1 အာနီ န့ ဘော ဝီ မုး ပဲ့ ဟဲ့ ကာလာင် ဇဝ်ဖြာ ဒီ အာအီဆာယ အီ မုး ဂွန် အာမူတ်။ အန် ဟဲ့ ကာလာင် ပီ ဒီ ဘူင် အန် ဒီ မိူင် ယူဒါ ဂါယ် မိူင် ယေရူဆာလဲမ်။ အန် ဟဲ့ တဝ်း၊

2 “ပန် ဒီ ဇမ် အာခြာဝ် အာတ့် ဒီ ဟွတ့် တူတ့်၊ န့ ဒီ မိုဝ်း နွန် ဒူင် ကွယ် ဟုဝ် ဇဝ်ဖြာ၊ ဂေ ဒူအီ ဒီ ရုဝ်ဆေ အန် လွှိုမ် နွန် ဒွန် နွန်။ န့ ပီ အန် ဒီ ဘော ဒီဂေတ့် ခဲ့ ကွယ် နွန် ဘောကာဂ့လျီတ်။ ခဲ့ ကွယ် ဒူအီ အာမျုဝ် ဟဝ် ဘောကာဂ့လျီတ် ဂေ ဒီ တး ဒူင် ကွယ် နွန် တီ။

3 ဂေ ဒီ ဘော တဝ်း၊ ‘တး၊ တဲး အေ ဟုဝ့် ဒီ နွန် အီ မုး ဒူင် ကြိုပ် ဒူအီ ဒီ ဇဝ်ဖြာ။ တဲး အေ ဟုဝ့် ဒီ ဟုဝ် ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။ အန် ဇဝ် ဒီ ဘော မာနုဝ် အေ၊ တဲး အေ နပ် ဒီ ဘူင် ပီ အိုင် အန်။’ ခုဝ်၊ ဂေ ဒူအီ ခဲင် မိူင် ယေရူဆာလဲမ်၊ ဂေ ဒီ ဘော နပ် ဒါရာ ဇဝ်ဖြာ။ ဂေ မိူဝ် ဒီ ဘော ထူမ် ဂြုဝ်း ဇဝ်ဖြာ။ ဟဲ့ ဟွတ့်၊ ဂေ ဒီ ဝီ ကာလာင် တဲး ဘော အီ ဟဝ် ကော နပ်။

4 အန် ဇဝ် ဒီ ဘော ဆုင်ဖျာတ် အာမူ ဂေ ဒူအီ အာမျုဝ် ဟဝ်။ အန် ဒီ ဘော မာနုဝ် ဒူအီ ဘဲန် မျုဝ် ဘဲန် မျုဝ်။ မာပွါ့ လာင် ဂေ ဂေ ဒီ ဘော ဝီ စိုမ် တဲး န့ ဘဲန် ဘ့လာ န့ထဲ။ ဘ့လာ လျီး ဂေ မိူဝ်၊ ဂေ ဒီ ဘော ဝီ စိုမ် တဲး န့ ဘဲန် န့ဝါတ့်။ ဒူအီ အူ မိူင် မိူဝ်၊ အာဝ် ဟူ ဝီ ကာဂုဝ်း ဒီ ဒူအီ ပေါ အူ မိူင်။ ဂေ မိူဝ် အာဝ် ဟူ လုဝ် ဟေန် ပီ ဒီ ပါယ် ဒီ လာယ် ကာဂုဝ်း။

5 အိုယ် ဘေ လှုက်လှာန် အာကူပ်၊ တး တဲး အေ ဘူင် ဒူပ် ဒါရာ ဇဝ်ဖြာ အီ ပီ ဘ့လာင် ပီ ဒွါ အန် ဇဝ် ဒီ အေ။

