1 အာအီဆာယ ပီ ဝီ တဝ်း၊ “တဲး ဘေ ထူမ် မှုဝ် ပီ တဝ်း အုဝ် လွင် ဂိုက် ပီ ရွက့် အုဝ် ဘော လွင် မာန် မာငုန် အန်။ ‘ဂိုက် ပီ ရွက့် အုဝ် ဟဲ့ မိုဝ်း ဒီ ဆမ် အုန် ဟေ မာငုန် ဒူင် မုး ကာဒါယ် ဘွတ် ကာဒါယ် မွှိုမ်။

2 အန် မိူဝ် ဟဲ့ လုဝ့် ဟဲ့ စှဝ်၊ တဲး ကာဒါယ် ဖုန်။ အန် ဟဲ့ ထွန် ဝဲန် ဘော မာဝ် ဘော ဆမ် ဟေ မာငုန် အီ ဘွတ် အီ မွှိုမ် လွှိုမ် မျုဝ် ဟဝ်။ အန် ပီ ဝီ ဆမ် အုန် ဘော ကာစှူင့် စာ အီ ဘ်ု မာန် တီ။ အန် ပီ ဝီ ဘူင် အုန် ဘော ဒူင် ဒီ ကြိတ် ဘ့လေ မာငုန် တီ။ ဟဲ့ ဟွတ့်၊ အန် ဘော ဘ်ု တဲး န့ ကော ဇမ် ပန် ဒီ ဆိန် ဘ့လေ မာငုန်။ မာလဲ၊ ဘ့လေ မာငုန် တီ ဘော ဆိန်၊ ယီ ဝီ ပြာင် ကာဆဝ်၊ အာဝ် မိုဝ်း ဒီခုဝ် မာဆေ။’

3 ဟဲ့ ဟွတ့် ပါယ် တီ ဂိုက် ပီ ရွက့် အုဝ် တွိုန် ဝီ တဝ်း၊ ‘အိုယ် ဘေ ဒူအီ အီ ကွယ် ခဲင် မိူင် ယေရူဆာလဲမ် ဘော ဘေ အီ ကွယ် ခဲင် မိူင် ယူဒါ၊ မှာန့် တဲး ဘေ ဆုင်ဖျာတ် လွင် မာန် မာငုန် တီ ဘော လွင် ပဲ့ ဟဲ့ ဘူင် အုဝ်။

4 န့ ဆီ မိုဝ်း မျုဝ် မှဝ် ပီ လုဝ် ဘူင် အုဝ် ခဲင် မာန် မာငုန် တီ၊ ပီ ညှမ် ပွိုန် အုဝ် ဒီ ဘူင်။း မှဝ် န့ ပါယ် ပီ ဝီ ဘ့လေ မာန် မာငုန် အုဝ် မီ ဘ့လေ ပြာင်။း မှဝ် န့ ပါယ် ပီ တူ လေး အန် ဘ့လေ ဆီငဲး ပီ နှဝ့် န့ဒဝ့် အုဝ်။း

5 အုဝ် ဒီ ခဲ ဒီ ဘေ လွင် ပီ ဒီ ဘူင် အုဝ်။ အုဝ် ဒီ ပျာတ့် ဝဲန် လူင့် ဝဲင် မာန် အုဝ် တီ။ အုဝ် ဒီ ရိုတ့် ဝဲန် ဘော မာအာတ့် အီ ဟဲ့ ဆမ် ဘဲန် လူင့်၊ ဝီ တဲး မာဒုဝ် ပြဲ ဝီ တး ဟူမ် တး ညဲတ့် မာန် မာငုန် တီ။

6 အုဝ် ဒီ ဘ့လေး တဲး အန် ဘဲန် မာန် ရာမ်။ အာဝ် ဟူ မိုဝ်း အာဆေ အီ ဒီ လုဝ့် ဒီ ဒုဝ်း အန်။ န့ ဒီ ဝီ လတ့် မီ ဒဝ် မာအာတ့် ဒွန် မျုဝ် နာ ခဲင်။ အုဝ် ဒီ ဘော စ်ု န့အု ကွဲ့ တဲး ဂ့လာယ် စုဝ်း ဒဲင် မာန် တီ။’ ဂိုက် အုဝ် ဟဲ့ ကာလာင် ပါယ် တီ။”

