1 အာအီဆာယ ပီ ဝီ ကာလာင် တဝ်း၊ “ဘ်ု ဘေ ယွတ်၊ န့ ဒီ ဘဲန် ပါယ် နီ။ ဇဝ်ဖြာ အီ အိုပ် တူတ့် ဒွန် မျုဝ် ဒီ ပျာတ့် ဝဲန် တူတ့် ဒွန် မျုဝ် အီ မုး ဒူင် ဘိုင် ဒူင် နဝ်း တာင် ဂေ ဒူအီ။ ဂေ ဒူအီ အီ ကွယ် ခဲင် မိူင် ယေရူဆာလဲမ် ဘော ခဲင် မိူင် ယူဒါ ဘော မိူင်၊ ဂေ ဒီ ဘော စှိုမ် တူတ့် ဒွန် မျုဝ်။ ခဲ့ ကွယ် ပီ ဒီ ဟူမ် ပီ ဒီ ဒျီင် ဂေ၊ အန် ဇဝ် ဒီ ပျာတ့် ဝဲန် တူတ့် ဘောကာဂ့လျီတ်။

2 ဒူအီ ဂေ အီ ကျ ဒီ ကာဂုဝ်း ဘော ဂေ ဒါ ဆိုက် ဘော ဒါ တာင် အီ ဆုင်ဖျာတ် ဒါရာ ဘော ဒါ အီ ဘျာန် ဂြုဝ်း ဇဝ်ဖြာ ဘော ဒါ ဆာရာ အီ နပ် ဒီ မဲန် ဘေဒါင် ဘော ဒါ တာင် အီ အိုပ် ဂေ၊ အာဝ် ဟူ ပွိုန် ဒီ ဘိုင် ဇဝ်ဖြာ။

3 န့ ဘော မုး ဘော ဒါ ဘုဝ် အီ အိုပ် ဒါ ဆိုက် ဖန် ဂိုဝ် ဝီ ဘော ခုန် ခဲင် ရဝ် ခဲင် ကာင် ဂေ ဘော ဒါ တာင် အီ ဒွါ အာကျာမ် အာငျာန် ဒီ ဂေ ဘော ဒူအီ အီ လှဲဝ် ဒီ ဘူင် ဘဲန် မျုဝ် ဘဲန် မျုဝ် ဘော ဂေ ဒူအီ အီ နပ် ဒီ ဘူင် မျလှယ့် အီ မွှိုမ် အာမ်၊ အန် ဇဝ် ဒီ ပျာတ့် ဝဲန် တူတ့် ဒွန် အီ။

4 ဇဝ်ဖြာ ဒီ ဝီ တဲး ဂွန် အီမာယ် အီ ဆီ နှိုမ် ဝီ အိုပ် ဒူအီ ဂေ တီ။ ဘော ဒူအီ အီ ဆီ မိုဝ်း နဝ်း ဂွန်၊ ဂေ ဒီ ဝီ ဘဲန် ဒါ ကာညာ ဂေ။

5 ဂေ ဒူအီ ဒွန် အီ ဘော လာယ် ခါနှာပ် ကာတဲ ဂေ နင်ဂန်။ ဂေ ဒီ ဘော ခါနှာပ် ဂိုက် ဂေ အီ ကွယ် ကာတတ် ဂေ။ ဂွန် အီ ဆီ နှိုမ် အာဝ် ဟူ ရီမာတ် ဒူအီ ကတ် ဒူအီ ဂဲ။ ဒူအီ အီ တူ မိုဝ်း ဒီခုဝ် အာဝ် ဟူ ရုဝ်ဆေ ဒူအီ အီ မိုဝ်း ဆာရေ။”

6 န့ ဒီ ဘော မိုဝ်း ဒူအီ အာ ဝီ ခဲင် အူ န့ဟူမ်၊ ဂေ ဒီ ဘော ဝီ ရဝ်း ဒူအီ ခဲင် န့ဟူမ် ဂုန့် ဂေ တဝ်း၊ “မဲ ဆီ မိုဝ်း ဒီ တာ ခြိုင်၊ တဲး မဲ ဝီ ဘဲန် ဒါ တာင် အီ အိုပ် ယေ အီ ဟဲ့ စှိုမ် တူတ့် နီ။”

7 မာလဲ၊ ဒူအီ ဝီ တွိုန် ဒီ ဝီ တဝ်း ဒီ ဂေ၊ “အာဝ် မုး ပါယ် တီ။ အုဝ် မိူဝ် တူ ပွိုန် စွယ် ဘေ။ အုဝ် မိူဝ် တူ မိုဝ်း ပီ ဒီ ဟူမ်၊ တူ မိုဝ်း ခြိုင် ပီ ဒီ တာ။ အာဝ် လုဝ် တဲး အုဝ် ဘဲန် ဒါ တာင် ဘေ။”

