1 ဒေါ အိတ် အုဝ် ဒဲင် ကာစှူင့် အိတ် အုဝ် ခဲင် မှိုဝ် အုဝ် ဘော ဒီကေန် ပါဝ် ပီ ရွက့် အုဝ်။ အုဝ် ဘော ကာပြာ ကာဆဝ် တဲး အန် တး၊ အန် ယီ တူ တး။

2 အုဝ် မိူဝ် ဝီ တဝ်း၊ “အုဝ် ဒီ ယိတ့် ဟာဝ် ခဲင် မိူင်၊ ဟာဝ် ဘော ဒူပ် န့တေန့် ဘော ဟြေတ့် ပါဝ် ပီ ရွက့် အုဝ် တီ ဒွန် ပ့လုဝ့်။” အုဝ် ယီ တူ ယိုဝ် အန်။

3 ဂေ ဒူအီ အီ ဘ်ု မိူင် အီ ဟာဝ် ဝိဝ် ဟာဝ် ဝေန့် ခဲင် မိူင်၊ ဂေ ဘော ကာတုန့် အုဝ်။ အုဝ် ဝီ ဒီမွှတ် ဂေ တဝ်း၊ “ဘေ ယိုဝ် ပါဝ် ပီ ရွက့် အုဝ် ဒီ နီ။း”

4 အုဝ် ဘော ကာလုဝ်း ဟာဝ် တ ကွယ် ဂေ တီ အီ စဲက်၊ အုဝ် ဘော ဟာဝ် ယိုဝ် ပါဝ် ပီ ရွက့် အုဝ်။ အုဝ် မိူဝ် ဟာဝ် ပါ ရိတ် အန်၊ တူ ဘ့လေး ဒေါ မှဝ်၊ တဲး အန် ကော ဇမ် ဒီ ကာင် မာ အုဝ် ဘော ဒိုဝ်း လိုပ် အန် ခဲင် အိတ် ဒူင် ဂွိုတ် အုဝ်။

5 အိုယ် ဘေ ဒီဘျာ အီ ကွယ် မိူင် ယေရူဆာလဲမ်၊ အုဝ် ဆီ တဲး ဘေ ဒိူင်၊ တဲး ဘော မာဇ ဂေ မာဘွုး ထူမ်။ ကွဲ့ တဲး ဘေ တး ပျာတ့် တး ဒီလဲ နဝ်း ရွက့် ယာယ်၊ တဲး ယာယ် ကော န့ဆိုဝ်း ရာင် ယာယ်။

6 အီ တး ခဲင် ပြဲ ကာဟဝ်း၊ အန် မုး အာဆေ။း အာရိုပ် အန် ဘော ပီ ရွင့် ဒက် ငဝ်။ အန် မိူဝ် အုး ငှုန် ပီ ကာညန် လေဘူန် ဘော ဒဝ် မောရာ ဘော န့ကြိုဝ်း အုး ငှုန် ပီ ယွင့် ဂေ ဒူအီ အီ ယွင့် ကြုဝ်။

7 ယွတ်၊ န့ မုး ကာစှူင့် ပီ ကာစှူင့် ခုန်ဒီခမ် အာဆာလုဝ်မုဝ်။ ဒါ ဆိုက် အန် အာဒါ ဒဝ် ဂိုဝ် ဝီ အီ ကျ လွှိုမ် ဒွန် အီ ကာတဲ ဒူအီ အာမျုဝ် အီဆာရေလ၊ ဂေ ဟဲ့ ဒူပ် အန်။

8 ဒါ ဆိုက် ဂေ တီ ဘောကာဂ့လျီတ် မုး တူတ့် ဒါ ဆိုက် အီ ကျ ဒီ ကာဂုဝ်း တာ မာပွါ့ လာင် ဂေ ဘ့လာ လျီး။ ဂေ ဘော နပ် ဒီ ဒိုဝ်း ဂူင့် မာပွါ့ လာင် ဂေ ဘော ဘ့လာ လျီး ဂေ၊ ဂွင့် ရဲ အာဖေ အာရေ ခဲင် မှိုဝ်။

9 ခုန်ဒီခမ် အာဆာလုဝ်မုဝ် ဟဲ့ ဘူင် ကာစှူင့် အန် အီ စှိတ် ကာဆဝ် တာ ဟေ ပီ ဒိုဝ်း တး ဂေ ဒီ နွန် လေဘာနုန်။

10 ရွင့် အန် ဒွန် ညွင့် ဟဲ့ မုး တူတ့် ရွိုန်။ ဒင် ရွင့် ဟဲ့ မုး တူတ့် ခြိဝ်။ ဒီ မာလာင် ဒူင် တုတ့် အန် ဟဲ့ ဒ ဘိက် ရေန့် ဂဲ။ နာ ခဲင် ဟုဝ် ဂေ အီဘိုန့် ခဲင် မိူင် ယေရူဆာလဲမ် ဟဲ့ ဘူင် တဲး န့ စှိတ်၊ တဲး န့ ဘျ ခဲ့ ရွက့် ဂေ ခုန်ဒီခမ်။

11 အိုယ် ဘေ ဒီဘျာ အီ ကွယ် ခဲင် မိူင် ယေရူဆာလဲမ်၊ တဲး ဘေ တး ယွတ် ခုန်ဒီခမ် တာင် အာဆာလုဝ်မုဝ် ဟဲ့ စှိုပ် မင်ဂိုမ် အန်။ မင်ဂိုမ် တီ ဘော မုး ပီ ဒွါ မာ အန် ဒီ အန် ဒေါ မုး ဆီငဲ ခတ် အန်။ ဆီငဲ တီ ဟဲ့ မုး ဆီငဲ အီ ဘျုဝ် ဒါခိုယ် ကာဆဝ် အာဒါ အန်။