7 အုဝ် ယီ တဝ်း ဒီ ဘေ၊ ဂေ ဒူအီ အီဆာရေလ၊ ဂေ ပီ မာန် မာငုန် ပီ ဆမ် ဇဝ်ဖြာ အီ အိုပ် တူတ့် ဒွန် မျုဝ်။ ဂေ ဒူအီ အာယူဒါ ဂေ ဘော ပီ ဟေ မာငုန် ပီ ဆမ် အုန် အန် ဇဝ် တဲး နဝ်း အန် ဒါခိုယ်။ အန် ဇဝ် ဟဲ့ ထာင် ဂေ ဒီ ဘူင် ဆိူဝ် ဆိူဝ် မှာန် မှာန်။ မာလဲ၊ ဂေ ယီ ဝီ ငဝ်း ယမ် အာဆာက် အီ ဟဝ်။ အန် ဇဝ် မိူဝ် ဟဲ့ ထာင် ဂေ ဒီ ဘူင် ဒူပ် ဒါရာ။ မာလဲ၊ အန် ဝီ ယိုဝ် အီ ယာမ် ကူပ် ဟဲ့ ခါနှာပ် အီ ဒီ ဂေ။

8 ဘေ ဒူအီ အီ စိုဝ်း ကာင် စိုဝ်း ဒူင် နာ အီ ဟဝ်၊ တဲး ဘေ ဝဲ မိုဝ်း ကာပွါ၊ ကွဲ့ ဟူ တဲး န့ ဆီ မိုဝ်း ကာဒါယ် ဒူင် ဒီ ကွယ် အီ ဟဝ်၊ တဲး န့ ဂိတ် မီ ဘေ အီ ဒီ ကွယ် ခဲင် မိူင်၊ ဘေ ဒီ ဇမ် ဒုက် တာင်။

9 အုဝ် ဟဲ့ ယိုဝ် ဇဝ်ဖြာ အီ အိုပ် တူတ့် ဒွန် မျုဝ် တဝ်း၊ “အုဝ် တဝ်း အာခ်ု ဒီ ဘေ၊ ကာင် ဘေ အီ ဟဲ့ တာင်၊ ဂေ ဘောကာဂ့လျီတ် ဒီ လိုဝ် တူတ့်။ ဟုဝ် ဘေ အီ ဟဲ့ စှိတ်၊ ဂေ ဒီ ဘော ရာမ် လိုဝ် တူတ့်၊ အာဝ် ဟူ မိုဝ်း အီ ကွယ် နာ ခဲင်။

10 မာန် မာငုန် အီ ဟဲ့ ကာဝဝ်း ခဲ့ ပီ ထဲ မာမက် အူ ဂူ အာဒါ ဂိုဝ် ဆီငဲ၊ န့ ဒီ ဘော လေး အိုမ် မာငုန် အူ ပါတ်။^a ငှုဝ် ပီ ဆမ် ဂေ အာဒါ အူ အုဝ်မာ၊^b န့ ဒီ ဝီ ပွိုန် အူ အေဖာ။” ^c ဇဝ်ဖြာ ဟဲ့ တဝ်း ပါယ် တီ။

11 ဂေ ဒူအီ အီ ယိတ့် ဒျီင် ပဝ်း ဆိန့် ဆိန့်ဝး စေဝ် ပီ ဝီ ဒျီင် တဲး ကော ဇမ် ခဲင် မှိုဝ်၊ တဲး ဂေ ကော ယိုတ့် ကာဆဝ်၊ ဂေ ဒီ ဇမ် ဒုက် တာင်။