8 ဂေ ဒီ တဝ်း ပါယ် တီ ခုဝ်၊ ဂေ ဒူအီ ခဲင် မိူင် ယေရူဆာလဲမ် လုဝ် ခမ် ဒုက်။ မိူင် ယူဒါ ဒီ ကေး တူတ့်။ ခုဝ်၊ ဘော ပီ ကာလာင် ဂေ ဘော ပီ ဘူင် ဂေ ဟဲ့ ကာဘး ဒီ ဇဝ်ဖြာ။ ဂေ ဟဲ့ နဲန ဇဝ်ဖြာ အီ မိုဝ်း အာဖုင် ဒင်ခုဝ် တာင်။

9 ပီ ဘူင် ဂေ မိုဝ်း ဒူင် ရွက့် ဒူင် ဇွင့်။ ပါယ် တီ န့ လိုဝ်း ဆီချာ လွင် မှာပ် ဂေ။ ဂေ ဘူင် အီ တူ မွှိုမ်၊ တဲး ဒွန် အီ ပွိုန် ဒီ ယိုဝ်။ ခုဝ်၊ န့ ဟဲ့ ပီ ပီ ဘူင် ဂေ ဒူအီ ခဲင် မိူင် ဆုဝ်ဒူမ် တွိုန်။ ဂေ ဒီ ဘော ဝီ ဇမ် ဒုက် တာင်။ ဂေ ဟဲ့ ဘူင် အီ တူ ဘွတ် အီ တူ မွှိုမ်၊ တဲး န့ ဝီ ဘဲန် ဒုက် ဒီ ဒုဝ် ဘြိမ် ဂေ။

10 ဇဝ်ဖြာ ဟဲ့ စ်ု အုဝ် ကာလာင် ပါယ် နီ။ ဒူအီ နဝ်း ဆိူဝ် နဝ်း မှာန် ဂေ ဒီ ဘျုဝ် ဒါခိုယ်။ ခုဝ်၊ ဂေ ဒီ ဝီ ပွိုန် ဒီ ဘိုင် အာဂျိုဝ် ပီ ဘူင် ဂေ။

11 ဂေ ဒူအီ အီ တူ မွှိုမ် ဂေ ဒီ ဇမ် ဒုက် တာင်။ ဂေ ဒီ ဘော ဝီ ကာဒုး ဒီ ခမ် အီ တူ မွှိုမ် ဒီလူယ်။ နာ တူ မွှိုမ် ခဲ့ ပီ ဘူင် ဂေ ဒီ အီ ဟဝ်၊ ဂေ ဒီ ဝီ ခမ် တူတ့် ဒွန် မျုဝ်။

12 ဇဝ်ဖြာ ဟဲ့ တဝ်း၊ န့ ဒီ မိုဝ်း ဂေ ဂွန် ဒီရွယ် ဒီ ခါနှာပ် ဂေ ဒူအီ ပီ အိုပ် အန်။ ဘော အီဘိုန့် ဒီ ဝီ အိုပ် ဂေ။ အန် ဘော တဝ်း၊ “အိုယ် ဘေ ဒူအီ ပီ အိုပ် အုဝ်၊ ဒါ တာင် အီ ယဲတ့် ဘေ ဂေ ဒီ ဘူင် တဲး ဘေ ကာလိုပ်။ န့ ပီ ဂေ ဒီ ဘူင် တဲး န့တေန့် ပီ ဒီ ဒူပ် ဘေ ကာပျာတ့် လိုဝ်။

13 ဇဝ်ဖြာ ဟဲ့ တး ဇမ် ဒီ ဒူင် ဆုင်ဖျာတ် အန် အာမူ ဒူအီ။ အန် ဒီ ဒမ် မှာပ် ဒီ ဂေ ဒူအီ ပီ အိုပ် အန်။

14 အန် ဇဝ် စုး ဒီ ဆုင်ဖျာတ် အာမူ ဂေ ဒါ တာင် အီ အိုပ် အီ ယဲတ့် ဂေ ဒူအီ ပီ အိုပ် အန်။ အန် တဝ်း ဒီ ဂေ၊ ‘ဘေ ဟဲ့ ဖာတ် ဒိုဝ်း ဒီ ဟူမ် မာန် မာငုန် အီ။ ခဲင် ကာင် ဘေ မိူဝ်၊ ဟဲ့ နုဝ့် ကြုဝ်ကြာမ် ပဲ့ ဟဲ့ ဖာတ် ဟဲ့ ဒိုဝ်း ဘေ ဒီ ဒူအီ ဒုက် ဒူအီ ဂိန်။

15 ဘေ ယီ တူ ပွိုန် ခါနှာပ် ဒူအီ ပီ အိုပ် အုဝ်၊ ဘူင် တဲး န့ ပီ ဘေ ညဲတ့် ကာပျာတ့် ဂေ။ ဘေ ယီ တူ ပွိုန် ဘူင် နာ စာဝ် ဒီ ဒူအီ ဒုက် ဒူအီ ဂိန်၊ တဲး န့ ပီ ဘေ ဘူင် နာ ဂေ လိုဝ်။ အုဝ် ဇဝ်ဖြာ အီ မိုဝ်း ပွုန် တာင်၊ အုဝ် ဟဲ့ ကာလာင် ပါယ် တီ။’

