1 အိုယ် မဲ နာင် အီ ဟဲ့ စှိတ် လွှိုမ် အီဘိုန့် အီ ဟဝ် ဘောကာဂ့လျီတ်၊ ပါဝ် ပီ ရွက့် မဲ တီ ဟဲ့ ဟာဝ် နာ မှဝ်။း ပါဝ် ပီ ရွက့် မဲ တီ ဟဲ့ ဟာဝ် ဒူပ် န့တေန့် မှဝ်။း ကာလာင် ဒီ ယေ၊ တဲး ယေ ပွိုန် ဒီ စွယ် မဲ ဟြေတ့် အန်။

2 ပါဝ် ပီ ရွက့် အုဝ် တီ ဟဲ့ လူင် ဒီ ကာပိုမ် အန် အီ မိုဝ်း န့ကြိုဝ်း အုး ငှုန် ကိူန်။ အန် ဟာဝ် တဲး အန် ပွိုန် ဒီ ဟူမ် ဒီ ဒျီင် ဘော ဘေတ့် ဘုဝ်း ခမ်ဆွန် ခဲင် ကာပိုမ် အန် တီ။

3 ပါဝ် ပီ ရွက့် ကာဆဝ် အုဝ် တီ၊ အန် ဘော မုး ဒူင် ဘိုင် အုဝ်။ အုဝ် ဘော မုး ဒူင် ဘိုင် အန်။ အန် ဘော ဟျီင် ဖိုင် မာဘူ အန် ခဲင် အူင့် ပေတ့် အီ မိုဝ်း ဘုဝ်း ခမ်ဆွန်။

4 အိုယ် မဲ ပါဝ် ပီ ရွက့် အုဝ်၊ မဲ နာင် ဟဲ့ စှိတ် ပီ မိူင် ဒီရာစာ။ မဲ ဘော မွှိုမ် ရွက့် ပီ မိူင် ယေရူဆာလဲမ်။ မဲ ဘော မွှိုမ် အာမ် ပီ ဒါ ဆိုက် အီ ဟဲ့ ဂူင့် အာလာမ် ဂေ။

5 တဲး ငါယ် မဲ နာင် ဝး အုဝ်။ ခုဝ်၊ ငါယ် မဲ တီ ဟဲ့ စှိတ် ကာဆဝ်။ အုဝ် အာဝ် ဟူ ခမ် ဒီ ယွတ်။ ဟိုက် ဂိန့် မဲ ဟဲ့ ဝွင့် ပီ ဖိုင် မာပဲ အီ ဒဲန် လူင် ဒီ နွန် ဂီလေအာတ်။ 6 ဟြာင် မဲ မိူဝ် ဟဲ့ လုယ် ဆီငါ ပီ ဖိုင် မာဘူ အီ ဟဲ့ ဟွတ့် တာ အိုမ်။ ယီ တူ ဘျုဝ်း တူ ဟြာယ် ခေါ အူ ဘူင့် ဘော လာယ် ဒါမ် ကာရမ်။

7 မဲ ပီ ဘော ဟဲ့ ကာမှုဝ့် နာ မဲ၊ ကာလာ မဲ ယီ ခွင် ပီ ဘ့လေ မာစက် အီ ဟဲ့ ကာပ့လ ကာတဲ။

8 ဆေ နာင် ဟောခမ် ဟဲ့ မိုဝ်း ဒဝ် ဂိုဝ် ဝီ၊ နာင် တျီ့ ဘော မိုဝ်း ဒါ ဂိုဝ် ဝီ ဘော ဂေ အီ မုး ဒီဘျာ ဇဲတ် ပီ ဘော ဟဲ့ မိုဝ်း ကိူန် ခဲင် ဇိူင် နာင် ခုန်ဒီခမ် မိူဝ်၊

9 အုဝ် ယီ တူ ယိုဝ် ခေါ အူ ဝီ အီ ဟဲ့ ဇေ့ဇုင် အီ မွှိုမ် ရွက့် ပီ မဲ အီ ပီ မာဘ့လူယ် အုဝ်။ မာ မဲ မိူဝ် မိုဝ်း မီ ဂွန် အီဘိုန့် အူ ဝီ တီ။ မာ မဲ ဘော ရွက့် မဲ လွှိုမ် ဒွန် အီ။ ဂေ အီ ယွတ် မဲ ဂေ ဘော တဝ်း၊ မဲ မုး ဒူအီ ပီ မွင့်ကာရာ ဒွါ ဇဝ်ဖြာ။

10 ဂွန် ဒီဘျာ အီ မွှိုမ် ယွတ်၊ မွှိုမ် ငွိုပ် ကာဆဝ် ပီ အာခြာဝ် စေဝ် ညှာ တီ၊ အန် မုး အာဆေ။း နာင် တီ ဟဲ့ စှိတ် ကာဆဝ် ကော ပီ ကာတာန် ဘ့လာင် မာဂျီန်၊ ဘော မာဘြိဝ် ပီ ဘ့လာင် ဆီငဲ၊ ဘော မွှိုမ် အာမ် ပီ ဆီမန့်။

11 အုဝ် ဟဲ့ လူင် ဒီ ကာပိုမ် ဟေ ဘ့လေ အီ မိုဝ်း ဂဝ် ဘဲန် မျုဝ် ဘဲန် မျုဝ်၊ အုဝ် ဘော ဆီ ယွတ် ဟေ ဘ့လေ အီ ကာစုး ဒီ ဘုဝ်း။ အုဝ် ဆီ ယွတ် ယုဝ် ဟေ မာငုန် ဟဲ့ ကာဒွတ် ဘော ဘ့လေ မာစက် ဟဲ့ ဘုဝ်း။

12 မဲ နာင် ဟဲ့ ဘူင် တဲး နဝ်း အုဝ် ဝှိုန့် ကူပ် ရွက့် ကာဆဝ် အုဝ် ဒီ မဲ။ နဝ်း အုဝ် မိူဝ် ဟဲ့ နဝ်း တာင် ပီ ဒူအီ အီ ပဝ့် လက်လဝ် မ့ပြွင့် ပီ ပဝ့် ခုန်ဒီခမ်။

13 အိုယ် ဂွန် ဒီဘျာ ဆူလာမိတ်၊ တဲး မဲ ဝီ တး။ တဲး ဘော ယေ ပွိုန် ဒီ ခူယ် ဒါခိုယ် ဒူပ် မဲ။

မှဝ် န့ ပါယ် ပီ ဆီ ယွတ် ဘေ ဒီ အုဝ် ဒေါ ဂါ အုဝ် ကာတဲ ဂေ ဒူအီ အီ ကွယ် ဘဲန် မ့ပြဲင်။ မှဝ် န့ ပါယ် ပီ ဆီ ယွတ် ဘေ ဒီ အုဝ် ပါယ် တီ။း^a