1 မဲ နာင် ဟဲ့ စှိတ် ကာဆဝ်။ မဲ မုး ပါဝ် ပီ ရွက့် အုဝ် အီ ဟဲ့ စှိတ် ကာဆဝ်။ မဲ ပီ ဘော ဟဲ့ ဂွင့် ငါယ် မဲ၊ ဆေ အုဝ် ယွတ်၊ ငါယ် မဲ ဘော မွှိုမ် ရွက့် ပီ ငါယ် မာဘ့လူယ်။ ဟိုက် ဂိန့် မဲ မိူဝ် ဝွင့် ပီ ဖိုင် မာပဲ အီ လူင် ဒီ နွန် ဂီလေအာတ်။

2 ဟြာင် မဲ မိူဝ် လုယ် ဆီငါ ပီ ဖိုင် မာဘူ အီ ဟဲ့ ဟွတ့် ကပ် ဟိုက်၊ ဟဲ့ ဟွတ့် တာ အိုမ်။ န့ မိူဝ် တူ ဘျုဝ်း တူ ဟြာယ် ခေါ အူ ဘူင့်။

3 ဆီပိုန့် မဲ နာင် မိူဝ် ဟဲ့ ရေန့် ပီ ဝန် အီ ရေန့် ဂဲ။ မူတ့် မဲ မိူဝ် မွှိုမ် ရွက့်။ မဲ ပီ ဘော ဟဲ့ ကာမှုဝ့် နာ မဲ မိူဝ်၊ ကာလာ မဲ ယီ ခွင် ပီ ဘ့လေ မာစက် အီ ဟဲ့ ကာပ့လ ကာတဲ။

4 မဲင် မဲ နာင် မိူဝ် ဟဲ့ ဂ့လျီတ် လိူမ် ဆီချာ ပီ ဟုဝ် စာ ပီ ဆမ် အာဒါဝိတ် အီ ဟဲ့ မန် ဆီချာ ဘော မွှိုမ် ယွတ်။ မာကာဝဲ့ အီ ဟွယ် ဒီ မဲင် မဲ ဘော ပီ မင် ဂွင့် ပဲ့ ဟဲ့ ဟွယ် အုန် ဂေ ခဲင် ဟုဝ် တီ။ န့ မိုဝ်း ခြိုင် ကာဂုဝ်း ပီ တာ ဂေ ဒါ ဆိုက် အီ ကျ ကာဆဝ်။

5 ဘ့လေ ပူ မဲ နာင် အာ ဘူင့် မိူဝ် ဟဲ့ ပီ ဂွန် ရာပ် မာဇ အီ ဟြေတ့် ဒီ ဟူမ် ခဲင် အူင့် ပေတ့် အီ မိုဝ်း ဘုဝ်း ခမ်ဆွန်။

6 အာတ့် ဘ့လာင် ပြဲ၊ အာတ့် ပွုန် တူတ့် အပ် ဝွင့် အုဝ် ဒီ ကွယ် ဒူပ် မဲ အီ ပီ နွန် ကာညန် လေဘူန် ဘော မ့ပိုမ် ဒဝ် မောရာ။

7 အိုယ် မဲ ပါဝ် ပီ ရွက့် အုဝ်။ မဲ ဟဲ့ စှိတ် ဘော ဒုဝ်၊ အာဝ် မိုဝ်း ဒူင် ဒီ နဲ မာဆေ။

8 တဲး မဲ လူင် ဒီ နွန် လေဘာနုန်၊ တး ဒူပ် အုဝ်။ အိုယ် မဲ ပါဝ် ပီ ဝါင် အုန် အုဝ်၊ တဲး မဲ လေး တ နွန် လေဘာနုန် တီ၊ တး ဒူပ် အုဝ်။ တဲး မဲ လေး လူင် ဒီ နွန် အာမာနာ ဘော ဒီ နွန် ဇီရူန် အီ စိူဝ် ဘော နွန် ဟေရာမူန်။ လေး တး ခဲင် ကာဒဝ် ဒူင် ကွယ် မာခြင်ဆီ ဘော မာဒီဝါယ် ဆီဇိုမ်။

9 မဲ ဝါ အုဝ် ဘော ဒီဘျာ အီ ဒီ ခတ် ဒိုဝ်း အုဝ်၊ ပီ ပါယ် ငါယ် မဲ ဘော မာဘြိဝ် ဆဲန့် အီ ဟွယ် ဒီ မဲင် မဲ ဟဲ့ ဘေတ့် ဟာဝ် ကာဒူမ် အုဝ်။ အိုယ် မဲ ပါဝ် ပီ ရွက့် အုဝ်၊ မဲ ဟဲ့ ဘေတ့် ဟာဝ် ကာဒူမ် အုဝ်။

