အုဝ် ဘော ပီ ဘုဝ်း ပြဲ အီ ကွယ် ခူပ် ကာဒါယ် မိူင် လာစာရုန်။ အုဝ် ဘော ပီ ဘော ဘုဝ်း ခမ်ဆွန် အီ လတ့် ဒူပ် ဒီလယ့် ဒူပ် ဘ့လဲင်။

2 မဲ ပါဝ် ပီ ရွက့် အုဝ်၊ ဆေ အုဝ် ယိုဝ် မဲ ကွယ် ကာတဲ ဂေ ဒီဘျာ ဝီ ဟဝ်၊ မဲ ဟဲ့ စှိတ် လွှိုမ် ဂေ ပီ ဘုဝ်း ခမ်ဆွန် အီ လတ့် ကာတဲ ဒဝ် မာအာတ့်။

3 မဲ ပါဝ် ပီ ရွက့် အုဝ်၊ ဆေ အုဝ် ယိုဝ် မဲ ကွယ် ကာတဲ ဂေ ကာညူမ် ဝီ ဟဝ်၊ မဲ ဟဲ့ စှိတ် လွှိုမ် ဂေ။ မဲ ဟဲ့ ပီ ဟေ ဘ့လေ အီ လတ့် ကာတဲ ဟေ ပြဲ။ ဆေ အုဝ် တုတ့် ခြိုမ် ယာပ် ဟေ တီ၊ န့ ဘော ဘျုဝ် ဒါခိုယ်။ ဘ့လေ အန် မိူဝ် ငါမ် ဆီငဲး ကာဆဝ်။

4 ပါဝ် ပီ ရွက့် အုဝ် တီ ဒီ ယဲတ့် အုဝ် ဟာဝ် ခဲင် ဘ့လွယ် ဒူင် ဟျီင် ဂေ ဒူအီ ကိူန်။ ဆေ အန် ယွတ် အုဝ်၊ န့ ဘော ဘျ ခဲ့ ရွက့် အန် ဒီ အုဝ်။

5 အန် ဝီ ဒိုဝ်း ဒီခ့လဲပ် ဘ့လေ မာငုန်၊ တဲး အုဝ် ဟူမ်၊ တဲး န့ ဘော ဘဲန် ပ့လူမ် ဘဲန် ဟဲန့် ဒီ အုဝ်။ အန် ဝီ ဒိုဝ်း ဘော ဘ့လေ ဆီပိုမ် ဝီ ဟျီင် အုဝ်၊ တဲး အုဝ် ဝီ ကဲန်၊ ဝီ ဒါခိုယ်။ ခုဝ်၊ အုဝ် ဒီလှး န့စမ် ကူပ် ဟဲ့ ရွက့် ကာဆဝ် အုဝ်။

6 ဒဲ အန် ဘ့လာက် အာဂ ဘော ဘဲန် မွှန် အုဝ်။ ဒဲ အန် ဘ့လာက် အာအး ဘော ငျီမ် အုဝ်။

7 အိုယ် ဘေ ဒီဘျာ အီ ကွယ် မိူင် ယေရူဆာလဲမ်၊ အုဝ် ဆီ တဲး ဘေ ဒိူင်၊ တဲး ဘော မာဇ ဂေ မာဘွုး ထူမ်။ ကွဲ့ တဲး ဘေ တး ပျာတ့် တး ဒီလဲ နဝ်း ရွက့် ယာယ်၊ တဲး ယာယ် ကော န့ဆိုဝ်း ရာင် ယာယ်။

8 အုဝ် မိူဝ် ထူမ် ဂြန့် ပါဝ် ပီ ရွက့် အုဝ် ဘော ယိုဝ် အန် ဟဲ့ တး။ အန် ဘော ဒဲန် ကာလုဝ်း နွန် တာင် ဘော နွန် ဒီတဲတ်။

