ဒေါ အန် တီ အီဘိုန့် ဘူ ဝီ ဂေ ဒီ ဘော ကာဖြူမ် ဒီ ဒိုဝ်း အီမာယ် အူ ဝီ။ ဂေ ဒီ ဘော တဝ်း ဒီ အန်၊ ‘ယေ ဒီ ဟြေတ့် ဒီ ဟူမ် ရာင် ယေ။ ယေ ဒီ ဟြေတ့် ခြိုင် တာ ရာင် ယေ။ မာလဲ၊ ယေ မှာန့် တဲး ယေ ပွိုန် ဒီ တဝ်း၊ မဲ မုး အီမာယ် ယေ၊ ကွဲ့ တဲး ယေ လုဝ် ဆာယ် အီ ကူပ် မုး ယေ ဒီဘျာ ဘ့လုယ်။’” အာအီဆာယ ဟဲ့ တဝ်း ပါယ် တီ။

2 ဟဲ့ ဟွတ့်၊ အာအီဆာယ ပီ ဝီ တဝ်း၊ “ဒေါ အန် တီ ဇဝ်ဖြာ ဒီ ဝီ ဘူင် တဲး န့ ဝီ မွှိုမ်၊ တဲး န့ ဝီ စှိတ် ဒွန် မျုဝ်။ ပီ ဒီ ဘူင် အန် တီ၊ န့ ပီ အန် ဝီ တဲး ရာ ဟေ ပဲ့ ဟဲ့ ဒွိုမ် ဒဲပ် ဝဲန် အန် ဝီ န့လုဝ်း ဝီ တာင်။ ခဲ့ ဆီ ကွယ် ဂေ ဒူအီ အီဆာရေလ ဘောကာဂ့လျီတ်၊ ဂေ ဒီ ဘော မိုဝ်း နဝ်း တာင် နဝ်း ဒါခိုယ် ကူပ် ဟဲ့ ဝီ မိုဝ်း ငှုဝ် ဂေ ဘ့လေ ကိူန် ခဲင် မိူင် ဂေ။ 3 အီ မုး ဂေ အီ လွတ် ယမ် အီ ကွယ် ခဲင် မိူင် ယေရူဆာလဲမ်၊ အီ ဟဝ် ဒီ ဘော တဝ်း၊ ဂေ ဘောကာဂ့လျီတ် မုး ဒူအီ အီ ဆီငါ ဘွတ်။ 4 ဇဝ်ဖြာ ဒီ ဒမ် မှာပ် ဒီ ဂေ ဒူအီ ခဲင် မိူင် ယေရူဆာလဲမ် ဘော ဝဲန် ဂေ အီ တူ မွှိုမ် ဒွန် မျုဝ် ခဲင် မိူင်၊ တဲး န့ ပီ အန် ဒိုဝ်း တူတ့် အီ တူ မွှိုမ်၊ ဝီ ဒုဝ့် ခဲင် ငဝ်။ န့ ဘော ပီ အန် ဇဝ် ဒီ ဘာယ် ဝဲန် အီ ကာဒါတ့် ဒီ အီဘိုန့် အီ ကွယ် ခဲင် မိူင် ယေရူဆာလဲမ် ဘော ဘာယ် ဝဲန် နှာမ် အီ ဟဲ့ ဒိုက် ဒီ ဂေ ဒူအီ အီ ကွယ် ခဲင် မိူင် တီ။ 5 ဒေါ အန် တီ ဒေါ ကာတဲ ဆီငဲ၊ ဇဝ်ဖြာ တဲး န့အု ပ့လိုက် နွန် ဇီအူန် ဘော ဂေ ဒူအီ အီ တး ကွယ် ကာဇု ဒီ တီ။ ခဲင် မှိုဝ် အန် ဇဝ် ဒီ တဲး န့ ဝီ မိုဝ်း ပ့လဲ့ ငဝ်၊ တဲး န့ ဘ့လာင် ဒီ ဂေ။ နာ ဒဲင် အီ မွှိုမ် အီ စှိတ် ပဲ့ ဟဲ့ ဘူင် ဇဝ်ဖြာ ဒွန် မျုဝ် တွိုန် အန် တဲး န့ မိုဝ်း အီ ပ့လိုက်၊ အီ ဂွင့် ရဲ ဂေ။ 6 ဒေါ ကာတဲ ဆီငဲ န့ ဒီ ပီ ထိုပ် ဘော ယာပ် ဟေ အီ အပ် ဒီ ဂေ။ န့ ဘော ပီ ဘော ဒူင် ဒီ ပွိုန် ချြီင် ဒေါ မိုဝ်း ခုန် တာင် ဘော ဂ့လာယ် တာင်။” ခဲ့ တီ အာအီဆာယ ဟဲ့ ကာလာင် ဒီ ဂေ ဒါ တာင် အီ အိုပ် ဂေ ဒူအီ အာယူဒါ။