10 ပီ ပါယ် မဲ နာင် ဒီ ရွက့် အုဝ်၊ န့ ဟဲ့ လဝ့် ကာဆဝ် နဝ်း အုဝ်။ နဝ်း ရွက့် မဲ နာင် ဒီ အုဝ်၊ န့ ဟဲ့ မွှိုမ် လွှိုမ် အိုမ် မာငုန် အီ ဟဲ့ ကာဝ်ု န့ကြိုဝ်း မှီ ပီ ဒျီင် အုဝ်။ နာမန် အုး ငှုန် ပီ ဖဝ်း မဲ နာင် ဟဲ့ အုး ငှုန် လွှိုမ် န့ကြိုဝ်း အီ အုး ငှုန် ဒွန် မျုဝ်။

11 မူတ့် မဲ မိူဝ် ငါမ် ပီ ငါမ် မာဖျီန်။ ဆီဒ မဲ ဟဲ့ ပီ အိုမ် ပူ ဘော ငါမ် မာဖျီန် ဒီ အုဝ်။ အုး ငှုန် ခဲင် ခြိုင် ပီ တာ မဲ ပီ အုး ငှုန် ပြဲ ဒီ နွန် လေဘာနုန်။

12 အိုယ် မဲ ဝါ အုဝ် ဘော ဒီဘျာ အီ ဒီ ခတ် ဒိုဝ်း အုဝ်၊ မဲ ဟဲ့ ပီ ကာပိုမ် အီ ဟဲ့ မိုဝ်း လူင့် ရူပ် ဒွန် ဘ့လာက်။ ဟဲ့ ပီ ဘော အိုမ် ခိုမ် ဘော အိုမ် တုဝ်း အီ ဟဲ့ ကာဘိတ် ရိတ် ပီ တူ ပွိုန် တဝ့် အီ ဟဝ်။

13 ခဲင် ကာပိုမ် တီ ဟဲ့ မိုဝ်း ဘော ဟေ ဘ့လေ၊ မိုဝ်း ဘော ဘ့လေ မာစက် အီ ဆီငဲး အီ ငါမ်၊ မိုဝ်း ဘော ဘုဝ်း အီ ဘာ ခဲင် န့ကြိုဝ်း အုး ငှုန် အီ ကွယ် ခဲင် မာန် မာငုန် ဘော န့ကြိုဝ်း အုး ငှုန် အီ စိူဝ် နာဒူ။

14 ခဲင် န့ကြိုဝ်း အုး ငှုန် တီ၊ ဟဲ့ မိုဝ်း ဘော နာဒူ၊ မိုဝ်း ဘော ဒေန့် အီ လေး ခဲင် ဘုဝ်း ခါခူမ်၊ ဘော ကာဟူမ် ဘော ဂ့လဲ့ ဟေ မဲဇူင်ဟွမ်၊ ဘော လေဘူန် ဘဲန် မျုဝ် ဘဲန် မျုဝ်၊ ဒဝ် မောရာ၊ ဒဝ် အာလုဝ် ဘော န့ကြိုဝ်း အီ အုး ငှုန် လွှိုမ် ဒွန် မျုဝ်။ ဇိုဝ် တီ ဒွန် မျုဝ် ဟဲ့ ပီ တူတ့် မဲ နာင်။

15 မဲ နာင် မိူဝ် ဟဲ့ ပီ အိုမ် တုဝ်း ခဲင် ကာပိုမ် ဘော တုဝ်း အိုမ် အီ လှဲ လူင် ဒီ နွန် လေဘာနုန်။

16 အိုယ် ခုန် အီ တး ဘ့လာက် နာ ကွာ၊ တဲး မဲ န့ဆိုဝ်း။ အိုယ် ခုန် အီ ကွယ် ဘ့လာက် နာ တေတ့်၊ တဲး မဲ ဘုတ် တး ခဲင် ကာပိုမ် ပါဝ် အုဝ် တီ၊ တဲး အုး ငှုန် အန် ကော ကာလတ့်။ တဲး ပါဝ် ပီ ရွက့် အုဝ် တီ ဘော လိုပ် ဟာဝ် ခဲင် ကာပိုမ် အန် တီ။ တဲး အန် ဘော ဟာဝ် ဟူမ် ဘ့လေ အီ ဆီငဲး အီ ငါမ် ခဲင် ကာပိုမ် တီ။