12 ဂေ ဒီ ဘော ဘူင် ဘ့လွယ် ဘော နပ် ဒီ ဘး ဒိင် ဘဲန် မျုဝ် ဘဲန် မျုဝ်။ ဂေ ဘော က်ု ဂြိုင်၊ ဘုတ် ဝဝ် ဘော ဒျီင် အိုမ် မာငုန်။ မာလဲ၊ ဂေ ယီ တူ ဝီ နပ် မာဆေ လွင် ပီ ဘူင် ဇဝ်ဖြာ။ ဂေ မိူဝ် တူ ရုဝ်ဆေ ပဲ့ ဟဲ့ ဘ့လေး အုန် အန် ဇဝ်။

13 ကူပ် န့ ပါယ် တီ ဂေ ဒူအီ ပီ အိုပ် အုဝ် လုဝ် ခမ် အီ ဟဝ် မှေတ့် ဟာဝ် ဂေ။ ဂေ ဒါ တာင် ဒီ ဘော ယမ် ကူပ် အေတ့် ဂေ ပီ ဒီ ဟူမ်။ ဂေ ဒူအီ ရဝ် ဒူအီ ကာင် ဒီ ဘော ဒီလှး ကာဆဝ် ကူပ် အေတ့် ဂေ အိုမ်။

14 န့ ပီ မိူင် မာရာန ဟဲ့ ကာပြာန့် ကာဆဝ် ဂေ။ အန် ဒီ ဘော အာင် တာင် မူတ့် အန်၊ တဲး အန် ပွိုန် ဒီ မဲင် ဘ့လွိုပ် ဂေ ဘောကာဂ့လျီတ်။ ဘော ဂေ အီ မိုဝ်း ဆာရေ ဘော ဂေ ဒူအီ ရဝ် ဒူအီ ကာင် ဂေ အီ ဘူင် ဘ့လွယ် အီ ဆီနန် ဆီနိူင် တွိုန်၊ ဂေ ဒီ လိုပ် လူင် တူတ့်။

15 ဒူအီ ဒွန် အီ ဒီ စုဝ်း တျီမ်။ ဂေ ဒူအီ အီ ပီခိုက် မိူဝ်၊ ဂေ ဒီ ဝီ လုဝ် ဂူမ် လုဝ် ယူမ်။

16 မာလဲ၊ န့ မုး ဇဝ်ဖြာ အီ အိုပ် တူတ့် ဒွန် မျုဝ်။ ဂေ ဒီ အိူပ် မျုက် အန် ဇဝ် ကူပ် ပီ ဆုင်ဖျာတ် အန် ဟဲ့ ဒူပ် နာ မုး နာ မှာန်။ အန် ဇဝ် ဒီ ဘော ဘျ ခဲ့ ဆီငါ ဘွတ် အန် ကူပ် ဘူင် အန် နာ ဆိူဝ် နာ မှာန် ဒီ အီ။

17 ဒေါ အန် တီ မာဘူ ဒီ ဘော ဟူမ် ပေတ့် ဂေ ပြဲ ခဲင် မိူင် အီ ဟဲ့ လိုဝ် ဟဲ့ ကာပျာတ့် တီ။ ဘော ဂွန် မာဘူ ဒီ ဘော ဟြေတ့် ဒီ ဟူမ် ပေတ့် ဒီ အူင့် ကာင် ရာမ် အီ ဟဲ့ ဒွိုမ် မုး ကာင် ဒူအီ ခြမ်။

18 ဂေ ဒူအီ အီ ဘူင် မှာပ် ဆေဆေ၊ ဂေ ပီ ဒူအီ အီ ဒိူတ် လက်လဝ်။ ဝန် မဲင် ပီ စှိုပ် ဂေ တီ၊ န့ ပီ အီ တူ မှာန် အီ တူ မွှိုမ် ပီ ဘူင် ဂေ ဆေဆေ။ ဂေ ဒူအီ ဇိုဝ် တီ၊ ဂေ ဒီ ဇမ် ဒုက် တာင်။

