ဒါ ဒါ ဂေ ဟဲ့ ဒွိုမ် ဘူင်။ ဂေ ဝဲန် ဇဝ်ဖြာ ဘော ဝီ ဒိန့် ကာတု ဂေ ဒီ အန် ဇဝ် အီ မုး ဇဝ်ဖြာ အီ ဆီငါ ဘွတ် အီ အိုပ် ဒူအီ အီဆာရေလ။ ဂေ ဟဲ့ ပိဝ် တူတ့် ဇဝ်ဖြာ။

5 မှဝ် မ့ပါယ် ပီ ဘူင် ကာဘး ဘေ ဒီ အန် ဇဝ် ဆေဆေ။း မှဝ် န့ ပါယ် ပီ ဆီ ခမ် ဘေ ဒုက် ပေါ မ့ပွါ။း န့ ပီ ဂိန့် ဘေ ဟဲ့ မုး တူတ့် ပန် ဒိမ် ပန် ပ့လာ ဒီလူယ်။ နဝ်း ဘေ မိူဝ်၊ ဟဲ့ န့စမ် ဒီယဝ့်။

6 စုး ဒီ ဂိန့် ဘေ ကော ဇမ် ကာဘာ ပ့လဝ် ဘေ အာဝ် မိုဝ်း ကာဆိူဝ် မွှိုမ် ခေါ အူ ပ့လုဝ့် ဒီ ဒုဝ် ဘူင့် ဘေ။ န့ ပီ ဟဲ့ မုး တူတ့် ဒူင် မာယမ် ဒီလူယ်။ ဟဲ့ အဝ်း၊ ဟဲ့ ဘိုပ်၊ ဟဲ့ ငမ် အိုမ် ကာတိုမ် ဘော ဟဲ့ ဘြး ဟဲ့ ဒိမ်။ ကာဆိူဝ် ဒိမ် ဘေ ဂေ တီ ယီ တူ မိုဝ်း အာဆေ အီ ဝီ ဆာနျီ့ လေး အိုမ် ကာတိုမ်၊ ဝီ ကာဘန် တာ ဒူန့်။ ယီ တူ မိုဝ်း အာဆေ အီ ဝီ ဖဝ်း နာမန်၊ တဲး အန် ဝီ န့စမ် ဝီ ကဲန်။

7 မာန် မိူင် ဘေ မိူဝ် ဟဲ့ ကာပျာတ့် တူတ့်။ ငဝ် မိူဝ် ဟဲ့ ကာဆိုမ် တူတ့် ကာင် ခဲင် မိူင် ဘေ။ ဒေါ ဝီ ယိုဝ် ဝီ ယွတ် ဘေ၊ ဒူအီ အာမျုဝ် ဟဝ် ဟဲ့ ဟွတ့် ဝီ တး ဖာတ် မိူင် ဘေ ဂေ ကာဒါယ် ဘေ။ န့ ဟဲ့ ဟွတ့် ကာပျာတ့် လိုဝ် တူတ့်။ ခုဝ်၊ အီ ဟဝ် ဟဲ့ ဟွတ့် တး အိုပ် တး အွင် တူတ့်။

8 မိူင် ယေရူဆာလဲမ် ယီ ဆီ ကွယ်။ အန် ဘော ပီ မိူင် အီ မိုဝ်း ရန်ဆူ အီ ဟဲ့ ရူပ် ဂေ။ အန် ဘော ပီ ထိုပ် အီ ကွယ် ခဲင် မာန် မာငုန် ဘော ထိုပ် အီ ကွယ် ခဲင် မာန် ဒီဂျီ။

9 ဇဝ်ဖြာ ယီ အိုပ် တူတ့် ဒွန် မျုဝ်။ ဆေ အန် တူ အုန် ဒူအီ အာမျုဝ် အေ ခဲင် မိူင် ယေရူဆာလဲမ် တဲး န့ ဆီ ဂိူတ် အီ စဲက်၊ န့ ဒီ ဘော ပီ မိူင် ဆုဝ်ဒူမ် ဂါယ် မိူင် ဂုဝ်မုဝ် တွိုန်။

10 အိုယ် ဘေ ဒါ ကာညာ အီ ပီ ဒူအီ အီ အိုပ် မိူင် ဆုဝ်ဒူမ် ဘော ဘေ အီ ပီ ဒူအီ အီ ကွယ် ခဲင် မိူင် ဂုဝ်မုဝ်၊ တဲး ဘေ ထူမ် ဂြုဝ်း ပီ ကာလာင် ဇဝ်ဖြာ ဒီ ဘေ။

