အုဝ် ဆီ တဲး မဲ ပီ အီကတ် အီမာယ် အာရာင် အုဝ် အီ ဟဲ့ ဂွိုတ် ဒီ မာ အုဝ်။ ဆေ န့ ပါယ် တီ၊ ဒေါ ကာတုန့် အုဝ် ဒီ မဲ ကာတဲ ရဝ်၊ အုဝ် ပီ ဘော ညွှတ် အုး မဲ မိူဝ်၊ အီ ဟဝ် တူ ပွိုန် နဲန အုဝ်။

2 အုဝ် မိူဝ် ဒီ ပါ ဒဲ မဲ၊ ဟာဝ် ဇမ် ခဲင် ကာင် မာ အုဝ် ဘော တဲး မဲ လိုပ် ခဲင် အိတ် ဒူင် ဂွိုတ် အုဝ်။ အုဝ် မိူဝ် ဒီ ဝီ ဒိုဝ်း အိုမ် မာငုန် အီ ဟဲ့ ကာဝ်ု န့ကြိုဝ်း မှီ ဘော အိုမ် ဘ့လေ မာစက် အုဝ်၊ ဝီ ဒွါ တဲး မဲ ဒျီင်။

3 ဒဲ မဲ ဘ့လာက် အာဂ ဒီ ဘဲန် မွှန် အုဝ်။ ဒဲ မဲ ဘ့လာက် အာအး ဘော ဝီ ငျီမ် အုဝ်။

4 အိုယ် ဘေ ဒီဘျာ အီ ကွယ် မိူင် ယေရူဆာလဲမ်၊ အုဝ် ဆီ တဲး ဘေ ဒိူင်၊ ကွဲ့ တဲး ဘေ တး ပျာတ့် တး ဒီလဲ နဝ်း ရွက့် ယာယ်၊ တဲး ယာယ် ကော န့ဆိုဝ်း ရာင် ယာယ်။

5 အီဘိုန့် အီ နေ ဒီ ပါဝ် ပီ ရွက့် အန် အီ တး ခဲင် ပြဲ၊ အန် မုး အာဆေ။း

အုဝ် မိူဝ် ဟဲ့ ဘျိတ့် ယိတ့် မဲ ဒေါ ကွယ် မဲ ခြိုမ် ဟေ ဆီပိုမ်။ ဒူင် တီ ဘော မုး ဒူင် ဟဲ့ ဒဲ မာ မဲ ဘာဒိက် ဆန်ထေ ဒီ မဲ ဘော ဒူင် ဟဲ့ ခမ် မာ မဲ ဒီ ဝတ့် ဆဝ် ဒီ မဲ ဒေါ ဟဲ့ ဂွိုတ် မဲ။

6 တဲး မဲ တဲး အုဝ် ကွယ် ရိုမ် ဒူပ် မဲ ဆေဆ ဘော ဒိုက် ဒီ နဝ်း မဲ ပီ ဇိုမ် အီ ဟွယ် ဒီ မဲင် မဲ။ တဲး ဒွန် အီ ကော ယိုဝ် မဲ ရွက့် မီ အုဝ် ပီ ဆီကာနူ အီ စှိုပ် ဒီ ဒဲ မဲ။ ခုဝ်၊ လွင် နဝ်း ရွက့် မိုဝ်း ပွုန် တာင် ပီ ပွုန် အီ တဲး အီ ယမ်။ ဆေ အီဘိုန့် အီမာယ် တူ လာယ် ညှိုမ် နဝ်း၊ န့ ဘော နပ် ဒီ ကွယ် ဆေဆေ ပီ မိူင် မာရာန အီ ကွယ် ဆေဆေ။ နဝ်း မျုဝ် တီ ဘော နပ် ဒီ ကုး ပီ ငဝ် အီ ကုး တာင် ကုး ဟဲန့် ကာဆဝ်။

7 အိုမ် ပီ ဘော ကိူန် ခဲ့ မှဝ် မိူဝ်၊ န့ တူ ပွိုန် ဘျတ် နဝ်း ရွက့်။ အိုမ် ခဲင် ဘ့လဲင် မိူဝ် တူ ပွိုန် မ့ပုန် နဝ်း ရွက့် တီ။ ဆေ ဒူအီ ဒီ ဘော ဒိုဝ်း တူတ့် ကြုဝ်ကြာမ် အန် ဒွန် မျုဝ်၊ တဝ်း ဒီ စိုဝ်း နဝ်း ရွက့် တီ၊ အာဝ် မိုဝ်း အီ ဆီဖဝ် လွင် အန် တီ။