19 ဘော ဂေ ဒူအီ အီ တူ ညှိုမ် ဂြုဝ်း ဇဝ်ဖြာ၊ ဂေ ဒီ ဘော တဝ်း၊ “တဲး ဇဝ်ဖြာ ဘူင် ဟဲ ဟဲ၊ ဘူင် ခြန် ခြန် ပီ တဝ်း အန် ဒီ ဘူင်၊ တဲး ယေ ယိုဝ်။ တဲး န့ တး ခဲ့ ပီ ခြာမ် အန် ဒီ ဘူင်။ အန် ဇဝ် အီ ဘွတ် ကာဆဝ်၊ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ၊ တဲး အန် ဘူင် ခဲ့ ပီ ဆီ ဘူင် အန်၊ တဲး ယေ ယိုဝ်၊ တဲး ယေ နပ်။”

20 မင် အီ ဟဲ့ နပ် လွင် ပီ ဘူင် အီ ဟဝ်၊ န့ တူ မွှိုမ်။ ဂေ ယီ တဝ်း၊ န့ မွှိုမ်။ ဘော၊ ဆေ န့ မိုဝ်း အီ မွှိုမ်၊ ဂေ နပ် တဝ်း၊ န့ တူ မွှိုမ်။ ဘော ဒူအီ ဇိုဝ် တီ ဒီ ဇမ် ဒုက် တာင်။ ဂေ မိူဝ် နပ် တဝ်း၊ အီ အပ် ဝွင့် ဟဲ့ ဘ့လာင်။ ဘော အီ ဘ့လာင် ဟဲ့ အပ် ဝွင့်။ ဂေ ဘော ဒိုဝ်း အီ ဆွင့် ဝီ ကာဒါင် အီ ငါမ်။ ဂေ ဘော ဒိုဝ်း အီ ငါမ် ဝီ ကာဒါင် အီ ဆွင့်။ ဂေ ဒူအီ ဇိုဝ် တီ၊ ဂေ ဒီ ဇမ် ဒုက် တာင်။

21 ဘော မင် အီ ဂေ ထာင် ဂေ မိုဝ်း အာငျာန်။ ဂေ ဘော ထာင် ဂေ ဟဲ့ လွှက့် လှဲမ်။ ဘော ဂေ ဒီ ဇမ် ဒုက် တာင်။

22 မင် အီ ဘော မုး အာပဝ်း ကတ်။ ဂေ ဘော နပ် ဆီချာ ဒီ ဒိုဝ်း ပဝ်း၊ ကာဝ်ု ကာဆူ ဆီနမ်။

23 ဆေ န့ မုး ဒူအီ အီ ဟဲ့ ဘူင် မှာပ်၊ ဂေ ဒါ တာင် ယီ တူ ဒမ် မှာပ် ဒီ အန် ကူပ် ဟဲ့ ဒိုဝ်း ဂေ ဒီ ဟူမ် ခေါဆွင် ပီ ဒွါ အန်၊ ဆေ ဂေ ဘော ဝး ဒါရာ အီ မုး အီ မှာန်၊ ဝီ ဒမ် မှာပ် ဒီ ဒူအီ အီ တူ မိုဝ်း မှာပ်၊ ဘော ဂေ ဒူအီ ဇိုဝ် တီ၊ ဂေ ဒီ ဇမ် ဒုက် တာင်။

24 ဂေ ဒီ စှိုမ် ပီ ဟေ အီ မိုဝ်း ရျီး ကာဟဝ်း။ ဂေ စှိုမ် ဘော ပီ ဘုဝ်း ကာဟဝ်း ပီ ဘုတ် ခုန်။ ဒုက် ပီ လုဝ် ခမ် ဂေ၊ န့ ဘော ပီ ငဝ် အီ ဟူမ် ဟျြီင် ကာဟဝ်း ဘော ကာဆိုမ် ပြဲ ကာဟဝ်း။ ခုဝ်၊ ဂေ ဟဲ့ ဝဲန် ဇဝ်ဖြာ အီ အိုပ် တူတ့် ဒွန် မျုဝ်၊ အီ မုး ဇဝ်ဖြာ အီ ဆီငါ ဘွတ် ပီ ကြိုပ် ဂေ ဒူအီ အီဆာရေလ။