11 ဇဝ်ဖြာ ဟဲ့ တဝ်း၊ “ဘေ ထာင် အုဝ် ဆီ ပွိုန် ဒုဝ် ပီ ဒီ လှူ ဘေ။း အုဝ် ဟဲ့ ပိုဝ် ဒုဝ် ပီ ဒီ လှူ ဘေ အီ ဒုဝ့် ဒီ ငဝ် ဘော ဒီက့လွုန် ဘျြီင် ဒုဝ် ဆတ် အီ ဂ့လန့် ဆီချာ ပီ လှူ ဘေ တီ။ အုဝ် မိူဝ် တူ လုဝ် နှာမ် မာမက် ဘော နှာမ် မာဘူ ဂေ မာပဲ ဘေ တီ။

12 ဆေ ဘေ တး ဒူင် ကွယ် အုဝ်၊ အာဆေ ဟဲ့ မှာန့်၊ တဲး ဘေ တး ညဲတ့် ဝဲင် အုဝ်။း

13 ကွဲ့ တဲး ဘေ ဒိုဝ်း တး ပီ ဒီ လှူ ဘေ အီ ပီယေန့်၊ အီ တူ မိုဝ်း ဒီခုဝ် မာဆေ တီ။ အုဝ် ဟဲ့ ကာအိး န့ကြိုဝ်း အုး ငှုန် ပီ လှူ ဘေ အီ ဒုဝ့် ဒီ ငဝ် တီ။ အုဝ် တူ အိုင် ဘော ဘ့လွယ် ပီ ဘူင် ဘေ ဒေါ မုး ဆီငဲ မာဂျီန် ကာမာယ် ဘော ဒေါ မုး ဆီငဲ ဒီလှဝ်။ အုဝ် ကာအိး ဘော ဘ့လွယ် အာမျုဝ် ဟဝ် ဒေါ တး ကာဇု ဘေ။ ခုဝ်၊ အုဝ် တူ ခမ် ဘေ ဘူင် ဘ့လွယ် ဘော ဘူင် ကာဆူ မှာပ်။

14 အုဝ် ဟဲ့ ဇွင့် ဘ့လွယ် ဆီငဲ မာဂျီန် ကာမာယ် ဘော ဘ့လွယ် ဆီငဲ ဘွတ် ပီ ဘူင် ဘေ။ ဆီငဲ ဂေ တီ၊ န့ တဲး လဲ န့ ညှာပ် ဒီ နဝ်း အုဝ်။ အုဝ် အာဝ် ဟူ ပဲ ခမ် ဒီ ဒူင့် လွင် အန် တီ။

15 ဒေါ ကြိုပ် ဆာခိုဝ် ဘေ ဒီ အုဝ်၊ အုဝ် မိူဝ် တူ ယွတ် ဘေ။ ဘေ ပီ ဘော ဆာခိုဝ် ခဲ့ မှဝ်၊ အုဝ် တူ ထူမ်။ ခုဝ်၊ န့ ပီ ဒဲ ဘေ ဟဲ့ ဘဲ နှာမ် ဒီလူယ်။

16 တဲး ဘေ ဘာယ် ဒုဝ် ဘေ၊ တဲး အန် ဆီငါ။ တဲး ဘေ ဝဲန် အီ တူ မွှိုမ် ပဲ့ ဟဲ့ ဘူင် ဘေ ပီ ယိုဝ် အုဝ် တီ။ တဲး ဘေ ဝီ စူ ဘူင် အီ တူ မွှိုမ်။

17 တဲး ဘေ ဝီ ဟေန် ဒီ ဘူင် နာ ဘွတ် နာ မွှိုမ်၊ ဝီ ဟြေတ့် ဒီ ဘူင် ဆိူဝ် ဆိူဝ် မှာန် မှာန်၊ ဝီ စွယ် ဂေ အီ ဟဲ့ ခမ် ပီ ခါနှာပ် အီ ဟဝ်၊ ခြဲ ဂေ အီ ဆီ ဘူင် နာ တူ မွှိုမ် ဒီ ဂွန် ဆီပြး၊ ဝီ စွယ် ဂွင့် ရဲ ယာ ဆီပြး။”

