1 အိုယ် မဲ ဝါ အီ မုး ပါဝ် အီ ဒီ ခတ် ဒိုဝ်း အုဝ်၊ အုဝ် ဟဲ့ ဟွတ့် တး လိုပ် ခဲင် ကာပိုမ် အုဝ်။ အုဝ် ဟဲ့ ဟွတ့် ဂဲပ် အုန် ဒဝ် မောရာ ဘော န့ကြိုဝ်း အုး ငှုန်။ အုဝ် ဟဲ့ ဟွတ့် ဟူမ် ငါမ် မာဖျီန် အီ လေး ဒီ န့လာင် အန်။ အုဝ် မိူဝ် ဟဲ့ ဒျီင် ဘော အိုမ် မာငုန် အီ ဟဲ့ ကာဝ်ု န့ကြိုဝ်း မှီ ဘော အိုမ် ပူ အုဝ်။ အိုယ် ဘေ ဂိုက် အုဝ်၊ တဲး ဘေ ဟူမ်။ ဘေ အီ မိုဝ်း ပါဝ် ပီ ရွက့် ဘေ၊ တဲး ဘေ ဒျီင်၊ တဲး ဘေ ကော ဖဲ။

2 အုဝ် နာင် ပီ ဘော ဟဲ့ ပွိုန် ဒီ အိတ် မိူဝ်၊ နဝ်း အုဝ် ယီ တူ အိတ်။ အုဝ် ဘော မ့ဘာဝ် ပါဝ် ပီ ရွက့် အုဝ် ဟဲ့ တး ဒွယ် မာလုဝ်း တဝ်း၊ “အိုယ် မဲ ဝါ အီ မုး ပါဝ် ပီ ရွက့် အုဝ်၊ မဲ နာင် ဟဲ့ စှိတ် ကာဆဝ်၊ အာဝ် မိုဝ်း ဒူင် နဲ ဟဲ့ ပီ မာဘ့လူယ်။ တဲး အုဝ် ပွိုန် ဒီ ဟာဝ် ဒူင် ကွယ် မဲ။ ဂိန့် အုဝ် ဟဲ့ အမ် ည ဒီ အိုမ် ဒီငါန်။ ကူပ် ဟဲ့ ဟာဝ် အုဝ် ခဲင် မှိုဝ် ဟိုက် ဂိန့် အုဝ် မိူဝ် ဟဲ့ ဒီ နှိပ်။”

3 အုဝ် ဟဲ့ ဟွတ့် ဘုတ့် လေး ခြိုင် ပီ တာ အုဝ်၊ အုဝ် တူ ပွိုန် ဝီ စှိုပ်။ အုဝ် မိူဝ် ဟဲ့ ဟွတ့် ဘာယ် ပ့လဝ် အုဝ်၊ အာဝ် ပွိုန် တဲး န့ ဝီ ကာဒိး။

4 ပါဝ် ပီ ရွက့် အုဝ် ဟဲ့ ဒိုဝ်း ဒဲ အန် တဝ်း ဒီ စူက် လိုပ် ခဲင် မာလုဝ်း ဝီ ဝိုဝ်း ဆဲ အန်။ ဘာင် နဝ်း အုဝ် မိူဝ် ဟဲ့ တာ တိုက် ကာဆဝ်။

5 အုဝ် မိူဝ် တဝ်း ဒီ ဟာဝ် ဝိုဝ်း မာလုဝ်း ဒွါ ဒီ ပါဝ် ပီ ရွက့် အုဝ် တီ။ ဒဲ အုဝ် မိူဝ် ဟဲ့ ဘဲ နာမန် ဒဝ် မောရာ။ နာမန် ဒဝ် မောရာ အီ ဒိုက် ဒီ ကာနူ အုဝ် ဘော ဝီ စွတ် ဒီ ဆဲ မာလုဝ်း ဒေါ ပါ အုဝ်။

6 အုဝ် ဘော ဝိုဝ်း မာလုဝ်း ဒွါ ဒီ အန်၊ အုဝ် ယီ တူ ယိုဝ် အန်။ အန် ဟဲ့ ဟွတ့် ဝီ ဟြာယ်။ ဒေါ အန် တီ နဝ်း အုဝ် ဘော ဒီလှး န့စမ် ကူပ် ဟဲ့ ဝီ ကာဘတ် ဟာဝ် အန်။ အုဝ် ဝီ ဒဲ့ အန် မိူဝ်၊ အန် တူ အိုဝ် ဂြုဝ်း အုဝ်။