25 ခုဝ် အန် တီ ဇဝ်ဖြာ ဟဲ့ ရူ ကာဆဝ် ဒီ ဂေ ဒူအီ ပီ အိုပ် အန်။ န့ ဘော ပီ အန် ဟဲ့ ဆူင့် ဒဲ အန် ဘော မး ယမ် ဂေ။ န့ ဒီ ဘော တဲး နွန် ဒီယုး ဒီယေန့်။ ဒုဝ် ယမ် ဂေ ဒီ ဘော ပီ ကာအး အီ ဘုင်ဘြတ် ဒူပ် န့တေန့်။ ပီ ဘော ဟဲ့ ပါယ် တီ မိူဝ်၊ နဝ်း ရူ ဇဝ်ဖြာ ယီ တူ ဟြာယ်။ န့ ပီ အန် ဇဝ် ယီ ဆီ ဆူင့် ဒဲ အန်၊ တဲး အန် ဝီ မး ဂေ ပေါ န့ ပွါ။

26 အန် ဇဝ် ဒီ ဘော ဒဲ့ ဒူအီ အာမျုဝ် ဟဝ် အီ ကွယ် တူင့်။ န့ ပီ အန် ဆမ် ရွင့် အာလာမ် ပီ ပွိုန် ယိုဝ် ဂေ နာ ကာတူင့်။ အန် ဇဝ် ဒီ ဘော ကာဟူတ့် တဲး န့ ဒဲ့ ဂေ တး ဒူင် ဆိူတ် ကာဒါယ်။ ဂေ မိူဝ် ဒီ ဘော တး ခြန် ခြန်။

27 ဒူအီ ဂေ တီ ဂေ ယီ တူ ဒီလှး တူ နုန်။ အာဝ် မိုဝ်း အီ ကာစွာ အီ ကေး ခေါ အူ ဝီ။ ဘော အီ ဘဲန် ဆီ အိတ် ဘော အီ အိတ် ကော ပိဝ် ဒုဝ် မိူဝ် အာဝ် မိုဝ်း။ ဆဲ့ ဂေ အီ လုတ် ဘော ဝန် ခ့လဲပ် အီ ကာဒတ် မိူဝ် အာဝ် မိုဝ်း။

28 ဘ့လာ ဂေ မိူဝ် ဘတ့်။ အ ဂေ မိူဝ် ဟဲ့ ဟွတ့် ဝိတ့်။ ဂိပ် မင်ပြွင့် ဂေ မိူဝ် ပ့လူမ် ပီ မာဝ် ဆာဝ်။ ကာလေန့် လက်လဝ် ဂေ မိူဝ် နပ် ဒီ ဟာဝ် ဟဲ ဟဲ ပီ ခုန် လာင်။

29 ဂြုဝ်း ပီ ဒတ် ဂေ ဒါ ဆိုက်၊ န့ ဘော ပီ ဟမ် ရျီင် မာခြင်ဆီ ဘော ဟမ် ရျီင် ဂွန် မာခြင်ဆီ။ ဒေါ ဟဲ့ ဟွတ့် ကဝ့် ယမ် မာခြင်ဆီ ဒုဝ် ဆတ်၊ ဒေါ ဝီ ကာပ် ဟာဝ် အန်၊ အန် ရျီင် ပါယ် တီ ကွဲ့ တဲး န့ မိုဝ်း အီ ယ တး ဖာတ် ဒိုဝ်း ဒီ အန်။

30 ဒေါ အန် တီ ဂေ ဒီ ဘော ဆီနန် ဆီနိူင် ဒေါ ကာဂုဝ်း ဂေ ဒီ ဒူအီ အီဆာရေလ။ န့ ဘော ပီ ဟမ် ဒီငိုန့် အိုမ် နမ်မုက်ဆာရာ။ ဆေ အီ ယွတ် ခဲင် မိူင် တီ ဟဲ့ မိုဝ်း မီ အီ ဒုက် အီ အပ် ဝွင့် ဒီလူယ်။ န့အု ဘော ဝီ ကာဒး ခဲ့ ကွယ် ဘ့လာင်။ လွင် အန် တီ အာအီဆာယ ဟဲ့ ကာလာင် ဒီ ဂေ ဒူအီ ခဲင် မိူင် ယူဒါ ဘော မိူင် ယေရူဆာလဲမ်။