6 အိုယ် ဘေ လှုက်လှာန် အာကူပ်၊ ဘေ ဟဲ့ ဝဲန် ဂေ ဒူအီ အီ မုး အာမျုဝ် ဘေ။ ခုဝ်၊ ခဲင် မိူင် ဂေ၊ ဂေ ဟဲ့ ဒဲ့ တး ဒူအီ ကိူန် ခဲင် မိူင် ဘ့လာက် နာ လေး ဆီငဲ၊ တဲး ဂေ တး ဘူင် အာဒါတ်။ န့ မိူဝ် မိုဝ်း ဒူအီ ကိူန် အီ ဘဲန် ဒါ ဘေဒါင် ပီ ဂေ ဒူအီ ဖီလီထီ အီ ဟဲ့ ကွယ် နုဝ့် ခဲင် မိူင် ဂေ။ ခဲ့ ကွယ် ဂေ ဒူအီ ကိူန်၊ ဂေ ဟဲ့ ဝီ ဒူပ် ထုင်ဂျာမ် ဒူအီ အာမျုဝ် ဟဝ် ဂေ တီ။

7 ခဲင် မိူင် ဂေ တီ ဟဲ့ မိုဝ်း ရွိုန် ဂေ ခြိဝ် ကော နုဝ့်။ ကြုဝ်ကြာမ် ဂေ မိူဝ် ဟဲ့ ကိူန် ကာဆဝ် ကော ဟူ နပ် ခဲ့ ဘော မုး။ န့ မိူဝ် မိုဝ်း ဘော မင်ပြွင့် ဘော လက်လဝ် ပီ ပဝ့် ဒါ ဆိုက်။ ဂေ ဟဲ့ ကိူန် ကာဆဝ်၊ ကော ဟူ နပ် ခဲ့ ဘော ကိူန်။

8 ခဲင် မိူင် ဂေ တီ ဘော အာရိုပ် ရာင် ဟဲ့ နုဝ့် ဘော မိူင်။ ဂေ ဝီ ကြိုပ် ပီ ဘူင် ဂေ တာ ဒဲ ဂေ။

9 ခုဝ်၊ ဂေ ဒီ ဘော ဝီ စုဝ်း တျီမ်။ ဂေ ဒီ ဘော ဝီ ဆာယ် အီ။ မဲ ဇဝ်၊ ကွဲ့ တဲး မဲ ဂဝ်း ဝဲန် မှာပ် ဂေ တီ။

10 တဲး ဘေ တဝ် ဟာဝ် ချြီင် ခဲင် ကာဒဝ် မာဝ်။ တဲး ဘေ ဘော ဟာဝ် ချြီင် ခဲင် ကာဒဝ် ကာဒါယ်၊ တဲး ဘေ လွတ် ပန် ဒီ ရူ ကာဆဝ် ဇဝ်ဖြာ ဘော ပန် ဒီ ဘျ ဇဝ်ဖြာ အာဖုင် ဒင်ခုဝ် အန်။

11 ဂေ ဒူအီ အီ ပီဖုင် ဂေ၊ ဂေ ဒီ ဘော ဟြာယ် တူတ့်။ ဒူအီ အီ မိုဝ်း နဝ်း ပီခိုက် ဂေ ဒီ ဘော ဝီ စုဝ်း တျီမ်။ ပန် အန် တီ န့ မိုဝ်း မီ ဇဝ်ဖြာ အူ ကာဒင် ပီ ပွိုန် အေ အိူပ် မျုက်။

12 ဇဝ်ဖြာ အီ အိုပ် တူတ့် ဒွန် မျုဝ် ဟဲ့ အုန် အူ ဆီငဲ၊ တဲး အန် ဝဲန် တူတ့် ဂေ အီ မိုဝ်း အာဖုင် ဒင်ခုဝ် တာင် ဘော ဂေ အီ ပီဖုင် ဂေ၊ တဲး ဂေ ဝီ စုဝ်း တျီမ်။