18 ဇဝ်ဖြာ ဘော ကာလာင် ဟာဝ် တဝ်း၊ “တး၊ တဲး အေ လာယ် ကာလာင် လာယ် ခဲ၊ အာဆေ ဟဲ့ မှာန် အာဆေ တူ မှာန်။ မှာပ် အီ ကွယ် ခဲင် နဝ်း ဘေ ပီ ဘော ဟဲ့ ရေန့် ဒီရျီင်၊ တဲး န့ ကော ညှာပ် ဘာယ် ဝဲန် မိူဝ်၊ အုဝ် ယီ ဒီ ဝီ ဘူင် တဲး နဝ်း ဘေ ဝီ လုယ် ကာမာယ်၊ တဲး န့ ကော လုယ် ရာဝ် ပီ အိုမ် ဒါတ်။ မှာပ် ဘေ အီ တဲး နဝ်း ဘေ ကာဒါတ့်၊ တဲး န့ ကော ရေန့် ဝွင့် မိူဝ်၊ အုဝ် ဒီ ဝီ ဘူင် တဲး န့ လုယ် ပီ ဟိုက် မာဘူ။

19 ဆေ ဘေ မိုဝ်း နဝ်း ဆီ ထူမ် ဂြုဝ်း အုဝ်၊ ဘေ ဒီ ဘော ပွိုန် ဒီ ဟူမ် အီ မွှိုမ် ဒွန် မျုဝ် အီ လေး ခဲင် ကာဒါယ် နီ။

20 မာလဲ၊ ဆေ ဘေ ဝီ ထဲန့် အုဝ်၊ ဝီ ကာဘး ဒီ အုဝ်၊ ဘေ ဒီ ဘော ယမ် ဒီ မာပွါ့ လာင် အီ ဟဝ်။ အုဝ် အီ မုး ဇဝ်ဖြာ ဟဲ့ တဝ်း ပါယ် တီ။”

21 ခဲင် မိူင် ယေရူဆာလဲမ် ဂေ ဒူအီ ဟဲ့ ဒွိုမ် ဒူပ် ဆီချာ ဇဝ်ဖြာ။ ဂေ ယီ ဟဲ့ ဝီ ဝဲန် ဇဝ်ဖြာ၊ ဝီ ဘူင် ဒီ အန် ပီ ပီ ဘူင် ယာ မာလမ် ဒီ အီမာယ် ဘြိမ် အန်။ အာတ့် နီ၊ န့ ဘော မုး ဒူအီ အီ မိုဝ်း နဝ်း ဆိူဝ် နဝ်း မှာန် ဒီလူယ်။ ဒေါ တီ နီ ယီ ဝီ မိုဝ်း မီ ဒူအီ အီ ငဝ်း ယမ် အာဆာက် အီ။

22 အာတ့် နီ ဂေ ပီ ဘော ဟဲ့ ပီ ရွိုန် ဇဲတ် မိူဝ်၊ ဒေါ တီ နီ ဂေ ဟဲ့ ဝီ ပီ အျီင် ရွိုန်။ အိုမ် မာငုန် အီ မွှိုမ် တွိုန် မိူဝ်၊ ဟဲ့ ဝီ ကာဆူ ကာဝ်ု အိုမ် အး။

23 ဂေ ဒါ ကာညာ ဘေ အီ အိုပ် မိူင် မိူဝ် ဟဲ့ ဝီ ကာဘး ဒီ မိူင် တီ။ ဂေ ဟဲ့ ဝီ ဘဲန် ဂိုက် ဒါ ဇူန် ဂေ ဒါ ပြာ။ ဂေ ဒွန် အီ ဘော ဝီ ဒိုဝ်း ဒီ ဟူမ် လက်ဆွင် ပီ ဒွါ အီ ဟဝ်။ ဂေ အာဝ် ဟူ ဂွင့် ရဲ ဂွန် ဆီပြး ခဲင် မိူင်။ ဂေ အာဝ် ဟူ ဆုင်ဖျာတ် အာမူ ပီ ကာလာင် ယာ ဆီပြး။

24 ကူပ် န့ ပါယ် တီ ဇဝ်ဖြာ အီ အိုပ် တူတ့် ဒွန် မျုဝ်၊ အီ မုး ဘော ဇဝ်ဖြာ အီ အိုပ် ဒူအီ အီဆာရေလ အန် ဟဲ့ ဝီ တဝ်း၊ “ဘ်ု ဘေ ယွတ်၊ အုဝ် မိူဝ် ဒီ ဝဲန် ဂေ အီ ဘဲန် ရန်ဆူ အုဝ်။ အုဝ် ဒီ ဝီ ဘူင် ဝျီ့ ဒီ ဂေ အီ မုး ရန်ဆူ အုဝ်။