7 ဂေ ဒူအီ အီ ဘ်ု မိူင် အီ ဟာဝ် ဝိဝ် ဟာဝ် ဝေန့် ခဲင် မိူင် ဘော ကာတုန့် အုဝ်၊ ဂေ ဘော မး ကာဆဝ် အုဝ်၊ တဲး အုဝ် ကော ဒိမ် ဘော ဒုဝ်။ ဂေ ဒူအီ အီ ဘ်ု ဒီ ရဲင် မိူင်၊ ဂေ ဘော ဝီ ဖာတ် ဒိုဝ်း ဆီတုဝ် တုန် အုဝ်။

8 အိုယ်၊ ဘေ ဒီဘျာ အီ ကွယ် ခဲင် မိူင် ယေရူဆာလဲမ်၊ အုဝ် ဆီ တဲး ဘေ ဒိူင် ကာဆဲန့် ဒီ အုဝ်။ ဆေ ဘေ ယိုဝ် ပါဝ် ပီ ရွက့် အုဝ် တီ၊ တဲး ဘေ ကာလာင် ဒီ အန် ခဲ့ ဟဲ့ ဒုက် ဟဲ့ ဆဝ် ဒီ နဝ်း အုဝ် ကူပ် ဟဲ့ ရွက့် ကာဆဝ် အုဝ် ဒီ အန်။

9 အိုယ် မဲ နာင် အီ ဟဲ့ စှိတ် လွှိုမ် အီဘိုန့် ဝီ ဟဝ် ဘောကာဂ့လျီတ်၊ ပါဝ် ပီ ရွက့် မဲ တီ၊ အန် ဟဲ့ စှိတ် လွှိုမ် အီ ဟဝ် ခဲ့ မှဝ်၊ မဲ ကော လုဝ် တဲး ယေ ဒိူင် ကာဆဲန့် ပါယ် တီ။း

10 ပါဝ် ပီ ရွက့် အုဝ် တီ၊ အာရိုပ် အန် စှိတ်၊ မိုဝ်း ဘော ပ့လူမ် ဂေ ဟဲန့်။ ဆေ န့ မိုဝ်း ဒူအီ အူ မှိုန့် ဝီ၊ အန် ဟဲ့ မွှိုမ် လွှိုမ် ဂေ ဒွန် အီ။

11 ဂိန့် အန် ပီ ခြိဝ် ဇဲတ်။ ဟိုက် ဂိန့် အန် မိူဝ် ဟေတ့် ကာဒန် ဘော ဝွင့် ပီ မာကာအ ဝွင့်။

12 ငါယ် အန် မိူဝ် စှိတ် ပီ ငါယ် မာဘ့လူယ် အီ ကွယ် ခူပ် ဘ့လဲင် အိုမ်။ အန် ပီ ဘော မာဘ့လူယ် လုယ် အီ ပီ အိုမ် ပူ စုး ခူပ် ဘ့လဲင် အိုမ် လှဲ။

13 ကာလာ အန် မိူဝ် မွှိုမ် ရွက့် ပီ ကာပိုမ် န့ကြိုဝ်း အုး ငှုန်။ ဆီပိုန့် အန် ဘော ပီ ဘုဝ်း ခမ်ဆွန် ဘော ဒဝ် မောရာ ဇဲတ်။

14 ဒဲ အန် ဘော ပီ ရွင့် ခြိဝ် အီ မိုဝ်း ကန်ဒဲ အီ ဟပ် ဆဲန့် ငျီန် ဝွင့်။ ဒုဝ် ဘူင့် အန် ဘော ပီ ပ့လဲ့ မာဆာင် အီ ဟဲ့ ဟပ် ဆဲန့် ခွင်။

15 ပ့လဝ် အန် ဘော ပီ ရွင့် မာဝ် လုယ် အီ ဟဲ့ ဝီ ဘ့လေး ဒဲင် ဒင် ခြိဝ်။ ပီ ပါယ် အာရိုပ် ဒုဝ် ဘူင့် အန် ဘော ပီ နွန် လေဘာနုန်။ ပီ ပါယ် အန် ဒီ မိုဝ်း ဆာရေ ဘော ပီ ဟေ အာရိတ်။

16 မူတ့် အန် မိူဝ် နပ် ဒီ ကာလာင် ဂြုဝ်း ငါမ် ဂြုဝ်း ဒါခိုယ်။ ဒုဝ် ဘူင့် အန် ဘော တူတ့်၊ န့ ဘော မွှိုမ် ရွက့် ကာဆဝ်။ အိုယ်၊ ဘေ ဒီဘျာ အီ ကွယ် မိူင် ယေရူဆာလဲမ်၊ ပါဝ် ပီ ကာလာင် အုဝ် တီ၊ အန် ဘော မုး ပါဝ် ပီ ရွက့် ပီ အိုင် အုဝ်။