13 အန် ဇဝ် ဒီ ဘော ဝဲန် တူတ့် ဂေ အီ ပီဖုင် ပီစာ ဂေ။ န့ ဘော မုး ဟေ အာရိတ် အီ ကွယ် ဒီ နွန် လေဘာနုန်၊ ဘော ဟေ ထေရေပ် အီ ဟဲ့ တာင် ဟဲ့ စာ အီ ကွယ် ဒီ မိူင် ဘာဆန်။

14 ဘော မုး ဘော နွန် တာင် နွန် စာ ဒွန် ပ့လုဝ့်

15 ဘော ခဲ့ ကွယ် ဟုဝ် စာ ဟုဝ် တာင် ဘော ရဲင် မိူင် အီ မန် ဆီချာ

16 ဘော ရိုဝ် ဆင်ဖုဝ် အီ တာင် ဘော အာမျုဝ် အီ စှိတ် ဒွန် မျုဝ်၊ ဇဝ်ဖြာ ဒီ တဲး န့ ဟြာယ် တူတ့် ဒွန် မျုဝ်။

17 ပန် အန် တီ ဂေ ဒူအီ အီ ပီဖုင် ဂေ၊ ဂေ ဒီ ဝီ စုဝ်း ဒူင် တျီမ်။ ဒူအီ အီ ပီခိုက်၊ ဂေ လုဝ် ဝီ ဂူမ် အီ။ ဂေ ဒီ ဝီ အိူပ် မျုက် မီ ဇဝ်ဖြာ အူ ကာဒင်။

18 ခဲ့ ကွယ် အာရိုပ် ရာင်၊ ဂေ ဒီ ဟြာယ် တူတ့် ဘောကာဂ့လျီတ်။

19 ပန် ဒီ တး လူင် အန် ဇဝ် ကာဒါယ် ဒီ ဒီယုး ဒီယေန့်၊ ဂေ ဒူအီ ဒီ ဘော တဝ် ဟာဝ် ချြီင် ဂေ ခဲင် ကာဒဝ် မာဝ် ဘော ခဲင် ကာဒဝ် ဒါအာင်။ ဂေ ဒီ ဘော ဟာဝ် ချြီင် ဂေ ဘော ခဲင် ကာဒဝ် ကာဒါယ် ကူပ် ယုဝ် ကာဆဝ် ဂေ ဇဝ်ဖြာ ဘော ကူပ် ဟဲ့ ဘျ ဇဝ်ဖြာ အာဖုင် ဒင်ခုဝ် အန် ဘော အာရူင် ဘ့လာင် အန်။

20 ဆေ ဟီ ဇမ် ဆီငဲ တီ၊ ဂေ ဒူအီ ဒီ ဘော ဒိုဝ်း အာရိုပ် ရာင် ပီ ဘူင် ဂေ။ ဘော မုး ရွိုန်၊ ဘော မုး ခြိဝ် အာဝ် တဝ်း၊ ဂေ ဒီ ဘော ဝီ ဝဲန် အာရိုပ် ဂေ တီ ဒူင် ကွယ် မာဘုယ် ဂေ မာကာလ။

21 ပန် ဒီ တး လူင် ဇဝ်ဖြာ ကာဒါယ် ဒီ ဒီယုး ဒီယေန့်၊ ဂေ ဒီ ဘော တဝ် ဟာဝ် ချြီင် ဂေ ခဲင် ကာအူင့် နွန် ဘော ခဲင် ဒး မာဝ် ကူပ် ဟဲ့ ယုဝ် ကာဆဝ် ဂေ ဇဝ်ဖြာ ဘော ကူပ် ဟဲ့ ဘျ ဇဝ်ဖြာ အာဖုင် ဒင်ခုဝ် အန် ဘော အာရူင် ဘ့လာင် အန်။

22 ကွဲ့ တဲး ဘေ နဝ်း တာင် ဒီ ဒူအီ အီ လုဝ် ဟိုဝ်း ဖွိုမ် ဒီ ဂုင်မုး ဂေ။ ခုဝ်၊ ဂေ တူ မိုဝ်း ဒီခုဝ် မာဆေ။”