25 အုဝ် ဒီ ဝီ ဒမ် မှာပ် ဒီ ဘေ၊ တဲး န့ ပီ အီ ထာရွင် ရွိုန်၊ တဲး အျီင် အန် လေး။ ပါယ် တီ အုဝ် ဒီ ဒိုဝ်း ဝဲန် တူတ့် အီ တူ မွှိုမ် အီ ကွယ် ခဲင် နဝ်း ဘေ။

26 အုဝ် ဒီ ဝီ ဒါင် တဲး န့ မိုဝ်း ဒါ တာင် အီ ဆုင်ဖျာတ် ဒါရာ၊ တဲး န့ ဝီ ပီ ဒေါ ဂုဝ် တွိုန်၊ တဲး န့ ဘော မိုဝ်း ဒါ အီ ဒွါ အာကျာမ် အာငျာန် ဒီ ဘေ ပီ ခါ အာတ့်။ ဝါယ် အန် တီ အီ ဟဝ် ဒီ ဝီ တဝ်း၊ ‘ခဲင် မိူင် ယေရူဆာလဲမ် န့ မိုဝ်း မီ ဒူအီ နဝ်း ဆိူဝ် နဝ်း မှာန် ဘော ဂေ အီ ဘူင် နာ မှာန် ဆေဆေ။” ဇဝ်ဖြာ ဟဲ့ ကာလာင် ပါယ် တီ။

27 အုဝ် ယီ တဝ်း ဒီ ဘေ၊ ဇဝ်ဖြာ ဒီ ဘော ချွတ် ဂေ ဒူအီ ခဲင် မိူင် ဇီအူန် တဲး န့ ဒူပ် နာ မုး နာ မှာန်။ ဂေ ဒူအီ အီ ဟဲ့ ကာပ့လု နဝ်း၊ အီ ဟဲ့ လှုဝ်း မှာပ် ဂေ၊ အန် ဇဝ် ဒီ ဝီ ကာဝေ ဂေ ကူပ် မိုဝ်း အန် နဝ်း ဆိူဝ် နဝ်း မှာန်။

28 မာလဲ၊ အန် ဇဝ် ဒီ ဝဲန် ဂေ အီ ဘူင် နာ တူ မွှိုမ်၊ အီ ကာဘး ဒီ အန် ဒွန် အီ။ အန် ဒီ ဘော ဝဲန် ဂေ အီ ဝဲန် အန်၊ တဲး ဂေ လိုဝ် စှိုမ် ဒွန် အီ။

29 ဘေ ဒီ ဘော မွှိုမ် ဆာယ် ဒီ အာတ့် ဇဝ်ဖြာ ကူပ် ဟဲ့ ဒွိုမ် ကြိုပ် ဘေ ဒင် ဟေ ထေရေပ်။ ဘော ကူပ် ဟဲ့ ဒွိုမ် ခူယ် ကာဆဝ် ဘေ ဒေါ ကြိုပ် ဘေ ပါယ် တီ။ ဇဝ်ဖြာ ဒီ ဘော တဲး ဘေ စှိုမ် ဆာရေ ကူပ် ကာပိုမ် ပဲ့ ဟဲ့ ရဝ်း ဘေ တွိုန်။

30 ခုဝ် အန် တီ၊ ဘေ ဒီ ဘော ပီ ဟေ အီ မိုဝ်း လှာ အီ ဟဲ့ ဟျီ့ ကာဟဝ်း။ ဘေ ဒီ ပီ ဘော ကာပိုမ် အီ တူ မိုဝ်း အိုမ် ဒီ ရိုက်။

31 ဆေ န့ မိုဝ်း ဒူအီ အီ မိုဝ်း ပ့လူမ် တာင်၊ အန် ဒီ ဘော ဝီ ပီ ကာဟိုမ် ပ့လာယ်။ ပီ ဘူင် အန်၊ န့ ဒီ ဘော ပီ ကာစှတ့် ငဝ်။ ဘော အာ မျုဝ် တီ ဒီ ဘော ကာဆိုမ် ဒီ ရိုမ် တူတ့်။ ငဝ် တီ ယီ တူ မိုဝ်း အာဆေ အီ ပွိုန် ဘျတ် တဲး အန် ယတ်။” အာအီဆာယ ဟဲ့ ကာလာင် ပါယ် တီ ဒီ ဂေ ဒါ တာင် အီ အိုပ် ဂေ ဒူအီ အာယူဒါ။