ဂြုဝ်း ကာညူမ်

1 အိုယ် မဲ ဂွန် ဒါ ကာညာ၊ ပ့လဝ် မဲ အီ ဟဲ့ စှိုပ် ခ့လဲပ် ဟဲ့ စှိတ် ကာဆဝ်။ ဂိုမ် မဲ နာင် မိူဝ် ဟဲ့ ပီ ဆဲန့် ဘွတ် အီ မုး ပီ ဘူင် ဒူအီ အီ လှဲဝ် ဒီ ဘူင်။

2 ကာတိန့် မဲ နာင် ဟဲ့ ပီ ကွက့် အီ ဟဲ့ ဟပ် နုဝ့် အိုမ် မာငုန်။ ဝတ့် မဲ ဟဲ့ ပီ မ့ပိုမ် ငှုဝ် ပဲ့ ဟဲ့ မ့ပြာယ် အုန် အီ၊ ဟဲ့ ဝီ ဒါင် ဘော ဘုဝ်း ခမ်ဆွန်။

3 ဘ့လေ ပူ မဲ အာ ဘူင့် တီ ဘော ပီ မာဇ ဂွန် ရာပ်။

4 မဲင် မဲ နာင် ဟဲ့ ပီ ဟုဝ် စာ ပ့လဲ့ မာဆာင်။ ငါယ် မဲ မိူဝ် ဟဲ့ ပီ အိုမ် ဒိုင် ခဲင် မိူင် ဟေဆာဖူန် ဘော အီ ကွယ် ခူပ် မာလုဝ်း မိူင် အီ စိူဝ် ဘာဆာရာဘေမ်။ ဂုင်မုး မဲ နာင် ဟဲ့ ပီ ဟုဝ် စာ အီ ကွယ် ဒီ နွန် လေဘာနုန်၊ အီ ဝီ မာငး ဟာဝ် နာ မိူင် ဒါမာခူ။

5 ဂိန့် မဲ ဘော ပီ နွန် ဂါမေလ။ ဟိုက် ဂိန့် မဲ မိူဝ် ဒီပ့လာယ် ဘော ဝွင့် ကာလ။ ပီ ပါယ် အာရိုပ် ဟိုက် ဂိန့် မဲ ဒီ စှိတ်၊ န့ ဘော လဝ့် ကာဆဝ် နဝ်း ခုန်ဒီခမ်။

6 အိုယ် မဲ ပါဝ် ပီ ရွက့် ကာဆဝ် အုဝ်၊ မဲ ဟဲ့ စှိတ် ကာဆဝ်။ န့ ဘော တဲး အုဝ် ဘျုဝ် ဒါခိုယ် ကူပ် ရွက့် အုဝ် ဒီ မဲ။

7 မဲ နာင် ဘော စာ ဒီဟျီဝ် ပီ ဟေ နမ်ထာန်။ ဘ့လေ ပူ မဲ ဘော ပီ မ့ပူင့် ဘ့လေ အန်။

8 အုဝ် ဟဲ့ တဝ်း၊ “အုဝ် ဒီ ဟုဝ့် ဟေ နမ်ထာန် ဘော ပါ ဘ့လေ အန်။” တဲး ဘ့လေ ပူ မဲ ပီ မ့ပူင့် ဘ့လေ မာငုန်။ ဖွိုမ် ပီ ဟိုဝ်း မဲ၊ တဲး န့ ဘော အုး ငှုန် ပီ ဘ့လေ ဆီပိုမ်။

9 ဘော မူတ့် မဲ တဲး န့ ပီ အိုမ် မာငုန် အီ ဆီငဲး လွှိုမ် မျုဝ် ဟဝ်။

ဆေ န့ ဘော ပါယ် တီ တဲး အိုမ် မာငုန် လှဲ ဟာဝ် ဆိူဝ် ဆိူဝ် ဒူင် ကွယ် ပါဝ် ပီ ရွက့် အုဝ် တီ။ တဲး န့ ဘော လှဲ ဟာဝ် ကာလုဝ်း ဆီပိုန့် အန် ဘော ဟြာင် အန်။

10 ပါဝ် ပီ ရွက့် ကာဆဝ် အုဝ် တီ၊ အုဝ် ဘော မုး ဒူင် ဘိုင် အန်။ အန် ဘော ဆီ ကွယ် ကာဆဝ် ရိုမ် ဒူပ် အုဝ်။

11 အိုယ် မဲ ပါဝ် ပီ ရွက့် အုဝ်၊ တဲး မဲ တး။ တဲး အာယ် ကာဒူပ် ဟာဝ် ယွတ် မာန် ဂေ ဒူင် နာ။ တဲး အာယ် ဟာဝ် တမ် ခဲင် ရဝ် ခဲင် ကာင် ဂေ တီ။

12 တဲး အာယ် ယိတ့် ဆိန့် ဆိန့်ဝး စေဝ်၊ တဲး အာယ် ဟာဝ် ယွတ် မာန် မာငုန်၊ ယုဝ် ဟဲ့ ကာပုဝ် ဒီ ဘုဝ်း။ တဲး အာယ် ယွတ် ယုဝ် ဘုဝ်း ဟဲ့ ဟွတ့် ဘြး။ တဲး အာယ် ယွတ် ဘော ဟေ ဘ့လေ မာစက်၊ ယုဝ် ဟဲ့ မိုဝ်း ဘုဝ်း ဂေ ဘ့လေ အန်။ ဒူင် တီ၊ အုဝ် ဒီ ဘျ ခဲ့ ရွက့် အုဝ် ဒီ မဲ။

13 မဲ ဒီ ပွိုန် ဒီ ယိုဝ် အုး ငှုန် ဘ့လေ အီ တဲး အီ လာယ် အိုင် ဘော ဘ့လေ အီ ဆီငဲး ဒွန် မျုဝ် အီ ကွယ် ခူပ် မာလုဝ်း ကာင်။ န့ ဟဲ့ မိုဝ်း ဘော ဘ့လေ ဘြိမ် ဘ့လေ ကာမာယ်၊ အုဝ် ဟဲ့ ဂဲပ် အုန် အာဒါ မဲ၊ အိုယ် မဲ ပါဝ် ပီ ရွက့် အုဝ်။