16 ဇဝ်ဖြာ ပီ ဝီ တဝ်း၊ ‘ယွတ်၊ ဂေ အီဘိုန့် ခဲင် မိူင် ယေရူဆာလဲမ် ဟဲ့ ပီခိုက် ကာဆဝ် ဂေ။ ဂေ ဘော ငိုဝ်း ဂိန့် ဂေ ကော ပီ ဂိန့် မာအာဂူယ်။ ဂေ ဘော နပ် ဒီ ကာယပ် ဝိဝ် ကာယပ် ဝေန့် ငါယ် ဂေ။ ဂေ ဘော နပ် ဒီ ဇာပ် ဟာဝ် ကာဒျီ့၊ တဲး န့ လိုဝ်း ဂြန့် ဟိင် ပဲ့ ဟဲ့ စှိုပ် ဂေ ဒီ ပ့လဝ် ဂေ။ 17 မာလဲ၊ အုဝ် ဒီ ဒမ် မှာပ် ဒီ ဂေ အီဘိုန့် ခဲင် မိူင် ယေရူဆာလဲမ် တီ။ အုဝ် ဒီ တဲး ဂေ ဘဲန် ဂိန့် ဝ၊ ဘော ဂါ့ ဝဲန် ဟိုက် ဂိန့် ဂေ။’

18 ဆီငဲ အန် တီ ဇဝ်ဖြာ ဒီ ဒိုဝ်း ဝဲန် ဟိင် ပီ စှိုပ် ဂေ ဒီ ပ့လဝ် ဂေ ဘော ကာမဲ့ ဆေန့် ဘော ဂင်ခုဝ် ဂေ။ 19 အန် ဒီ ဒိုဝ်း ဝဲန် ဘော ဘီဟျဝ့် ဂေ ဂန်ဒဲ ဘော ကာမဲ့ လာယ် ဂေ 20 ဘော မာဂိန့် ပီ တာ ဂေ ဘော ဝန် ခြိဝ် ဘော ဆာဘြွတ် ပီ ပက် ဂေ ဒီ ညွယ် ဂေ ဘော အဲပ် ဆီနမ် အုး ငှုန် ဘော လာဘ့လွယ် ဂေ 21 ဘော ဆီကာနူ ပီ ဒွက် ဂေ ဇိုမ် ဘော ခြိဝ် ပီ စှိုပ် ဂေ ဒီ ဂုင်မုး ဂေ 22 ဘော ဆီတုဝ် ဂေ အီ စှိတ် ကာဆဝ် ဘော ဘိက် ပီ ကန် ဂေ ဘော ဆီတုဝ် တုန် ပီ တာ ဂေ ဘော ဟူ ရွိုန် ဂေ 23 ဘော အဲပ် ဇမ် ဂေ ဘော ဘိက် ကာတမ် လုယ်၊ ဘော ဟိုပ် ဘော ကာမဲ့ ပီ ကာမှုဝ့် ဂေ နာ ဂေ၊ အန် ဇဝ် ဒီ ဝဲန် တူတ့် ဇိုဝ် တီ။

24 ဒူင် ဒွိုမ် အုး ငှုန် ဒီ ဝီ အုး အမ်၊ အုး မာလိုန့်။ ဂေ အီ ဒွိုမ် မိုဝ်း ဒီ တာ နွင့်ရွတ်၊ ဂေ ဒီ ဝီ ကာဒုး ဒီ ပက် တာ ပ့လိုင်။ ဂေ အီ မိုဝ်း ဟိုက် ဂိန့် အီ ပွိုန် စး ပွိုန် ပက် ဒီ ဝီ ဘဲန် ဂိန့် ဂ့လ၊ ဂိန့် လိူမ်။ ဂေ အီ ဒွိုမ် တာ ခြိုင် စှိတ်၊ ခြိုင် ချုဝ် ဒီ ဝီ ကာဒုး ဒီ တာ ခြိုင် စာန်။ ဂေ အီ မိုဝ်း နာ ဘွတ် နာ မွှိုမ် ဒွန် မျုဝ်၊ န့ ဒီ ဝီ ဘဲန် အီ မွှိုမ် ဆာယ် ဒီ ဂေ။

25 အိုယ် မဲ မိူင် ယူဒါ ဘော မိူင် ယေရူဆာလဲမ်၊ အီမာယ် မဲ အီ ကွယ် ခဲင် မိူင်၊ ဂေ ဒီ ဘော ယမ် ဒီ မာပွါ့ လာင်။ ဒါ ဆိုက် မဲ အီ မိုဝ်း ပ့လူမ် တာင် ဒီ ဘော ယမ် ဒေါ ကာဂုဝ်း ဂေ။

26 မိူင် တာင် တီ ဒီ ဘော ယေန် ဘော ငွင့်၊ အာဝ် ဟူ မိုဝ်း ဒူအီ။ ခုဝ်၊ န့ ပီ မာလုဝ်း မိူင် ဂေ ဒီ ဘော ငှုန် ဘော က့လိုဝ် ဘော ယာမ်။ န့ ပီ အီဘိုန့် အီ ဟဲ့ ဂ့လ၊ ဝီ တုတ့် ဒဲင် ကာဒါယ်။