8 ယေ မိုဝ်း ဝါ ဂွန် ဒီဘျာ တျီ့ အူ ဝီ၊ ပူ အန် မိူဝ် ညှမ် တာင်။ ဆေ ဟီ ဇမ် ပန် ဒီ တး မှာန့် ဂေ ကာညူမ် ဝါ ယေ တီ၊ ယေ တူ နပ် ဒီ ပါယ် မှဝ် ဒီ အန်။

9 ဆေ ဝါ ယေ တီ ပီ ရဲင်၊ ယေ ဒီ ဘူင် ဟုဝ် ရွိုန်၊ ဘ့လေး ဒဲင် အန်။ ဆေ အန် ပီ မာလုဝ်း၊ ယေ ဒီ ဒိုဝ်း ဟေ အာရိတ်၊ ဘူင် ဘဲန် ဆဲ အန်၊ ဟပ် အုန် ဒီ ဘ့လ မာလုဝ်း တီ။

10 အုဝ် ဟဲ့ ပီ ရဲင်။ ဘ့လေ ပူ အုဝ် ဘော ပီ ဟုဝ် စာ ဒဲင် ရဲင် တီ။ ပါဝ် ပီ ရွက့် အုဝ် မိူဝ် ဟဲ့ မာတ် အုဝ် ပါယ် တီ။ အုဝ် ဟဲ့ ပီ ဒူအီ အီ တး ဒွါ နဝ်း နှိမ် နဝ်း ယေန် ဒီ အန်။

11 ခုန်ဒီခမ် အာဆာလုဝ်မုဝ် ဟဲ့ ဒွိုမ် မိုဝ်း မာန် မာငုန် အူ ဒဲ အီ ကွယ် ခဲင် မိူင် ဘာလာမူန်။ အန် ဟဲ့ ဒွါ ဂေ အီ ဟဝ် ခါတ် ဒီ ရန့် မာန် အန် တီ။ ဂေ ယီ လုဝ် ဒွါ ရွိုန် ဒီ အန်၊ အူ ဝီ အူ ဟြဲန့် ဘူင့် အာဒါ ဘ့လေ ပဲ့ ဟဲ့ ပွိုန် ဂေ။

12 အီ မုး မာန် မာငုန် အုဝ်၊ အုဝ် ဒီ ဒွါ ဒီ ဒူအီ ပီ အိုင် အုဝ်။ အိုယ် မဲ ခုန်ဒီခမ် အာဆာလုဝ်မုဝ်၊ အုဝ် ဒီ ဒွါ ရွိုန် အာဒါ အူ ဟြဲန့် ဘူင့် ဒီ မဲ။ ဂေ ဒူအီ အီ ခါတ် ဒီ ရန့် မာန် မာငုန် တီ၊ အုဝ် ဒီ ဒွါ အူ ဝီ အာ မာယဝ်း ဘူင့်၊ တဲး န့ ဘဲန် ရုး ရန့် ဂေ။

13 အိုယ် မဲ နာင် ပီ ရွက့် ကာဆဝ် အုဝ်၊ မဲ ဟဲ့ ကွယ် ခဲင် ကာပိုမ် အုဝ် တီ။ ဂေ ဂိုက် အုဝ် နှဝ့် ဒီ ထူမ် ဂြုဝ်း မဲ။ တဲး မဲ ကာလာင်၊ တဲး ဘော အုဝ် ပွိုန် ဒီ ထူမ် ဂြုဝ်း မဲ။

14 အိုယ် မဲ ပါဝ် ပီ ရွက့် အုဝ်၊ တဲး မဲ တး ဒူင် ကွယ် အုဝ်။ တဲး မဲ ပီ မာဇ အီ ညှမ် တာင် ဘော မာဘွုး အီ နုဝ့် အူ ဆီနမ် အီ ကွယ် ဒီ နွန် အီ လတ့် ဟေ န့ကြိုဝ်း အုး ငှုန် ကိူန်။