9 ပါဝ် ပီ ရွက့် ကာဆဝ် အုဝ် တီ၊ အန် ဘော ပီ မာဇ ဘော မာဘွုး အာလူင့်။ အန် ဘော ကွယ် နာ ရေတ့် ရဲင် ဘော ချွင် ဒီ ယွတ် လိုပ် ခဲင် ကာဒဝ် ပါတဲင်။ အန် ဘော ဘျ ဆီချာ ဒုဝ် အန် ဒီ ကာဒဝ် ပါတဲင် တီ။

10 ပါဝ် ပီ ရွက့် အုဝ် တီ ဟဲ့ ကာလာင် ဒီ အုဝ် တဝ်း၊ “အိုယ် မဲ နာင် ပီ ရွက့် ကာဆဝ် အုဝ်၊ တဲး မဲ ယိတ့်။ အိုယ် နာင် အီ ဟဲ့ စှိတ် ကာဆဝ်၊ တဲး မဲ ဒူပ် အုဝ်။

11 အာခြာဝ် ဂတ် မိူဝ် ဟဲ့ ဟွတ့် ပွုန်။ ဂ့လာယ် မိူဝ် ဟဲ့ ဟွတ့် ဟိတ်။

12 ဘုဝ်း ဒွန် ပ့လုဝ့် ဟဲ့ ကြဲ ဒီ ဘြး။ အာခြာဝ် ဒီ လုဝ် တဝ်း မှုဝ် ဂေ ကာအိုဝ် မိူဝ် ဟဲ့ ဟွတ့် ဇမ်။ ခဲင် မာန် ဂေ ခဲင် ဒူင် နာ ဟဲ့ ယိုဝ် မီ ဟမ် မာဘ့လူယ်။

13 ဘ့လေ ဒီပူ မိူဝ် ဟဲ့ ကြဲ ဒီ ကာဒွတ်။ ဘုဝ်း ဘ့လေ မာငုန် မိူဝ် ဟဲ့ အုး ငှုန်။ ပါယ် တီ မဲ ပါဝ် ပီ ရွက့် အုဝ်၊ တဲး မဲ ယိတ့်။ မဲ နာင် အီ စှိတ် ကာဆဝ်၊ တဲး မဲ ဒူပ် အုဝ်။”

14 အိုယ် မဲ နာင်၊ မဲ ဟဲ့ ပီ မာဘ့လူယ် အီ ချြီင် ဒုဝ် အန် ခဲင် ဒး ဒါအာင် မာဝ်။ တဲး အုဝ် ယိုဝ် နာ မဲ၊ ယိုဝ် ဘော ဂြုဝ်း ဒါခိုယ်၊ မဲင် ဒါခိုယ် မဲ။ ခုဝ်၊ မဲင် မဲ ဟဲ့ ဒါခိုယ် ဘော အာရိုပ် မဲ ဟဲ့ မွှိုမ် ယွတ်။

15 တဲး မဲ မှေတ့် မာဆုဝ် ပြဲ အီ ကွယ် ခဲင် မာန် မာငုန်။ န့ မုး ဘော မာဆုဝ် ပြဲ ဒီတဲတ် အီ နပ် ဒီ တဲး မာန် မာငုန် လိုဝ် စှိုမ် ဒေါ ဘုဝ်း အန်။

16 ပါဝ် ပီ ရွက့် အုဝ် တီ ဘော မုး ဒူင် ဘိုင် အုဝ်။ အုဝ် မိူဝ် မုး ဒူင် ဘိုင် အန်။ အန် ဘော ဟျီင် မာဘူ အန် ခဲင် အူင့် ပေတ့် အီ မိုဝ်း ဘုဝ်း ခမ်ဆွန်။

17 အိုယ် မဲ ပါဝ် ပီ ရွက့် အုဝ်၊ အာတ့် ဘ့လာင် ပြဲ၊ အာတ့် ဟြာယ် အပ် ဝွင့်၊ တဲး မဲ တး ဒူင် ကွယ် အုဝ်၊ တဲး မဲ ပီ မာဇ အာလူင့် ဘော ဂွန် မာဇ အာလူင့် အီ ပွိုန် ကာဘ့လဲပ် ဟာဝ် ဒဲင် နွန် ဒီအာင် ဒီအွုး။